Parole Jéhovah vivant

DOUZE an inn passé depuis ki bann dernier l’evenement ki’nn rapporté dan livre Ezra inn arrivé. Asterla pré pou arrive l’heure kot “parole pou retabli ek reconstruire Jérusalem pou sorti.” Sa l’evenement-la mark commencement 70 semaine ki amenn ziska Messie. (Daniel 9:24-27) Livre Nehémia raconte l’histoire peuple Bondié dan lepok kot ti reconstruire muraille Jérusalem. Li couvert enn period bien important ki dure plus ki 12 an. Sa period-la commence a partir 456 a.n.l. ek li termine inpé apré 443 a.n.l.

Livre Nehémia inn ecrire par gouverneur Nehémia. Sa livre-la raconte dan enn fason bien vivant couma vrai l’adoration gagne la gloire kan le peuple pa zis ena enn confiance total en Jéhovah, mais zot montré sa par zot bann action ferme. Li montré bien couma Jéhovah dirige bann l’evenement pou ki so volonté kapav faire. Li raconte aussi zistoire enn dirigeant ki fort ek ki ena courage. Livre Nehémia ena enn message ki utile pou tou bann vrai adorateur Bondié zordi, “parski parole Bondié, li vivant ek li puissant.”—Hébreux 4:12.

“A LA FIN INN REUSSI TERMINE MURAILLE-LA”

(Nehémia 1:1–6:19)

Nehémia pé servi le roi Artaxerxès Longue-Main dan so chateau ki trouve dan Suse. Sa travail ki li pé faire-la montré ki le roi ena bien confiance en li. Nehémia gagne nouvel ki so peuple “dan enn mauvais situation ki faire honté; ek muraille Jérusalem inn demoli, ek so bann la-porte inn brulé.” Sa bien troublé li ek li pa arrete prié Bondié pou demann Li ki bizin faire. (Nehémia 1:3, 4) Avek le temps, le roi remark tristesse Nehémia, ek li donne li permission pou al Jérusalem.

Apré ki li’nn arrive Jérusalem, Nehémia profité couma faire noir pou guetté dan ki situation muraille été, ek li faire bann Juif koné ki li ena l’intention pou reconstruire muraille. Construction commencé ek l’opposition aussi commencé. Mais, Nehémia dirige bann travail avek courage, ek “a la fin, inn reussi termine muraille-la.”—Nehémia 6:15.

Reponse pou bann question biblik:

1:1; 2:1—Eski commence calcule “vingtieme l’année” ki mentionné dan sa deux verset-la a partir mem date? Oui, li mentionne ici 20^eme l’année règne le roi Artaxerxès. Mais, maniere calculé pa pareil dan sa deux verset-la. Dapré bann preuve historik, le roi Artaxerxès ti commence so règne en 475 a.n.l. Parski bann scribe babylonien ti habitué calcule règne bann lé-roi perse a partir mois Nisan (mars/avril) ziska prochain mois Nisan, alors premier l’année règne Artaxerxès ti commencé en Nisan 474 a.n.l. Alors, 20^eme l’année so règne ki mentionné dan Nehémia 2:1 ti commencé en Nisan 455 a.n.l. Li logik pou dire ki mois Kislev (novembre/décembre) ki mentionné dan Nehémia 1:1, c’est mois Kislev l’année avant, setadir l’année 456 a.n.l. Nehémia dire ki 20^eme l’année règne Artaxerxès, tombe aussi dan sa mois-la. Kitfois, dan sa cas-la, li ti pé compte bann l’année a partir date ki Artaxerxès ti monte lor trone. Kitfois aussi kan Nehémia ti calcule sa period-la, li ti servi seki bann Juif zordi appel l’année civil ki commence avek mois Tishri, setadir mois septembre/octobre. En tou cas, c’est en 455 a.n.l. ki parole pou retabli ek reconstruire Jérusalem ti sorti.

4:17, 18—Couma eski enn zom ti kapav faire travail reconstruction avek enn sel la-main? Sa pa ti pou enn problem pou bann ki ti sarrié bann fardeau. Enn fois ki ti’nn fini place zot la-charge lor zot la-tête ou-soit lor zot zepaule, zot ti kapav facilement garde sa en equilibre avek enn la-main “tandis ki avek zot lot la-main zot ti pé sarrié enn zarme.” Bann ki ti pé construire ek ki ti bizin zot deux la-main pou faire zot travail, “ti ena enn ceinture ki ti tini sakenn so l’epée lor so la-hanche, pendant ki zot ti pé travail.” Zot ti paré pou defann-zot si l’ennemi ti attaké.

5:7—Dan ki sens Nehémia ti commence “faire reproche bann chef ek bann chef adjoint”? Bannla ti pé viole la Loi Moïse kan zot ti pé prete l’argent zot bann compagnon juif ek zot ti pé demann l’interet. (Lévitique 25:36; Deutéronome 23:19) En plus, zot ti pé demann beaucoup l’interet. Si zot ti pé demann l’interet “enn centieme” par mois, sa ti pou faire enn l’interet 12 pourcent par an. (Nehémia 5:11) Sa ti montré ki zot pa ti ena okenn pitié, parski le peuple ti pé deja souffert a cause taxe ek la famine. Nehémia ti faire reproche bann riche, setadir li ti servi la Loi Bondié pou reprend zot ek reprimande zot, ek coumsa li ti denonce bann mauvais kitsoz ki zot ti pé faire.

6:5—Kifer Sânballat ti envoye Nehémia “enn lettre ouvert,” alors ki ti habitué mette bann lettre confidentiel dan bann l’enveloppe scellé? Kitfois Sânballat ti envie ki tou dimoune konn sa bann fausse charge ki li ti’nn ecrire dan sa lettre-la. Kitfois aussi, li ti croire ki sa ti pou faire Nehémia tellement en colere ki li ti pou arrete travail construction ek vinn defann li. Ou-soit kitfois Sânballat ti pensé ki sa lettre-la ti pou tellement bouleverse bann Juif ki zot ti pou arrete tou travail. Nehémia pa ti laisse sa faire li gagne peur, ek li ti contigne faire avek calme travail ki Bondié ti’nn donne li.

Bann leson pou nou:

1:4; 2:4; 4:4, 5. Kan nou trouve-nou dan bann situation difficile ou-soit kan nou ena pou prend bann decision important, nou bizin “perseveré dan la priere” ek agir en harmonie avek direction ki Jéhovah donne nou par so Parole ou-soit par so l’organisation.—Romains 12:12.

1:11–2:8; 4:4, 5, 15, 16; 6:16. Jéhovah reponn la priere sincere so bann serviteur.—Psaume 86:6, 7.

1:4; 4:19, 20; 6:3, 15. Nehémia ti enn dimoune ki ti ena bon sentiment, mais sa pa ti empeche li agir ek defann la justice. Li enn bon l’exemple pou nou.

1:11–2:3. Nehémia ti ena enn position bien important. Li ti servi le roi so di-vin. Pourtant c’est pa sa ki ti donne li so pli grand la-joie. C’est plutot seki li ti faire pou favorise vrai l’adoration ki ti donne li so pli grand la-joie. L’adoration Jéhovah ek tou seki favorise sa bizin interesse nou avant tou kitsoz ek sa-mem ki bizin faire nou gagne pli grand la-joie.

2:4-8. Jéhovah ti faire en sorte ki Artaxerxès donne Nehémia permission pou al Jérusalem pou reconstruire muraille. Proverbes 21:1 dire: “Leker enn lé-roi, li couma bann ti la-riviere dan la main Jéhovah. Li dirige sa partout kot Li content.”

3:5, 27. Nou bizin pa faire couma “bann grand personnage” parmi bann Teqoïte ek pensé ki bann travail manuel ki bizin faire pou favorise vrai l’adoration, zot trop bas pou nou. Au contraire, nou bizin imite bann lezot Teqoïte ki ti accepté pou faire n’importe ki travail.

3:10, 23, 28-30. Alors ki certain kapav demenagé pou al kot bizin plus proclamateur, beaucoup parmi nou soutenir vrai l’adoration là kot nou resté. Nou kapav faire sa kan nou participe dan construction bann la-Salle du Royaume, dan bann secours pou aide bann victime catastrophe, mais avant tou kan nou participe dan travail predication.

4:14. Kan nou faire face ar l’opposition, nou aussi nou kapav surmonte la peur si nou mazinn “sa Kikenn ki grand ek ki nou bizin peur-la.”

5:14-19. Gouverneur Nehémia inn laisse enn bon l’exemple pou bann surveillant chrétien. Li ti ena l’humilité, li pa ti egoïste, ek li ti prudent. Mem si li ti applik la Loi Bondié avek zèle, li pa ti domine lor lezot pou gagne enn l’avantage personnel. Plutot, li ti interessé avek bann pauvre ek avek bann ki ti pé souffert parski ti pé faire dominere ar zot. Dan domaine generosité, Nehémia inn laisse enn bon l’exemple pou tou bann serviteur Bondié.

“PA BLIÉ MOI, AH MO BONDIÉ, POU DI-BIEN KI MO’NN FAIRE”

(Nehémia 7:1-13:31)

Dé-suite couma termine construction muraille Jérusalem, Nehémia installe bann la-porte ek prend bann disposition pou protege la ville. Li decide pou enregistré le peuple. Le peuple entier rassemblé “lor place publik ki devant la Porte des Eaux,” ek Ezra ki ti pretre lire livre la Loi Moïse, ek Nehémia ek bann Lévite explik bann Israélite la Loi. (Nehémia 8:1) Kan zot aprann concernant la fête des Huttes, zot prend bann disposition pou celebré sa fête-la avek grand la-joie.

Apré, ena enn lot rassemblement kot “descendance Israël” confesse peché ki le peuple inn faire. Bann Lévite rappel bann fason ki Bondié agir envers Israël, ek le peuple faire serment pou “marche dan la loi vrai Bondié.” (Nehémia 9:1, 2; 10:29) Ti ena trop tigit dimoune ki ti reste Jérusalem. A cause sa ti faire enn tirage au sort pou ki enn lor chaque dix dimoune ki en dehors Jérusalem, vinn reste dan la ville. Apré sa, faire inauguration muraille avek tellement la joie ki “depuis bien loin ti tann la joie ki ti ena dan Jérusalem.” (Nehémia 12:43) Apré ki Nehémia inn passe 12 an dan Jérusalem, li quitte la ville ek reprend so travail dan la cour Artaxerxès. Bann Juif pa tardé pou adopté bann pratik malprop. Letan li ré-vinn Jérusalem, Nehémia prend bann disposition severe pou corrige la situation. Avek humilité, li demann Jéhovah: “Pa blié moi, Ah mo Bondié, pou di-bien ki mo’nn faire.”—Nehémia 13:31.

Reponse pou bann question biblik:

7:6-67—Nehémia donne enn la-liste bann ki ti retourne Jérusalem avek Zorobabel. Ezra aussi donne enn la-liste kot li mentionne quantité dimoune ki ti retourné par famille. Kifer sa deux la-liste pa pareil? (Ezra 2:1-65) Kitfois Ezra ek Nehémia pa finn prend zot bann renseignement dan mem place. Par exemple, li possible ki pa tou bann Juif ki ti donne zot nom pou retourne Jérusalem, ti vrai-mem retourné. Kitfois aussi bann chiffre pa ti pareil parski certain Juif ki pa ti kapav prouve zot descendance dan commencement, ti reussi faire sa apré. Mais toulé-deux recit d’accord lor enn point: apart bann esclave ek bann chanteur, ti ena 42, 360 dimoune ki ti retourné.

10:34—Kifer ti demann le peuple pou fourni di-bois? La Loi mosaïk pa ti demann bann offrande di-bois. Ti demann le peuple pou faire sa zis par necessité. Ti bizin enn grand quantité di-bois pou brule bann sacrifice lor l’autel. Mais apparemment pa ti ena assez Nethinim, setadir bann esclave ki pa ti Israélite ek ki ti travail dan temple. Alors ti tire au sort pou assuré ki pa mank di-bois dan temple.

13:6—Pou comié lé-temps Nehémia ti’nn quitte Jérusalem? La Bible zis dire ki “apré enn certain lé-temps,” Nehémia ti demann le roi congé pou retourne Jérusalem. Alors, li impossible pou koné pendant comié lé-temps li ti absent dan Jérusalem. Mais kan li ti retourné, li ti trouvé ki bann pretre pa ti pé gagne okenn soutien, ek ki le peuple pa ti pé observe Sabbat. Beaucoup ti’nn marié avek bann madame etranger, ek zot bann zenfant pa ti mem konn langage bann Juif. Nehémia ti bizin inn quitte Jérusalem pendant assez longtemps pou ki bann condition deterioré sa quantité-la.

13:25, 28—En plus ki li ti “faire reproche” bann Juif parski zot ti’nn retombe dan peché, ki lezot disposition severe Nehémia ti prend pou corrige zot, ek redresse la situation? Nehémia ti ‘maudit zot’ setadir li ti cite bann jugement dan la Loi Bondié kont zot. Li ti ‘batte certain parmi zot,’ kitfois kan li ti donne l’ordre pou prend bann action legal kont zot. Li ti ‘arrache zot cheveux’ pou montré so degout pou bann mauvais kitsoz ki zot ti pé faire. Enn ti zenfant grand pretre Éliashib ti’nn marié avek enn tifi Sânballat ki ti enn Horonite. Nehémia ti faire li quitte la ville allé.

Bann leson pou nou:

8:8. En tant ki enseignant Parole Bondié, ‘nou aide lezot pou comprend so signification’ kan nou ouvert bien nou la-bouche pou kozé ek kan nou mette l’accent kot bizin. Nou kapav aussi faire sa kan nou explik bann verset couma bizin ek montré bien zot application.

8:10. Pou konn “la joie Jéhovah,” nou bizin reconette ek satisfaire nou bann besoin spirituel, ek aussi suive direction ki Jéhovah donne nou. Alors li bien important ki nou serieux dan nou l’etude la Bible, ki nou assisté bann reunion regulierement, ek ki nou participe avek zèle dan predication ek faire bann disciple.

11:2. Pou zot quitte tou l’heritage ek vinn etabli dan Jérusalem, bann Juif ti bizin faire beaucoup depense ek passe par beaucoup difficulté. Bann ki ti volontaire pou faire sa, ti montré ki zot ti disposé pou faire sacrifice. Nou aussi nou kapav montré ki nou ena mem l’attitude kan invite nou pou offert nou l’aide dan bann l’assemblée ou dan bann lezot situation.

12:31, 38, 40-42. Bann cantik, zot enn bon fason pou loué Jéhovah ek exprime nou reconnaissance pou Li. Nou bizin chante avek tou nou leker dan bann reunion.

13:4-31. Nou bizin faire attention ki materialisme, corruption ek l’apostasie pa rente dan nou leker.

13:22. Nehémia ti reconette ki li ti bizin rann compte Bondié. Nou aussi nou bizin reconette sa.

Li important ki nou gagne benediction Jéhovah

Enn ecrivain Psaume ti chante sa bann parole-la: “Si Jéhovah Li-mem pa construire lakaz-la, c’est pou nanyin ki bann ki pé construire inn travail dur.” (Psaume 127:1) Livre Nehémia montré bien ki sa bann parole-la vrai.

Leson-la li clair pou nou: pou nou reussi dan tou seki nou faire, nou bizin ena benediction Jéhovah. Mais eski nou kapav attann ki Jéhovah beni nou si nou pa mette so l’adoration en premier dan nou la-vie? Alors, pareil couma Nehémia, anou mette l’adoration Jéhovah en premier dan nou la-vie.

[Zimage, page 28]

“Leker enn lé-roi, li couma bann ti la-riviere dan la main Jéhovah”

[Zimage, page 29]

Nehémia—enn zom ki pa ti peur pou agir mais ki ti ena bon sentiment—vinn Jérusalem

[Zimage, page 30]

Eski ou koné couma pou ‘aide lezot pou comprend signification Parole Bondié’?