Eski ou faire ou part pou rann bann reunion pli encourageant?

“Kan zot rassemblé, . . . ki tou seki passé, fortifié zot tou.”—1 COR. 14:26.

1. Dapré 1 Corinthiens chapitre 14, cite enn l’objectif bien important bann reunion.

‘SA REUNION-LA finn bien encourage moi!’ Eski ou finn deja dire sa bann parole-la apré ki ou finn assisté enn reunion dan la Salle du Royaume? Surement! Bann reunion zot vrai mem encourage nou. Mais sa li pa etonnant. Apré tou, pareil couma dan lepok bann premier chretien, enn l’objectif bien important bann reunion zordi, c’est pou fortifié tou bann assistant lor plan spirituel. Remarké couma l’apotre Paul ti mette l’accent lor sa l’objectif bien precis-la dan premier lettre ki li ti ecrire bann Corinthien. Toute longue chapitre 14, plusieurs fois li ti dire ki chaque partie dan programme bann reunion bizin ena mem l’objectif, setadir “pou fortifié la congregation.”—Lire 1 Corinthiens 14:3, 12, 26.a

2. (a) Grace a ki l’influence nou kapav gagne bann reunion ki encourageant? (b) Ki question nou pou examiné?

² Nou reconette ki c’est avant tou grace a l’influence l’esprit Bondié ki nou kapav gagne bann reunion ki fortifié nou. Ala kifer nou commence chaque reunion par enn la priere sincere ar Jéhovah ek nou demann Li pou beni nou rassemblement par moyen so l’esprit saint. Mais kan mem, nou reconette ki tou bann membre dan congregation kapav faire zot part pou rann bann reunion plus encourageant ki possible. Alors, ki nou kapav faire personnellement pou ki bann reunion ki organisé chaque semaine dan nou la Salle du Royaume, zot toujours reconforte ek encourage zot tou lor plan spirituel?

3. Ki l’importance bann reunion ena?

³ Pou reponn sa question-la, nou pou examine certain point ki bann frere ki dirige bann reunion bizin garde bien dan zot l’esprit. Nou pou guetté aussi couma zot tou dan congregation kapav faire zot part pou ki bann reunion vinn enn moment encourageant pou tou bann assistant. Sa c’est enn kitsoz ki interesse nou beaucoup parski nou bann reunion zot sacré. Oui, assisté ek participé dan bann reunion, c’est bann l’aspect important dan nou l’adoration pou Jéhovah.—Ps. 26:12; 111:1; Is. 66:22, 23.

Enn reunion pou etudié la Bible

4, 5. Ki l’objectif l’etude La Tour de Garde?

⁴ Nou tou nou envie tire profit ar l’etude La Tour de Garde ki faire toulé-semaine. Pou nou comprend bien l’objectif principal sa reunion-la, anou ré-guette raison kifer ena l’etude La Tour de Garde ek aussi certain changement ki finn faire dan bann lartik l’etude.

⁵ L’objectif l’etude La Tour de Garde c’est pou etudié la Bible avek l’aide sa periodik-la. Oui, dan l’etude La Tour de Garde chaque semaine, nou gagne “bann explication” lor Parole Bondié, ek pareil couma dan lepok Nehémia, sa l’etude-la aide nou pou “comprend so sens.”—Neh. 8:8; Is. 54:13.

6. (a) Ki changement finn faire dan l’etude La Tour de Garde? (b) Ki nou bizin garde dan nou l’esprit concernant bann verset kot inn ecrire “lire”?

⁶ La Bible c’est nou livre principal. A cause sa finn faire enn changement dan l’etude La Tour de Garde. A coté certain verset nou trouve sa mot-la: “Lire.” Nou tou nou encouragé pou suive lecture sa bann verset-la dan nou prop la Bible pendant bann reunion. (Actes 17:11) Kifer? Kan nou trouve conseil ki Bondié donne nou dan nou prop la Bible, sa ena enn pli grand l’influence lor nou. (Héb. 4:12) Alors, avant ki lire sa bann verset-la, frere ki pé faire l’etude La Tour de Garde bizin donne zot tou assez le temps pou rod sa bann verset-la dan zot la Bible.

Nou gagne plus le temps pou exprime nou la foi

7. Ki l’occasion nou gagné pendant l’etude La Tour de Garde?

⁷ Enn lot changement ki finn ena, c’est par rapport avek longueur bann lartik l’etude. Dan bann dernier l’année ki’nn passé, bann lartik-la finn vinn pli courte. Pendant l’etude, ena moins paragraphe pou lire, alors, bann frere ek soeur gagne plus le temps pou faire bann commentaire. Asterla, beaucoup plus dan congregation gagne l’occasion pou exprime zot la foi en publik. Zot kapav faire sa kan zot rann reponse pou question ki posé dan periodik, kan zot faire application enn verset, kan zot cite enn l’experience ki montré kifer li sage ki nou suive bann principe la Bible, ou-soit dan lezot fason encore. Bizin reserve inpé le temps aussi pou koz lor bann zimage.—Lire Psaume 22:22; 35:18; 40:9.

8, 9. Ki role sa frere ki faire l’etude La Tour de Garde ena?

⁸ Mais, nou pou kapav gagne plus le temps pou donne different commentaire selman si bann ki participé donne bann reponse courte ek ki sa frere ki faire l’etude-la evite faire bann commentaire trop souvent. Alors, pou ki reunion-la encourageant pou zot tou, ki kapav aide sa frere ki dirige l’etude-la pou trouve enn bon l’equilibre entre so bann commentaire ek commentaire bann frere ek soeur?

⁹ Pou reponn sa question-la, anou prend enn l’exemple. Nou kapav compare enn l’etude La Tour de Garde ki bien dirigé ar enn bouquet fleur ki joli pou guetté. Pareil couma dan enn grand bouquet fleur ena beaucoup different fleur, pendant l’etude La Tour de Garde aussi ena beaucoup different commentaire. Dan enn bouquet ena bann fleur different grosseur ek couleur. Pareil aussi dan l’etude La Tour de Garde, bann commentaire ki donné, zot different longueur ek zot presenté dan different fason. Mais couma nou kapav decrire role sa frere ki faire l’etude-la? Bann commentaire ki li faire de temps en temps zot couma sa bann deux-trois feuille vert ki nou ajouté avek beaucoup soin dan enn bouquet. Sa bann feuille-la zot pa seki nou plus remarké, mais zot donne bouquet-la enn forme ek rassemblé tou sa bann fleur-la ensam pou forme enn sel. Pareil aussi avek sa frere ki faire l’etude-la. Li bizin garde bien dan so l’esprit ki fodé pa ki so bann commentaire dominé dan sa l’etude-la, mais zot bizin complete bann expression louange ki la congregation offert. Oui, kan mette ensam tou commentaire ki la congregation faire ek deux-trois ti commentaire bien placé sa frere ki faire l’etude-la, sa forme coumadir enn joli bouquet parole ki pou faire zot tou dan l’assistance content.

“Anou touletan offert Bondié enn sacrifice louange”

10. Couma eski bann premier chretien ti considere bann reunion?

¹⁰ Description ki Paul ti faire lor bann reunion dan 1 Corinthiens 14:26-33, aide nou pou comprend couma ti pé faire bann reunion dan premier siecle. Enn specialiste lor la Bible ti faire enn commentaire lor sa bann verset-la. Li ti ecrire ki enn kitsoz bien interessant concernant reunion ki bann premier chretien ti faire, c’est ki surement “preské chaque dimoune ti vini avek sentiment ki li ti ena privilege ek l’obligation pou faire so part dan sa reunion-la. Enn dimoune pa ti vini zis avek l’intention pou ecouté; li pa ti vini zis pou gagne kitsoz, mais pou donné.” Oui, bann premier chretien ti considere bann reunion couma bann l’occasion pou exprime zot la foi.—Rom. 10:10.

11. (a) Ki kitsoz ki rann bann reunion encourageant, ek kifer? (b) Ki suggestion, kan nou applik zot, kapav ameliore nou bann commentaire dan bann reunion? (Guette note.)

¹¹ Kan nou exprime nou la foi pendant bann reunion, sa contribué beaucoup “pou fortifié la congregation.” Surement ou pou d’accord ki n’importe ki quantité l’année nou finn assisté bann reunion, li toujours enn plaisir pou ecoute bann commentaire ki nou bann frere ek soeur faire. Kan enn fidele compagnon chretien ki agé donne enn reponse sincere, sa touche nou. Nou senti-nou encouragé kan enn ancien ki ena beaucoup l’amour faire enn commentaire rempli ar discernement. Ek nou pa kapav empeche-nou faire enn sourire kan enn coup, enn zenfant rann enn reponse par li-mem pou exprime so l’amour sincere pou Jéhovah. Li clair ki, kan nou donne bann commentaire, nou tou nou pé faire nou part pou rann bann reunion encourageant.b

12. (a) Ki nou kapav aprann ar l’exemple Moïse ek Jérémie? (b) Couma la priere kapav aide nou pou donne bann commentaire?

¹² Mais, pou bann ki timide, donne enn commentaire kapav enn kitsoz bien difficile. Si ou dan sa cas-la, kitfois li pou bon ou rappel ki mem bann fidele serviteur Bondié dan le passé ti ena sa probleme-la. Par exemple, Moïse ek Jérémie ti mank l’assurance pou koz en publik. (Ex. 4:10; Jér. 1:6) Oui, pareil couma Jéhovah ti aide zot pou loué Li en publik, Li kapav aide ou pou offert bann sacrifice louange. (Lire Hébreux 13:15.) Couma ou kapav gagne l’aide Jéhovah pou surmonte ou la peur pou donne bann commentaire? D’abord prepare ou reunion bien. Apré sa, avant ou al la Salle, prié Jéhovah dan enn fason precis ek demann Li pou donne ou courage pou donne enn commentaire. (Phil. 4:6) Ou pé demann enn kitsoz ki “en accord avek so volonté,” alors ou kapav ena confiance ki Jéhovah pou reponn ou la priere.—1 Jean 5:14; Prov. 15:29.

Bann reunion ki ena l’objectif pou ‘fortifié, encouragé ek consolé’

13. (a) Ki l’effet nou bann reunion bizin ena lor l’assistance? (b) Ki question surtout bien important pou bann ancien?

¹³ Paul ti dire ki enn l’objectif important bann reunion congregation c’est pou “fortifié, encourage ek console” bann ki dan l’assistance.c (1 Cor. 14:3) Zordi, couma bann ancien kapav faire sur ki zot bann sujet vrai-mem remonte moral ek console zot bann frere ek soeur? Pou reponn sa question-la, anou examine enn reunion ki Jésus ti faire zis apré so resurrection.

14. (a) Ki bann l’evenement ti arrivé avant reunion ki Jésus ti faire? (b) Kifer surement bann zapotre ti bien soulagé kan “Jésus ti vinn pré ar zot ek ti koz ar zot”?

¹⁴ D’abord, remark bann l’evenement ki ti arrivé avant sa reunion-la. Zis avant ki Jésus mort, so bann zapotre “ti abandonne li, ek ti sauvé,” ek pareil couma Jésus ti predire, ‘zot ti separé, sakenn ti al dan so prop lakaz.’ (Marc 14:50; Jean 16:32) Mais, apré so resurrection, Jésus ti invite so bann zapotre ki ti decouragé, pou assisté enn reunion special.d Ki zot ti faire? “Toulé onze disciple ti al Galilée, lor montagne kot Jésus ti donne zot rendez-vous.” Kan zot ti arrivé, “Jésus ti vinn pré ar zot ek ti koz ar zot.” (Mat. 28:10, 16, 18) Mazinn enn coup couma zot ti senti-zot soulagé ki Jésus ti prend l’initiative pou koz ar zot! Ki Jésus ti dire zot?

15. (a) Lor ki kitsoz Jésus ti kozé, mais lor kitsoz li pa ti kozé? (b) Ki l’effet sa reunion-la ti ena lor bann zapotre?

¹⁵ Jésus ti commencé par enn l’annonce: “Mo’nn gagne tou pouvoir.” Apré sa li ti donne zot enn mission: “Alors, allé ek faire bann disciple.” Finalement, li ti donne zot enn l’assurance rempli ar l’amour: “Mo avek zot toulé-jour.” (Mat. 28:18-20) Mais eski ou finn remarké ki Jésus pa ti faire? Li pa ti corrige so bann zapotre. Li pa ti servi sa reunion-la pou dire zot ki zot pa ti ena assez la foi, pou faire zot senti-zot encore plus coupable ou-soit pou mette en doute zot bann mobile. Au contraire, Jésus ti rassure zot ki li ek so Papa bien content zot, ek li ti montré sa kan li ti confié zot enn grand responsabilité. Par fason ki Jésus ti agir envers so bann zapotre, ki l’effet sa ti ena lor zot? Zot ti senti-zot tellement fortifié, encouragé, ek consolé ki, enn tipé le temps apré sa reunion-la, zot ti recommence ‘enseigné ek annonce la bonne nouvelle.’—Actes 5:42.

16. Couma eski zordi bann ancien imite l’exemple Jésus kan zot dirige bann reunion ki reconforte lezot?

¹⁶ Pareil couma Jésus, bann ancien considere bann reunion couma bann l’occasion pou rassure zot bann compagnon chretien ki jamais Jéhovah pa pou arrete content so peuple. (Rom. 8:38, 39) A cause sa, dan zot bann sujet, bann ancien attire l’attention lor point fort zot bann frere, pa lor zot point faible. Zot pa mette en doute mobile zot bann frere. Au contraire, zot bann parole montré ki zot considere zot bann compagnon chretien couma bann dimoune ki content Jéhovah ek ki envie faire seki droite. (1 Thess. 4:1, 9-12) Bien sur, parfois bann ancien bizin donne bann conseil pou redresse la congregation en general. Mais si c’est zis certain membre congregation ki bizin sa bann conseil-la, souvent li pli bon ki zot donne sa en privé. (Gal. 6:1; 2 Tim. 2:24-26) Kan zot pé koz ar congregation en entier, bann ancien bizin ena l’objectif pou felicite zot bann frere, chaque fois ki possible. (Is. 32:2) Zot faire zeffort pou koz dan enn fason, ki kan reunion fini, tou dimoune dan l’assistance senti-zot reconforté ek fortifié.—Mat. 11:28; Actes 15:32.

Enn place kot nou gagne reconfort

17. (a) Kifer li encore pli important zordi ki nou bann reunion zot enn place kot nou gagne reconfort? (b) Ki ou kapav faire personnellement pou ki nou bann reunion zot encourageant? (Guette l’encadré “Dix fason pou rann nou bann reunion encourageant pou nou-mem ek pou lezot.”)

¹⁷ A mesure ki le monde Satan pé vinn de plus en plus cruel, nou bizin faire sur ki nou bann reunion zot enn l’endroit kot tou dimoune gagne reconfort. (1 Thess. 5:11) Enn soeur ek so mari ti faire face ar enn l’epreuve bien difficile plusieurs l’année avant. Soeur-la dire: “Kan mo ti dan la Salle du Royaume, mo ti ena l’impression ki Jéhovah ti pé prend moi dan so lé-bras. Pendant sa le temps ki nou ti la [dan reunion], entouré avek nou bann frere ek soeur, nou ti senti ki nou ti kapav jette nou fardeau lor Jéhovah, ek nou ti ressenti la paix dan nou leker.” (Ps. 55:22) Nou souhaité ki tou bann ki assisté nou bann reunion senti-zot encouragé ek consolé pareil couma sa soeur-la. Pou faire sur ki nou pou ressenti sa, anou contigne faire nou part pou rann bann reunion encourageant.

[Notes]

Ki ou pou reponn?

• Ki l’importance bann reunion ena?

• Kifer eski bann commentaire ki donné dan bann reunion “fortifié la congregation”?

• Ki nou kapav aprann ar reunion ki Jésus ti faire avek so bann disciple?

[L’encadré page 26]

DIX FASON POU RANN NOU BANN REUNION ENCOURAGEANT POU NOU-MEM EK POU LEZOT

Prepare a l’avance. Si deja a l’avance ou prepare seki pou etudié dan la Salle du Royaume, ou pou pli concentré pendant bann reunion ek ou pou tire plus profit.

Assisté regulierement. Enn bon l’assistance li pli encourageant pou tou bann ki present. Alors ou presence ena l’importance.

Arrive a l’heure. Si ou fini prend ou place avant ki programme commencé, ou pou kapav chante cantik ek ecoute la priere, bann kitsoz ki forme partie dan nou l’adoration pou Jéhovah.

Vini bien equipé. Amenn ou la Bible ek (bann) publication ki pou servi dan reunion pou ki ou kapav suive ek comprend pli bien seki pé examiné.

Pa laisse ou distraire. Par exemple, attann ki reunion fini pou ou lire bann message lor ou portable. Coumsa, ou pou garde tou bann kitsoz concernant ou la vie personnel dan place ki bizin.

Participé. Kan pli beaucoup dimoune donne commentaire, pli beaucoup dimoune encouragé ek fortifié par different fason ki nou exprime nou la foi.

Faire bann ti commentaire. Sa donne pli beaucoup dimoune l’occasion pou donne enn commentaire.

Pa rate ou bann participation. En tant ki bann zeleve ki participe dan Lekol ministere theocratik ou-soit bann participant dan reunion service, prepare-ou bien, repete a l’avance ek essaye autant ki possible pou pa rate ou bann participation.

Felicite bann ki participé. Dire bann ki’nn participe dan reunion ou-soit ki’nn donne bann commentaire, ki quantité ou apprecié bann zeffort ki zot inn faire.

Encourage nou camarade. Ou pou gagne enn plus grand la joie si ou dire lezot enn bonjour amical ek ena bann conversation encourageant avek zot, avant ek apré reunion.