“Enn temoignage pou tou bann nation”
“Zot pou mo bann temoin . . . ziska dan region pli loin lor la terre.”—ACTES 1:8.
1. Kan ek ki coté bann disciple ti tann prophetie Matthieu 24:14, premier fois?
TELLEMENT nou finn tann bann parole ki Jésus ti prononcé dan Matthieu 24:14, ki beaucoup parmi nou konn sa text-la par coeur. Oui, c’est vrai-mem enn prophetie extraordinaire! Maziné seki bann disciple ti pensé kan zot ti tann sa premier fois! Sa ti passé en l’an 33 n.l. Bann disciple ti’nn passe apepré trois an avek Jésus, asterla, zot ti pé accompagne li dan Jérusalem. Zot ti trouve so bann mirak ek zot ti tann so bann l’enseignement. Mem si zot ti bien apprecié bann verité ki Jésus ti enseigne zot, zot ti koné ki pa tou dimoune ki ti apprecié sa. Jésus ti ena bann l’ennemi puissant, ki ti ena enn grand l’influence.
2. Ki bann danger ek bann difficulté bann disciple ti pou koné?
2 Lor mont des Oliviers, quatre disciple ti pé assize pré kot Jésus, ek avek enn grand l’attention, zot ti pé ecoute li koz lor bann danger ek bann difficulté ki zot ti pou gagné. Avant sa, Jésus ti’nn deja dire zot ki so bann adversaire pou touye li. (Matthieu 16:21) Asterla, li ti pé dire zot dan enn fason bien clair, ki zot aussi, zot pou gagne bann persecution bien cruel. Li ti dire zot: “Bann dimoune pou faire zot konn bann persecution ek pou touye zot, ek tou bann nation pou ena la haine pou zot a cause mo nom.” Pa ti pou ena zis sa. Bann fausse prophete ti pou detourne beaucoup. Certain ti pou tombé ek ti pou trahir zot camarade ek ti pou ena la haine entre zot. Lezot encore, avredir la “majorité,” ti pou laisse zot l’amour pou Bondié ek pou so Parole, refroidi.—Matthieu 24:9-12.
3. Kifer bann parole ki Jésus ti dire en Matthieu 24:14, ti etonne so bann disciple?
3 C’est apré ki Jésus ti koz lor sa bann condition difficile-la ki li ti dire enn kitsoz ki ti surement etonne so bann disciple. Li ti dire: “Sa bon nouvel lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.” (Matthieu 24:14) Oui, travail ki Jésus ti commencé en Israël, setadir “donne temoignage lor la verité,” ti pou contigné ek ti pou faire partout dan le monde. (Jean 18:37) Enn prophetie vrai-mem extraordinaire! Deja, sa ti pou enn grand defi pou preche avek bann dimoune “tou bann nation;” asterla pou faire sa malgré ‘la haine tou bann nation,’ sa ti pou enn mirak. Sa grand travail-la pa ti pou zis montré puissance Jéhovah ek so droit pou dirige l’univers, mais aussi so l’amour, so misericorde ek so patience. En plus, so bann serviteur ti pou gagne l’occasion pou montré zot la-foi ek zot l’attachement envers Li.
4. Kisannla ti gagne enn mission pou rann temoignage, ek ki l’encouragement Jésus ti donne zot?
4 Jésus ti faire so bann disciple comprend ki zot ti ena enn grand mission pou accompli. Avant li monte dan le ciel, li ti apparette ar zot ek li ti dire zot: “Zot pou gagne pouvoir kan l’esprit saint pou vinn lor zot, ek zot pou mo bann temoin dan Jérusalem, partout dan Judée ek Samarie, ek ziska dan region pli loin lor la terre.” (Actes 1:8) Bien-sur, ti pou ena encore lezot disciple avek zot plitar. Mais kan-mem pa ti ena beaucoup disciple. Surement sa ti encourage zot pou koné ki l’esprit saint Bondié, ki bien puissant, ti pou donne zot la force pou accompli sa mission-la!
5. Ki bann disciple pa ti koné concernant travail predication?
5 Bann disciple ti koné ki zot ti bizin preche la bonne nouvelle ek “faire bann disciple parmi bann dimoune dan tou bann nation.” (Matthieu 28:19, 20) Mais zot pa ti koné ki quantité ti pou bizin donne sa temoignage-la, ek zot pa ti koné kan la fin ti pou vini. Nou aussi nou pa konn sa. C’est zis Jéhovah ki decide sa. (Matthieu 24:36) Kan Jéhovah pou satisfait ki so bann serviteur inn assez donne temoignage, Li pou detruire sa mauvais lé-monde-la. C’est seulement lerla ki bann chrétien pou comprend ki travail predication finn accompli couma Jéhovah envie. Bann disciple dan premier siecle pa ti pou kapav maziné ki quantité ti pou donne sa temoignage-la pendant lepok la fin.
Temoignage ki’nn donné dan premier siecle
6. Ki ti arrivé jour la Pentecôte l’an 33 n.l., ek enn tipé apré sa?
6 Dan premier siecle, bann chrétien ti gagne bann bon resultat kan zot ti preché ek faire bann disciple. Jour la Pentecôte l’an 33 n.l., environ 120 disciple ti dan enn la-chambre la-haut, dan enn lakaz dan Jérusalem, ek Bondié ti envoye so l’esprit saint lor zot. Pou explik signification sa mirak-la, l’apotre Pierre ti faire enn discours bien touchant ek environ 3,000 dimoune ti vinn croyant ek ti prend bapteme. Sa ti zis enn commencement. Mem si bann chef religieux ti faire tou seki zot ti kapav pou empeche predication la bonne nouvelle, “toulé-jour, Jéhovah ti pé contigne ajoute avek [bann disciple], bann dimoune ki Li ti pé sauvé.” Bientot, “ti ena apepré cinq mille zom.” Apré sa, “bann ki ti croire dan le Seigneur ti contigne augmenté, enn grand quantité zom ek femme toulé-deux.”—Actes 2:1-4, 8, 14, 41, 47; 4:4; 5:14.
7. Kifer kan Corneille ti vinn enn croyant, sa ti enn evenement extraordinaire?
7 Ti ena enn lot evenement extraordinaire en l’an 36 n.l.—Corneille, enn non-Juif ki ti ena la crainte pou Bondié, ti vinn croyant ek ti prend bapteme. Kan Jéhovah ti dirige l’apotre Pierre vers sa missié-la, Li ti montré ki, l’ordre ki Jésus ti donné pou “faire bann disciple parmi bann dimoune dan tou bann nation,” pa ti applik zis ar bann Juif ki ti dan different pays. (Actes 10:44, 45) Ki reaction bann ki ti prend la tête dan predication, ti ena? Kan bann zapotre ek bann ancien dan Judée ti comprend ki bizin preche la bonne nouvelle ar bann non-Juif aussi, zot ti glorifié Bondié. (Actes 11:1, 18) Entre-temps, predication parmi bann Juif ti pé produire bann bon resultat. Plitar, kitfois vers l’an 58 n.l., apart bann croyant non-Juif, ti ena aussi plusieurs “millier croyant parmi bann [Juif].”—Actes 21:20.
8. Ki l’effet la bonne nouvelle ena lor bann dimoune?
8 Mem si li extraordinaire pou lire seki la Bible dire lor augmentation ki ti ena parmi bann chrétien dan premier siecle, fodé pa nou blié ki sa bann chiffre-la represente bann dimoune. Message biblik ki zot ti tendé ti ena enn grand pouvoir. (Hébreux 4:12) Sa ti change zot la-vie net. Chaque dimoune ti purifié so la-vie, ti mette enn nouveau personnalité lor li, ek ti retourne vers Bondié. (Éphésiens 4:22, 23) Zordi aussi li pareil. Ek tou bann ki accepté la bonne nouvelle ena possibilité pou vive pou touletan.—Jean 3:16.
Compagnon travail avek Bondié
9. Ki privilege ek ki responsabilité bann premier chrétien ti koné ki zot ena?
9 Bann premier chrétien pa ti pretann ki c’est par zot prop capacité ki zot ti’nn kapav accompli sa travail-la. Zot ti reconette ki c’est grace a “pouvoir l’esprit saint” ki zot ti pé faire sa. (Romains 15:13, 19) C’est Jéhovah ki ti derriere sa l’accroissement-la. En mem temps, sa bann chrétien-la ti koné ki li enn grand privilege ek aussi enn grand responsabilité pou vinn bann “compagnon ki travail avek Bondié.” (1 Corinthiens 3:6-9) A cause sa, en accord avek seki Jésus ti dire, zot ti faire bann grand zeffort pou faire sa travail ki zot ti gagné-la.—Luc 13:24.
10. Ki zeffort certain parmi bann premier chrétien ti faire pou donne temoignage ar bann dimoune dan tou nation?
10 L’apotre Paul ki ti “enn zapotre pou bann nation,” ti voyage plusieurs millier kilometre lor la terre ek lor la mer, ek li ti forme beaucoup congregation dan partie l’Asie ki ti controlé par bann Romain, ek aussi en Grèce. (Romains 11:13) En plus, li ti al Rome ek kitfois aussi en Espagne. Entre-temps, l’apotre Pierre, ki ti gagne responsabilité pou preche ‘la bonne nouvelle ar bann ki ti circonci,’ ti voyage dan lot direction pou al Babylone, enn l’endroit kot ti ena beaucoup Juif dan sa lepok-la. (Galates 2:7-9; 1 Pierre 5:13) Parmi bann chrétien ki ti travail dur pou preche la bonne nouvelle, ti ena bann femme couma Tryphène ek Tryphose. Ti ena enn lot femme ki ti appel Persis, ki “ti faire beaucoup travail pou nou Seigneur.”—Romains 16:12.
11. Couma Jéhovah ti beni zeffort bann disciple Jésus?
11 Jéhovah ti bien beni bann zeffort ki sa bann chrétien-la ek lezot ti faire. Moins ki 30 an apré ki Jésus ti annoncé ki tou bann nation pou gagne enn temoignage, Paul ti ecrire ki “la bonne nouvelle” finn “preché dan tou creation ki trouve enba le ciel.” (Colossiens 1:23) Eski la fin ti vini lerla? Dan enn sens, oui. Li ti vinn lor system juif en l’an 70 n.l., kan bann l’armée romain ti detruire Jérusalem ek so temple. Seulement, Jéhovah ti’nn decidé ki bizin donne enn temoignage beaucoup pli grand avant ki li detruire le monde mauvais ki Satan pé dirigé.
Temoignage ki pé donné zordi
12. Couma bann premier Etudiant la Bible ti comprend l’ordre pou preché?
12 Vers la fin 19eme siecle, apré enn longue period ki ti dominé par l’apostasie, vrai l’adoration ti’nn retabli. Bann Etudiant la Bible, couma bann Témoins de Jéhovah ti appelé dan sa lepok-la, ti bien comprend l’ordre ki bann chrétien ti gagné pou faire bann disciple partout lor la terre. (Matthieu 28:19, 20) En 1914, ti ena apepré 5,100 proclamateur ki ti actif dan predication, ek zot ti pé preche la bonne nouvelle dan environ 68 pays. Seulement, bann Etudiant la Bible dan sa lepok-la pa ti bien comprend signification Matthieu 24:14. Vers la fin 19eme siecle, bann societé biblik ti’nn fini traduire la Bible, livre kot ena l’evangile setadir la bonne nouvelle, en plusieurs langue. En plus zot ti’nn aussi imprime sa bann traduction-la ek distribué zot dan le monde entier. C’est a cause sa ki, pendant plusieurs l’année, bann Etudiant la Bible ti pensé ki tou bann nation ti’nn fini gagne enn temoignage.
13, 14. En 1928, couma La Tour de Garde ti faire comprend volonté ek projet Bondié pli bien?
13 Tigit par tigit, Jéhovah ti faire so bann serviteur comprend pli bien so volonté ek so projet. (Proverbes 4:18) La Tour de Garde 1er décembre 1928 ti dire: “Eski nou kapav dire ki, parski finn distribué bann la-Bible [partout], ki sa finn accompli la predication ki annonce l’evangile lor royaume [Bondié]? Non! Malgré sa distribution-la, li encore necessaire ki sa ti group temoin Bondié ki lor la terre-la, imprime bann livre ki explik [projet] Bondié ek al visite bann dimoune ki finn prend sa bann la-Bible-la. Sinon, sa bann dimoune-la pa pou koné ki gouvernement messianik finn etabli dan nou lepok.”
14 Sa La Tour de Garde-la ti ajouté: “En 1920, . . . bann Etudiant la Bible ti comprend pli bien prophetie ki nou Seigneur ti donné dan Matthieu 24:14. Lerla, zot ti realisé ki ‘l’evangile’ ki ti bizin preché partout lor la terre couma enn temoignage pou tou bann nation, c’est pa enn l’evangile lor enn royaume ki ti pou vini, mais enn l’evangile lor le Roi messianik ki ti’nn fini commence regné lor la terre.”
15. Couma predication la bonne nouvelle finn bien augmenté depuis 1920?
15 Sa “ti group temoin” ki ti ena dan bann l’année 1920-la pa’nn reste tigit. Pendant bann l’année apré, bann Témoins ti comprend kisannla “grand la-foule” “lezot brebis” été, ek zot ti commence rassemblé zot. (Révélation 7:9; Jean 10:16) Zordi, ena 6,613,829 proclamateur la bonne nouvelle dan 235 pays. Prophetie Matthieu 24:14 finn realisé dan enn fason vrai-mem extraordinaire! Jamais avant, la bonne nouvelle finn preché lor la terre sa quantité-la. Jamais Jéhovah pa finn ena sa quantité serviteur fidel-la lor la terre.
16. Ki travail finn faire pendant l’année service ki’nn fek passé? (Guette tableau dan page 23-26.)
16 Sa la-foule Témoins-la ti bien actif pendant l’année service 2005. Zot finn passe plus ki enn milliard l’heure pou preche la bonne nouvelle dan 235 pays. Zot finn faire plusieurs million nouvelle visite ek zot finn conduire plusieurs million l’etude la Bible. Bann Témoins de Jéhovah finn faire sa travail-la gratis, zot finn donne zot lé-temps ek zot finn servi bann moyen ki zot ena pou faire lezot dimoune konn Parole Bondié. (Matthieu 10:8) Par so l’esprit saint, Jéhovah contigne donne la force so bann serviteur pou zot faire so volonté.—Zekaria 4:6.
Travail dur pou donne temoignage
17. Couma bann serviteur Jéhovah pé obeir bann parole ki Jésus ti dire concernant predication la bonne nouvelle?
17 Mem si preské 2,000 an finn passé depuis ki Jésus ti dire ki bizin preche la bonne nouvelle, peuple Bondié ena toujours enn grand zèle pou faire sa travail-la. Kan nou contigne faire le bien, sa permette nou pou imite l’amour, misericorde ek patience Jéhovah. Pareil couma Li, nou pa envie ki okenn dimoune detruire, mais nou envie ki zot repenti ek zot retourne vers Jéhovah. (2 Corinthiens 5:18-20; 2 Pierre 3:9) Avek l’aide l’esprit saint Bondié, bann Témoins de Jéhovah contigne preche avek zèle la bonne nouvelle ziska dan boute la terre. (Romains 12:11) Resultat: partout bann dimoune pé accepté la verité ek pé soumette-zot ar direction Jéhovah. Anou guette dé-trois l’exemple.
18, 19. Cite certain l’experience lor bann dimoune ki’nn accepté la bonne nouvelle.
18 Charles ti enn fermier ki ti reste dan l’ouest Kenya. En 1998, li ti vann plus ki huit tonne tabac, ek li ti gagne enn certificat ki montré ki li-mem pli bon planteur tabac. Dan mem lepok, li ti commence etudié la Bible. Avek le temps, li ti’nn comprend ki enn dimoune ki produire tabac pé desobeir l’ordre ki Jésus ti donné pou content so prochain. (Matthieu 22:39) Kan li’nn rann-li compte ki ‘pli bon planteur tabac’ vedir aussi ‘pli grand criminel,’ Charles finn arrose poison lor so plantation tabac. Li’nn faire progré ziska ki li’nn prend bapteme ek zordi, li enn pionnier permanent ek enn assistant ministeriel.
19 Pena okenn doute ki, par predication ki pé faire dan le monde entier, Jéhovah pé sakouye bann nation, ek bann kitsoz desirable, setadir bann dimoune, pé sorti. (Haggaï 2:7) Pedro reste en Portugal. Kan li ti ena 13 an, li ti rente dan enn lekol kot forme bann dimoune pou vinn pretre. Li ti envie vinn enn missionnaire ek enseigne la Bible. Mais apré enn tipé lé-temps, li ti quitte sa lekol-la parski bann cours ki li ti pé prend pa ti preské koz lor la Bible ditou. Six an plitar, li ti pé etudié psychologie, dan enn l’université dan Lisbonne. Li ti pé reste avek so ma-tante, enn Témoin de Jéhovah, ki ti encourage li pou etudié la Bible. Sa lepok-la, Pedro pa ti trop sur si Bondié vrai-mem existé, ek li pa ti kapav decidé si li pou etudié la Bible ou non. Enn jour, li ti koz avek so professeur psychologie lor bann dimoune ki pa kapav prend decision. Professeur-la ti dire li ki enn parmi bann principe ki psychologie enseigné c’est ki souvent bann dimoune ki pa kapav prend decision, faire zot-mem di-tort. Kan Pedro inn tann sa, li ti prend decision pou etudié la Bible. Li’nn fek prend bapteme, ek zordi li pé conduire bann l’etude la Bible avek lezot dimoune.
20. Kifer nou kapav content ki bann nation pé gagne enn grand temoignage?
20 Nou pankor koné ki quantité la bonne nouvelle pou preché encore couma enn temoignage pou bann nation. Nou pa koné aussi ki jour ek ki l’heure la fin pou vini. Mais nou koné ki li pré pou vini. Nou content ki sa quantité temoignage ki finn donné lor la terre-la, c’est zis enn parmi bann signe ki montré ki Royaume Bondié pré pou remplace bann gouvernement ki pé dirigé zordi. (Daniel 2:44) Chaque l’année, plusieurs million dimoune gagne l’occasion pou accepté la bonne nouvelle, ek sa glorifié nou Bondié Jéhovah. Anou bien decidé pou reste fidel envers Jéhovah, ek ensam avek nou bann frere partout lor la terre, anou reste bien occupé pou rann temoignage ar tou bann nation. Kan nou faire sa, nou pou sauve nou-mem ek bann dimoune ki ecoute nou.—1 Timothée 4:16.
Eski ou rappel?
• Kifer prophetie ki trouve dan Matthieu 24:14, li enn prophetie extraordinaire?
• Ki zeffort bann premier chrétien ti faire pou preché, ek ki resultat zot ti gagné?
• Couma bann Etudiant la Bible ti arrivé comprend ki li important pou donne enn temoignage ar tou bann nation?
• Kan ou examine l’activité bann Témoins de Jéhovah pendant l’année service ki’nn fek passé, ki kitsoz ki impressionne ou?
[Zimage, page 20]
Jéhovah ti dirige Pierre vers Corneille ek so famille pou donne zot enn temoignage
[Zimage, page 21]
Paul ti voyage plusieurs millier kilometre lor la terre ek lor la mer pou preche la bonne nouvelle
[Tableau page 23-26]
RAPPORT MONDIAL BANN TÉMOINS DE JÉHOVAH POU L’ANNÉE SERVICE 2005