Montré respé pou nou bann reunion ki sacré
“Lerla, mo pou faire zot vinn lor mo montagne ki saint, ek mo pou faire zot trouve la joie dan mo lakaz kot faire la priere.”—ISAÏE 56:7.
1. Ki bann raison biblik nou ena pou montré respé ki bizin pou nou bann reunion?
Jéhovah finn rassemblé so peuple, bann chrétien oint ek bann membre lezot brebis, pou zot adore Li lor so “montagne ki saint.” Li pé faire zot trouve la joie dan so “lakaz kot faire la priere,” so temple spirituel ki enn “lakaz kot tou bann nation faire la priere.” (Isaïe 56:7; Marc 11:17) Tousala montré ki l’adoration Jéhovah li saint, li pur ek li ena enn niveau bien haut. Kan nou montré respé ki bizin pou nou bann reunion kot nou al etudié ek adore Jéhovah, nou montré ki nou ena mem fason pensé ki Jéhovah lor bann kitsoz sacré.
2. Ki montré nou ki Jéhovah ti considere sa place ki Li ti choisir pou adore Li-la couma sacré, ek couma Jésus aussi ti montré sa?
2 Dan le passé, bann Israélite ti bizin considere place ki Jéhovah ti choisir pou adore Li, couma enn place sacré. Zot ti bizin verse de l’huile sacré lor tabernacle, so bann meuble ek bann materiel ki ti servi ladan ek sanctifié zot “pou ki vrai-mem zot vinn bien sacré.” (Exode 30:26-29) Sa deux piece ki ti ena dan tabernacle-la, ti appel zot “Saint” ek “Très-Saint.” (Hébreux 9:2, 3) Plitar ti remplace tabernacle par temple ki ti trouve Jérusalem. Parski Jérusalem ti centre l’adoration Jéhovah, ti appel li “la ville saint.” (Nehémia 11:1; Matthieu 27:53) Kan Jésus ti lor la terre, li ti montré respé ki bizin pou temple. Li ti bien en colere kan li ti trouvé ki bann dimoune pa ti ena okenn respé pou temple parski zot ti pé faire commerce ladan ek zot ti pé passe dan la cour temple pou faire chemin coupé.—Marc 11:15, 16.
3. Ki montré nou ki bann l’assemblée ki ti ena en Israël, zot ti sacré?
3 Bann Israélite ti rassemblé regulierement pou adore Jéhovah ek pou ecoute bann Lévite lire so la-Loi. Pou montré ki sa bann rassemblement-la ti sacré, zot ti appel certain jour pendant sa bann fête-la, bann rassemblement ki saint ou-soit bann l’assemblée ki sacré. (Lévitique 23:2, 3, 36, 37) Dan lepok Ezra ek Nehémia, ti faire enn l’assemblée publik kot bann Lévite “ti pé explik le peuple la loi.” Parski “le peuple entier ti pé ploré letan zot ti pé tann bann parole la loi,” bann Lévite “ti pé donne tou bann dimoune l’ordre pou reste trankil, ek zot ti dire: ‘Reste trankil! parski sa jour-la li enn jour sacré.’ ” Apré sa, bann Israélite ti faire fête des Huttes pendant sept jour avek enn “grand la-joie.” En plus, bann Lévite “ti lire livre la loi vrai Bondié bien fort toulé-jour, depuis premier jour ziska dernier jour; ek zot ti celebré sa fête-la pendant sept jour, ek huitieme jour ti ena enn l’assemblée ki sacré, dapré l’ordre ki zot ti’nn gagné.” (Nehémia 8:7-11, 17, 18) Sa bann fête-la ti vrai-mem bann l’evenement sacré ek tou seki ti là ti bizin ecouté avek enn grand respé.
Nou bann reunion, zot sacré
4, 5. Ki kitsoz dan nou bann reunion montré ki sa bann rassemblement-la zot sacré?
4 Li vrai ki zordi Jéhovah pena okenn la-ville saint lor la terre, kot ena enn temple special kot nou kapav adore Li. Mais seulement, fodé pa nou blié ki bann reunion kot nou al adore Jéhovah, zot sacré. Trois fois par semaine, nou joinde pou lire ek etudié la Bible. Pareil couma dan lepok Nehémia, nou gagne ‘l’explication’ Parole Jéhovah ek nou comprend so ‘sens.’ (Nehémia 8:8) Tou nou bann reunion commencé ek fini par la priere, ek dan la plupart reunion, nou chante bann cantik pou loué Jéhovah. (Psaume 26:12) Oui, bann reunion forme partie dan nou l’adoration, a cause sa, par nou l’attitude ek par fason ki nou ecouté, nou bizin montré respé pou sa bann rassemblement-la.
5 Jéhovah beni so bann serviteur kan zot joinde ensam pou adore Li, pou etudié so Parole ek pou profite bon compagnie zot bann frere ek soeur spirituel. Kan inn arrive l’heure pou assisté reunion, nou kapav sur ki c’est la-bas-mem ki Jéhovah ‘finn donne l’ordre pou ena so benediction.’ (Psaume 133:1, 3) Nou gagne sa benediction-la si nou là ek si nou ecoute bien l’enseignement spirituel ki pé donné. En plus, Jésus ti dire: “Là kot ena deux ou trois ki rassemblé lor mo nom, mo là parmi zot.” Kan nou lire contexte sa verset-la, nou trouvé ki sa applik ar reunion ki bann ancien faire pou traite bann problem grave ki arrivé entre bann chrétien, mais sa applik aussi ar nou bann reunion. (Matthieu 18:20) Si Jésus Christ, par moyen l’esprit saint, li là kan bann chrétien joinde lor so nom, eski nou pa bizin considere sa bann reunion-la couma sacré?
6. Ki nou kapav dire lor bann place kot nou faire reunion ou-soit l’assemblée?
6 Li vrai ki Jéhovah pa reste dan bann temple ki’nn faire par bann zom. Pourtant, nou bann la-Salle du Royaume, zot bann place kot pratik vrai l’adoration. (Actes 7:48; 17:24) Nou joinde la-bas pou etudié Parole Jéhovah, pou prié Li ek pou chante bann cantik ki loué Li. Li pareil aussi kan nou al dan bann la-Salle l’assemblée. Bann l’auditorium, bann la-salle kot faire exposition, ou-soit bann stade ki nou loué pou faire l’assemblée, zot vinn bann place kot nou adore Jéhovah pendant ki nou pé faire nou bann rassemblement sacré. Kan nou adore Jéhovah dan sa bann l’occasion-la, ki nou beaucoup ou-soit tigit, nou bizin montré nou respé par nou l’attitude ek par nou conduite.
Bann fason pou montré respé pou nou bann reunion
7. Dan ki fason bien precis nou kapav montré respé pou nou bann reunion?
7 Nou kapav montré respé pou nou bann reunion dan bann fason bien precis. Enn fason c’est kan nou là pou chante cantik. Beaucoup sa bann cantik-la, zot bann la-priere, alors nou bizin chante sa avek respé. L’apotre Paul ti cite Psaume 22 ek li ti applik sa bann parole-la ar Jésus: “Mo pou annonce to nom ar mo bann frere, au milieu la congregation mo pou loué toi avek bann cantik.” (Hébreux 2:12) Alors, li bon ki nou prend l’habitude pou assize dan nou place avant-mem ki president annoncé ki cantik pou chanté, ek concentré lor sens bann parole ki nou pé chanté. Kan nou chanté, anou montré ki nou ena mem sentiment ki ecrivain Psaume 111, ki ti dire: “Mo pou loué Jéhovah avek tou mo leker, ensam avek bann dimoune droite ki proche avek moi, ek dan l’assemblée.” (Psaume 111:1) Oui, chante bann cantik pou loué Jéhovah, c’est enn bon raison pou arrive boner reunion ek pou resté ziska la fin.
8. Ki l’exemple biblik montré ki bann la-priere ki faire dan reunion, zot merité ki nou ecoute zot avek respé?
8 Enn lot kitsoz ki augmente valeur tou nou bann reunion, c’est bann la-priere sincere ki faire pou tou bann assistant. Enn fois, bann chrétien premier siecle dan Jérusalem ti rassemblé ek “zot tou ensam,” zot ti “prié Bondié” par enn la-priere bien sincere. Ki l’effet sa la-priere-la ti ena lor zot? Malgré persecution, zot ti contigne “koz parole Bondié avek courage.” (Actes 4:24-31) Eski nou kapav pensé ki pendant sa la-priere-la, enn parmi bann chrétien pa ti pé concentré ek li ti pé pense lezot kitsoz? Non, “zot tou ensam” ti pé prié. Bann la-priere ki faire pendant nou bann reunion, montré sentiment tou bann assistant. Zot merité ki nou ecoute zot avek enn grand respé.
9. Couma nou kapav montré ki par nou l’habillement ek nou conduite, nou ena respé pou nou bann rassemblement ki sacré?
9 Enn lot fason ki nou kapav montré ki quantité respé nou ena pou nou bann reunion ki sacré, c’est par fason ki nou habillé. Nou l’apparence, setadir nou coiffure ek nou linge toulé-deux kapav augmente dignité nou bann reunion. L’apotre Paul ti donne sa conseil-la: “Mo envie ki partout kot zot été, bann zom prié ek leve bann la-main ki fidel, sans okenn colere ek debat. Mo envie aussi ki bann femme habille bien, avek modestie ek bon sens, pa avek bann fason tresse cheveux, ni avek l’or ou-soit perle,ou-soit bann linge ki coute cher, mais couma li bizin été pou bann femme ki dire ki zot adore Bondié avek respé.” (1 Timothée 2:8- 10) Kan nou assisté bann grand l’assemblée ki faire dan bann stade en plein air, nou kapav adapté nou l’habillement avek le temps ki faire dehors, mais li bizin reste digne. En plus, parski nou ena respé pou l’assemblée, nou pa pou mangé, ni mache chewing-gum pendant bann session. Kan nou ena enn l’habillement ki digne ek enn bon conduite pendant nou bann rassemblement, sa honore Jéhovah, so l’adoration ek nou bann frere ek soeur.
Enn conduite ki digne pou bann serviteur Bondié
10. Couma l’apotre Paul ti montré ki nou bizin ena enn grand respé pendant nou bann reunion?
10 Dan 1 Corinthiens chapitre 14, nou trouve enn bon conseil ki l’apotre Paul ti donné pou montré couma bann reunion chrétien bizin deroulé. Apré sa, li ti tire sa conclusion-la: “Ki tou kitsoz passe couma bizin ek dan l’ordre.” (1 Corinthiens 14:40) Nou bann reunion zot forme enn partie important dan bann activité congregation ek nou conduite en tant ki bann serviteur Jéhovah, bizin digne pendant sa bann reunion-la.
11, 12. (a) Ki nou bizin faire bann zenfant ki assisté reunion comprend? (b) Couma bann zenfant kapav exprime zot la-foi pendant bann reunion?
11 Nou bizin surtout montré bann zenfant couma zot bizin comporte-zot pendant reunion. Bann parent bizin explik zot zenfant ki la Salle du Royaume ek place kot faire l’etude de livre, c’est pa bann place pou joué. C’est bann place kot nou adore Jéhovah ek nou etudié so Parole. Le roi Salomon ki ti sage, ti ecrire: “Veille bien to bann pas kan to al dan lakaz vrai Bondié; ek to bizin kosté pré pou to tendé.” (Ecclésiaste 5:1) Moïse ti demann bann Israélite pou rassemblé zot ensam, bann adulte ek bann “ti-zenfant” toulé-deux. Li ti dire zot: “Rassemblé le peuple . . . pou zot ecouté ek pou zot aprann, parski zot bizin ena la crainte pou Jéhovah zot Bondié ek veille bien pou applik tou bann parole sa la-loi-la. Ek zot bann garson ki pa ti koné, bizin ecouté, ek zot bizin aprann pou ena la crainte pou Jéhovah.”—Deutéronome 31:12, 13.
12 Zordi aussi pareil. Bann zenfant accompagne zot parent reunion surtout pou ecouté ek pou aprann. Kan zot inn vinn assez grand pou suive seki pé dire ek pou comprend bann l’enseignement de base ki ena dan la Bible, zot kapav faire “declaration publik” zot la-foi, kan zot donne bann ti commentaire. (Romains 10:10) Pou commencé, enn ti-zenfant kapav dire dé-trois mot pou reponn enn question ki li’nn comprend. Apré, kitfois li pou zis lire reponse-la, mais avek le temps, li pou essaye donne bann reponse dan so prop mot. C’est enn kitsoz ki pou faire sa zenfant-la di-bien ek li pou trouve sa interessant. Bann adulte content kan zot tann enn zenfant reponn par li-mem pou montré so la-foi. Bien-sur, bann parent pou donne enn bon l’exemple kan zot-mem zot reponn dan reunion. Li bon aussi ki bann zenfant ena zot prop la Bible, zot cantik, ek enn copie bann publication ki pé etudié, si possible. Zot bizin aprann pou pa abime sa bann publication-la. Tousala pou aide bann zenfant pou comprend ki nou bann reunion zot sacré.
13. Ki l’impression nou envie ki bann dimoune ki vinn assisté reunion premier fois ena?
13 Bien-sur, nou pa oulé ki nou bann reunion ressemblé bann la-messe ki faire dan bann l’eglise la chrétienté ki trop serieux ek ki grandiose, ou-soit kot ena enn paquet tapage coumadir dan enn concert rock. Nou envie ki bann reunion ki faire dan nou bann la-Salle du Royaume, zot amical ek accueillant, mais fodé pa ki ena enn l’ambiance trop relax pareil couma dan certain club. Nou al reunion pou adore Jéhovah, alors fodé ki nou bann reunion zot touletan digne. Nou envie ki bann dimoune ki vinn assisté reunion premier fois, kapav dire: “Bondié vrai-mem parmi zot,” apré ki zot inn tann program ki’nn presenté, ek apré ki zot inn trouve nou conduite ek conduite nou bann zenfant.—1 Corinthiens 14:25.
Enn kitsoz permanent
14, 15. (a) Couma nou kapav evité “neglige lakaz nou Bondié”? (b) Couma prophetie Isaïe 66:23 pé realisé zordi?
14 Couma nou finn trouvé commencement sa lartik-la, Jéhovah pé rassemblé so peuple ek pé faire zot trouve la joie dan so “lakaz kot faire la priere,” setadir dan so temple spirituel. (Isaïe 56:7) Nehémia, enn fidel serviteur Jéhovah ti rappel bann Juif ki zot bizin ena respé pou temple ki ti ena lor la terre, ek montré sa par zot contribution materiel. Li ti dire: “Fodé pa ki nou neglige lakaz nou Bondié.” (Nehémia 10:39) Alors nou aussi, fodé pa ki nou neglige l’invitation ki Jéhovah faire nou pou adore Li dan so “lakaz kot faire la priere.”
15 Pou montré l’importance pou rassemblé regulierement pou adore Jéhovah, Isaïe ti donne sa prophetie-la: “ ‘Ek vrai-mem pou arrivé ki, enn nouvelle lune apré enn lot nouvelle lune, ek enn sabbat apré enn lot sabbat, tou dimoune pou vinn prosterne devant moi,’ c’est seki Jéhovah ti dire.” (Isaïe 66:23) Sa-mem ki pé arrivé dan nou lepok. Regulierement, chaque semaine dan chaque mois, bann chrétien ki finn voué zot la-vie ar Jéhovah, vinn ensam pou adore Li. Parmi bann kitsoz ki zot faire pou adore Jéhovah, zot assisté bann reunion ek zot participe dan predication. Eski ou parmi bann dimoune ki ‘vinn prosterne devant Jéhovah’ regulierement?
16. Kifer fodé ki nou assisté reunion regulierement ek nou faire sa vinn enn kitsoz permanent dan nou la-vie depuis asterla-mem?
16 Dan le monde nouveau, Isaïe 66:23 pou applik bien ar la vie ki bann dimoune pou amené. Dan sa lepok-la, dan enn sens litteral, “tou dimoune pou vinn prosterne devant” Jéhovah, setadir zot pou adore Li, semaine apré semaine ek mois apré mois, ek zot pou faire sa pou touletan. Dan le monde nouveau, nou bann rassemblement pou adore Jéhovah, zot pou forme partie dan nou la-vie spirituel pou touletan. Alors, li pou bon ki depuis asterla-mem nou assisté reunion regulierement ek nou faire sa vinn enn kitsoz permanent dan nou la-vie.
17. Kifer nou bizin assisté nou bann reunion “encore plus kan [nou] trouve jour-la pé kosté”?
17 Alors ki la fin pé kosté, nou bizin encore pli decidé pou assisté tou nou bann reunion. Parski nou ena respé pou nou bann reunion ki sacré, nou pa laisse nou travail, nou bann devoir lekol ou-soit bann leson ki nou prend apré lekol, empeche nou assisté reunion regulierement avek nou bann frere ek soeur. Nou bizin sa la-force ki nou gagné kan nou frequente nou bann frere ek soeur-la. Bann reunion donne nou l’occasion pou konn nou bann frere ek soeur pli bien, pou encourage nou camarade, ek pou montré “l’amour, ek faire bann bon action.” Nou bizin faire sa “encore plus kan [nou] trouve jour-la pé kosté.” (Hébreux 10:24, 25) Alors, anou toujours montré respé ki bizin pou nou bann rassemblement ki sacré, kan nou assisté sa bann rassemblement-la regulierement, kan nou habille couma bizin, ek kan nou ena enn bon conduite. Kan nou faire sa, nou montré ki nou ena mem fason pensé ki Jéhovah lor bann kitsoz sacré.
Revision
• Couma nou koné ki nou bizin considere nou bann rassemblement couma sacré?
• Ki kitsoz dan nou bann reunion montré ki zot sacré?
• Couma bann zenfant kapav montré zot respé pou nou bann reunion ki sacré?
• Kifer assisté bann reunion bizin vinn enn kitsoz permanent dan nou la-vie?
[Zimage, page 28]
Bann reunion kot nou adore Jéhovah, zot sacré n’importe kot sa nou faire zot
[Zimage, page 31]
Nou bann “ti-zenfant” assisté reunion pou ecouté ek pou aprann