Question bann lecteur

Couma nou koné ki description la sagesse ki ena dan Proverbes 8:22-31 applik ar Jésus Christ, avant ki li ti vinn lor la terre?

Dan livre Proverbes, nou trouve enn description ki inspiré, concernant la sagesse. Nou lire: “Jéhovah Li-mem ti crée moi couma commencement tou seki Li ti faire, bien longtemps avant ki Li ti faire lezot kitsoz. . . . Avant ki Li ti etabli bann montagne, avant bann colline, mo finn né coumadir dan bann douleur . . . Kan Li ti prepare le ciel, mo ti là; . . . lerla mo ti vinn couma enn zouvrier qualifié a coté Li, ek mo ti vinn sa kikenn ki Li ti bien content-la, jour apré jour, alors ki mo ti dan la joie touletan devant Li, . . . ek bann kitsoz ki mo ti content, ti avek bann dimoune lor la terre.”

Li pa possible ki sa verset-la pé koz zis lor sagesse Bondié ou-soit lor la sagesse intellectuel. Kifer? Parski sagesse ki pé kozé ici ti crée couma commencement tou seki Jéhovah ti faire. Jéhovah finn touletan existé ek Li finn touletan ena la sagesse. (Psaume 90:1, 2) So sagesse pa finn ena commencement, li pa finn crée. Li pa finn “né coumadir dan bann douleur.” En plus, la Bible dire ki sa sagesse-la, li kozé ek li agir; alors li represente enn dimoune.—Proverbes 8:1.

Livre Proverbes dire ki bien longtemps, la sagesse ti a coté Jéhovah, nou Createur, couma “enn zouvrier qualifié.” Bien-sur, sa applik ar Jésus. Bien avant ki li vinn lor la terre, Jésus ti travail tellement pré ar Jéhovah ki la Bible dire: “Li existé avant tou lezot kitsoz, et par so moyen tou lezot kitsoz inn commence existé.”—Colossiens 1:17; Révélation 3:14.

Li approprié ki la Bible decrire Garson Bondié couma la sagesse, parski li-mem ki’nn faire konn bann projet ek bann l’ordre Jéhovah ki sage. Avant ki li vinn lor la terre, Jésus ti la Parole, ou-soit Porte-Parole Bondié. (Jean 1:1) La Bible decrire li couma “la puissance Bondié ek la sagesse Bondié.” (1 Corinthiens 1:24, 30) Sa, li enn joli description Garson Bondié. Li ti tellement content bann dimoune ki sa ti pousse li pou donne so la-vie en ranson pou sape zot!—Jean 3:16.