Nou bann l’assemblée district—enn grand temoignage pou la verité
1. Pendant bann fête, lor ki bann verité spirituel bien important bann Israélite ti gagne l’occasion pou reflechi ek pou discuté?
1 Bann Israélite dan le passé, ti rassemblé trois fois par an pou bann fête ki zot ti faire regulierement. Mem si zis bann zom ki ti ena l’obligation pou assisté sa bann fête-la, bien souvent tou bann membre la famille ti al Jérusalem pou profite sa bann rassemblement bien joyeux-la. (Deut. 16:15, 16) Sa bann evenement-la ti donne zot l’occasion pou medite lor bann verité spirituel ki important ek pou koz lor la. Ki sa bann verité-la sa? Enn parmi c’est ki Jéhovah Li enn Papa ki content nou ek ki genereux. (Deut. 15:4, 5) Enn lot verité c’est ki zot ti kapav compte lor Li pou gagne direction ek protection. (Deut. 32:9, 10) Bann Israélite ti kapav aussi reflechi lor enn kitsoz: en tant ki enn peuple ki porte nom Jéhovah, dan zot la vie zot ti bizin reflete la justice Jéhovah. (Deut. 7:6, 11) Azordi, nou bann l’assemblée district faire nou gagne bann bienfait pareil couma bann Israélite.
2. Dan ki fason l’assemblée district pou aide nou comprend pli bien la verité?
2 Programme l’assemblée aide nou comprend pli bien la verité: Dan nou bann l’assemblée district, nou apprecié bann discours, bann drame, bann demonstration, ek bann interview. Tousala aide nou pou comprend pli bien bann verité biblik bien important. (Jean 17:17) Deja asterla-mem, beaucoup travail finn fini commencé pou prochain l’assemblée district ki pou ena. L’organisation Jéhovah pé prepare enn programme bien precis ki pou touche bann probleme ki tou bann frere ek soeur partout dan le monde pé gagné. (Mat. 24:45-47) Eski ou bien envie trouvé ek tendé seki pou presenté?
3. Ki nou bizin faire pou tire profit ar programme l’assemblée?
3 Bien sur, nou pou tire plus profit si nou present ek nou ecoute bien pendant sa trois jour-la. Si ou pankor demann ou patron congé, alors koz avek li. Faire bann l’arrangement pou ki ou kapav gagne assez repos chaque soir, coumsa ou pou kapav bien concentré pendant programme. Beaucoup finn trouvé ki si zot guette l’orateur ek zot prend bann ti note sa aide zot pou reste attentif. Pa laisse ou portable ou-soit ou pager derange ou ou-soit derange lezot. Evite kozé, envoye ou-soit lire bann message, mangé, ou-soit boire pendant programme.
4. Couma bann parent kapav aide zot zenfant pou tire profit pendant l’assemblée?
4 Pendant bann l’année sabbatik, bann famille ti rassemblé pou ecoute lecture la Loi ki ti faire pendant fête des Huttes. Zot ti amenn zot bann “ti zenfant” avek zot “pou zot ecouté ek pou zot aprann.” (Deut. 31:12) Sa vrai-mem bien encourageant kan nou trouve bann famille pé assize ensam pendant l’assemblée ek nou trouve bann zenfant pa pé dormi ek pé ecouté bien! Kifer ou pa guette ou bann note chaque soir ek discute ensam lor bann point ki ou finn surtout bien apprecié dan programme? “Betise li attaché ar leker enn garson,” alors pendant pause midi bann parent bizin veille zot zenfant, parmi ena aussi bann adolescent, au lieu ki laisse zot ‘faire seki zot envie.’—Prov. 22:15; 29:15.
5, 6. Kan nou dan l’endroit kot faire l’assemblée, couma nou kapav faire la verité vinn pli joli?
5 Nou bon conduite faire la verité vinn pli joli: Bon conduite ki nou ena kan nou dan l’endroit kot faire l’assemblée, faire la verité vinn pli joli. (Tite 2:10; Col. 4:6) Kan bann representant enn filiale ti pé negocié avek enn l’hotel l’année derniere, madame ki occupe reservation ti dire zot: “Nou content kan zot vinn dan nou l’hotel parski zot bann bon dimoune. Zot ena bon maniere ek zot touletan traite nou bann travailleur avek respé ek zot prend bien soin bann kitsoz ki zot servi.”
6 Li vrai ki kan nou mette nou badge sa faire lezot dimoune koné ki ena l’assemblée, ek permette lezot assistant identifié nou. Mais sa donne surtout enn bon temoignage bann passant. Bann dimoune dan l’endroit pou trouvé ki bann ki’nn mette badge zot habillé bien, dan enn fason simple, zot pa debraillé ou-soit mette bann linge provokan couma bann dimoune dan le monde. (1 Tim. 2:9, 10) Alors, nou bizin veille bien lor nou l’habillement ek nou coiffure kan nou dan l’endroit kot faire l’assemblée. Si nou decide pou change linge apré programme ek al restaurant, nou bizin rappel ki nou toujours bann ki assisté l’assemblée ek fodé pa nou habille dan enn fason trop decontracté.
7. Cite enn fason kot nou kapav profite l’unité ki ena parmi bann chretien pendant l’assemblée.
7 Pendant bann fête, bann Israélite ti profite bon compagnie bann lezot adorateur Jéhovah ki ti sorti different region dan Israël ek dan le monde, ek sa ti renforci zot l’unité. (Actes 2:1, 5) Pendant bann l’assemblée district, tou dimoune kapav trouve bien la famille nou bann frere, ki pena so deuxieme. Sa joli l’aspect nou paradis spirituel-la souvent impressionne bann ki observe nou. (Ps. 133:1) Au lieu ki nou quitte la salle l’assemblée pendant pause midi pou al acheté mangé, li ti pou beaucoup pli bon ki nou amenn enn ti dejeuner ek nou profite l’occasion pou zwenn ek koz avek nou bann frere ek soeur ki pé assize a coté nou!
8. Si nou situation permette nou, ki bann raison nou ena pou porte-nou volontaire?
8 Bann ki observe nou souvent impressionné par bon l’organisation ek propté nou la salle, surtout kan zot aprann ki tou travail faire par bann volontaire. Eski ou kapav ‘porte-ou volontaire’ pendant l’assemblée? (Ps. 110:3) Souvent bann famille en entier porte-zot volontaire coumsa sa forme bann zenfant pou aprann aide lezot. Si ou timide, enn bon fason pou ou zwenn lezot frere ek soeur c’est kan ou porte-ou volontaire. Enn soeur dire: “Kan mo ti arrivé, a part mo famille ek deux-trois camarade ki mo ena, mo pa ti konn beaucoup dimoune. Mais kan mo’nn donne coup de main pou nettoyé, mo’nn zwenn enn quantité frere ek soeur, sa ti top!” Kan nou aidé pendant l’assemblée, sa pou agrandi nou groupe camarade ek sa pou faire nou gagne plus la joie. (2 Cor. 6:12, 13) Si jamais ou’nn gagne l’occasion pou porte-ou volontaire, demann bann ancien couma ou kapav faire sa.
9. Ki nou pou faire avant l’assemblée?
9 Invite lezot pou tann la verité: Pareil couma dan bann l’année avant, trois semaine avant l’assemblée, nou pou participe dan enn campagne l’invitation. Bann congregation surement pou envie couvert maximum territoire possible. (Guette l’encadré “Couma nou pou offert l’invitation?”) Bizin amenn tou l’invitation ki resté l’assemblée. Bann frere ek soeur ki pou rann temoignage informel dan l’endroit kot faire l’assemblée kapav servi sa bann l’invitation-la.
10. Cite bann l’experience ki prouvé ki campagne l’invitation ki nou faire toulé l’année produire bann bon resultat.
10 Eski bann dimoune vinn assisté l’assemblée grace a sa campagne-la? Pendant enn l’assemblée, enn membre service l’accueil ti aide enn couple marié pou trouve enn place. Zot ti dire li ki zot ti gagne enn l’invitation ek “zot ti trouve sa interessant.” Zot ti roule apepré 320 kilometre pou vinn l’assemblée! Enn soeur li, alors ki li ti pé preché porte en porte, li’nn donne enn l’invitation enn missié ki ti envie konn plus lor l’assemblée. Li’nn prend le temps pou koz lor sa l’invitation-la ar li. Deux-trois jour plitar, sa soeur-la ti trouve sa missié-la ek enn so camarade dan l’assemblée, ek zot ti ena enn nouveau publication avek zot!
11. Kifer li important ki nou assisté nou bann l’assemblée district?
11 Bann fête dan le passé ti enn disposition rempli avek l’amour ki Jéhovah ti prend pou aide bann Israélite “servi Li avek l’integrité ek la verité.” (Jos. 24:14) Li pareil zordi. Nou presence pendant bann l’assemblée district toulé l’année aide nou pou “contigne marche dan la verité,” ek zot enn partie important dan nou l’adoration. (3 Jean 3) Nou souhaité ki Jéhovah beni bann zeffort ki tou bann ki content la verité pou faire pou assisté l’assemblée ek tire maximum profit!
[L’encadré page 4]
Bon conduite ki nou ena kan nou dan l’endroit kot faire l’assemblée, faire la verité vinn pli joli
[L’encadré page 5]
Trois semaine avant l’assemblée, nou pou participe dan enn campagne l’invitation
[L’encadré page 3-6]
Bann rappel pou l’assemblée district 2012
◼ Programme: Toulé-trois jour, programme pou commencé 9:20 a.m. La porte la Salle l’assemblée pou ouvert 8:00 a.m. Kan la musik commence joué, nou tou nou bizin prend nou place pou ki programme kapav commencé dan enn fason ki digne. Programme pou terminé 4:55 p.m. vendredi ek samedi, ek 3:40 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam.
◼ Reserve bann place: Ou kapav reserve bann place zis pou bann dimoune ki pé voyage ensam avek ou dan mem transport, ou-soit ki reste dan mem lakaz ki ou, ou-soit pou bann l’etude.—1 Cor. 13:5.
◼ Repas pou midi: S’il vous plait, amenn ou repas pou midi au lieu ki ou al acheté mangé en dehors pendant pause. Ou kapav amenn enn ti cooler-bag ki kapav rente enba ou chaise. Fodé pa amenn bann grand cooler-box ek bann kitsoz en verre dan la Salle l’assemblée.
◼ Bann donation: Nou kapav montré nou reconnaissance pou tou bann disposition ki’nn prend pou l’assemblée kan nou faire bann contribution volontaire dan la Salle l’assemblée. Bann donation ki faire par cheque bizin faire lor nom “Association of Jehovah’s Witnesses.”
◼ Bann accident ek bann urgence: Si ena enn urgence medical, ou bizin appel enn kikenn dan service l’accueil, ki desuite pou contacté service premier secours. L’equipe premier secours kapav guette la situation ek donne enn l’aide. Si necessaire, l’equipe premier secours pou telephone SAMU (114). Sa pou evité ki SAMU gagne plusieurs l’appel telephone.
◼ Medecine: Si ou bizin prend medecine ki docteur finn donne ou, s’il vous plait amenn quantité ki ou bizin, parski pa pou gagne okenn medecine dan l’assemblée.
◼ Bann poussette ek bann chaise pliable: Fodé pa amenn bann poussette ek bann chaise pliable dan l’assemblée. Mais, bann parent kapav amenn bann siege bébé ki zot kapav mette lor enn chaise a coté zot.
◼ Bann parfum: Nou pou montré ki nou ena consideration pou lezot si nou pa trop servi bann parfum fort ki kapav faire bann dimoune ki ena probleme respiratoire ek lezot probleme ki associé ar sa, tombe malade.—1 Cor. 10:24.
◼ Form Veuillez suivre l’intérêt (S-43): Bizin servi bann form Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn deux-trois sa bann form-la avek zot kan zot vinn l’assemblée. Kan zot inn fini rempli zot form, zot kapav donne sa secretaire zot congregation.—Guette Ministere du Royaume mai 2011, page 5.
[L’encadré page 6]
Couma nou pou offert l’invitation?
Pou nou kapav couvert nou territoire, nou presentation bizin bref. Nou kapav dire sa: “Bonjour. Nou pé participe dan enn campagne mondial ek nou pé distribué sa l’invitation-la. Sa c’est ou l’invitation. Ou pou gagne lezot detail ladan.” Ou bizin ena l’enthousiasme. Kan nou pé distribué bann l’invitation pendant week-end, nou kapav offert aussi bann periodik kan li approprié.