“Divisé par langage mais uni par l’amour”

Delivrance. Liberation. Pendant longtemps, bann dimoune inn attann avek impatience kan zot pou soulagé ar zot bann tracas. Couma nou kapav faire face ar bann problem ki nou gagné dan la vie? Eski enn jour nou pou kapav delivré ar tousala? Si oui, couma sa pou arrivé?

BANN Témoins de Jéhovah ti organise enn serie l’assemblée district trois jour ki ti commencé en mai 2006 ek ki ti koz lor sa sujet-la. Theme sa bann l’assemblée-la ti “Delivrance pé approché!”

Dan neuf sa bann l’assemblée-la ti ena bann millier delegué ki ti sorti dan different pays. Sa bann l’assemblée-la ti organisé entre juillet ek août 2006 dan Prague, capital République tchèque; Bratislava, capital Slovaquie; Chorzów ek Poznań dan Polognea ek dan cinq la-ville l’Allemagne—Dortmund, Francfort, Hambourg, Leipzig ek Munich. Ti ena tou plus ki 313,000 dimoune ki ti assisté sa bann l’assemblée-la.

Ki qualité l’atmosphere ti ena dan sa bann l’assemblée-la? Ki publicité bann journal, radio ek television inn faire pou sa? Couma bann ki ti assisté sa bann l’assemblée ti senti-zot apré?

Bann preparation

Bann visiteur ek bann Témoin local ti pé attann avek impatience sa bann l’evenement spirituel, ki zot ti koné jamais zot pa pou blié-la. Ti bizin faire bann l’arrangement pou ki bann delegué gagne enn place pou resté ek sa ti enn grand travail. Par exemple pou l’assemblée ki ti ena Chorzów, bann Témoin polonais ti offert zot lakaz pou loge preské 13,000 invité ki ti sorti dan bann pays l’Europe de l’Est. Bann delegué pou sa l’assemblée-la ti sorti Arménie, Bélarus, Estonie, États-Unis, Géorgie, Kazakhstan, Kirghizistan, Lettonie, Lituanie, Moldavie, Ouzbékistan, Russie, Tadjikistan, Turkménistan ek Ukraine.

Beaucoup delegué ti bizin commence faire bann preparation pou zot voyage plusieurs mois a l’avance. Tatiana ki preché a plein temps dan Kamchatka, enn partie la Russie ki trouve dan nord-est ar Japon, ti commence ramasse so kass enn an avant so voyage. Li ti bizin faire 10,500 kilometre. En premier, li ti voyage cinq heure-temps par avion, apré li ti faire preské trois jour dan train, ek finalement 30 heure-temps dan bus avant li arrive Chorzów.

Ti ena bann millier volontaire pou aidé avant sa bann l’assemblée-la. Zot ti bizin prepare bann stade ek bann l’endroit tout autour pou ki sa bann l’endroit-la digne pou adore Jéhovah. (Deutéronome 23:14) Pou cite zis enn l’exemple, dan Leipzig bann Témoin ti nettoye sa stade kot zot ti pou faire l’assemblée-la bien prop ek zot ti promette pou faire pareil kan l’assemblée fini. Resultat: bann responsable sa stade-la inn cancel enn section dan contrat location kot ti demann enn gros somme l’argent pou bann frais nettoyage.

Bann l’invitation

Dan le monde entier, bann congregation ti donne bann l’invitation pou bann l’assemblée “Delivrance pé approché!” Bann ki ti pou assisté sa bann l’assemblée special-la ti participe avek enn grand zèle dan sa campagne-la. La veille l’assemblée zot ti contigne donne bann l’invitation ziska tard a-soir. Eski zot zèle inn produire bann bon resultat?

Bogdan, enn Témoin polonais ti joinde enn missié agé ki ti envie assisté l’assemblée mais li ti dire ki so ti pension pa ti pou permette li paye so voyage pou al Chorzów, enn distance 120 kilometre. Ti pou ena enn place vide dan bus ki congregation ti pé prend. Bogdan raconté: “Nou ti dire sa missié-la ki li ti pou kapav vinn avek nou sans paye nanyin, si li arrive place kot nou ti’nn mette rendez-vous pou demarré, cinq heure et demi du matin.” Missié-la inn accepté nou l’invitation ek li’nn assisté l’assemblée. Plitar li ti ecrire bann frere ek li ti dire: “Apré ki mo’nn assisté sa l’assemblée-la, mo’nn decidé pou vinn enn pli bon dimoune.”

Dan Prague enn soir, enn missié ki ti pé reste dan enn l’hotel kot ti ena bann delegué anglais ti dire sa bann frere-la ki li aussi li ti’nn assisté l’assemblée sa jour-la. Ki ti pousse li pou al l’assemblée? Missié-la ti dire ki apré ki li ti’nn gagne bann l’invitation avek dix different proclamateur lor chemin, li pa ti kapav pa al l’assemblée! Li ti bien impressionné ek li ti envie konn plus.—1 Timothée 2:3, 4.

Enn program nourriture spirituel solid

Program l’assemblée ti examiné couma pou faire face ar beaucoup problem. Bann conseil bien direct ki sorti dan la Bible ti montré couma kapav reglé ou-soit endure sa bann problem-la.

Bann ki dan difficulté parski zot agé, zot ena enn mauvais la-santé, zot inn perdi enn dimoune ki zot content, ou-soit a cause lezot problem personnel, ti gagne l’encouragement ki sorti dan la Bible pou aide zot trouve la vie dan enn pli bon fason. (Psaume 72:12-14) Bann couple ek bann parent ti gagne bann conseil couma zot kapav ena enn mariage heureux ek reussi elevé bien zot bann zenfant. (Ecclésiaste 4:12; Éphésiens 5:22, 25; Colossiens 3:21) Zordi dan lekol, bann jeune chrétien bizin faire face ar bann mauvais l’influence ki faire pression lor zot alors ki dan lakaz ek dan congregation zot gagne bann bon conseil ki sorti dan Parole Bondié. Zot aussi zot ti gagne bann conseil pratik couma pou faire face ar sa bann pression-la ek couma pou “rejette bann desir la jeunesse.”—2 Timothée 2:22.

Enn vrai famille international

Touletan bann Témoins de Jéhovah gagne bann bon conseil ki sorti dan la Bible dan zot bann rassemblement. (2 Timothée 3:16) Mais sa bann l’assemblée-la ti special parski zot ti international. Zot tou ti presente mem program spirituel dan plusieurs langage. Toulé-jour bann membre College central ti faire bann discours ek ti ena bann rapport lor lezot pays ki ti faire program-la vinn pli interessant encore. Bann frere ti traduire sa bann discours ek sa bann rapport-la pou ki bann different group ki ti present ek ki koz lezot langage kapav comprend.

Bann delegué ti excité pou joinde zot bann frere ek soeur ki sorti lezot pays. Enn delegué ti dire: “Mem si nou ti koz different langage, sa pa ti enn problem. Au contraire, sa ti faire sa l’evenement-la vinn pli joyeux encore. Bann invité ti sorti dan different culture, mais zot tou ti uni par mem la-foi.” Bann ki ti assisté l’assemblée Munich ti dire sa coumsa: “Divisé par langage mais uni par l’amour.” N’importe ki pays zot sorti ek n’importe ki langage zot kozé, bann ki ti assisté sa bann l’assemblée-la ti senti ki zot ti parmi bann vrai camarade—bann frere ek bann soeur spirituel.—Zekaria 8:23.

Zot montré zot reconnaissance

Le temps ki ti faire pendant bann l’assemblée ki ti ena dan Pologne ti testé l’attitude ek l’endurance bann delegué. Pli souvent la pluie ti pé tombé ek ti faire bien frais aussi—pa mem 15°Celsius. Enn frere ki sorti l’États-Unis ti dire: “Jamais mo’nn assisté enn l’assemblée dan enn lé-temps aussi mauvais ki sa ek kot temperature inn desann bien bas coumsa, ek mo ti comprend bien tigit dan sa program-la. Mais sa l’atmosphere international incroyable, l’esprit extraordinaire ek l’hospitalité special ki ti ena-la, ti faire nou blié sa mauvais lé-temps ki ti faire-la. Jamais mo pa pou blié sa l’assemblée-la!”

Enn kitsoz ki bann assistant ki koz polonais pa pou blié, c’est presentation Étude perspicace des Écritures en polonais. Sa ti enn recompense extraordinaire pou sa l’endurance ki zot ti ena pou assizé ek ecouté malgré mauvais temps. Dan tou bann l’assemblée “Delivrance pé approché!,” bann assistant ti bien content kan ti presente nouveau livre Vivez en gardant à l’esprit le jour de Jéhovah.

Pou lezot raison encore, bann assistant pa pou blié sa bann l’assemblée-la. Kristina, enn soeur tchèque ki ti volontaire pou accompagne enn group delegué etranger ki ti vinn dan bus, rappel: “Kan nou ti pé dire aurevoir, enn soeur ti amenn moi a part, li ti serre moi dan so lé-bras ek li ti dire: ‘Mo’nn senti ki ti vrai-mem prend nou soin! To’nn amenn mangé ziska kot nou ti pé assizé ek to’nn mem donne nou de l’eau pou boire. Merci beaucoup pou to l’amour ek to l’esprit sacrifice.’ ” Li ti pé koz lor bann disposition ki ti prend pou ki bann delegué ki sorti lezot pays gagne zot dejeuner. Enn frere ti expliké: “Nou pa ti ena okenn l’experience dan sa travail-la. Nou ti bizin livré preské 6,500 repas chaque midi. Li ti touchant pou trouvé ki ti ena beaucoup volontaire, parmi ti ena bann zenfant aussi.”

Enn soeur ki ti sorti Ukraine pou vinn Chorzów ti dire: “Nou bien touché par l’amour, l’attention ek generosité ki nou bann frere ek soeur inn montré envers nou. Nou pa kapav trouve bann mot pou dire ki quantité nou reconnaissant.” Annika, enn tifi huit an ki ti sorti Finlande ti ecrire filiale bann Témoins de Jéhovah dan Pologne: “Sa l’assemblée-la ti encore pli extraordinaire ki mo ti’nn pensé. Li vrai-mem bon pou faire partie dan l’organisation Jéhovah parski nou ena bann camarade dan le monde entier!”—Psaume 133:1.

Commentaire par bann dimoune ki pa Témoin

Avant bann l’assemblée, ti organise bann tour pou certain delegué visite pays kot zot ti assisté l’assemblée. En Bavière, bann visiteur ti arreté kot bann la-Salle du Royaume dan la campagne ek bann Témoin dan sa bann congregation-la ti accueillir zot. Enn guide ki pa Témoin ti vrai-mem impressionné par fason ki bann frere ti montré zot l’affection. Enn delegué raconté: “Dan bus kan nou ti pé retourne nou l’hotel, nou guide ti dire ki nou ti bien different avek bann lezot touriste. Nou ti bien habillé ek nou tou ti cooperé avek bann ki ti responsable nou group. Personne pa ti zouré ek tou ti bien organisé. Li ti etonné ki bann dimoune ki pa ti konn zot camarade avant, kapav enn sel coup vinn bann bon camarade.”

Enn frere ki ti travail dan service communication avek la presse pou l’assemblée ki ti ena Prague, raconté: “Dimanche gramatin, officier ki en charge la police ki ti bizin travail kot ti pé faire l’assemblée, ti vinn guette nou. Li ti remark la paix ki ti ena ek li ti dire ki li pa ti ena nanyin pou faire. Li ti aussi dire ki dé-trois dimoune ki reste dan sa l’endroit-la ti pé pose question lor l’assemblée. Kan li ti dire ki c’est bann Témoins de Jéhovah ki ti pé faire l’assemblée, en general zot pa ti content ditou. Lerla li ti dire zot: ‘Si bann dimoune ti comporte-zot zis la moitié couma bann Témoins de Jéhovah, la police pa ti pou bizin mem existé.’ ”

Beaucoup inn deja delivré!

Parole Bondié, la Bible, servi couma enn pont entre bann culture; li rassemblé bann chrétien dan la paix ek l’unité. (Romains 14:19; Éphésiens 4:22-24; Philippiens 4:7) Bann l’assemblée “Delivrance pé approché!” inn montré sa. Bann Témoins de Jéhovah inn deja delivré ar beaucoup problem ki ena dan le monde. Parmi zot, nepli ena bann dimoune ki pa accepté bann ki different ar zot, bann ki attak lezot, ek bann ki faire distinction entre race—zis pou nomme certain problem ki ena dan le monde—ek zot attann sa lepok kot le monde entier pou liberé ar sa bann qualité problem-la.

Bann ki’nn assisté sa bann l’assemblée la inn trouvé par zot-mem l’unité ki existé parmi bann Témoin ki sorti dan different pays ek dan different culture. Zot inn trouve sa surtout a la fin sa bann l’assemblée-la. Tou dimoune ti pé applaudi, ti pé serre zot bann nouveau camarade dan zot lé-bras ek ti pé prend bann dernier photo. (1 Corinthiens 1:10; 1 Pierre 2:17) Kan zot ti retourne dan zot lakaz ek dan zot congregation, bann delegué ti content ek zot ti sur ki delivrance ar tou bann tracas ek bann problem bien pré. Sa determination ki zot ti ena pou reste bien attaché ar “parole ki donne la vie” ki sorti kot Bondié-la ti’nn renouvelé.—Philippiens 2:15, 16.

[Note]

[L’encadré, page 10]

Vingt-cinq langage koz couma enn sel

Dan toulé-neuf l’assemblée, program ti dan langue ki kozé dan sa bann pays-la. Pendant bann l’assemblée en Allemagne, bann discours ti aussi dan 18 lezot langage. Dan Dortmund, ti faire bann discours en arabe, espagnol, persan, portuguais, ek russe; dan Francfort en anglais, français, ek serbo-croate; dan Hambourg en danois, néerlandais, suédois ek tamil; dan Leipzig en chinois, polonais ek turc, ek dan Munich en grec, italien ek langue des signes allemand. Dan bann l’assemblée ki ti ena Prague, tou bann discours ti faire en anglais, tchèque ek russe. Dan Bratislava, program ti en anglais, hongrois, ek slovaque ek langue des signes slovaque. Dan Chorzów, program ti en polonais, russe, ukrainien, ek langue des signes polonais. Ek dan Poznań, program ti en finnois ek polonais.

Vingt-cinq langage en tou! Vrai-mem, bann ki ti assisté sa bann l’assemblée-la ti divisé par zot langage, mais zot ti uni par l’amour.

[Zimage, page 9]

Dan Francfort, bann delegué ki sorti Croatie ti content pou gagne “ Traduction du monde nouveau ” dan zot prop langage