Zot prosperé lor plan spirituel pendant la vieillesse
“Bann ki’nn planté couma bann pié dan lakaz Jéhovah . . . pou contigne prosperé pendant la vieillesse.”—PSAUME 92:13, 14.
1, 2. (a) Souvent ki la vieillesse faire ou pensé? (b) Ki la Bible promette concernant bann consequence peché Adam?
LA VIEILLESSE—ki sa faire ou pensé? Enn dimoune ki so la-peau inn gagne bann ride, ki pa tann bien, ek ki so bann membre inn vinn faible? Ou-soit ou pense lezot kitsoz ki arrivé pendant “bann jour difficile” ki Ecclésiaste 12:1-7 decrire? Si oui, li important ou rappel ki, seki decrire dan Ecclésiaste chapitre 12 lor la vieillesse, li consequence ki peché ena lor nou lekor, peché ki nou finn herité ar Adam, pa seki Jéhovah ti’nn prevoir au commencement.—Romains 5:12.
2 La vieillesse li-mem, li pa enn malediction, parski pou enn dimoune contigne existé, le temps bizin passé. En realité, tou seki vivant, grandi ek vinn adulte, ek sa li enn bon kitsoz. Bientot, tou bann ravage ki peché ek l’imperfection inn faire autour nou pendant six mille an pou disparette, ek tou bann dimoune obeissant pou profite la vie couma Jéhovah ti envie au commencement, sans ki zot souffert a cause la vieillesse ek la mort. (Genèse 1:28; Révélation 21:4, 5) Lerla, “okenn habitant pa pou dire: ‘Mo malade.’ ” (Isaïe 33:24) Bann dimoune agé pou regagne ‘la force ki zot ti ena kan zot ti jeune’ ek zot la-peau pou “vinn pli frais ki dan la jeunesse.” (Job 33:25) Mais asterla, nou tou nou bizin lutté kont l’imperfection ki nou finn herité a cause peché Adam. Pourtant, bann serviteur Jéhovah zot beni dan bann fason special kan zot rente dan l’age.
3. Dan ki fason bann chrétien kapav “contigne prosperé pendant la vieillesse”?
3 Parole Bondié donne nou l’assurance ki “bann ki’nn planté couma bann pié dan lakaz Jéhovah . . . pou contigne prosperé pendant la vieillesse.” (Psaume 92:13, 14) Dan enn langage symbolik, sa psalmiste-la ti dire enn verité bien important: bann serviteur fidel Bondié kapav contigne progressé ek prosperé lor plan spirituel mem si zot la-santé pé deterioré. Beaucoup l’exemple biblik ek modern montré sa.
‘Jamais li ti absent’
4. Malgré ki prophetesse Anne ti agé, couma li ti montré ki li ti bien devoué ar Jéhovah, ek couma Jéhovah ti recompense li?
4 Anou prend l’exemple prophetesse Anne. Alors ki li ti ena 84 an, Anne “jamais pa ti absent dan temple. Li ti pé offert enn service sacré la-nuit li-jour; li ti garde careme ek li ti faire bann supplication.” Papa Anne ti enn descendant “tribu Asher,” li pa ti enn Lévite, sa vedir ki Anne pa ti kapav vrai-mem vive dan temple. Alors maziné ki zeffort sa ti demann li pou al dan temple toulé-jour depuis ki commence faire bann sacrifice gramatin, ziska bann sacrifice ki ti offert tantot! Mais Jéhovah ti recompense Anne parski li ti bien devoué ar Li. Li ti ena privilege pou là kan Joseph ek Marie ti amenn Jésus dan temple pou presente li devant Jéhovah couma la Loi ti demandé. Kan li ti trouve Jésus, Anne “ti commence remercié Bondié ek koz lor sa zenfant-la ar tou seki ti pé attann delivrance Jérusalem.”—Luc 2:22-24, 36-38; Nombres 18:6, 7.
5, 6. Couma beaucoup dimoune agé zordi manifesté mem l’attitude ki Anne?
5 Zordi parmi nou, ena beaucoup dimoune agé ki ressemblé Anne, parski zot bien regulier pou assisté bann reunion, zot suppliye Jéhovah pou ki vrai l’adoration progressé, ek zot ena enn grand desir pou preche la bonne nouvelle. Guette ki enn frere ki ena plus ki 80 an ek ki assisté reunion regulierement avek so femme, ti dire: “Nou finn prend l’habitude al reunion. Nou pa envie trouve-nou dan lezot place. Kot peuple Bondié été, là-mem ki nou envie été. C’est là ki nou senti-nou bien.” Zot l’exemple vrai-mem enn grand l’encouragement pou nou, pa vrai?—Hébreux 10:24, 25.
6 Jeanne, enn veuve ki ena plus ki 80 an dire: “Si ena enn l’activité spirituel ki mo trouvé mo kapav faire, mo envie faire li.” Li’nn prend sa couma enn principe. Li ajouté: “Bien sur, parfois mo triste, mais kifer eski tou dimoune ki autour moi bizin triste kan moi mo triste?” So lizié brillé kan li raconte la joie ki li ti gagné kan li ti visite bann lezot pays pou bann l’occasion spirituel bien encourageant. Pendant enn voyage ki li ti fek faire, li ti dire so bann camarade ki ti voyage avek li: “Mo pa envie trouve encore lezot chateau; mo envie al preché!” Mem si li pa ti konn langue sa pays-la, Jeanne ti reussi faire bann dimoune interessé ar message ki ena dan la Bible. En plus, pendant plusieurs l’année, li ti travail avek enn congregation ki ti bizin l’aide, mem si sa ti demann li pou aprann enn nouveau langue ek pou voyage enn heure-temps pou al reunion ek enn heure-temps pou retourné.
Garde ou l’esprit actif
7. Kan Moïse ti agé, ki li ti dire pou montré ki li envie progressé dan so relation avek Bondié?
7 C’est avek le temps ki nou gagne l’experience. (Job 12:12) Mais li pa automatik ki plus nou vieilli, plus nou pou progressé lor plan spirituel. Alors, au lieu ki bann serviteur fidel Jéhovah compte zis lor connaissance ki zot inn gagné dan le passé, zot faire tou pou “aprann plus” a mesure ki le temps passé. (Proverbes 9:9) Kan Jéhovah ti donne Moïse enn mission, li ti ena 80 an. (Exode 7:7) Dan so lepok, li pa ti normal pou vive ziska sa l’age-la, parski Moïse ti ecrire: “Jour nou bann l’année zot soixante-dix an; ek . . . a cause enn la-force special zot arrive ziska quatre-vingt an.” (Psaume 90:10) Kan-mem, Moïse jamais pa ti pensé ki li trop vié pou aprann. Apré ki li’nn servi Bondié pendant plusieurs l’année ek li’nn gagne beaucoup privilege ek li’nn prend bann grand responsabilité, Moïse ti suppliye Jéhovah: “Faire moi konn to bann chemin, s’il te plait, pou mo kapav konn toi.” (Exode 33:13) Moïse ti touletan envie progressé dan so relation avek Jéhovah.
8. Couma Daniel ti garde so l’esprit actif alors ki li ti ena 90 an, ek ki resultat sa ti ena?
8 Kan prophete Daniel ti ena environ 90 an, li ti encore pé etudié bann l’Ecriture sacré. Seki li ti comprend kan li ti etudié “bann livre”—kitfois ladan ti ena aussi livre Lévitique, Isaïe, Jérémie, Hoshéa, ek Amos—ti pousse li pou rod Jéhovah dan enn la-priere sincere. (Daniel 9:1, 2) Jéhovah ti reponn sa la-priere-la kan Li ti donne Daniel bann renseignement concernant Messie ki ti pou vini ek seki ti pou arrive vrai l’adoration dan l’avenir.—Daniel 9:20-27.
9, 10. Ki certain finn faire pou garde zot l’esprit actif ?
9 Pareil couma Moïse ek Daniel, nou kapav faire zeffort pou garde nou l’esprit actif kan nou fixé nou l’esprit lor bann kitsoz spirituel tant ki nou kapav. C’est seki beaucoup pé faire. Par exemple, Worth, enn ancien ki ena plus ki 80 an, faire zeffort pou reste a jour avek nourriture spirituel ki ena dan bann publication ki “l’esclave fidel et avisé” donne nou. (Matthieu 24:45) Guette seki li dire: “Mo vrai-mem content la verité, ek mo extra content pou trouvé couma la lumiere la verité pé contigne vinn pli fort.” (Proverbes 4:18) Li pareil aussi pou Fred ki finn passe plus ki 60 an dan service a plein temps. Li trouvé ki, kan li commence bann discussion lor la Bible avek bann lezot chrétien, sa donne li la force lor plan spirituel. Li dire: “Mo bizin garde la Bible vivant dan mo l’esprit. Si ou kapav faire la Bible vinn vivant, setadir kan ou comprend so sens, ek si ou kapav faire seki ou pé aprann rente dan ‘model bann bon parole,’ lerla, ou pa pou ena zis bann boute-boute renseignement ki a part. Ou pou kapav trouvé couma chaque renseignement ena so place.”—2 Timothée 1:13.
10 C’est pa parski enn dimoune li agé ki sa pou empeche li aprann bann kitsoz ki nouveau ek ki difficile. Bann dimoune ki ena plus ki 60, 70, ek mem 80 an, finn reussi aprann lire ou-soit finn aprann enn nouveau langue. Certain Témoins de Jéhovah finn faire sa pou zot kapav partage la bonne nouvelle avek bann dimoune ki ena different nationalité. (Marc 13:10) Harry ek so madame ti ena preské 70 an kan zot ti decide pou preche avek bann Portugais. Harry dire: “Li vrai ki n’importe ki kitsoz vinn pli difficile avek l’age.” Mais malgré sa, avek beaucoup zeffort ek perseverance, zot inn reussi conduire bann l’etude la Bible en portugais. Sa faire plusieurs l’année asterla ki Harry pé faire bann discours pendant l’assemblée district dan sa nouveau langue ki li’nn aprann-la.
11. Kifer nou bizin guette seki bann dimoune agé ki fidel finn faire?
11 Bien sur, pa tou dimoune ki ena enn bon la-santé ek ki dan enn situation ki permette zot faire bann kitsoz coumsa. Alors, kifer nou bizin guette seki certain dimoune agé finn faire? C’est pa pou dire ou ki nou tou nou bizin faire zeffort pou faire pareil. Au contraire, c’est pou suive seki Paul ti dire, kan li ti ecrire bann chrétien hébreux lor bann ancien fidel: “Pendant ki zot observe resultat conduite bannla, imite zot la-foi.” (Hébreux 13:7) Kan nou observe l’exemple bann dimoune agé ki ena zèle coumsa, sa kapav encourage nou pou imite zot la-foi solid, enn la-foi ki motive zot dan service Bondié. Harry, ki ena 87 an asterla, expliké seki motive li: “Mo envie servi le temps ki mo resté pou vive avek sagesse, ek autant ki possible, mo envie ki mo utile dan service Jéhovah.” Fred, ki nou ti mentionné avant, ena enn grand satisfaction dan so service ki li faire dan Béthel. Li faire sa remark-la: “Ou bizin trouvé dan ki fason ou kapav servi Jéhovah pli bien ek contigne faire sa.”
Reste attaché ar Bondié malgré bann changement situation
12, 13. Couma Barzillaï ti montré ki li attaché ar Bondié malgré ki so situation ti’nn changé?
12 Li kapav difficile pou accepté ek pou faire face ar bann changement ki arrive nou lor plan physik. Pourtant, li possible pou montré ki nou attaché ar Bondié malgré sa bann changement-la. Barzillaï, enn Guiléadite inn donne nou enn bon l’exemple dan sa domaine-la. Kan li ti ena 80 an, li ti montré enn l’hospitalité extraordinaire envers David ek so l’armée. Li ti donne zot mangé ek seki zot ti bizin pou dormi kan zot ti pé sauvé pendant rebellion Absalom. Kan David ti pé retourne Jérusalem, Barzillaï ti accompagne li ek so bann zom ziska la riviere Jourdain. David ti propose Barzillaï pou forme partie dan la cour royal. Ki Barzillaï ti reponn? “Zordi mo ena quatre-vingt an. . . . Eski to serviteur pou kapav apprecié gout seki mo pou mangé ek seki mo pou boire, ou-soit eski mo pou kapav ecoute encore la voix bann chanteur ek bann chanteuse? . . . Ala to serviteur Kimham. Laisse li traverse avek mo seigneur le roi; ek faire pou li seki toi to trouve bon.”—2 Samuel 17:27-29; 19:31-40.
13 Malgré ki so situation ti’nn changé, Barzillaï ti faire seki li ti kapav pou soutenir le roi ki Jéhovah ti choisir. Mem si li ti reconette ki li pa ti gagne gout mangé ek ki li pa ti tendé couma avant, li pa ti’nn vinn amer. Au contraire, li pa ti montré-li egoïste kan li ti demandé ki Kimham gagne bann benediction ki David ti offert li. Kan li ti faire sa, Barzillaï ti montré ki qualité leker li ti ena. Pareil couma Barzillaï, zordi beaucoup serviteur Jéhovah ki agé ena mem l’attitude ki li, zot pa egoïste ek zot genereux. Zot faire seki zot kapav pou soutenir vrai l’adoration, parski zot koné ki c’est “bann sacrifice coumsa ki faire Bondié plaisir.” Oui, li vrai-mem enn grand benediction pou ena bann dimoune fidel parmi nou!—Hébreux 13:16.
14. Kifer bann parole ki ena dan Psaume 37:23-25 ena plus poids parski David ti agé?
14 Mem si situation David ti’nn changé plusieurs fois avek le temps, li ti toujours sur ki fason ki Jéhovah prend soin so bann fidel serviteur, jamais pa changé. Vers la fin so la-vie, David ti compose enn cantik ki nou trouvé zordi dan Psaume 37. Pou enn ti moment, essaye mazinn David ki pé reflechi, li pé joué la harpe ek li pé chante sa bann parole-la: “Jéhovah inn fini prepare bann pas enn zom fort, ek Li trouve plaisir dan chemin ki li prend. Mem si arrivé li tombé, li pa pou tombe net enba, parski Jéhovah pé attrape so la-main. Mo ti enn jeune homme, mo finn mem vinn vié, ek pourtant mo pa finn trouve enn dimoune juste ki’nn abandonné net, ni so descendance ki pé rod di-pain.” (Psaume 37:23-25) Dan sa psaume-la Jéhovah inn trouve bon pou mentionné ki David ti agé. Oui, sa donne plus poids sa bann parole sincere-la!
15. Couma l’apotre Jean inn donne nou enn bon l’exemple fidelité malgré so l’age ek so situation ki’nn changé?
15 L’apotre Jean, li enn lot bon l’exemple enn kikenn ki’nn reste fidel malgré so l’age, ek malgré so situation ki’nn changé. Apré ki li’nn servi Bondié pendant preské 70 an, Jean ti prisonnier lor l’île Patmos parski li ti ‘koz lor Bondié ek li ti rann temoignage lor Jésus.’ (Révélation 1:9) Selman, so travail pa ti encore fini. En realité, tou bann livre la Bible ki Jean inn ecrire, li ti’nn ecrire sa vers la fin so la-vie. Kan li ti Patmos, Bondié ti donne li bann vision extraordinaire ki trouve dan Révélation, ek li ti ecrire sa avek beaucoup l’attention. (Révélation 1:1, 2) Apré sa, li possible ki li ti liberé lor l’île Patmos pendant règne l’empereur romain Nerva. Ensuite, apepré vers l’an 98 n.l., kan li ti ena kitfois 90 ou-soit 100 an, Jean ti ecrire so l’Evangile ek trois lezot livre ki porte so nom.
Enn l’endurance ki pou resté pou touletan
16. Couma bann dimoune ki pa kapav communik avek lezot couma avant, montré ki zot attaché avek Jéhovah?
16 Chaque dimoune limité dan different fason. Par exemple, certain dimoune pa mem kapav communik avek lezot couma avant. Pourtant, zot encore ena bann bon souvenir lor l’amour ek lor faveur Bondié. Mem si zot pa kapav kozé couma avant, dan zot leker zot pé dire Jéhovah: “Mo vrai-mem content to la-loi! Toute longue la journée, li reste dan mo pensée.” (Psaume 119:97) Ek Jéhovah Li, Li konn bann ki “pense so nom,” ek Li remarké ki quantité sa bann frere ek soeur-la zot different avek la plupart dimoune ki pa prend compte so bann principe. (Malaki 3:16; Psaume 10:4) Oui, nou vrai-mem encouragé kan nou koné ki seki nou medité dan nou leker, faire Jéhovah plaisir!—1 Chroniques 28:9; Psaume 19:14.
17. Ki bann serviteur Jéhovah ki finn servi Li pendant longtemps finn gagné ki vrai-mem special?
17 Fodé pa nou blié ki bann ki finn servi Jéhovah pendant plusieurs l’année finn gagne enn kitsoz ki vrai-mem special ek ki pa kapav gagné dan lezot fason—enn l’endurance ki pou resté pou touletan. Jésus ti dire: “C’est par zot l’endurance ki zot pou sauve zot nâme.” (Luc 21:19) Li bien important ki enn dimoune ena l’endurance pou li gagne la vie eternel. Certain parmi zot ki finn faire “volonté Bondié” ek ki finn prouve zot fidelité par fason ki zot inn vive, kapav attann pou trouve “realisation promesse ki’nn faire zot.”—Hébreux 10:36.
18. (a) Ki Jéhovah content pou trouvé en rapport avek so bann serviteur ki agé? (b) Ki nou pou examiné dan prochain lartik?
18 Seki ou pé faire dan service Jéhovah avek tou ou nâme, ki ou pé kapav faire beaucoup ou-soit tigit, sa ena enn grand valeur pou Li. Malgré seki pé arrive ‘seki ou été en dehors’ a mesure ki ou pé vieilli, ou kapav renouvelé seki ‘ou été endan’ jour apré jour. (2 Corinthiens 4:16) Pena okenn doute ki Jéhovah apprecié seki ou finn faire dan le passé, mais li bien clair ki Li apprecié aussi seki ou pé faire asterla pou so nom. (Hébreux 6:10) Dan prochain lartik, nou pou examiné couma sa fidelité-la kapav ena bann l’effet ki dure longtemps.
Couma ou pou reponn?
• Ki bon l’exemple Anne inn donne bann chrétien agé zordi?
• Kifer li pa automatik ki, kan enn dimoune vinn vié, li nepli kapav faire kitsoz?
• Couma bann dimoune agé kapav contigne montré ki zot attaché ar Bondié?
• Couma Jéhovah considere service ki bann dimoune agé rann Li?
[Zimage, page 25]
Beaucoup chrétien agé donne enn bon l’exemple parski zot assisté reunion regulierement, zot preche avek zèle, ek zot content pou aprann