Trois jour kot nou pou gagne l’encouragement spirituel
1. Ki bienfait nou pou gagné kan nou pou assisté l’assemblée district sa l’année-la?
1 Dan sa le monde Satan kot ena la secheresse lor plan spirituel-la, Jéhovah contigne donne So bann serviteur seki zot bizin lor plan spirituel pou rafraichi zot. (Is. 58:11) Enn disposition ki Jéhovah servi pou redonne nou la force c’est l’assemblée district ki faire toulé l’année. A mesure ki l’assemblée pou sa l’année-la pé kosté, couma nou kapav prepare-nou pou gagne ek pou donne lezot enn reconfort spirituel?—Prov. 21:5.
2. Ki bann preparation nou bizin inn fini faire?
2 Si ou pankor faire li, prend le temps asterla-mem pou faire bann l’arrangement personnel ek dan travail pou ki ou kapav assisté toulé-trois jour l’assemblée. Eski ou finn calculé comié le temps sa pou prend ou pou al l’assemblée chaque jour pou ki ou kapav arrive boner ek rod enn place avant ki programme commencé? Pena doute ki nou pa pou envie mank mem enn ti miette dan repas spirituel ki Jéhovah inn preparé pou nou, pou fortifié nou. (Is. 65:13, 14) Eski ou’nn fini faire bann l’arrangement pou transport?
3. Ki bann suggestion pou aide nou ek nou famille pou bien profite programme l’assemblée?
3 Ki pou aide ou pou reste concentré pendant bann session? Si possible, al dormi boner sa trois jour l’assemblée-la. Fixé ou l’attention lor orateur-la. Chaque fois ki li cite enn verset, guette verset-la dan ou la Bible. Prend bann ti note. Li pli bon ki bann famille assize ensam, coumsa bann parent kapav aide zot zenfant pou ecoute bien. (Prov. 29:15) Kan ou rente kot ou apré l’assemblée, kitfois ou kapav koz lor bann point interessant en famille. Ki ou kapav faire pou ki ou famille contigne gagne bann l’encouragement mem apré l’assemblée? Ou kapav reserve le temps pendant l’etude familial pou examine bann point precis ki ou famille kapav mette en pratik.
4. Couma nou kapav aide lezot dan nou congregation pou gagne reconfort lor plan spirituel?
4 Aide lezot pou gagne reconfort: Nou envie ki l’assemblée reconforte lezot aussi. Eski dan congregation ena bann proclamateur agé ek lezot ki bizin l’aide pou zot kapav assisté l’assemblée? Eski ou kapav aide zot? (1 Jean 3:17, 18) Bann ancien, surtout bann surveillant groupe, bizin veillé ki sa bann proclamateur-la gagne l’aide ki bizin.
5. Couma nou pou distribué bann l’invitation pou l’assemblée? (Guette aussi l’encadré la-haut.)
5 Pareil couma dan bann dernier l’année, trois semaine avant l’assemblée, nou pou participe dan enn campagne pou invite bann dimoune pou vinn assisté sa l’evenement-la. Bann congregation bizin fixé l’objectif pou distribué zot quota l’invitation ek couvert zot territoire autant ki possible. Si apré sa campagne-la, ou famille ena encore bann l’invitation ki’nn resté, ou bizin zot avek ou dan l’assemblée pou ki ou kapav servi sa pou rann temoignage. Nou pou gagne plus l’information lor la pendant programme vendredi. Si ou ena bann l’invitation ki ou pensé ou famille pa pou servi, ou kapav donne sa enn frere ki occupe service l’accueil kan ou rente dan la salle l’assemblée. S’il vous plait, garde enn copie avek ou, parski ou pou bizin sa pendant dernier discours dimanche.
6. Dan ki fason nou kapav montré bann bon maniere pendant l’assemblée?
6 Bann bon maniere reconforte lezot: Dan enn lepok kot beaucoup dimoune “content zot-mem” ek pena okenn consideration pou sentiment lezot, sa bien reconforte nou kan nou parmi nou bann compagnon chretien ki faire zeffort pou montré bann bon maniere! (2 Tim. 3:2) Nou montré bon maniere kan nou rente dan la Salle l’assemblée en ordre ek sans faire tapage kan la porte ouvert 8:00 a.m. ek kan nou reserve place zis pou bann ki reste dan mem lakaz ki nou, ou-soit ki voyage avek nou, ou-soit pou nou bann l’etude. Nou ecoute bann instruction ki president donne nou, kan li invite nou pou assizé pou ecoute la musik ki joué avant chaque session. Nou pou montré bann bon maniere kan nou reglé nou portable ou-soit nou pager pou ki li pa derange personne pendant programme. Nou pou montré bann bon maniere aussi kan nou pa kozé, envoye message, mangé ou-soit marche-marché pou nanyin pendant programme.
7. Couma nou kapav gagne ek donne reconfort kan nou frequente lezot frere ek soeur?
7 Enn compagnie agreable: Bann l’assemblée donne nou enn pli grand l’occasion pou profite l’unité ki ena parmi nou bann frere ek soeur. (Ps. 133:1-3) Kifer ou pa prend l’initiative pou ’ouvert ou leker bien grand’ ek faire connaissance bann frere ek soeur ki dan lezot congregation? (2 Cor. 6:13) Ou kapav fixé l’objectif pou konn au moins enn nouveau dimoune ou-soit enn nouveau famille toulé-jour. Pause midi donne nou enn bon l’occasion pou faire sa. Alors, amenn enn repas leger ek profite l’occasion pou mangé ek pou joinde lezot dan la Salle l’assemblée au lieu ki ou al acheté mangé ou-soit ki ou mange en dehors. Sa kapav permette ou pou crée bann nouveau l’amitié ki pou duré.
8. Kifer nou bizin porte-nou volontaire pou l’assemblée, ek couma nou kapav faire sa?
8 Li vrai-mem reconfortant pou travail ensam avek nou bann compagnon chretien dan service sacré! Eski ou kapav porte-ou volontaire pou enn service dan l’assemblée ou-soit pou aide ou congregation pou nettoyé? (Ps. 110:3) Si ou pankor gagne okenn responsabilité, s’il vous plait, dan l’assemblée, al vers departement service volontaire pou propose ou l’aide. Kan ena plusieurs volontaire, travail-la vinn pli leger ek nou faire li dan la joie.
9. Kifer nou bizin surtout faire attention lor nou conduite ek nou l’apparence pendant l’assemblée?
9 Nou conduite kapav touche bann ki observe nou: Nou bann delegué l’assemblée pendant sa trois jour l’assemblée-la, pa zis pendant programme. Bann ki observe nou dan l’endroit kot faire l’assemblée bizin kapav remarké ki ena enn grand difference entre nou ek bann ki pa Témoins. (1 Pierre 2:12) Nou l’habillement ek nou coiffure dan la Salle l’assemblée bizin honore Jéhovah. (1 Tim. 2:9, 10) Si nou mette nou badge bann dimoune ki observe nou pou kapav koné ki nou bann Témoins de Jéhovah. Kitfois, sa kapav donne nou l’occasion pou koz lor nou l’assemblée ek donne enn temoignage.
10. Ki bann l’experience ki montré bon temoignage ki nou kapav donné kan nou ena enn bon conduite?
10 Ki l’impression nou bon conduite pendant l’assemblée kapav ena lor lezot? Dapré enn lartik dan enn journal, manager enn batiment ki ti servi pou bann l’assemblée ti dire: “Bann dimoune-la ena bon maniere. Nou bien content pou gagne zot toulé l’année.” L’année derniere enn kikenn ki pa Témoin ti perdi so porte-monnaie dan enn l’hotel kot ti ena bann Témoins ki ti pé assisté l’assemblée. Enn kikenn ti retourne porte-monnaie-la avek tou seki ti ena ladan avek directeur l’hotel-la. Lerla directeur-la ti dire sa missié ki ti perdi so porte-monnaie-la: “Heureusement pou ou ki l’hotel ti rempli ar bann Témoins de Jéhovah ek ki zot ti pé assisté l’assemblée pré la-mem. Parski sinon pena chemin ou ti pou ré-gagne ou porte-monnaie.”
11. A mesure ki l’assemblée pé kosté, ki l’objectif nou bizin ena, ek kifer?
11 L’assemblée pou sa l’année-la pé kosté bien vite. Sa inn demann beaucoup le temps ek zeffort pou ki sa programme-la reconforte nou ek ki nou kapav suive programme-la dan bann bon condition. Fixé l’objectif pou assisté toulé-trois jour l’assemblée, ek prepare ou pou seki Jéhovah ek so l’organisation inn preparé pou ou. Ou bizin determiné pou reconforte lezot a travers ou bann bon maniere, bon compagnie ek bon conduite. Coumsa ou ek lezot kapav ena mem sentiment ki enn soeur ki ti assisté l’assemblée l’année derniere, ek ki ti dire: “Mo pa kapav rappel enn lot moment kot mo ti content coumsa!”
[L’encadré page 4]
Pareil couma dan bann dernier l’année, trois semaine avant ki l’assemblée commencé nou pou participe dan enn campagne pou invite bann dimoune pou vinn assisté sa l’evenement-la
[L’encadré page 6]
Nou l’habillement ek nou coiffure dan la Salle l’assemblée bizin honore Jéhovah
[L’encadré page 7]
Ou bizin determiné pou reconforte lezot a travers ou bann bon maniere, bon compagnie ek bon conduite
[L’encadré page 4]
Bann rappel pou l’assemblée district 2011
◼ Programme: Toulé-trois jour, programme pou commencé 9:20 a.m. La porte la Salle l’assemblée pou ouvert 8:00 a.m. Kan la musik commence joué, nou tou nou bizin prend nou place pou ki programme kapav commencé dan enn fason ki digne. Programme pou terminé 4:55 p.m. vendredi ek samedi, ek 3:40 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam. Coumsa, sa pou diminué quantité l’auto ki ena dan parking.
◼ Reserve bann place: Ou kapav reserve bann place zis pou bann dimoune ki pé voyage ensam avek ou dan mem transport, ou-soit ki reste dan mem lakaz ki ou, ou-soit pou bann l’etude.—1 Cor. 13:5.
◼ Repas pou midi: S’il vous plait, amenn ou repas pou midi au lieu ki ou al acheté mangé en-dehors pendant pause. Ou kapav servi enn ti cooler-bag ki kapav rente enba ou chaise. Li interdit pou amenn bann grand cooler-box ek bann kitsoz en verre dan la Salle l’assemblée.
◼ Bann donation: Nou kapav montré nou l’appreciation pou tou bann disposition ki’nn prend pou l’assemblée kan nou faire bann contribution volontaire dan la Salle l’assemblée. Bann donation ki faire par cheque bizin faire lor nom “Association of Jehovah’s Witnesses.”
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek c’est li ki pou contacté service premier secours. L’equipe premier secours ki qualifié kapav guette la situation ek donne enn l’aide. Si necessaire, l’equipe premier secours pou telephone SAMU (114).
◼ Medecine: Si ou bizin prend medecine ki docteur finn donne ou, s’il vous plait amenn quantité ki ou bizin, parski pa pou gagne okenn medecine dan l’assemblée.
◼ Soulier: Toulé l’année, ena bann dimoune ki blessé a cause soulier ki zot inn metté. Li pli bon ki ou mette bann soulier assez simple, ki zis dan ou lipié ki pou permette ou marche en securité, couma par exemple lor bann l’escalier.
◼ Bann pousette ek bann chaise pliable: Fodé pa amenn bann pousette ek bann chaise pliable dan l’assemblée. Mais, bann parent kapav amenn bann siege bébé ki zot kapav mette lor enn chaise a coté zot.
◼ Bann parfum: Couma zot koné, li arrivé ki l’air pa circulé facilement dan nou la Salle l’assemblée, en plus ena beaucoup dimoune tout autour. Alors, nou pou montré ki nou ena consideration pou lezot si nou pa trop servi bann parfum fort ki kapav faire bann dimoune ki ena probleme respiratoire ek lezot probleme ki associé ar sa, tombe malade.—1 Cor. 10:24.
◼ Form Veuillez suivre l’intérêt (S-43): Bizin servi bann form Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn deux-trois sa bann form-la avek zot kan zot vinn l’assemblée. Kan zot inn fini rempli zot form, zot kapav donne sa secretaire zot congregation kan zot retourné.—Guette Ministere du Royaume novembre 2009, page 4.
[L’encadré page 5]
Couma nou pou offert bann l’invitation?
Pou ki nou kapav couvert nou territoire, nou bizin pa prend beaucoup le temps. Nou kapav dire sa: “Bonjour. Nou pé participe dan enn campagne mondial ek nou pé distribué sa l’invitation-la. Sa c’est ou l’invitation. Ou pou gagne lezot detail ladan.” Couverture-la attire l’attention bann dimoune, alors donne l’invitation-la dimoune-la pou ki li kapav trouve sa. Ou bizin ena l’enthousiasme. Kan nou pé distribué bann l’invitation pendant week-end, nou kapav offert aussi bann periodik kan li approprié.