Harmaguédon—Enn nouveau commencement

MOT “Harmaguédon” sorti dan l’expression hébreu “Har–Maguédôn,” ki vedir “Montagne Meguiddo.” Nou trouve sa mot-la dan Révélation 16:16, ki dire: “Zot finn rassemblé bannla dan enn place ki, en hébreu, appel Har–Maguédôn.” Kisannla ki finn rassemblé a Harmaguédon, ek kifer? Zis deux verset avant, dan Révélation 16:14, nou lire ki pé rassemblé “bann lé-roi lor la terre entier . . . pou la guerre grand jour Bondié Tout-Puissant.” Li normal ki sa souleve encore bann lezot question bien interessant. Sa ‘bann lé-roi-la,’ kot-sa zot laguerre? Pou ki raison zot laguerre, ek avek kisannla zot laguerre? Eski zot pou servi bann zarme ki kapav cause grand-grand destruction, couma beaucoup pensé? Eski ena dimoune ki pou sapé? Laisse la Bible reponn sa bann question-la.

Le fait ki faire mention “Montagne Meguiddo,” eski sa vedir ki la guerre Harmaguédon pou arrivé dan enn l’endroit particulier dan Proche-Orient? Non. Premierement, pena okenn montagne coumsa ki existé vrai-mem—dan l’endroit kot ti ena ancien Meguiddo, ena zis enn ti hauteur apepré 20 metre. En plus, l’endroit autour Meguiddo pa assez grand pou mette tou “bann lé-roi ki dirige la terre ek zot bann l’armée.” (Révélation 19:19) Mais, Meguiddo ti l’endroit kot finn ena bann pli grand la-guerre terrible dan l’histoire Proche-Orient. Alors, sa nom Harmaguédon-la inn vinn symbol enn grand la-guerre, kot ena enn sel gagnant.—Guette l’encadré “Meguiddo—Enn symbol approprié,” lor page 5.

Harmaguédon pa kapav zis enn la-guerre entre bann lé-roi ki dirige la terre, parski Révélation 16:14 dire ki “bann lé-roi lor la terre entier” joinde ensam couma enn sel dan “la guerre grand jour Bondié Tout-Puissant.” Dan so prophetie inspiré par Bondié, Jérémie ti dire ki “bann dimoune ki Jéhovah pou touyé” pou fané partout “depuis enn boute la terre ziska lot boute.” (Jérémie 25:33) Alors Harmaguédon pa enn la-guerre entre bann dimoune, ki deroulé dan enn l’endroit special dan Proche-Orient. C’est la guerre Jéhovah, ek li enn la-guerre universel.

Mais, remarké ki, dan Révélation 16:16, appel Harmaguédon enn “place.” Dan la Bible enn “place” kapav vedir enn condition ou-soit enn situation—dan sa cas-la, c’est situation le monde entier, ki pou joinde ensam pou oppose kont Jéhovah. (Révélation 12:6, 14) Kan Harmaguédon arrivé, tou bann nation lor la terre pou marié piké ensam kont “bann l’armée ki ti dan le ciel” ki dirigé par Jésus, “le Roi tou bann lé-roi ek Seigneur tou bann seigneur.”—Révélation 19:14, 16.

Eski Harmaguédon pou enn grand destruction kot pou servi bann zarme ki bien puissant, ou-soit eski li pou enn collision entre la terre ek enn kitsoz ki sorti dan l’espace? Eski enn Bondié ki ena l’amour pou laisse bann dimoune, ek la terre, l’endroit kot zot resté, detruire dan enn fason aussi terrible ki sa? Non. Bondié finn bien dire ki Li pa finn crée la terre “pou nanyin” mais Li “finn forme li pou ki dimoune reste lor la.” (Isaïe 45:18; Psaume 96:10) Kan Harmaguédon arrivé, Jéhovah pa pou detruire la terre dan enn grand catastrophe. Plutot, li pou “detruire bann ki pé detruire la terre.”—Révélation 11:18.

Harmaguédon—Kan?

Depuis bien longtemps ena enn question ki finn faire bann dimoune gagne tou sorte qualité l’idée: kan Harmaguédon pou arrivé? Si nou examine seki livre Révélation dire par rapport ar seki lezot livre la Bible dire, sa kapav aide nou pou koné kan sa la-guerre-la pou arrivé. Révélation 16:15 etabli enn rapport entre Harmaguédon ek lepok kot Jésus vini couma enn voleur. Jésus ti aussi servi sa l’exemple-la kan li ti koz lor lepok kot li pou vini pou amenn jugement lor sa lé-monde-la.—Matthieu 24:43, 44; 1 Thessaloniciens 5:2.

Bann prophetie la Bible ki’nn realisé, montré ki depuis 1914 nou pé vive dan bann dernier jour sa system-la.a Sa bann dernier jour-la pou termine par enn period ki Jésus ti appel “grande tribulation.” La Bible pa dire comié lé-temps sa period-la pou duré, mais bann malheur ki li pou amené pou pli pire ki tou seki le monde inn koné avant. Sa grand tribulation-la pou termine avek Harmaguédon.—Matthieu 24:21, 29.

Parski Harmaguédon li “la guerre grand jour Bondié Tout-Puissant,” pena nanyin ki bann dimoune kapav faire pou renvoye sa pou plitar. Jéhovah inn etabli enn ‘lé-temps fixé’ kan sa la-guerre-la pou commencé. “Li pa pou en retard.”—Habaqouq 2:3.

Enn Bondié ki juste faire enn la-guerre ki juste

Mais, kifer Bondié pou faire enn la-guerre universel? Harmaguédon, li ena enn rapport avek enn parmi so bann pli grand qualité: la justice. La Bible dire: “Jéhovah content la justice.” (Psaume 37:28) Li finn trouve tou bann l’injustice ki bann dimoune inn commette depuis ki zot existé. Li normal ki sa faire Li ressenti enn la-colere ki juste. A cause sa, li finn etabli so Garson pou faire enn la-guerre juste pou detruire tou sa system mauvais-la.

Zis Jéhovah ki kapav faire enn la-guerre ki vrai-mem juste ek ki pou detruire zis bann ki merite destruction ek sauve bann dimoune droite, n’importe kot-sa zot été lor la terre. (Matthieu 24:40, 41; Révélation 7:9, 10, 13, 14) Ek c’est zis Li tousel ki kapav impose so droit pou dirige la terre entier, parski sa, li so creation.—Révélation 4:11.

Ki qualité zarme Jéhovah pou servi kont so bann l’ennemi? Sa nou pa koné. Seki nou koné, seki Li ena moyen pou detruire bann nation net. (Job 38:22, 23; Tsephania 1:15-18) Mais, bann serviteur Jéhovah ki lor la terre pa pou participe dan sa la-guerre-la. Vision ki ena dan Révélation chapitre 19 montré ki zis bann l’armée dan le ciel ki pou prend part ensam avek Jésus. Parmi bann chrétien ki servi Jéhovah lor la terre, personne pa pou participe dan sa la-guerre-la.—2 Chroniques 20:15, 17.

Enn Bondié ki ena la sagesse donne l’avertissement plusieurs fois

Eski pou ena dimoune ki pou sapé? Avredir, personne pa obligé mort kan Harmaguédon arrivé. L’apotre Pierre ti dire: “Jéhovah . . . pa envie ki personne detruire mais Li envie ki tou dimoune repenti.” (2 Pierre 3:9) Ek l’apotre Paul ti dire ki Bondié “envie ki tou sorte qualité dimoune sauvé ek gagne enn connaissance exact lor la verité.”—1 Timothée 2:4.

A cause sa, avek sagesse, Jéhovah inn faire sur ki “bon nouvel lor royaume” preché partout lor la terre entier, dan bann centaine langue. Partout dimoune pé gagne l’occasion pou sapé ek gagne la vie. (Matthieu 24:14; Psaume 37:34; Philippiens 2:12) Bann ki ecoute la bonne nouvelle kapav traverse Harmaguédon ek vive pou touletan dan la perfection lor la terre, ki pou vinn enn paradi. (Ézékiel 18:23, 32; Tsephania 2:3; Romains 10:13) Pa sa-mem ki nou attann avek enn Bondié ki la Bible dire, Li l’amour?—1 Jean 4:8.

Eski enn Bondié ki ena l’amour kapav laguerre?

Mais, beaucoup dimoune demann zot-mem, kifer enn Bondié ki ena l’amour pou touye sa quantité dimoune-la. Nou kapav compare sa situation-la avek l’etat enn lakaz ki infesté avek bann lé-rat. Eski ou pa d’accord ki enn bon proprietaire bizin detruire net sa bann lé-rat-la pou protege la santé ek bien-etre so famille?

Li pareil: c’est parski Jéhovah ena enn grand l’affection pou bann dimoune, ki Li bizin faire la guerre Harmaguédon. Jéhovah envie faire la terre vinn enn paradi ek faire bann dimoune vinn parfait ek vive dan la paix, sans “personne ki faire zot tremblé.” (Mika 4:3, 4; Révélation 21:4) Mais, ki pou arrivé avek bann ki menace la paix ek la securité bann lezot dimoune? Pou bien-etre bann dimoune juste Bondié bizin elimine sa bann “la-peste-la”—bann mauvais ki pa pou changé jamais.—2 Thessaloniciens 1:8, 9; Révélation 21:8.

Si zordi ena la guerre ek tou sa di-sang versé-la, souvent c’est a cause fason dirigé imparfait bann dimoune, ek bann pays ki pense zis zot prop l’interet ek lutté pou sa. (Ecclésiaste 8:9) Bann gouvernement humain pé tellement rod ena plus pouvoir, ki zot pa prend okenn compte Royaume Bondié, ki finn etabli. Nanyin pa faire nou pensé ki zot pou remette zot pouvoir dan la main Bondié ek Christ. (Psaume 2:1-9) Alors bizin tire sa bann gouvernement-la pou laisse gouvernement Jéhovah, kot Jésus le roi, dirige la terre avek la justice. (Daniel 2:44) Bizin ena la guerre Harmaguédon pou kapav trouve solution enn fois pou tou a sa question concernant kisannla ena droit dirige la terre ek bann dimoune ki lor la.

C’est dan l’interet bann dimoune ki Jéhovah pou amenn Harmaguédon. Alors ki bann condition dan le monde pé vinn pli pire, zis gouvernement parfait Bondié pou faire bann dimoune gagne vrai-mem tou seki zot bizin. Pou kapav ena vrai la-paix ek prosperité zis par moyen so Royaume. Couma le monde pou été si Bondié pa faire nanyin? Eski la haine, la violence, ek la guerre pa pou contigne faire bann dimoune souffert, couma sa finn été pendant tou sa lé-temps ki dimoune inn dirige la terre-la? Avredir, la guerre Harmaguédon, li enn parmi bann pli bon kitsoz ki kapav arrive nou!—Luc 18:7, 8; 2 Pierre 3:13.

La guerre ki pou arrete tou bann la-guerre

Harmaguédon pou faire enn kitsoz ki okenn lot la-guerre pa finn jamais faire—arrete tou bann la-guerre. Kisannla ki pa envie trouve sa jour kot la guerre nepli pou existé? Pourtant, tou bann zeffort ki bann dimoune inn faire pou arrete la guerre pa finn reussi. Au contraire sa montré bien ki sa bann parole Jérémie-la vrai: “Mo konn bien, ô Jéhovah, ki enn dimoune pa finn crée pou decidé ki chemin li pou prend. Enn dimoune ki pé marché, pa finn crée pou dirige so pas.” (Jérémie 10:23) Concernant seki Jéhovah pou faire, la Bible promette: “Li faire bann la-guerre arreté ziska dan boute la terre. L’arc-la, Li casse li, lance-la aussi Li casse li boute-boute; Li brule bann char la guerre dan difé.”—Psaume 46:8, 9.

Kan bann nation pou servi zot bann zarme dangereux pou touye zot camarade ek ki sa pou menace nou l’environnement, Createur la terre pou agir—Li pou amenn sa Harmaguédon ki la Bible mentionné-la! (Révélation 11:18) Alors, sa la-guerre-la pou accompli seki bann dimoune ki ena la crainte pou Bondié finn attann pendant tou sa lé-temps-la. Li pou justifié droit ki Proprietaire la terre, Jéhovah, ena pou dirige tou so creation.

Alors, bann ki content la justice, pa bizin peur Harmaguédon. Plutot, sa donne nou enn raison pou ena l’espoir. La guerre Harmaguédon pou tire tou corruption ek mechanceté ki ena lor la terre, ek li pou ouvert chemin pou enn nouveau system kot pou ena la justice ek ki pou dirigé par Royaume Bondié. (Isaïe 11:4, 5) Harmaguédon pa pou ditou enn la-fin du monde ki faire peur, mais li pou mark enn nouveau commencement pou bann dimoune juste ki pou reste pou touletan lor enn la-terre ki pou vinn enn paradi.—Psaume 37:29.

[Note]

[L’encadré lor page 5]

MEGUIDDO—ENN SYMBOL APPROPRIÉ

Ancien la ville Meguiddo ti situé dan enn place bien important. Li ti trouve lor coté ouest vallée Yizréel ki ti bien fertile, dan le nord Israël. Parski li ti situé dan enn la-croisée, li ti control bann la-route militaire ek commercial. Alors, Meguiddo ti vinn enn place kot ti ena bann la-guerre bien important. Dan so livre Cities of the Biblical World—Megiddo, professeur Graham Davies ecrire: “Li ti facile pou bann commercant ek bann immigrant ki sorti partout pou rente dan la ville Meguiddo, mais en mem temps, kan li ti ena assez pouvoir, Meguiddo ti kapav control kisannla ti gagne droit rentré ek sorti par sa bann chemin-la, ek dan sa fason-la li ti kapav control developpement commerce ek deroulement la guerre, toulé-deux. Alors li pa etonnant ki . . . beaucoup finn laguerre pou gagne sa la-ville-la ek kan zot ti reussi gagne li, zot ti defann li bien.”

L’histoire Meguiddo inn commencé bien longtemps, dan deuxieme millenaire a.n.l. kan le roi égyptien Thoutmosis III ti remporte la victoire lor bann lé-roi cananéen. L’histoire sa la-ville-la ti contigné ziska en 1918, kan General Edmund Allenby ti remporte enn grand la-victoire lor l’armée turque. C’est dan Meguiddo ki Bondié ti donne juge Baraq enn grand la-victoire lor l’armée le roi cananéen Yabîn. (Juges 4:12-24; 5:19, 20) Guidéôn ti batte bann Madianite dan sa region-la. (Juges 7:1-22) C’est aussi là ki le roi Ahazia ek Yoshiya ti trouve la mort.—2 Rois 9:27; 23:29, 30.

Alors li approprié ki associé Harmaguédon ar sa l’endroit-la, parski finn ena beaucoup la-guerre bien important là. Li enn symbol approprié pou victoire complet ki Bondié pou remporté lor tou so bann l’ennemi.

[Remerciement phoro]

Pictorial Archive (Near Eastern History) Est.

[Zimage, page 7]

Dan le monde entier, bann dimoune pé gagne enn l’avertissement ek l’occasion pou sapé kan Harmaguédon arrivé

[Zimage, page 7]

Harmaguédon pou mark enn nouveau commencement