Enseigne seki la Bible enseigné vrai-mem
“Faire bann disciple parmi bann dimoune dan tou bann nation, . . . enseigne zot.”—Matthieu 28:19, 20.
1. Ki nou kapav dire lor facilité pou gagne la Bible?
La Bible, Parole Jéhovah, c’est enn parmi bann livre ki pli vié ek ki finn plus distribué dan le monde. Finn traduire sa livre-la en entier ou-soit en partie dan plus ki 2,300 langue. Plus ki 90 pour cent population la terre kapav gagne la Bible dan zot langue maternel.
2, 3. (a) Kifer ena confusion concernant bann l’enseignement ki ena dan la Bible? (b) Ki question nou pou examiné?
2 Plusieurs million dimoune lire enn portion la Bible toulé-jour. Certain finn lire li plusieurs fois depuis commencement ziska la fin. Plusieurs millier religion pretann ki zot base zot l’enseignement lor la Bible, mais zot pa d’accord entre zot lor seki li enseigné. Seki mette bann dimoune plus dan confusion encore, c’est kan zot trouve bann grand desaccord ki ena entre bann membre mem religion. Certain ena bann doute lor l’origine ek lor valeur la Bible. Beaucoup dimoune considere li couma enn livre sacré ki zis bon pou faire bann voeu ek pou faire serment pou dire la verité dan la cour.
3 En realité, dan la Bible ena parole setadir message Bondié pou bann dimoune dan le monde entier. C’est enn message ki ena beaucoup pouvoir. (Hébreux 4:12) En tant ki bann Témoins de Jéhovah, nou envie ki bann dimoune aprann seki la Bible enseigné. Nou bien content pou accompli sa mission ki Jésus ti donne so bann disciple-la. Li ti dire zot: “Allé ek faire bann disciple parmi bann dimoune dan tou bann nation, . . . enseigne zot.” (Matthieu 28:19, 20) Dan nou ministere publik, nou joinde bann dimoune sincere ki nepli koné ki zot pou pensé kan zot trouve grand confusion ki ena dan bann religion partout dan le monde. Zot envie konn la verité lor nou Createur ek aprann seki la Bible dire lor but nou la-vie. Anou guette trois question ki beaucoup dimoune demann zot-mem. Pou chaque question, nou pou guette bann reponse ki bann chef religieux donné ek ki mette dimoune dan erreur, ek apré, nou pou guette seki la Bible enseigné vrai-mem. Sa trois question-la c’est: (1) Eski Bondié interessé ar nou? (2) Kifer nou lor la terre? (3) Ki arrive nou kan nou mort?
Eski Bondié interessé ar nou?
4, 5. Kifer bann dimoune pensé ki Bondié pa interessé ar nou?
4 Anou examine premier question: Eski Bondié interessé ar nou? Malheureusement, beaucoup dimoune pensé ki reponse sa question-la, li non. Kifer? Enn raison, c’est parski zot vive dan enn lé-monde ki rempli ar la haine, la guerre ek souffrance. Beaucoup dire ki ‘si Bondié ti vrai-mem interessé ar nou, Li ti pou empeche sa bann malheur-la arrivé.’
5 Enn lot raison kifer bann dimoune pensé ki Bondié pa interessé ar nou c’est parski bann chef religieux inn faire zot pense coumsa. Ki souvent bann chef religieux dire kan enn malheur arrivé? Kan enn madame ti perdi so deux ti-garson dan enn accident, enn pretre ti dire li: “C’est volonté Bondié. Li ti bizin encore deux ange.” Kan bann chef religieux koz coumsa, en realité zot pé rann Bondié responsable bann malheur ki arrivé. Pourtant disciple Jacques ti ecrire: “Kan enn kikenn dan l’epreuve, fodé pa li dire: ‘Bondié pé testé moi.’ Parski pa kapav testé Bondié par bann mauvais kitsoz, ek Li pa testé personne dan sa fason-la.” (Jacques 1:13) Jamais Jéhovah pa faire bann mauvais kitsoz arrivé. “Jamais vrai Bondié pou faire le mal.”—Job 34:10.
6. Kisannla ki derriere mechanceté ek souffrance ki ena dan sa lé-monde-la?
6 Alors, kifer eski ena sa quantité mechanceté ek souffrance-la lor la terre? Enn raison c’est parski bann dimoune en general finn rejette domination Bondié. Zot pa’lé soumette-zot ar so bann la-loi ek ar so bann principe ki juste. Sans ki zot rann-zot compte, zot inn soumette-zot ar l’adversaire Bondié, Satan le Diable, parski en realité “le monde entier li dan pouvoir sa kikenn ki mauvais-la.” (1 Jean 5:19) Kan nou konn sa, li pli facile pou comprend kifer bann mauvais kitsoz existé. Satan li mauvais, li rempli ar la haine, li trompe dimoune ek li pena okenn pitié. Nou bizin attann ki le monde ena mem personnalité ki so chef. Alors, sa pa etonne nou ki ena sa quantité mechanceté ek souffrance-la zordi!
7. Kifer nou passe par bann souffrance?
7 Enn lot raison kifer ena souffrance c’est a cause l’imperfection bann dimoune. Bann dimoune imparfait ena tendance pou faire tou pou gagne pouvoir. Souvent sa crée bann la-guerre, sa pousse bann dimoune pou faire dominere ek pou faire lezot souffert. Ecclésiaste 8:9 bien dire: “Dimoune finn domine dimoune pou zot prop malheur.” Enn lot raison kifer ena souffrance c’est parski nou “tou passe par bann moment ek bann situation ki [nou] pa attann.” (Ecclésiaste 9: 11) Souvent bann dimoune gagne enn malheur parski zot trouve-zot dan mauvais place, dan mauvais moment.
8, 9. Couma nou koné ki Jéhovah vrai-mem interessé ar nou?
8 Sa bien encourage nou kan nou aprann ki Jéhovah pa faire nou souffert. Mais eski Bondié vrai-mem interessé ar seki pé passé dan nou la-vie? Oui bien-sur! Nou konn sa parski so Parole la Bible dire nou kifer Li finn laisse bann dimoune persisté pou faire le mal. En realité, ena deux question ki ti soulevé: so droit pou dominé ek l’integrité bann dimoune. Jéhovah, en tant ki Createur tout-puissant, pa obligé faire nou koné pou ki raison Li permette la souffrance. Pourtant, Li faire nou konn sa parski Li interessé avek nou.
9 Anou examine enn lot preuve ki Bondié interessé avek nou. Kan ti ena mechanceté partout lor la terre dan lepok Noé, la Bible dire nou ki Bondié “so leker ti faire mal.” (Genèse 6:5, 6) Eski Bondié encore ena mem sentiment zordi? Oui, parski Bondié pa changé. (Malaki 3:6) Li ena la haine pou l’injustice ek Li detesté trouve bann dimoune souffert. La Bible enseigne nou ki bientot, Bondié pou repare tou di-tort ki domination bann dimoune ek l’influence Satan finn amené. Eski c’est pa enn preuve ki Bondié interessé ar nou?
10. Couma Jéhovah considere la souffrance?
10 Bann chef religieux faire Bondié passe pou mauvais kan zot dire ki bann malheur ki nou gagné c’est volonté Bondié. Mais Jéhovah Li, Li impatient pou faire souffrance disparette. 1 Pierre 5:7 dire: “Li interessé ar zot.” C’est sa ki la Bible enseigné vrai-mem!
Kifer nou lor la terre?
11. Ki bann religion dan le monde souvent dire lor bann raison kifer nou lor la terre?
11 Asterla, anou examine enn deuxieme question ki beaucoup dimoune posé: Kifer nou lor la terre? Bann religion ki ena dan le monde souvent dire ki dimoune lor la terre zis pou enn ti-moment. Pou zot, la terre li zis enn place kot nou faire enn escale, apré sa, nou contigne nou voyage pou al vive dan enn lot place. Certain chef religieux mem dire ki enn jour Bondié pou detruire la terre. A cause sa qualité l’enseignement-la, beaucoup dimoune pensé ki vaut mieux zot profite la vie tant ki zot kapav, avant la mort vini. Ki la Bible enseigné vrai-mem lor bann raison kifer nou lor la terre?
12-14. Ki la Bible enseigné concernant projet Bondié pou la terre ek pou bann dimoune?
12 Bondié ena enn projet extraordinaire pou la terre ek pou bann dimoune. Li pa “finn crée la terre pou nanyin” mais “pou ki dimoune reste lor là.” (Isaïe 45:18) En plus, Jéhovah “finn pose la terre lor so bann base bien fixe; Jamais, oui, jamais li pa pou bougé.” (Psaume 104:5) Kan nou aprann sa bann kitsoz-la concernant projet Bondié pou la terre ek pou bann dimoune, sa kapav aide nou pou comprend kifer nou lor la terre.
13 Genèse chapitre 1 ek 2 montré ki Bondié ti prend beaucoup soin pou prepare la terre pou ki bann dimoune kapav vive lor là. A la fin period creation, kan Jéhovah ti fini prepare la terre pou bann dimoune, tou ti “bien bon.” (Genèse 1:31) Bondié ti mette premier zom ek premier femme, Adam ek Ève, dan enn joli jardin en Éden ek ti donne zot bann bon mangé en abondance. Apré sa, Li ti dire zot: “Gagne beaucoup zenfant, multiplié, rempli la terre ek ena control lor li.” Zot ti pou gagne bann zenfant parfait, faire la terre entier vinn enn paradi, ek domine lor bann zanimo avek amour.—Genèse 1:26-28.
14 Sa vedir ki projet Jéhovah, c’est ki bann dimoune parfait vive pou touletan lor la terre. La Bible dire: “Bann dimoune juste pou possede la terre, ek zot pou reste lor là pou touletan.” (Psaume 37:29) Oui, Bondié ti crée bann dimoune pou zot profite la vie eternel dan enn paradi lor la terre. Sa-mem projet Bondié, ek sa-mem ki la Bible enseigné vrai-mem!
Ki arrive nou kan nou mort?
15. Ki la plupart religion enseigné lor seki arrive enn dimoune kan li mort?
15 Asterla, anou examine enn troisieme question ki beaucoup dimoune pose-zot: Ki arrive nou kan nou mort? La plupart religion enseigné ki ena enn kitsoz dan enn dimoune ki contigne vive apré ki lekor-la inn mort. Certain religion encore enseigné ki Bondié puni bann mauvais dimoune kan Li faire zot souffert pou touletan dan enn l’enfer difé. Mais eski li vrai, sa? Ki la Bible enseigné vrai-mem lor la mort?
16, 17. Dapré la Bible, dan ki condition bann mort été?
16 Parole Bondié dire: “Bann ki vivant koné ki zot pou mort. Mais bann dimoune mort pa konn nanyin ditou, zot nepli gagne okenn la-paye.” Bann dimoune mort “pa konn nanyin ditou,” sa vedir ki zot pa kapav tendé, trouvé, kozé, ressenti kitsoz, ek pensé. Zot pa gagne okenn la-paye. Couma zot pou kapav gagne enn la-paye? Zot pa kapav faire okenn travail! En plus, “zot l’amour, zot la-haine ek zot jalousie finn fini disparette” parski zot pa kapav manifesté okenn sentiment.—Ecclésiaste 9:5, 6, 10.
17 Seki la Bible dire lor sa sujet-la, li bien simple ek clair—bann dimoune mort pa contigne vive dan enn lot place. Kan nou mort, pena nanyin ki quitte nou lekor, ki contigne vive ek ki reprend naissance dan enn lot lekor, couma bann dimoune ki croire dan reincarnation dire. Nou kapav comprend sa par enn l’exemple. Nou la-vie li pareil couma la flamme enn la-bougie. Kan sa la-flamme-la teigne, li pa al okenn part. Li nepli existé, sa-mem tou.
18. Kan enn etudiant la Bible aprann ki bann dimoune mort pa konn nanyin, ki sa kapav faire li comprend?
18 C’est enn verité ki simple mais ki ena enn grand signification. Reflechi lor seki sa impliké. Kan enn etudiant la Bible aprann ki bann dimoune mort pa konn nanyin, li pou pli facile pou li comprend ki so bann ancetre pa pou kapav vinn faire li di-tort, mem ki quantité mauvais sentiment zot ti kapav ena pou li kan zot ti encore vivant. Li pa pou tardé pou comprend ki so bann famille ki’nn mort, pa kapav tendé, trouvé, kozé, ressenti kitsoz, ni pensé. Sa vedir ki zot pa pé souffert enn grand solitude dan enn purgatoire, ni zot pé souffert dan enn l’enfer difé. Au contraire, la Bible enseigné ki bann dimoune mort ki dan memoire Bondié pou ressuscité. C’est enn l’esperance extraordinaire ki nou ena, pa vrai?—Jean 5:28, 29.
Enn nouveau livre pou nou servi
19, 20. Ki responsabilité nou ena en tant ki chrétien, ek ki livre finn preparé expré pou nou servi dan nou ministere?
19 Nou finn examine zis trois question ki beaucoup dimoune posé. Pou chaque question, la Bible rann bann reponse bien clair ek direct. C’est enn grand la-joie pou partage sa bann verité-la ar bann dimoune ki envie koné ki la Bible enseigné! Mais ena beaucoup lezot question bien important encore ki bann dimoune sincere pose-zot ek zot envie gagne bann reponse ki kapav convaink zot. En tant ki chrétien, nou ena responsabilité pou aide zot pou gagne bann reponse pou sa bann question-la.
20 Li pa facile pou enseigne la verité ki ena dan la Bible dan enn fason ki clair ek ki touche leker bann dimoune. Pou aide nou, “l’esclave fidel et avisé” finn prepare enn livre expré pou nou servi dan nou ministere. (Matthieu 24:45-47) Titre sa livre 224 page-la c’est Ki la Bible enseigné vrai-mem?
21, 22. Cite bann kitsoz bien interessant ki ena dan livre Ki la Bible enseigné vrai-mem?
21 Ti presente sa livre-la pendant l’assemblée district bann Témoins de Jéhovah, “L’obeissance pou Bondié” ki ti ena en 2005. Ena bann kitsoz bien interessant dan sa livre-la. Par exemple, so cinq premier page aide nou pou commence bann l’etude la Bible avek bann dimoune. Surement ou pou trouve sa facile pou ena enn conversation lor bann zimage ek bann verset ki ena dan sa cinq premier page-la. Ou kapav aussi servi sa partie-la pou montré bann etudiant couma pou rod bann chapitre ek bann verset dan la Bible.
22 Sa livre-la inn ecrire dan enn fason bien simple ek clair, ek finn faire enn zeffort pou touche leker bann etudiant ek autant ki possible faire zot comprend ki sa concerne zot. Au commencement chaque chapitre, ena plusieurs question ek a la fin ena l’encadré “Seki la Bible enseigné.” Dan sa l’encadré-la ena bann reponse biblik pou bann question ki posé au commencement. Bann zimage, bann commentaire ki ena a coté, ek bann l’exemple ki ena dan sa livre-la pou aide etudiant-la pou bien comprend bann nouveau l’idée ki li pou aprann. Bann chapitre dan sa livre-la finn ecrire dan enn langage bien simple, mais si etudiant-la demann plus l’explication, ena enn l’appendice ki pou permette ou examine 14 sujet important plus en profondeur.
23. Couma nou kapav servi livre Ki la Bible enseigné? kan nou conduire bann l’etude?
23 Livre Ki la Bible enseigné? finn ecrire pou aide nou enseigne bann dimoune ki ena different niveau l’education ek ki sorti dan different religion. Si enn etudiant pena okenn connaissance lor la Bible, kitfois li pa pou possible faire enn chapitre enn sel coup. Prend le temps ki bizin pou faire l’etude ek faire tou pou touche leker etudiant-la. Si li pa comprend enn certain l’exemple ki servi dan sa livre-la, explik li l’exemple-la, ou-soit servi enn lot l’exemple. Prepare-ou bien, faire tou seki ou kapav pou servi sa livre-la dan enn fason efficace ek prié Bondié pou aide ou pou ki ou kapav “servi parole la verité couma bizin.”—2 Timothée 2:15.
Ena reconnaissance pou bann grand privilege ki ou ena
24, 25. Ki grand privilege Jéhovah finn donne so peuple?
24 Jéhovah inn donne so peuple bann grand privilege. Li’nn donne nou possibilité pou konn la verité lor Li. Fodé jamais ki nou considere sa privilege-la couma enn kitsoz banal! En realité, Bondié finn cachiette so projet ar bann dimoune ki ena l’orgueil ek Li finn revele sa ar bann dimoune humble. En rapport avek sa, Jésus ti dire: “Devant tou dimoune, mo loué toi Papa, Seigneur le ciel ek la terre, parski to finn cachiette sa bann kitsoz-la ar bann dimoune ki ena la sagesse ek bann intellectuel, ek to finn faire bann ti-baba konn sa.” (Matthieu 11:25) C’est enn grand l’honneur pou faire partie parmi bann dimoune humble ki servi pli grand le Roi l’univers, Jéhovah—pa tou dimoune ki gagne sa privilege-la!
25 Bondié inn donne nou aussi privilege pou enseigne lezot lor Li. Rappel ki ena dimoune ki finn faire Li passe pou mauvais kan zot finn enseigne bann fausseté lor Li. A cause sa, beaucoup dimoune ena enn mauvais l’opinion lor Jéhovah. Zot pensé ki Li pa interessé ar nou ek ki so leker dur. Eski ou disposé pou corrige sa erreur-la? Eski c’est sa ki ou envie? Eski ou envie ki partout bann dimoune sincere konn la verité lor Bondié? Alors, faire tou seki ou kapav pou montré ou l’obeissance pou Bondié kan ou preché ek enseigne la verité avek zèle ek kan ou montré lezot seki la Bible dire lor bann kitsoz bien important. Bann dimoune ki pé rod la verité bizin aprann seki la Bible enseigné vrai-mem.
Ki ou pou reponn?
• Couma nou koné ki Bondié interessé ar nou?
• Kifer nou lor la terre?
• Ki arrive nou kan nou mort?
• Ki kitsoz ou finn surtout apprecié dan livre Ki la Bible enseigné?
[Zimage, page 7]
La Bible enseigné ki souffrance pou disparette
[Remerciement photo]
La-haut a droite, enn tifi: © Bruno Morandi/age fotostock; a gauche, enn femme: AP Photo/Gemunu Amarasinghe; enba, bann refugié: © Sven Torfinn/Panos Pictures
[Zimage, page 9]
Bann dimoune juste pou vive pou touletan dan Paradi