Aide lezot pou obeir seki la Bible enseigné
“Concernant bann ki lor bon la terre, c’est bann ki garde la parole ek rapporte fruit avek l’endurance apré ki zot finn tann la parole avek enn bon leker.”—Luc 8:15.
1, 2. (a) Dan ki but finn faire livre Ki la Bible enseigné vrai-mem? (b) Couma pendant bann dernier l’année, Jéhovah finn beni zeffort so bann serviteur pou faire bann disciple?
“Sa livre-la c’est vrai-mem enn bon livre! Mo bann etudiant ek moi, nou trouve li extraordinaire. Avek sa livre-la, nou kapav commence bann l’etude la Bible avek bann dimoune devant zot la-porte.” C’est seki enn soeur pionnier ti dire lor livre Ki la Bible enseigné vrai-mem? a Enn proclamateur agé ti dire lor sa livre-la: “Sa faire 50 an ki mo preché. Mo finn gagne privilege pou aide beaucoup dimoune pou konn Jéhovah. Mais mo bizin dire ki sa livre-la, li special. Li ena bann zimage ek bann l’exemple ki nouveau ek ki faire nou content.” Eski ou aussi ou ena mem sentiment lor livre Ki la Bible enseigné? Sa livre-la finn preparé pou aide ou rempli mission ki Jésus ti donné: “Allé ek faire bann disciple parmi bann dimoune dan tou bann nation, . . . enseigne zot pou suive tou mo bann commandement.”—Matthieu 28:19, 20.
2 Ena apepré 6.6 million Témoins de Jéhovah ki disposé pou obeir l’ordre Jésus pou al faire bann disciple, ek nou sur ki zot faire leker Jéhovah content. (Proverbes 27:11) Pena doute ki Jéhovah pé beni zot zeffort. Par exemple, pendant l’année service 2005, zot inn preche la bonne nouvelle dan 235 pays, ek en moyenne zot inn conduire plus ki 6,061,500 l’etude la Bible. C’est coumsa ki beaucoup dimoune finn tann ‘parole Bondié ek finn accepté li, pa couma parole bann zom, mais couma li été vrai-mem, setadir couma parole Bondié.’ (1 Thessaloniciens 2:13) Pendant sa deux dernier l’année ki finn passé-la, plus ki 500,000 nouveau disciple finn change zot la-vie pou vive en accord avek bann principe Jéhovah ek finn voué-zot ar Li.
3. Ki bann question lor fason ki bizin servi livre Ki la Bible enseigné? nou pou examiné dan sa lartik-la?
3 Eski dernierement, ou finn ena la joie pou conduire enn l’etude la Bible avek enn kikenn? Dan le monde entier, ena encore bann dimoune ki ena “enn bon leker.” Kan sa bann dimoune-la pou tann parole Bondié, zot pou ‘garde li ek zot pou rapporte fruit avek l’endurance.’ (Luc 8:11-15) Anou guetté couma ou kapav servi livre Ki la Bible enseigné? pou faire bann disciple. Nou pou examine trois question: (1) Couma ou kapav commence enn l’etude la Bible? (2) Ki bann method pli efficace ou kapav servi pou enseigné? (3) Couma ou kapav aide enn etudiant la Bible pou ki li aussi li vinn enn enseignant Parole Bondié?
Commence enn l’etude la Bible
4. Kifer certain hesité pou etudié la Bible, ek dan sa cas-la couma ou kapav aide zot?
4 Si demann ou pou saute enn la-riviere enn sel coute, surement ou pou refusé, pa vrai? Mais si mette bann roche enn apré lot dan bann bon distance, surement ou pou accepté pli facilement pou traverse la riviere-la. Li pareil aussi avek enn dimoune ki bien occupé. Li kapav hesité pou etudié la Bible. Kitfois li pensé ki sa pou demann-li trop beaucoup lé-temps ek zeffort. Dan sa cas-la, ki ou kapav faire pou aide li? Si ou ena plusieurs ti conversation lor livre Ki la Bible enseigné?, sa pou aide li aprann beaucoup kitsoz, ek sa kapav pousse li pou etudié la Bible regulierement. Si ou prepare-ou bien, chaque fois ki ou retourne visite sa dimoune-la, c’est coumadir ou pé pose enn roche ki pou aide ou etudiant progressé pou vinn enn camarade ar Jéhovah.
5. Kifer ou bizin lire livre Ki la Bible enseigné?
5 Mais, avant ki ou kapav aide enn dimoune pou tire profit ar livre Ki la Bible enseigné?, ou bizin bien konn livre-la ou-mem. Eski ou finn lire li net? Enn couple ti amenn sa livre-la avek zot kan zot ti al en vacance ek zot ti commence lire li kan zot ti lor la plage. Enn madame ki ti reste dan sa pays-la ek ki ti pé vann bann souvenir, ti approche zot. Li ti trouve titre sa livre-la: Ki la Bible enseigné vrai-mem? Li ti dire sa couple-la ki c’est exactement sa-mem ki li’nn fek demann Bondié dan so la-priere. Couple-la ti content pou donne madame-la enn copie sa livre-la. Eski ou, ou finn “ré-acheté le temps” pou lire sa livre-la, kitfois enn deuxieme fois, alors ki ou pé attann dan enn rendez-vous, ou-soit pendant enn pause dan travail ou-soit dan lekol? (Éphésiens 5:15, 16) Si ou faire sa, ou pou konn sa livre-la bien, ek kitfois ou kapav mem crée bann l’occasion pou koz lor la avek bann lezot dimoune.
6, 7. Couma ou kapav servi livre Ki la Bible enseigné? pou commence bann l’etude la Bible?
6 Kan ou servi sa livre-la dan predication, servi bien bann zimage, bann text ek bann question ki trouve dan page 4, 5, ek 6. Par exemple, ou kapav commence enn conversation ek demann dimoune-la: “Avek tou bann problem ki dimoune pé gagné zordi, ki coté ou pensé nou kapav gagne bann conseil ki sur?” Ecoute bien seki li reponn ou, apré sa lire 2 Timothée 3:16, 17, ek explik li ki la Bible propose enn vrai solution pou bann problem ki ena dan le monde. Attire so l’attention lor bann zimage ki ena dan page 4 ek 5, ek demann li: “Parmi tou sa bann problem-la, lekel ki affecté ou plus?” Kan dimoune-la inn fini reponn ou, demann li pou trappe ou livre. Lire dan ou la-Bible sa verset ki a coté sa zimage ki li’nn montré ou-la. Apré, lire seki ena dan page 6 ek demann li: “Parmi sa six question ki mentionné a la fin sa page-la, pou ki question ou ti pou content gagne enn reponse?” Kan li’nn choisir enn question, montré li chapitre ki koz lor sa question-la, laisse livre-la avek li ek faire bann l’arrangement precis pou ré-vinn visite li pou koz lor sa question-la.
7 Sa presentation-la pou prend ou apepré cinq minute. Mais sa pou permette ou pou koné ki interesse sa dimoune-la, pou lire ek pou faire l’application deux verset la Bible, ek pou pose enn base pou enn nouvelle visite. Kitfois depuis longtemps sa dimoune-la pa finn gagne enn conversation ki aussi encourageant ek reconfortant ki sa ti conversation ki ou finn gagné avek li-la. Alors, mem si li bien occupé, kitfois li pou content pou reserve dé-trois minute encore pou discute avek ou pendant ki ou aide li pou faire enn nouveau pas lor “chemin ki amenn vers la vie.” (Matthieu 7:14) Avek le temps, ek a mesure ki li montré plus l’interet, ou kapav prend inpé plus lé-temps pou faire so l’etude. Kitfois-mem ou kapav propose li pou assizé ek pou etudié pendant inpé pli longtemps.
Bann method pou enseigné ki pli efficace
8, 9. (a) Couma ou kapav aide ou etudiant pou faire face ar bann l’epreuve ki li pou kapav gagné? (b) Ki coté nou kapav trouve bann materiaux ki resisté ar difé, pou developpe enn la-foi solid?
8 Enn fois ki enn dimoune commence obeir seki la Bible enseigné, kitfois li pou gagne bann problem ki pou empeche li progressé. L’apotre Paul ti dire: “Tou bann ki envie reste attaché avek Bondié, en tant ki disciple Jésus Christ pou gagne persecution zot aussi.” (2 Timothée 3:12) Paul ti compare sa bann l’epreuve-la ar enn difé ki kapav detruire bann materiaux construction mauvais qualité, mais ki pa kapav abime bann materiaux couma l’or, l’argent, ek bann pierre precieuse. (1 Corinthiens 3:10-13; 1 Pierre 1:6, 7) Pou aide ou etudiant developpe bann qualité necessaire pou faire face ar bann l’epreuve, ou bizin aide li kan ou construire avek bann materiaux ki resisté ar difé.
9 Enn psalmiste ti compare “bann parole Jéhovah” ar “l’argent ki’nn raffiné dan enn four la terre kot fonn metal ek ki’nn purifié sept fois.” (Psaume 12:6) Oui, dan la Bible ena tou bann materiaux ki ena valeur ek ki nou kapav servi pou developpe enn la-foi solid. (Psaume 19:7-11; Proverbes 2:1-6) Ek livre Ki la Bible enseigné? montré ou couma ou kapav servi bann text la Bible dan enn fason efficace.
10. Couma ou kapav attire l’attention ou etudiant lor la Bible?
10 Toute longue l’etude, attire l’attention ou etudiant lor bann verset ki ena dan chapitre ki zot pé examiné. Servi bann question pou aide li comprend bann verset principal ek pou applik zot dan so la-vie. Faire attention pou pa dire li ki li bizin faire. Au contraire, imite l’exemple Jésus. Kan enn missié ki ti bien konn la Loi ti pose li enn question, li ti reponn: “Ki finn ecrire dan la Loi? Couma to lire?” Missié-la ti reponn dapré bann l’Ecriture, ek Jésus ti aide li pou trouvé couma li kapav applik sa principe-la dan so la-vie. Jésus ti aussi donne enn l’exemple pou montré li couma sa l’enseignement-la ti concerne li. (Luc 10:25- 37) Livre Ki la Bible enseigné? rempli ar bann l’exemple simple ki ou kapav servi pou aide ou etudiant pou applik bann principe la Bible dan so la-vie.
11. Ki quantité paragraphe ou bizin faire pendant enn l’etude?
11 Livre Ki la Bible enseigné? servi enn langage simple ek direct pou explik Parole Bondié, pareil couma Jésus ti faire kan li ti koz lor bann kitsoz profond mais dan enn langage simple. (Matthieu 7:28, 29) Suive so l’exemple. Donne bann explication simple, clair ek exact. Pa pressé pou ou fini enn chapitre. Au contraire, decidé ki quantité paragraphe ou pou faire dapré situation ek capacité ou etudiant. Jésus ti konn limit so bann disciple ek li pa ti dire zot plus ki seki zot ti bizin koné dan sa l’heure-la.—Jean 16:12.
12. Couma bizin servi l’appendice?
12 Dan livre Ki la Bible enseigné? ena enn l’appendice ki koz lor 14 sujet. Ou ki pé faire l’etude, ou bizin koné couma pou bien servi sa l’appendice-la dapré besoin ou etudiant. Par exemple, li possible ki li pa pé arrivé comprend enn sujet, ou-soit, li ena bann question precis lor certain sujet a cause seki li ti croire avant. Dan sa cas-la, ou kapav zis montré li partie dan l’appendice ki koz lor sa sujet-la ek laisse li examine sa personnellement. Mais parfois, etudiant-la pou bizin ki ou examine sujet-la ensam avek li. Dan sa l’appendice-la ena bann sujet biblik fondamental, couma par exemple: “ ‘Nâme’ ek ‘l’esprit’—Ki sa bann mot-la vedir vrai-mem?” ek “Ki été ‘Babylone la Grande’?” Kitfois ou pou trouve sa necessaire pou examine sa bann sujet-la avek ou etudiant. Dan sa l’appendice-la pena question, alors ou pou bizin bien konn bann renseignement ki ena ladan pou pose bann question ki approprié.
13. Ki role la priere joué pou fortifié la foi enn dimoune?
13 Psaume 127:1 dire: “Si Jéhovah Li-mem pa construire lakaz-la, c’est pou nanyin ki bann ki’nn construire sa, inn travail dur.” Alors, kan ou pé prepare-ou pou conduire enn l’etude la Bible, prié Jéhovah pou aide ou. Faire en sorte ki la priere ki ou faire avant ek apré chaque l’etude, montré bann relation bien proche ki ou ena avek Jéhovah. Encourage ou etudiant pou prié Jéhovah pou li gagne la sagesse necessaire pou bien comprend So Parole ek gagne la force pou mette en pratik bann conseil ki li gagné. (Jacques 1:5) Si li faire sa, li pou ena la force pou endure bann l’epreuve ek li pou contigne fortifié so la-foi.
Aide bann etudiant la Bible pou vinn bann enseignant
14. Ki progré bann etudiant la Bible bizin faire?
14 Pou ki bann etudiant la Bible obeir “tou” seki Jésus inn donne so bann disciple l’ordre pou faire, zot bizin progressé pou vinn bann enseignant Parole Bondié ek pa reste zis bann etudiant. (Matthieu 28:19, 20; Actes 1:6-8) Couma ou kapav aide enn etudiant pou progressé pou vinn enn enseignant?
15. Kifer ou bizin encourage ou etudiant la Bible pou assisté reunion?
15 Pendant premier l’etude-mem, invite etudiant-la pou assisté bann reunion dan congregation ensam avek ou. Explik li ki c’est dan bann reunion ki ou gagne formation pou vinn enn enseignant Parole Bondié. Pendant plusieurs semaine, prend dé-trois minute a la fin chaque l’etude pou koz lor program l’enseignement spirituel ki ou gagné dan bann different reunion ek dan bann l’assemblée. Koz avek enthousiasme lor bann bienfait ki ou gagné dan sa bann l’occasion-la. (Hébreux 10: 24, 25) Si etudiant-la commence assisté bann reunion regulierement, pena doute ki li aussi li pou vinn enn enseignant Parole Bondié.
16, 17. Cite certain l’objectif ki enn etudiant la Bible kapav fixé ek realisé.
16 Aide ou etudiant pou fixé bann l’objectif ki li pou kapav realisé. Par exemple, encourage li pou partage seki li pé aprann avek enn camarade ou-soit enn membre so famille. Encourage li aussi pou fixé l’objectif pou lire la Bible en entier. Si ou aide li pou prend l’habitude pou lire la Bible toulé-jour, ek pou garde sa l’habitude-la, sa pou contigne aide li bien longtemps apré so bapteme. En plus, kifer ou pa propose ou etudiant pou essaye rappel au moins enn verset la Bible ki reponn enn question principal dan chaque chapitre livre Ki la Bible enseigné? Si li faire sa, li pou vinn “enn dimoune approuvé, enn zouvrier ki pena nanyin pou honté, ki konn servi parole la verité couma bizin.”—2 Timothée 2:15.
17 Pa zis montré li pou repete bann verset ou-soit pou donne l’idée principal ki ena dan bann verset-la. Encourage li pou servi bann verset principal ek pou explik sa bann verset-la, pareil couma li ti pou reponn enn kikenn ki pose li enn question lor so croyance. Faire bann ti demonstration kot ou kapav joué role enn membre so famille ou-soit enn camarade travail ki demann li pou explik so croyance. En mem temps, montré li couma li kapav reponn “avek douceur ek enn grand respé.”—1 Pierre 3:15.
18. Kan enn etudiant la Bible rempli bann condition ki bizin pou vinn enn proclamateur, ki l’aide ou kapav donne li encore?
18 Avek le temps, etudiant-la kitfois pou rempli bann condition ki bizin pou preché. Montré li bien ki c’est enn grand privilege pou participe dan sa travail-la. (2 Corinthiens 4:1, 7) Kan bann ancien inn trouvé ki etudiant-la li rempli bann condition pou vinn enn proclamateur, aide li pou prepare enn presentation simple ek accompagne li dan predication. Travail avek li regulierement dan different domaine nou ministere. Montré li couma pou prepare-li ek pou faire bann nouvelle visite ki efficace. Si ou-mem ou donne li enn bon l’exemple, sa pou ena enn bon l’influence lor li.—Luc 6:40.
‘Sauve ou-mem ek bann ki ecoute ou’
19, 20. Ki l’objectif nou bizin fixé, ek kifer?
19 Oui, nou kapav dire ki c’est vrai-mem enn grand travail pou aide enn dimoune pou gagne “enn connaissance exact lor la verité.” (1 Timothée 2:4) Nou gagne enn grand la-joie kan nou aide enn dimoune pou obeir seki la Bible enseigné—pena beaucoup kitsoz dan nou la-vie ki kapav faire nou gagne enn la-joie coumsa. (1 Thessaloniciens 2:19, 20) Oui, c’est enn grand privilege ki nou ena pou “travail ensam avek Bondié” dan sa travail l’enseignement ki nou ena pou faire partout lor la terre-la!—1 Corinthiens 3:9.
20 Bientot, Jéhovah pou servi Jésus Christ ek bann ange puissant pou detruire bann dimoune “ki pa konn Bondié ek . . . ki pa obeir la bonne nouvelle concernant nou Seigneur Jésus.” (2 Thessaloniciens 1:6-8) La vie beaucoup dimoune concerné. Eski ou kapav fixé enn l’objectif pou conduire au moins enn l’etude la Bible dan livre Ki la Bible enseigné vrai-mem? Sa pou donne ou l’occasion pou ‘sauve ou-mem ek bann ki ecoute ou.’ (1 Timothée 4:16) Zordi plus ki jamais, li bien important ki nou aide nou prochain pou obeir seki la Bible enseigné.
[Note]
a Publié par bann Témoins de Jéhovah.
Ki ou finn aprann?
• Dan ki but finn faire livre Ki la Bible enseigné?
• Couma ou kapav commence bann l’etude la Bible avek livre Ki la Bible enseigné?
• Ki bann method pou enseigné ki pli efficace?
• Couma ou kapav aide enn etudiant la Bible pou vinn enn enseignant Parole Bondié?
[Zimage, page 11]
Eski ou pé bien servi sa livre-la?