Nou ena courage grace a la foi ek la crainte pou Bondié
“Prend courage ek vinn fort . . . Jéhovah to Bondié avek toi.”—JOSUÉ 1:9.
1, 2. (a) Dapré seki nou kapav pensé, eski bann Israélite ti ena enn chance pou gagne la guerre kont bann Cananéen? (b) Ki l’assurance Josué ti gagné?
En 1473 a.n.l., nation Israël ti pré pou rente dan la Terre promise ek Moïse ti faire zot rappel bann difficulté ki ti pé attann zot. Li ti dire: “Zordi to pé traverse Jourdain pou al tire bann nation ki pli grand ek pli fort ki toi, ek pou prend bann grand la-ville ki ena bann muraille ki haute ziska lé-ciel, enn peuple ki grand ek ki bann geant, bann descendant Anaqim . . . lor ki to finn tann dire: ‘Kisannla kapav tini devant bann descendant Anaq?’ ” (Deutéronome 9:1, 2) Oui, sa bann soldat-la ti bann geant, ek tou dimoune ti konn zot! En plus, certain Cananéen ti ena bann l’armée ki ti bien equipé avek bann cheval ek bann calesse ki ti ena bann lame ferraille dan zot la-roue.—Juges 4:13.
2 Bann Israélite zot, zot ti bann esclave ek zot ti’nn fek passe 40 an dan desert. Alors, nou kapav pensé ki zot pa ti ena beaucoup chance pou gagne la guerre kont bann Cananéen. Pourtant, Moïse ti ena la foi, ek li ti kapav ‘trouvé’ ki Jéhovah ti pé guide so peuple. (Hébreux 11:27) Moïse ti dire le peuple: “Jéhovah to Bondié pé traverse devant toi. . . . Li pou detruire zot net, ek Li-mem pou faire zot soumette devant toi.” (Deutéronome 9:3; Psaume 33:16, 17) Apré la mort Moïse, Jéhovah ti donne Josué l’assurance ki Li pou soutenir li. Li ti dire: “Levé, traverse Jourdain, toi ek tou sa peuple-la, rente dan pays ki mo pou donne bann garson Israël. Personne pa pou tini devant toi toute longue to la-vie. Pareil couma mo ti avek Moïse, mo pou avek toi.”—Josué 1:2, 5.
3. Ki ti aide Josué pou ena la foi ek courage?
3 Pou ki Josué ti kapav gagne l’aide ek direction Jéhovah, li ti bizin lire ek medite lor la Loi Bondié ek suive sa la-Loi-la. Jéhovah ti dire li: “Lerla to pou reussi dan seki to faire, ek to pou agir avek sagesse. Eski mo pa finn donne toi l’ordre? Prend courage ek vinn fort. Pa tremblé ek pa peur, parski Jéhovah to Bondié avek toi partout kot to pou allé.” (Josué 1:8, 9) Josué ti ecoute Bondié ek a cause sa li ti ena courage, li ti fort ek li ti reussi so mission. Mais, la plupart Israélite dan so lepok, pa ti ecouté. A cause sa, zot pa ti reussi dan seki zot ti faire, ek zot ti mort dan desert.
Enn peuple ki pa ti ena la foi ek ki ti mank courage
4, 5. (a) Ki difference ti ena entre l’attitude Josué ek Caleb ek l’attitude dix espion? (b) Ki reaction Jéhovah ti ena kan le peuple ti mank la foi?
4 Quarante an avant sa, kan premier fois bann Israélite ti arrive pré kot Canaan, Moïse ti envoye 12 espion dan sa pays-la. Dix ladan ti bien peur kan zot ti retourné ek zot ti dire: “Tou dimoune ki nou finn trouvé dan sa pays-la, zot bann zom ki extra grand. Nou finn trouve bann Nephilim, bann descendant Anaq, ki sorti dan bann Nephilim. Lerla nou ti senti-nou couma bann sauterelle devant zot.” Eski vrai-mem “tou dimoune” ti bann geant, ou-soit zis bann Anaqim? Eski vrai-mem bann Anaqim ti descendant bann Nephilim ki ti vive avant deluge? Non! Mais kan-mem, parski sa dix espion-la ti exageré dan seki zot ti dire, zot ti faire tou bann Israélite peur. Le peuple ti mem envie retourne l’Égypte kot zot ti esclave!—Nombres 13:31–14:4.
5 Mais, deux parmi bann espion, Josué ek Caleb, ti bien envie rente dan la Terre promise. Zot ti dire: ‘Sa bann Cananéen-la, zot coumadir di-pain pou nou. Zot nepli ena okenn protection, ek Jéhovah avek nou. Pa peur zot.’ (Nombres 14:9) Eski Josué ek Caleb ti ena enn tipé trop confiance dan seki ti pou arrivé? Non! Ensam avek bann lezot Israélite, zot ti trouvé couma Jéhovah ti abaisse l’Égypte ek so bann bondié kan Li ti envoye dix plaie lor sa grand puissance-la. Apré sa, zot ti trouve Jéhovah noye Pharaon ek tou so l’armée dan la mer Rouge. (Psaume 136:15) Li clair ki sa dix espion-la ek bann dimoune ki zot ti influencé, pa ti ena okenn excuse pou peur. Jéhovah ti bien triste kan Li ti dire zot: “Comié lé-temps encore zot pa pou ena la foi en moi, malgré tou bann signe ki mo’nn faire parmi zot?”—Nombres 14:11.
6. Ki rapport ena entre la foi ek courage, ek couma nou trouve sa dan nou lepok?
6 Jéhovah ti montré problem ki bann Israélite ti ena vrai-mem: si zot ti peur coumsa c’est parski zot pa ti ena assez la-foi. Oui, la foi ek courage marche ensam. C’est a cause sa ki l’apotre Jean ti ecrire lor la guerre spirituel ki la congregation chrétienne bizin faire. Li ti dire: “Seki finn gagne victoire lor le monde, c’est nou la-foi.” (1 Jean 5:4) Zordi, c’est grace a enn la-foi pareil couma Josué ek Caleb ki six million Témoins de Jéhovah pé preche la bonne nouvelle lor Royaume Bondié dan le monde entier. Parmi zot ena bann jeune ek bann agé, bann ki fort ek bann ki faible lor plan physik. Okenn l’ennemi pa’nn kapav arrete sa l’armée ki fort ek ki ena courage-la, ni faire zot reste trankil.—Romains 8:31.
Pa “reculé”
7. Ki sa vedir “reculé”?
7 Bann serviteur Jéhovah zordi pé preche la bonne nouvelle avek courage parski zot ena mem l’attitude ki l’apotre Paul. Li ti ecrire: “Nou, nou pa parmi bann ki pé reculé pou al vers destruction, mais nou parmi bann ki ena la foi pou garde nou nâme en vie.” (Hébreux 10:39) Kan Paul ti koz lor “reculé,” li pa ti pé koz lor enn dimoune ki reculé zis parski li ressenti la-peur pou enn ti moment. Avredir, beaucoup serviteur Jéhovah ki fidel, parfois finn ressenti la peur. (1 Samuel 21:12; 1 Rois 19:1-4) Mais, enn dictionnaire biblik expliké ki sa mot reculé-la vedir “renoncé, abandonné,” ek “negligent pou garde la verité.” Sa dictionnaire-la ajouté ki “reculé” kapav faire nou pense “enn dimoune ki baisse la voile ek ralenti” dan so service pou Bondié. Bien-sur, bann ki ena enn la-foi fort jamais pa pou pense pou “ralenti” dan zot service pou Bondié, mem si zot gagne persecution, maladie ou-soit n’importe ki lezot problem encore. Au contraire, zot perseveré dan zot service parski zot koné ki Jéhovah prend zot bien compte ek Li konn zot limite. (Psaume 55:22; 103:14) Eski ou ena sa qualité la-foi-la?
8, 9. (a) Couma Jéhovah ti fortifié la foi bann chrétien dan premier siecle? (b) Ki nou kapav faire pou fortifié nou la-foi?
8 Enn jour, bann zapotre ti ena sentiment ki zot pa ti ena assez la-foi, alors zot ti dire Jésus: “Donne nou plus la-foi.” (Luc 17:5) Bondié ti reponn zot la-priere, surtout jour la Pentecôte l’an 33 n.l. kan zot ti gagne l’esprit saint. Ek grace a sa, zot ti comprend pli bien Parole Bondié ek So projet. (Jean 14:26; Actes 2:1-4) Sa ti fortifié zot la-foi ek zot ti commence preché partout, malgré l’opposition. Zot ti reussi preche la bonne nouvelle “dan tou creation ki trouve enba le ciel.”—Colossiens 1:23; Actes 1:8; 28:22.
9 Nou aussi, pou nou kapav faire nou la-foi vinn pli fort ek perseveré dan nou service, nou bizin etudié ek medite lor Parole Bondié. Nou bizin aussi prié pou gagne l’esprit saint. Nou bizin grave la verité dan nou l’esprit ek dan nou leker, pareil couma Josué, Caleb ek bann chrétien dan premier siecle. C’est zis si nou faire sa, ki nou pou gagne enn la-foi ki pou donne nou courage ki nou bizin pou contigne nou la guerre spirituel ek gagne la victoire.—Romains 10:17.
La foi vedir plus ki zis croire
10. Ki sa vedir ena enn vrai la-foi?
10 L’exemple bann fidel serviteur Bondié dan le passé montré nou ki, pou nou ena enn la-foi ki donne nou courage ek l’endurance, nou bizin pa zis croire dan Bondié. (Jacques 2:19) Pou nou ena sa la-foi-la, nou bizin aprann pou konn Jéhovah couma enn kikenn ki réel, ek ena enn grand confiance en Li. (Psaume 78:5-8; Proverbes 3:5, 6) Ena la foi vedir ki nou sur ki, si nou obeir bann la-loi ek bann principe Bondié, nou pou gagne bann bienfait. (Isaïe 48:17, 18) La foi vedir aussi ena enn grand confiance ki Jéhovah pou realise tou so bann promesse ek ki Li pou vinn “celui ki recompense bann ki rod Li vrai-mem.”—Hébreux 11:1, 6; Isaïe 55:11.
11. Couma Jéhovah ti beni Josué ek Caleb pou zot la-foi ek zot courage?
11 Sa la-foi-la li contigne grandi kan nou mette en pratik la verité dan nou la-vie, kan nou “goute” bann bienfait ki nou gagné, kan nou “trouve” Jéhovah reponn nou la-priere, ek kan nou ressenti direction Jéhovah dan lezot fason encore. (Psaume 34:8; 1 Jean 5:14, 15) Nou kapav sur ki la foi Josué ek Caleb ti vinn pli fort kan zot ti trouvé ki quantité Jéhovah Li bon. (Josué 23:14) Reflechi lor sa bann point-la: Pareil couma Bondié ti promette zot, zot ti reste vivant apré 40 an dan desert. (Nombres 14:27-30; 32:11, 12) Pendant six an, zot ti bien participe dan la guerre pou prend pays Canaan. Ek finalement, Bondié ti faire zot vive longtemps, ti donne zot enn bon la-santé, ek zot ti mem gagne enn partie sa pays-la couma zot l’heritage personnel. Oui vrai-mem, Jéhovah recompense beaucoup bann ki servi Li avek fidelité ek courage!—Josué 14:6, 9-14; 19:49, 50; 24:29.
12. Couma Jéhovah ‘faire so parole vinn pli grand’?
12 Bonté ki Jéhovah ti manifesté envers Josué ek Caleb faire nou rappel bann parole Psaume 138:2 ki dire: “To finn faire to parole vinn encore pli grand ki to nom.” Kan Jéhovah servi so nom pou garanti enn promesse, Li faire sa promesse-la vinn “pli grand.” Dan ki sens? Kan promesse-la realisé, li depasse tou seki nou ti kapav esperé. (Éphésiens 3:20) Jéhovah tini toujours so promesse ek bann ki “prend plaisir” pou servi Li, jamais pa pou regretté.—Psaume 37:3, 4.
Enn zom ki ti “faire Bondié plaisir”
13, 14. Kifer Hénok ti bizin ena la foi ek courage?
13 Nou kapav aprann beaucoup lor la foi ek courage kan nou examine l’exemple Hénok, enn lot serviteur Bondié dan le passé. Avant-mem ki li ti commence prophetisé, kitfois Hénok ti koné ki so la-foi ek so courage ti pou testé. Kifer? Parski Jéhovah ti dire en Éden ki ti pou ena la haine entre bann ki servi Li ek bann ki servi Satan. (Genèse 3:15) Hénok ti koné aussi ki sa la-haine-la ti commencé kan Caïn ti touye so frere Abel, dan commencement l’histoire l’humanité. Ek Adam zot papa, ti encore vivant apepré 310 an apré naissance Hénok.—Genèse 5:3-18.
14 Malgré sa, avek courage Hénok ti “contigne marche avek vrai Bondié” ek li ti condamne “bann kitsoz choquant” ki bann dimoune ti dire kont Jéhovah. (Genèse 5:22; Jude 14, 15) Parski Hénok pa ti peur pou defann vrai l’adoration, surement sa ti faire li ena beaucoup l’ennemi, ek so la-vie ti en danger. C’est dan sa situation-la ki Jéhovah ti protege la vie Hénok pou li pa mort dan la souffrance. Apré ki Jéhovah ti faire Hénok koné ‘ki li ti faire Bondié plaisir,’ Jéhovah ti “transfert” li setadir ki Li ti prend so la-vie, kitfois pendant ki li ti pé gagne enn vision prophetik.—Hébreux 11:5, 13; Genèse 5:24.
15. Ki bon l’exemple Hénok finn donne bann serviteur Bondié dan nou lepok?
15 Dé-suite apré ki Paul ti koz lor transfert Hénok, li ti rappel l’importance ki la foi ena. Li ti dire: “sans la foi li impossible pou faire [Bondié] plaisir.” (Hébreux 11:6) Oui, parski Hénok ti ena la foi, sa ti donne li courage pou marche avek Jéhovah ek pou annonce So jugement ar bann dimoune ki pa ti ena okenn respé pou Bondié. Dan sa domaine-la, Hénok inn donne nou enn bon l’exemple. Nou aussi nou ena mem travail pou faire dan enn lé-monde ki kont vrai l’adoration ek ki rempli ar tou sorte qualité mauvais kitsoz.—Psaume 92:7; Matthieu 24:14; Révélation 12:17.
La crainte pou Bondié donne nou courage
16, 17. Kisannla Obadia ti été, ek dan ki situation li ti été?
16 Apart la foi, enn lot qualité ki donne nou courage, c’est la crainte pou Bondié. Anou examine l’exemple extraordinaire enn zom ki ti ena la crainte pou Bondié. Li ti vive dan lepok prophete Éliya kan le roi Ahab ti dirige royaume Israël dan le nord. Pendant règne Ahab, l’adoration Baal ti contamine royaume le nord couma jamais finn arrivé avant. En realité, ti ena 450 prophete Baal ek 400 prophete poteau sacré, enn symbol ki ti represente sexe male, ek zot ti pé “mange lor la table Jézabel,” femme Ahab.—1 Rois 16:30-33; 18:19.
17 Jézabel ti ena enn grand la-haine pou Jéhovah ek li ti envie elimine vrai l’adoration dan pays. Li ti touye certain prophete Jéhovah ek li ti mem essaye touye Éliya. Mais Jéhovah ti dire Éliya sauvé ek traverse Jourdain. (1 Rois 17:1-3; 18:13) Eski ou kapav maziné ki quantité li ti difficile dan sa lepok-la pou defann vrai l’adoration dan royaume le nord? Li ti pou pli pire encore si ou ti travail dan palais! Pourtant c’est dan sa situation-la-mem ki Obadia ti été.a Li ti enn serviteur ki ti ena la crainte pou Bondié ek li ti en charge dan palais Ahab.—1 Rois 18:3.
18. Kifer Obadia ti enn adorateur Jéhovah ki extraordinaire?
18 Nou sur ki Obadia ti faire bien attention ek li ti prend precaution pou li adore Jéhovah. Mais kan-mem, li pa ti cedé. En realité, 1 Rois 18:3 dire: “Obadia ti ena enn grand la crainte pou Jéhovah.” Oui, Obadia ti ena enn la-crainte extraordinaire pou Bondié! Sa ti donne li enn grand courage ek li ti montré sa zis apré ki Jézabel ti touye bann prophete Jéhovah.
19. Ki Obadia ti faire pou montré so courage?
19 La Bible dire nou: “Alors, letan Jézabel ti touye bann prophete Jéhovah, lerla, Obadia ti prend cent prophete ek ti cachiette zot par cinquante dan enn la-cave, ek li ti donne zot di-pain ek de l’eau.” (1 Rois 18:4) Surement ou kapav maziné ki li ti bien dangereux pou nourri cent dimoune en secret. Obadia pa ti zis bizin faire attention ki Ahab ou-soit Jézabel pa decouvert li, mais li ti bizin aussi faire attention ki sa 850 fausse prophete ki ti frequente palais-la, pa douté ki li ti pé faire. En plus, ti ena beaucoup fausse adorateur dan sa pays-la—depuis so laboureur ziska so prince. Si zot ti koné ki Obadia ti pé faire, zot pa ti pou hesité pou saisi l’occasion pou denonce li, pou zot gagne faveur le roi ek la reine. Pourtant, avek courage Obadia ti nourri bann prophete Jéhovah enba né-né sa bann fausse adorateur-la, sans ki zot koné. Oui, la crainte pou Bondié ena enn pouvoir extraordinaire, pa vrai?
20. Couma la crainte ki Obadia ti ena pou Bondié ti aide li, ek couma so l’exemple aide ou?
20 Obadia ti montré so courage parski li ti ena la crainte pou Jéhovah. Surement a cause sa-mem ki Jéhovah ti protege li kont so bann l’ennemi. Proverbes 29:25 dire: “Tremblé devant bann zom, sa-mem ki mette nou dan piege, mais enn dimoune ki mette so confiance en Jéhovah, pou protegé.” Obadia ti enn dimoune ordinaire, pareil couma nou tou. Li ti peur pangar so bann l’ennemi decouvert li ek touye li, pareil couma nou aussi nou ti pou peur dan so place. (1 Rois 18:7-9, 12) Mais kan-mem, la crainte ki li ti ena pou Bondié ti donne li courage pou surmonte la peur ki li ti pou kapav ena pou bann zom. Obadia enn bon l’exemple pou nou tou, surtout pou bann ki riské perdi zot liberté ou-soit mem zot la-vie parski zot adore Jéhovah. (Matthieu 24:9) Oui, anou faire tou seki nou kapav pou servi Jéhovah “avek la crainte ek enn grand respé.”—Hébreux 12:28.
21. Ki nou pou examiné dan prochain lartik?
21 Pa zis la foi ek la crainte pou Bondié ki donne nou courage; l’amour kapav ena enn pli grand pouvoir encore. L’apotre Paul ti ecrire: “Bondié pa finn donne nou enn l’esprit capon, mais enn l’esprit ki ena la force, l’amour ek bon jugement.” (2 Timothée 1:7) Dan prochain lartik, nou pou trouvé couma l’amour kapav aide nou pou servi Jéhovah avek courage pendant sa bann dernier jour ki critik-la.—2 Timothée 3:1.
[Note]
a Ici, nou pa pé koz prophete Obadia.
Ki ou pou reponn?
• Ki ti aide Josué ek Caleb pou ena courage?
• Ki vedir ena enn vrai la-foi?
• Kifer Hénok pa ti peur pou annonce jugement Bondié?
• Couma la crainte pou Bondié donne nou courage?
[Zimage, page 15]
Jéhovah ti donne Josué sa l’ordre-la: “Prend courage ek vinn fort”
[Zimage, page 17]
Hénok ti annonce parole Bondié avek courage