Har-maguédôn—La guerre Bondié ki pou faire tou la-guerre fini

“Pou zot li cruel pou touye enn lot dimoune; alors pou zot, la guerre c’est enn kitsoz horrible ki zot pa arrivé comprend, ek dan zot langue pena okenn mot pou sa.”—DESCRIPTION KI FRIDTJOF NANSEN, ENN EXPLORATEUR NORVÉGIEN, TI FAIRE EN 1888 LOR BANN ESQUIMAU KI TI RESTE GROENLAND.

KISANNLA pa ti pou content reste dan enn societé kot la guerre c’est enn kitsoz ‘horrible ki personne pa arrivé comprend.’ Kisannla pa envie enn lé-monde kot mem mot “la guerre” pa existé parski bann dimoune pa koné ki été sa? Enn lé-monde coumsa kapav parette enn rêve surtout si nou compte lor bann dimoune pou faire sa arrivé.

Mais dan prophetie ki Li’nn inspire Isaïe pou ecrire, Bondié Li-mem inn promette ki Li pou etabli enn lé-monde coumsa: “Zot pou bizin forge zot bann l’epée ek faire sa vinn bann zouti pou travail la terre, ek zot pou faire zot bann lance vinn bann cisaille. Enn nation pa pou leve l’epée kont enn lot nation, ek zot nepli pou aprann laguerre.”—Isaïe 2:4.

Li clair ki sa lé-monde zordi-la avek so 20 million soldat ki en service ek apepré 20 la-guerre ki en cours, pou bizin changé net pou ki sa promesse-la realisé. Li pa etonnant ki Jéhovah, Bondié Tout-Puissant pou bizin rente dan bann zaffaire ki pé deroulé lor la terre. C’est sa-mem ki pou terminé par seki la Bible appel Har-Maguédôn.—Révélation 16:14, 16.

Dan sa bann dernier l’année-la, bann dimoune inn servi mot “Armageddon” pou koz lor enn la-guerre nucleaire mondial. Mais enn dictionnaire explik premier signification sa mot-la coumsa: “L’endroit kot pou ena enn grand la guerre final entre bann la-force le bien ek le mal.” Eski le bien pou gagne la victoire lor le mal enn jour, ou-soit eski sa la-guerre-la, li zis enn la-guerre ki nou croire pou arrivé?

Nou kapav prend courage kan nou remarké ki plusieurs fois la Bible koz lor la fin tou seki mauvais. Enn ecrivain psaume ti annoncé: “Bann ki faire peché pou disparette lor la terre; ek bann mauvais zot, zot nepli pou existé.” (Psaume 104:35) Livre Proverbes dire: “Bann dimoune droite pou reste lor la terre, ek bann dimoune ki pena okenn reproche pou faire zot, zot ki pou resté. Mais bann mauvais dimoune zot, pou tire zot depuis lor sa la-terre-la; bann traitre zot, pou arrache zot depuis lor la.”—Proverbes 2:21, 22.

La Bible dire aussi bien clair ki bann mauvais dimoune pa pou largue zot pouvoir sans ki zot laguerre; alors Bondié pou bizin faire kitsoz pou fini enn fois pou tou avek seki mauvais, parmi ena aussi resultat ki la guerre inn amené. (Psaume 2:2) La Bible appel sa la-guerre exceptionnel-la Har-Maguédôn ek sa nom-la ena enn grand signification.

Bann la-guerre ki ti ena pré kot Meguiddo dan le passé

Har-Maguédôn vedir “Montagne Meguiddo.” Ancien la-ville Meguiddo ensam avek la plaine Yizréel ki pré ar li, li enn l’endroit kot, pendant longtemps, finn ena bann la-guerre ki finn mark l’histoire. Dan so livre Les batailles d’Har-Maguédôn (en anglais) historien Eric H. Cline ecrire: “Toute longue l’Histoire, dan Meguiddo ek vallée Yizréel finn ena bann grand la-guerre ki finn mark l’histoire bann nation.”

Pareil couma sa ecrivain-la dire, bann la-guerre ki ti ena pré kot Meguiddo ti bann la-guerre ki ti ena bann resultat bien important. Bann l’armée mongol ki ti reussi rente dan enn bon partie l’Asie dan 13^eme siecle, ti gagne zot premier defaite dan sa vallée-la. Pa trop loin ar Meguiddo, bann soldat anglais ki ti dirigé par general Allenby ti gagne la victoire lor bann Turc pendant Premier Guerre mondial. Enn specialiste dan l’histoire militaire ti dire ki sa victoire-la ti “enn parmi bann pli rapide ek bann pli complet dan tou bann bataille ki finn ena dan l’Histoire.”

La Bible raconte aussi bann la-guerre ki finn ena pré ar Meguiddo. C’est dan sa l’endroit-la ki juge Baraq ti batte bann l’armée cananéen ki ti dirigé par Sisera. (Juges 4:14-16; 5:19-21) Avek enn ti groupe 300 zom, Guidéôn ti gagne la victoire lor enn grand l’armée madianite pa loin avek Meguiddo. (Juges 7:19-22) Le roi Saül ek so garson Yonathân ti mort dan la guerre ki bann Philistin ti gagné kont bann Israélite lor Montagne Guilboa ki pa loin.—1 Samuel 31:1-7.

Meguiddo ek sa vallée ki pré ar li-la, situé dan enn place ki donne bann l’armée enn grand l’avantage. A cause sa-mem ki dan sa bann dernier 4,000 an-la, finn ena beaucoup la-guerre ki finn deroulé là. Enn historien finn compte au moins 34 la-guerre!

Signification symbolik mot “Har-Maguédôn” ena surement enn rapport avek zistoire Meguiddo ek so position important. Mem si sa nom-la parette zis enn fois dan la Bible, sa contexte kot mentionne li dan livre Révélation-la montré bien clair ki Har-Maguédôn pou ena enn l’influence lor la vie tou dimoune lor la terre.

Har-Maguédôn dapré la Bible

Mem si dan le passé finn ena beaucoup la-guerre important ki finn deroulé pré kot Meguiddo, okenn ladan pa finn faire la mechanceté disparette. Okenn pa finn oppose bann la-force le bien ek le mal, dan so vrai sens. Li logik ki c’est Bondié ki pou faire sa qualité la-guerre-la. Pareil couma Jésus inn dire enn jour, “pena personne ki bon a part enn sel, Bondié.” (Luc 18:19) En plus, la Bible appel Har-Maguédôn, la guerre Bondié.

Dan la Bible, livre Révélation dire ki “bann lé-roi lor la terre entier” pou rassemblé ensam “pou la guerre grand jour Bondié, Tout-Puissant.” (Révélation 16:14) Sa recit prophetik-la dire apré: “Ek zot finn rassemblé bannla dan enn place ki, en hébreu, appel Har-Maguédôn.a” (Révélation 16:16) Plitar, livre Révélation expliké ki “bann lé-roi ki dirige la terre ek zot bann l’armée” pou “rassemblé ensam pou faire la guerre avek sa kikenn ki assizé lor cheval-la ek avek so l’armée.” (Révélation 19:19) Sa cavalier-la, c’est Jésus Christ li-mem.—1 Timothée 6:14, 15; Révélation 19:11, 12, 16.

Ki conclusion nou arrivé kan nou lire sa bann verset-la? Ki Har-Maguédôn li enn la-guerre entre Bondié ek bann dimoune ki desobeir Li. Kifer Jéhovah ek so Garson Jésus Christ pou faire enn la-guerre coumsa? D’abord Har-Maguédôn pou “detruire bann ki pé detruire la terre.” (Révélation 11:18) En plus, Har-Maguédôn pou amenn enn lé-monde kot pou ena la paix, “enn nouveau la-terre” ki “nou pé attann, couma Li’nn [Bondié] promette,” ek “kot pou ena la justice.”—2 Pierre 3:13.

Kifer Har-Maguédôn bizin vini?

Eski li difficile pou pensé ki Jéhovah, enn “Bondié l’amour,” kapav choisir so Garson ki “prince la paix,” pou al laguerre? (2 Corinthiens 13:11; Isaïe 9:6) Sa pou surement pli clair pou ou si ou comprend seki pousse zot pou agir coumsa. Livre Psaume presente Jésus couma enn kikenn ki pé al laguerre. Kifer li laguerre? Ecrivain psaume expliké ki Christ avancé “pou defann la verité, l’humilité ek la justice.” Li laguerre parski li content la justice ek li ena la haine pou seki mauvais.—Psaume 45:4, 7.

La Bible raconte aussi couma Jéhovah reagir kan Li trouve l’injustice ki ena dan le monde zordi. Prophete Isaïe ecrire: “SEIGNEUR inn trouve tousala. Li’nn trouvé ki si pena la justice, sa li enn mauvais kitsoz. Li’nn mette la justice lor Li couma enn linge pou al laguerre ek lor so la-tête, Li’nn pose casque delivrance. Li’nn mette linge vengeance lor Li. Sa linge ki enveloppe Li-la, c’est sa grand desir ki Li ena pou laguerre-la.”—Isaïe 59:15, 17, Parole de Vie.

Tant ki bann mauvais dimoune ena pouvoir, bann bon dimoune pa pou konn la paix ek securité. (Proverbes 29:2; Ecclésiaste 8:9) Nou bizin realiste—si ena corruption ek mechanceté, c’est parski ena bann dimoune ki pratik sa bann kitsoz-la. Alors bizin paye enn prix pou ki ena la paix ek la justice: detruire bann mauvais dimoune. Salomon ti ecrire: “Bann mauvais dimoune zot enn ranson pou bann bon dimoune.”—Proverbes 21:18.

Parski Bondié Li nou Juge, nou kapav sur ki dan tou situation so bann jugement kont bann mauvais dimoune pou juste. Abraham ti demandé: “Eski sa Juge lor la terre entier-la pa pou faire seki droite?” Ki reponse li ti gagné? Jéhovah touletan faire seki droite! (Genèse 18:25) En plus, la Bible donne nou l’assurance ki sa pa faire Jéhovah plaisir pou detruire bann mauvais dimoune; Li faire sa kan pena okenn lot solution.—Ézékiel 18:32; 2 Pierre 3:9.

Reconette ki Har-Maguédôn li enn vrai la-guerre

Dan ki coté nou pou été dan sa la-guerre important-la? La plupart parmi nou pensé automatiquement ki nou dan coté bann la-force le bien. Mais couma nou kapav sur dan ki coté nou été? Prophete Tsephania donne nou sa conseil-la: “Rod la justice, rod l’humilité.” (Tsephania 2:3) L’apotre Paul dire ki Bondié envie ki “tou sorte qualité dimoune sauvé ek gagne enn connaissance exact lor la verité.”—1 Timothée 2:4.

Enn premier pas ki pou amenn nou vers delivrance c’est ki nou bizin aprann la verité lor Jéhovah ek lor projet ki Li ena pou tire mechanceté lor la terre. Enn deuxieme pas c’est ki nou bizin pratik la justice, ek sa pou faire nou gagne faveur ek protection Bondié.

Si nou faire sa bann pas important-la, avek confiance nou pou kapav attann Har-Maguédôn, enn la-guerre ki pou vrai-mem faire tou sa bann la-guerre ki bann dimoune pé faire-la, fini. Apré la guerre Har-Maguédôn, pou bann dimoune partout lor la terre, la guerre pou enn kitsoz horrible ki zot pa pou arrivé comprend. “Zot nepli pou aprann la guerre.”—Isaïe 2:4.

[Note]

[L’encadré lor page 3]

Har-Maguédôn, c’est kan Bondié pou rentre dan bann zaffaire humain

[Zimage lor page 4]

Meguiddo

[Zimage lor page 4]

Guidéôn ek so bann zom ti gagne enn la-guerre important pré kot Meguiddo

[Zimage lor page 4, 5]

Apré la guerre Har-Maguédôn, pou bann dimoune partout lor la terre, la guerre pou enn kitsoz horrible ki personne pa pou arrivé comprend

[Zimage lor page 6]

Enn premier pas ki pou amenn nou vers delivrance c’est ki nou aprann la verité lor Jéhovah ek lor so projet