Ki pou aide ou pou comprend la Bible?

“TO FINN cachiette sa bann kitsoz-la ar bann dimoune ki ena sagesse ek bann intellectuel, ek to finn faire bann ti-baba konn sa.” (Luc 10:21) Dapré sa bann parole ki li ti dire so Papa dan le ciel, Jésus ti montré ki nou bizin ena enn bon l’attitude pou nou kapav arrivé comprend la Bible. Nou trouve sagesse Jéhovah parski Li finn donne nou enn livre ki zis bann ki ena l’humilité ek ki disposé pou laisse-zot enseigné, ki kapav vrai-mem comprend sa livre-la.

Li pa facile pou la plupart parmi nou pou montré l’humilité. Nou tou nou’nn herite tendance pou ena l’orgueil. En plus, nou pé vive dan bann “dernier jour,” parmi bann dimoune ki ‘content zot-mem, . . . ki ena la tête dur, ki rempli ar l’orgueil.’ (2 Timothée 3:1-4) Tou sa bann l’attitude-la kapav empeche nou pou comprend Parole Bondié. Malheureusement, nou tou nou influencé inpé par bann dimoune ki autour nou. Dan sa cas-la, couma nou kapav ena l’attitude ki bizin pou arrivé comprend la Bible?

Prepare ou l’esprit ek ou leker

Dan le passé, Ezra, enn chef parmi le peuple Bondié, “ti prepare so leker pou examine la loi Jéhovah.” (Ezra 7:10) Couma nou kapav prepare nou leker? Avant tou, nou bizin ena enn bon maniere pensé lor la Bible. L’apotre Paul ti ecrire so bann compagnon chrétien: “Kan zot finn tann parole Bondié ki nou finn annoncé, zot pa finn accepté sa couma parole bann zom, mais couma li été vrai-mem, setadir couma parole Bondié.” (1 Thessaloniciens 2:13) Mem si Bondié ti servi bann zom pou ecrire la Bible, tou seki zot ti ecrire ti sorti kot Jéhovah. Si nou accepté sa verité important-la, li pou pli facile pou accepté seki nou lire.—2 Timothée 3:16.

Enn lot moyen pou prepare nou leker c’est la priere. Pareil couma Bondié ti servi l’esprit saint pou permette bann dimoune ecrire la Bible, Jéhovah kapav servi sa mem l’esprit-la pou aide nou pou comprend la Bible. Nou bizin prié pou gagne sa l’aide-la. Guette couma enn psalmiste ti supplie Jéhovah: “Faire moi comprend, pou ki mo kapav obeir to la-loi ek pou ki mo kapav garde li avek tou mo leker.” (Psaume 119:34) Nou bizin prié pa zis pou gagne l’intelligence pou comprend seki finn ecrire, mais aussi pou ena enn bon l’attitude dan nou leker, pou ki nou kapav accepté seki la Bible dire. Pou comprend la Bible, nou bizin disposé pou accepté seki vrai.

Ou kapav developpe sa qualité bon l’attitude-la kan ou reflechi couma enn l’etude la Bible kapav aide ou. Nou ena beaucoup raison valable kifer nou bizin examine Parole Bondié, mais pli important ladan c’est ki sa faire nou vinn proche ar Bondié. (Jacques 4:8) A mesure nou lire couma Jéhovah finn reagir dan different situation, couma Li apprecié bann ki content Li, ek couma Li reagir envers bann ki quitte Li, nou arrivé comprend ki qualité personnalité Jéhovah ena. Raison principal kifer nou lire la Bible c’est parski nou envie konn Bondié plus, ek coumsa nou bann relation avek Li pou vinn pli solid.

Bann kitsoz ki kapav empeche nou ena enn bon l’attitude

Ki bann kitsoz kapav empeche nou comprend Parole Bondié? Enn premier kitsoz c’est enn fidelité mal-placé setadir ki nou senti-nou obligé reste fidel ar bann croyance ki lezot finn enseigne nou. Par exemple, kitfois ou bien respecté bann croyance ek l’opinion certain dimoune. Mais, ki ou pou faire si sa bann dimoune-la pa d’accord avek la verité ki ena dan la Bible, ou-soit si pou zot la Bible pena okenn valeur? Dan sa cas-la, li pou difficile pou ou comprend seki la Bible enseigné vrai-mem. A cause sa, la Bible encourage nou pou examine bien seki lezot finn enseigne nou.—1 Thessaloniciens 5:21.

Mama Jésus ti trouve li dan mem situation. Marie ti grandi couma enn Juive. Li ti suive la Loi mosaïk dan tou ti detail ek pena doute ki li ti habitué al synagogue kot ti enseigne la Loi. Mais plitar, li ti comprend ki Bondié ti nepli accepté fason ki so bann parent ti montré li adore Bondié. Alors, Marie ti accepté bann l’enseignement Jésus ek li ti parmi bann premier ki ti vinn chrétien. (Actes 1:13, 14) Kan li’nn faire sa, li pa ti montré ki li ti mank respé envers so bann parent ou-soit envers zot bann tradition; au contraire, sa ti demontré so l’amour ki li ti ena pou Bondié. Si nou envie gagne bann bienfait grace a la Bible, pareil couma Marie, nou bizin mette nou fidelité envers Bondié avant nou fidelité envers bann dimoune.

Malheureusement, beaucoup dimoune pena beaucoup l’estime pou bann verité ki ena dan la Bible. Certain contente zot zis suive bann tradition ki basé lor fausseté. Lezot montré par zot maniere kozé ek zot maniere vive, ki zot pena okenn respé pou la verité. Alors, kan ou accepté bann verité ki ena dan la Bible kitfois ou pou gagne problem avek ou bann camarade, bann voisin, bann collegue travail, ek mem avek ou famille. (Jean 17:14) Pourtant, Salomon ti ecrire: “Acheté la verité ek pa vann li.” (Proverbes 23:23) Si la verité ena l’importance pou ou, Jéhovah pou aide ou pou comprend la Bible.

Enn lot kitsoz ki kapav empeche nou comprend la Bible c’est si nou pa envie mette en pratik seki li dire. Jésus ti dire so bann disciple: “Zot, zot finn gagne privilege pou comprend bann saint secret lor royaume ki dan le ciel, mais sa bann dimoune-la, zot pa finn gagne sa capacité-la. Parski leker sa bann dimoune-la finn vinn insensible, ek avek zot zoreille, zot finn tendé mais zot pa finn prend compte.” (Matthieu 13:11, 15) La plupart bann dimoune avek ki Jésus ti preché pa ti prend li compte, ek zot pa ti’lé changé. Nou trouve enn grand difference kan nou compare zot avek enn marchand lor ki Jésus ti kozé dan enn so bann parabole! Kan marchand-la ti trouve enn perle ki ena beaucoup valeur, dé-suite li ti vann tou seki li ti ena pou acheté sa perle-la. Li pareil avek la verité ki ena dan la Bible. Sa bizin ena enn grand valeur pou nou ek nou bizin faire zeffort pou comprend seki ena ladan.—Matthieu 13:45, 46.

Li pa toujours facile pou laisse lezot enseigne nou

Enn gros problem ki kapav empeche nou comprend la Bible c’est si nou trouve sa difficile pou laisse lezot enseigne nou. Li kapav arrivé ki nou trouve sa difficile pou accepté bann nouveau l’idée avek enn kikenn ki kitfois pena mem niveau ki nou. Mais fodé pa nou blié ki bann zapotre Jésus Christ ti “bann zom ordinaire ki pa ti ena grand l’instruction.” (Actes 4:13) L’apotre Paul ti expliké kifer: “Frere, kan Bondié finn appel zot, zot inn trouvé ki Li pa finn appel beaucoup ki sage dapré sa lé-monde-la, ni beaucoup ki ena enn grand pouvoir, ni beaucoup ki finn né dan bann grand famille. Mais Bondié finn choisir bann kitsoz bet dan sa lé-monde-la pou Li faire bann sage gagne la honte.” (1 Corinthiens 1:26, 27) Si ou trouve sa difficile ki enn ti dimoune vinn enseigne ou, pa blié ki avredir Bondié pé zis servi sa dimoune-la couma enn moyen pou Li enseigne ou. Eski li pa enn grand l’honneur ki nou laisse Jéhovah, nou “Grand Instructeur” enseigne nou?—Isaïe 30:20; 54:13.

Nou ena l’exemple Naamân, enn chef militaire syrien ki ti trouve sa difficile pou faire seki enn ti dimoune ti dire. Li ti al kot prophete Jéhovah, Élisha, parski li ti’nn gagne la lepre ek li ti envie gueri. Mais ala, c’est enn serviteur ki dire li ki li bizin faire pou li gueri. Naamân ti offensé ek li ti trouve sa difficile pou accepté avek l’humilité sa message-la ek aussi fason ki ti donne li sa message-la. Alors premier coup, li ti refuse obeir seki prophete Bondié ti dire li faire. Mais plitar, li ti change so l’attitude ek apré, li ti gueri. (2 Rois 5:9-14) Li pareil kan nou lire la Bible. Kitfois nou pou aprann ki pou nou gueri lor plan spirituel ek moral, nou pou bizin change nou fason vive. Eski nou pou ena assez l’humilité pou laisse enn lot dimoune montré nou seki nou bizin faire? Zis bann dimoune ki ena enn bon l’attitude, ki accepté ki lezot enseigne zot, kapav vrai-mem comprend la Bible.

Ti ena enn dimoune ki ti ena sa bon l’attitude-la. Li ti enn dimoune important ki ti pé servi Candace, la reine l’Éthiopie. Li ti pé retourne l’Afrique dan so kaless kan Philippe, enn disciple ti galopé pou al joinde li. Philippe ti demann missié-la si li ti comprend seki li ti pé lire. Sa fonctionnaire-la ti ena assez l’humilité pou dire: “Couma mo pou comprend si personne pa explik moi?” Kan li’nn arrivé comprend Parole Bondié, li’nn decide pou prend bapteme. Apré sa, li “ti contigne so la-route dan la joie.”—Actes 8:27-39.

Bann Témoins de Jéhovah en general, zot bann dimoune ordinaire. Chaque semaine zot pé enseigne la Bible plus ki six million dimoune. La Bible enseigne nou pli bon fason vive, li explik nou sel vrai l’espoir pou bann dimoune, ek li dire nou couma nou kapav konn Bondié. A cause sa, bann million dimoune finn trouvé ki kan zot etudié la Bible ek zot comprend seki li dire, sa faire zot enn grand plaisir. Oui, ou’si pareil ou kapav comprend la Bible!

[Zimage, page 7]

Naamân ti trouve sa difficile pou faire seki enn simple serviteur ti dire li

[Zimage, page 7]

Kan nou comprend la Bible, sa faire nou leker content