Inn arrive l’heure pou decidé ek pou agir
“Ziska kan zot pou hesité entre deux l’opinion different?”—1 ROIS 18:21.
1. Kifer nou lepok li different ar bann lezot lepok dan le passé?
ESKI ou croire ki Jéhovah Li-mem vrai Bondié? Eski ou croire aussi ki bann prophetie la Bible pé montré ki nou pé vive “dan dernier jour” sa mauvais lé-monde Satan-la? (2 Timothée 3:1) Si oui, surement ou pou d’accord pou dire ki zordi, plus ki tou lezot lepok, finn arrive l’heure pou decidé ek pou agir. C’est premier fois dan l’histoire ki sa quantité la-vie-la en danger coumsa.
2. Couma la situation ti été dan royaume dix tribu Israël, pendant règne Ahab?
2 Dan dixieme siecle avant nou lepok, nation Israël ti bizin prend enn decision bien serieux: kisannla zot pou servi? Le roi Ahab ti laisse-li influencé par so femme païen, Jézabel, ek li ti favorise l’adoration Baal partout dan royaume dix tribu Israël. Bann dimoune ti prié Baal pou gagne zenfant, pou faire zot zanimo reproduire, ek zot ti pensé ki li ti kapav faire la pluie tombé ek faire zot gagne bann bon recolte. Kitfois, beaucoup adorateur Baal ti a genou devant so statue, ou-soit zot ti embrasse zot la-main pou li. Pou ki Baal beni zot recolte ek zot troupeau, zot ti gagne relation sexuel avek bann prostitué ki ti servi dan so temple. Zot ti ena aussi enn coutume pou coupe-coupe zot-mem pou ki zot di-sang coulé.—1 Rois 18:28.
3. Ki l’adoration Baal ti pousse peuple Bondié pou faire?
3 Ti reste environ 7,000 Israélite ki ti refuse pou adore bann zidole, ek pou prend part dan sa l’adoration violent ek immoral-la. (1 Rois 19:18) Avek fidelité, zot ti respecté l’alliance ki zot ti faire avek Jéhovah, ek a cause sa zot ti gagne persecution. Par exemple, la reine Jézabel ti touye beaucoup prophete Jéhovah. (1 Rois 18:4, 13) A cause sa situation difficile-la, la plupart bann Israélite ti adore Jéhovah ek Baal, toulé-deux. Mais en realité, kan enn Israélite ti detourne-li ar Jéhovah pou adore enn fausse bondié, li ti tombe dan l’apostasie. Jéhovah ti promette pou beni bann Israélite si zot ti content Li ek obeir so bann commandement. Mais en mem temps, Li ti averti zot ki si zot pa ti reste ‘attaché zis ar Li tousel,’ zot ti pou detruire.—Deutéronome 5:6-10; 28:15, 63.
4. Dapré seki Jésus ek so bann zapotre ti annoncé, ki ti pou arrivé parmi bann chrétien, ek couma sa finn realisé?
4 Zordi dan la chrétienté, ena mem situation. Bann ki al l’Eglise pretann ki zot chrétien, mais zot bann fête, zot conduite, ek zot croyance pa en accord avek la Bible. Bann pretre la chrétienté faire pareil couma Jézabel, zot persecute bann Témoins de Jéhovah. Depuis longtemps, zot soutenir bann la-guerre, ek a cause sa, zot responsable la mort plusieurs million dimoune ki membre dan zot religion. Dapré la Bible, kan la religion soutenir bann gouvernement dan sa fason-la, li pé commette la fornication spirituel. (Révélation 18:2, 3) En plus, la chrétienté tolere encore plus ki avant, l’immoralité sexuel parmi so bann membre, mem parmi so bann pretre. Jésus Christ ek so bann zapotre ti annoncé ki pou ena sa grand l’apostasie-la. (Matthieu 13:36-43; Actes 20:29, 30; 2 Pierre 2:1, 2) Ki pé attann sa plus ki enn milliard dimoune ki forme partie dan la chrétienté-la? Ek ki responsabilité bann vrai adorateur ki servi Jéhovah ena envers sa bann dimoune-la, ek envers tou bann ki finn laisse-zot trompé par la fausse religion? Nou gagne enn reponse bien clair pou sa bann question-la kan nou examine bann evenement ki finn “tire l’adoration Baal net en Israël.”—2 Rois 10:28.
L’amour Bondié pou so peuple rebelle
5. Couma Jéhovah ti montré ki Li ti interessé ar so peuple ki ti rebelle?
5 Jéhovah pa content pou puni bann dimoune ki abandonne Li. Li enn bon Papa ek Li envie ki bann mauvais dimoune repenti ek recommence adore Li. (Ézékiel 18:32; 2 Pierre 3:9) Nou konn sa parski dan lepok Ahab ek Jézabel, Jéhovah ti servi beaucoup prophete pou averti so peuple lor bann consequence ki zot ti pou gagné si zot ti adore Baal. Éliya ti enn parmi sa bann prophete-la. Li ti annonce enn grand la-secheresse, ek a la fin sa la-secheresse-la, li ti demann le roi Ahab pou rassemblé bann Israélite ek bann prophete Baal lor montagne Carmel.—1 Rois 18:1, 19.
6, 7. (a) Couma Éliya ti montré pou ki vrai raison bann Israélite ti tombe dan l’apostasie? (b) Ki bann prophete Baal ti faire? (c) Ki Éliya ti faire?
6 Ti ena sa rassemblement-la kot enn l’autel Jéhovah ki ti’nn “demoli.” Kitfois ti’nn demoli sa l’autel-la pou faire plaisir Jézabel. (1 Rois 18:30) Li ti bien triste ki bann Israélite ki ti present, pa ti sur kisannla entre Jéhovah ek Baal ena pouvoir pou faire la pluie tombé, enn la-pluie ki zot ti bien bizin. Ti ena 450 prophete ki ti represente Baal, alors ki Éliya ti sel prophete ki ti represente Jéhovah. Éliya ti dire le peuple ki problem zot ti ena vrai-mem, kan li ti demann zot: “Ziska kan zot pou hesité entre deux l’opinion different?” Lerla dan enn fason encore pli direct, li ti montré zot ki choix zot ti ena. Li ti dire: “Si Jéhovah Li-mem vrai Bondié, suive Li; mais si c’est Baal, alors suive Baal.” Sa bann Israélite-la ti hesité pou prend enn decision concernant zot l’adoration. Pou encourage zot pou servi zis Jéhovah tousel, Éliya ti propose pou faire enn test pou prouvé kisannla ki vrai Bondié. Ti bizin sacrifié deux taureau, enn pou Jéhovah ek enn lot pou Baal. Lerla vrai Bondié ti pou brule so sacrifice par difé. Bann prophete Baal ti prepare zot sacrifice ek pendant plusieurs l’heure, zot ti contigne crié: “Ah Baal, reponn nou!” Kan Éliya ti commence sikann zot, zot ti coupe-coupe zot-mem ziska di-sang coulé, ek zot ti crié bien fort. Mais pa ti ena okenn reponse.—1 Rois 18:21, 26-29.
7 Apré sa, ti’nn arrive tour Éliya. Premierement, li ti commence repare l’autel Jéhovah, ek li ti mette bann morceau so jeune taureau lor la. Ensuite, li ti donne l’ordre pou verse quatre grand pot rempli ar de l’eau lor sa sacrifice-la. Ti’nn faire sa trois fois a suive, ziska ki canal ki ti tout autour l’autel, ti rempli ar de l’eau. Lerla, Éliya ti faire sa la-priere-la: “Ah Jéhovah, Bondié Abraham, Isaac, ek Israël, zordi, faire tou dimoune koné ki to-mem Bondié en Israël, ki moi, mo to serviteur ek ki c’est par to parole ki mo’nn faire tousala. Ah Jéhovah, reponn moi, pou ki sa peuple-la koné ki toi, Jéhovah, to-mem vrai Bondié ek ki c’est toi ki finn touche zot leker pou zot retourne vers toi.”—1 Rois 18:30-37.
8. Couma Bondié ti reponn la priere Éliya, ek ki Éliya ti faire apré?
8 Vrai Bondié ti reponn Éliya. Li ti faire difé sorti dan le ciel, ek sa ti brule sa sacrifice ki Éliya ti faire-la ek l’autel-la aussi. Sa difé-la ti mem faire de l’eau dan canal tout autour, sec! Maziné ki l’effet sa ti ena lor bann Israélite. La Bible dire: “Dé-suite zot ti prosterné ek zot ti dire: ‘Jéhovah, Li-mem vrai Bondié! Jéhovah, Li-mem vrai Bondié!’ ” Apré sa, Éliya ti agir dan enn fason bien ferme. Li ti donne sa l’ordre-la bann Israélite: “Attrape bann prophete Baal! Pa laisse enn sel sapé!” Lerla zot ti touye toulé 450 prophete Baal en-bas montagne Carmel.—1 Rois 18:38-40.
9. Ki l’epreuve bann vrai adorateur ti ré-gagné encore?
9 Dan sa mem jour-la, enn jour ki bann Israélite pa ti pou blié vite, Jéhovah ti faire la pluie tombé dan pays, premier fois depuis trois an et demi! (Jacques 5:17, 18) Surement ou kapav maziné ki conversation bann Israélite ti ena kan zot ti pé retourne kot zot; Jéhovah inn prouvé ki Li-mem vrai Bondié. Mais pourtant, bann adorateur Baal pa ti baisse le bras. Jézabel ti contigne persecute bann serviteur Jéhovah. (1 Rois 19:1, 2; 21:11-16) Encore enn fois, zot fidelité ti testé. Eski zot ti pou reste attaché zis ar Jéhovah kan Li ti pou faire so jugement kont bann adorateur Baal?
Prend ou decision asterla-mem ek agir
10. (a) Dan nou lepok, ki bann chrétien oint pé faire? (b) Ki nou bizin faire pou obeir l’ordre ki trouve en Révélation 18:4?
10 Dan nou lepok, bann chrétien oint faire enn travail pareil couma Éliya. Par zot parole ek par bann livre, zot averti bann dimoune tou nation—endan ek en dehors la chrétienté—ki la fausse religion li dangereux. Sa finn pousse plusieurs million dimoune pou prend enn decision ek pou agir: zot finn coupe tou contact avek la fausse religion. Zot finn voué zot la-vie ar Jéhovah, zot finn prend bapteme ek zot finn vinn bann disciple Jésus Christ. Oui, zot finn prend compte sa l’avertissement ki Bondié inn donné lor la fausse religion-la: “Sorti ladan, mo peuple, si zot pa envie participe dan so bann peché, ek si zot pa envie gagne enn part dan so bann malheur.”—Révélation 18:4.
11. Ki bizin faire pou gagne faveur Jéhovah?
11 Ena plusieurs million dimoune ki attiré par message ki trouve dan la Bible, ek ki bann Témoins de Jéhovah pé preché. Mais, zot pankor sur ki decision pou prend. Certain assisté reunion de temps en temps, par exemple zot vinn Mémorial ou-soit zot assisté certain jour l’assemblée district. Nou encourage tou sa bann dimoune-la pou reflechi bien lor seki Éliya ti dire: “Ziska kan zot pou hesité?” (1 Rois 18:21) Fodé pa zot tardé pou decidé, au contraire zot bizin prend enn decision ek agir asterla-mem. Zot bizin faire zeffort necessaire pou voué zot la-vie ar Jéhovah ek prend bapteme. Zot l’espoir pou gagne la vie eternel depann lor la!—2 Thessaloniciens 1:6-9.
12. Dan ki situation dangereux certain chrétien baptisé finn tombé, ek ki zot bizin faire?
12 Malheureusement, certain chrétien ki deja baptisé, pa pé servi Jéhovah regulierement, ou-soit zot finn arrete servi Li net. (Hébreux 10:23- 25; 13:15, 16) Certain finn perdi zot zèle parski zot peur persecution, ou-soit parski zot tracassé couma zot pou gagne zot la-vie; certain envie vinn riche, ena lezot ki rod bann plaisir egoïste. Jésus ti averti so bann disciple ki sa bann kitsoz-la pou faire certain tombé lor plan spirituel, sa pou touffe zot, ek pou vinn enn piege pou zot. (Matthieu 10:28-33; 13:20- 22; Luc 12:22-31; 21:34-36) Plutot ki zot “hesité entre deux l’opinion,” zot bizin “zélé ek repenti.” Zot bizin prend enn decision ferme pou zot kapav respecté voeu ki zot ti faire ar Bondié.—Révélation 3:15-19.
Fausse religion pou disparette enn sel coup
13. Ki situation ti ena en Israël kan ti choisir Yéhou pou vinn le roi?
13 Kifer bann dimoune bizin agir sans hesité asterla-mem? Nou kapav comprend kifer, kan nou guette seki ti passé en Israël, 18 an apré ki Jéhovah ti prouvé ki Li-mem vrai Bondié lor montagne Carmel. Pendant ministere Élisha, ki ti remplace Éliya, jour jugement Jéhovah kont l’adoration Baal ti arrive enn sel coup, sans ki personne ti attann. Sa lepok-la, Yehoram, garson le roi Ahab, ti le roi en Israël, ek Jézabel, la reine mere ti toujours vivant. Enn jour, Élisha ti envoye so serviteur pou al choisir Yéhou, ki ti chef l’armée Israël, pou vinn nouveau lé-roi. Sa l’heure-la, Yéhou ti Ramoth-Guiléad, dan l’est Jourdain, ek li ti pé laguerre kont bann l’ennemi Israël. Le roi Yehoram li, li ti Yizréel, dan enn la-plaine pré kot Meguiddo, kot li ti pé reposé, parski li ti’nn blessé dan enn la-guerre.—2 Rois 8:29–9:4.
14, 15. Ki mission Yéhou ti gagné, ek couma li ti reagir?
14 Guette l’ordre ki Jéhovah ti donne Yéhou: “To bizin touye bann dimoune dan famille Ahab, to seigneur, ek mo bizin venge di-sang mo bann serviteur bann prophete, ek di-sang tou bann serviteur Jéhovah ki Jézabel inn touyé. Ek tou dimoune dan famille Ahab bizin mort; . . . Ek Jézabel li, bann li-chien pou mange so la-chair dan terrain Yizréel, ek pa pou ena personne pou enterre li.”—2 Rois 9:7-10.
15 Yéhou ti enn dimoune ki ti decide vite. Li pa ti attann, li ti monte lor so char, ek li ti al Yizréel en vitesse. Enn guetteur ti reconette li par fason ki li ti pé conduire so char, ek li ti faire Yehoram koné ki Yéhou pé vini. Dé-suite, Yehoram ti monte lor so char ek ti al joinde chef so l’armée. Kan li ti joinde Yéhou, Yehoram ti demann li: “Eski ena la paix, Yéhou?” Ek Yéhou ti reponn li: “Kot kapav ena la paix, tant ki ena fornication Jézabel to mama, ek tou bann sorcellerie ki li faire?” Apré sa, avant ki le roi Yehoram ti kapav sauvé, Yéhou ti prend so l’arc ek ti touye Yehoram: li ti tire enn coup-de-fleche dan so leker.—2 Rois 9:20-24.
16. (a) Dan ki situation, bann fonctionnaire ki ti travail dan palais Jézabel, ti retrouve-zot enn coup? (b) Couma seki Jéhovah ti annoncé lor Jézabel, ti realisé?
16 Yéhou pa ti perdi le temps, li ti al vite dan la ville. Jézabel, ki ti’nn mette enn tas maquillage, ti pé guette li vini par enn la-fenetre. Li ti faire Yéhou enn menace bien grave. Sans mem ki Yéhou ti prend compte so bann parole, li ti appel bann dimoune pou soutenir li ek li ti demandé: “Kisannla avek moi? Kisannla?” Là, bann serviteur Jézabel ti bizin prend enn decision bien vite ek agir. Deux ou trois fonctionnaire la cour ti tire zot la-tête par la fenetre. Dan sa l’heure-la, zot fidelité ti passe par enn test. Yéhou ti donne zot sa l’ordre-la: “Jette li en-bas!” Bann fonctionnaire-la ti pousse Jézabel par la fenetre ek ti jette li dan la rue, ek cheval Yéhou ti marche lor li ek so char ti crase li. C’est coumsa ki Jézabel, ki ti favorise l’adoration Baal en Israël, ti disparette couma li ti merité. Avant-mem ki ti gagne le temps pou enterre li, bann li-chien ti mange so la-chair, pareil couma ti annoncé.—2 Rois 9:30-37.
17. Jugement Bondié kont Jézabel fortifié nou la-foi dan ki kitsoz ki pou arrivé dan l’avenir?
17 “Babylone la Grande,” sa prostitué symbolik-la, pou disparette aussi enn sel coup coumsa. Sa prostitué-la represente bann fausse religion ki trouve dan le monde Satan, ek ki ena zot l’origine dan ancien la ville Babylone. Kan zot pou disparette, Jéhovah pou tourne so l’attention vers tou bann dimoune ki forme partie dan le reste le monde Satan. Tou seki resté dan so lé-monde pou detruire. Sa pou permette Bondié etablir enn nouveau lé-monde kot pou ena la justice.—Révélation 17:3-6; 19:19-21; 21:1-4.
18. Apré la mort Jézabel, ki ti arrive bann adorateur Baal en Israël?
18 Apré la mort Jézabel, le roi Yéhou pa ti perdi le temps pou touye tou bann descendant Ahab ek bann dimoune ki ti prend la tête pou soutenir li. (2 Rois 10:11) Mais ti reste encore beaucoup adorateur Baal parmi bann Israélite, dan pays. Yéhou ti prend enn decision ferme kont zot, pou montré ki li ‘pa ti tolere nanyin ki kont Jéhovah.’ (2 Rois 10:16) Li ti faire-li passe pou enn adorateur Baal, ek li ti organise enn grand fête dan temple Baal, ki Ahab ti’nn faire en Samarie. Tou bann adorateur Baal en Israël ti vinn dan sa fête-la. Letan zot tou ti dan temple ek zot pa ti kapav sorti, bann zom Yéhou ti touye zot. La Bible fini sa zistoire-la kan li dire: “C’est coumsa ki Yéhou ti tire l’adoration Baal net en Israël.”—2 Rois 10:18-28.
19. Ki l’avenir extraordinaire pé attann “enn grand la-foule” bann adorateur fidel Jéhovah?
19 L’adoration Baal ti disparette en Israël. Li pou pareil aussi avek bann fausse religion, zot pou disparette enn sel coup. Dan ki coté ou pou été kan sa grand jour jugement-la pou arrivé? Prend ou decision ek agir asterla-mem, ou kapav ena privilege pou forme partie parmi bann membre la ‘grande foule’ ki pou survive pendant la “grande tribulation.” Lerla, ou pou ena la joie pou guette seki finn arrivé, ek ou pou loué Jéhovah parski Li finn juge sa “grand prostitué ki ti pé gate la terre avek so fornication-la.” Dan l’unité avek lezot vrai adorateur, ou pou agir en accord avek parole ki pé chanté dan le ciel: “Loué Yah, parski Jéhovah nou Bondié ki Tout-Puissant, inn commence regné.”—Révélation 7:9, 10, 14; 19:1, 2, 6.
Kitsoz lor ki nou kapav medité
• Couma bann Israélite ti vinn coupable concernant l’adoration Baal?
• Ki grand l’apostasie la Bible ti annoncé, ek couma sa finn realisé?
• Couma Yéhou ti faire l’adoration Baal disparette?
• Ki nou bizin faire pou gagne la vie sauve kan jour jugement Jéhovah vini?
[Map, page 9]
(guette publication)
Soko
Apheq
Helqath
Yoqnéam
Meguiddo
Taanak
Dothân
SAMARIE
En-Dor
Shounem
Ophra
Yizréel
Yibléam (Gath-Rimmôn)
Tirtsa
Beth-Shémesh
Beth-Shéân (Beth-Shân)
Yabesh-Guiléad?
Abel-Mehola
Maison d’Arbel
Ramoth-Guiléad
Mont
Mt Carmel
Mt Tabor
Moré
Mt Guilboa
[La mer]
Mer Méditerranée
Mer de Galilée
[Riviere]
Jourdain
[Source]
Source de Harod
[Remerciement photo]
Basé lor bann map avek copyright Pictorial Archive (Near Eastern History) Est. and Survey of Israel
[Zimage, page 10]
Preché ek assisté reunion regulierement, c’est bann kitsoz bien important ki forme partie dan vrai l’adoration
[Zmage, page 12, 13]
Pareil couma Yéhou, tou seki envie survive pendant jour Jéhovah bizin prend enn decision ek agir