Bann l’assemblée district—Enn moment joyeux kot nou adore Jéhovah
1. Couma bann fête ki ti faire en Israël zot pareil couma nou bann l’assemblée district zordi?
1 Joseph, Marie, zot zenfant, ek lezot adorateur Jéhovah, ti al Jérusalem regulierement pou bann fête ki ti ena chaque l’année. Dan sa bann l’occasion-la, zot ti essaye blié bann probleme ki zot ti ena dan la vie toulé-jour, pou concentré lor bann activité spirituel ki ti pli important dan zot la vie. Sa bann fête-la ti donne zot le temps pou reflechi ek pou koz lor bonté Jéhovah ek pou examine so la Loi. Nou prochain l’assemblée district pou donne nou bann l’occasion coumsa pou adore Jéhovah dan la joie.
2. Ki nou bizin faire pou prepare-nou pou prochain l’assemblée district?
2 Preparation: Famille Jésus ti bizin marche environ 200 km allé-retour depuis Nazareth. Mem si nou pa koné comié frere ek soeur Jésus ti ena, nou kapav mazinn preparation ek zeffort ki sa ti demann Joseph ek Marie. Eski ou finn faire bann preparation necessaire pou assisté toulé-trois jour nou prochain l’assemblée district? Kitfois ou pou bizin prend congé dan ou travail, ou-soit koz ar ou patron ou-soit ar professeur ou zenfant. Eski ou kapav prend l’initiative pou aide enn kikenn dan ou congregation ki bizin l’aide pou assisté l’assemblée?—1 Jean 3:17, 18.
3. Couma bann fête ki ti ena en Israël ti donne l’occasion pou profite enn compagnie encourageant?
3 Enn compagnie encourageant: Bann fête ki bann Juif ti faire ti donne zot l’occasion pou encourage sakenn zot camarade. Famille Jésus surement ti pé attann avek impatience pou passe le temps avek bann camarade ki zot ti koné depuis longtemps. Zot ti content aussi kan zot ti gagne l’occasion pou faire bann nouveau camarade parmi la foule bann Juif ek bann prosélyte ki ti pou Jérusalem, ou-soit bann ki ti pou voyage avek zot.
4. Couma nou kapav montré ki nou pa considere l’unité ki ena dan communauté nou bann frere couma enn kitsoz banal?
4 L’esclave fidele ek avisé inn prend disposition pou ki nou joinde ensam pou ecoute bann discours dan bann l’assemblée district au lieu ki nou gagne sa dan bann publication. Kifer? Pou ki nou kapav encourage sakenn nou camarade. (Héb. 10:24, 25) Alors, faire bann l’arrangement pou ki ou arrive l’assemblée boner chaque jour pou profite compagnie lezot assistant avant ki president session annonce la musik ki pou joué ek ki faire nou koné ki nou bizin prend nou place. Midi, au lieu ki nou quitte la salle pou al rod mangé, nou encouragé pou amenn enn repas leger ek pou reste dan l’assemblée pou nou kapav joinde ek koz avek bann dimoune ki autour nou. L’unité ki ena dan communauté nou bann frere c’est enn don ki Jéhovah inn donné ek fodé jamais ki nou considere sa couma enn kitsoz banal.—Mika 2:12.
5. Ki pou aide nou pou profite bien programme l’assemblée?
5 Enn le temps pou aprann: Depuis bien jeune, Jésus ti profite bann fête pou aprann bann kitsoz concernant so Papa ki dan le ciel. (Luc 2:41-49) Ki pou aide nou ek nou famille pou profite bien tou bann partie programme ki pou presenté? Pendant bann session, reste assizé ek evite koz pou nanyin. Pa laisse ou telephone portable ou-soit lezot l’appareil derange ou ou-soit derange lezot. Garde ou lizié lor l’orateur, ek prend bann ti note. Assize ensam avek ou famille pou ou faire sur ki ou zenfant pé ecouté zot aussi. A soir, prend le temps pou discute ensam lor bann point ki zot finn apprecié.
6. Ki nou bizin pa blié concernant nou l’habillement ek nou l’apparence?
6 L’habillement ek coiffure: Bann marchand etranger ki ti pé voyagé lor la route ti kapav facilement reconette famille Jésus ek lezot adorateur Juif ki ti pé voyagé avant ek apré bann fête parski zot ti ena enn frange dan rebord zot linge ek enn cordon bleu lor sa frange-la. (Nomb. 15:37-41) Mem si bann chretien pa mette bann linge special, bann dimoune konn nou pou nou l’habillement modeste, en ordre ek prop. Nou bizin surtout faire attention ar nou l’apparence kan nou pé voyagé avant ek apré l’assemblée ek kan nou dan l’endroit kot pou ena l’assemblée. Coumsa, nou pou montré-nou different avek bann dimoune ki pa Témoin ek nou pou donne enn bon l’impression bann dimoune ki pé observe nou.
7. Kifer nou bizin reflechi si nou kapav porte-nou volontaire dan l’assemblée?
7 Volontaire: Bizin beaucoup volontaire pou ki l’assemblée deroule bien. Eski ou kapav porte-ou volontaire pou aidé? (Ps. 110:3) Travail ki nou ena dan bann l’assemblée forme partie dan nou service sacré ek sa donne enn bon temoignage. Manager enn batiment kot ti faire l’assemblée ti tellement impressionné par bann volontaire ki ti nettoye batiment-la, ki li ti ecrire: “Jamais mo pa finn trouve enn l’evenement extraordinaire coumsa, mo envie remercié zot pou sa. Touletan mo finn tendé ki bann Témoins de Jéhovah zot bann dimoune different, ek zot ena enn bon reputation pou toujours laisse l’endroit ki zot finn servi pli prop ki kan zot ti gagne li. Zot ek zot l’organisation finn faire sa place-la vinn pli joli pou bann dimoune dan l’endroit ek zot finn faire sa avek bann dimoune ki ena pli bon maniere ki nou finn koné.”
8. Ki l’occasion nou pou ena pou rann temoignage dan l’endroit kot pou ena l’assemblée?
8 Bann l’occasion pou rann temoignage: Dan l’endroit kot faire l’assemblée, beaucoup dimoune pou remarké ki nou bien habillé, bien coiffé ek ki nou porte nou badge. Sa kapav pousse zot pou pose nou question, ek lerla nou pou gagne l’occasion pou koz avek zot concernant l’assemblée. Apré programme enn l’assemblée, enn ti garson quatre an ti amenn ar li enn nouveau publication ki ti fek sorti pendant l’assemblée ek li ti montré sa enn serveuse dan enn restaurant. Sa ti donne l’occasion so parent pou invite sa serveuse-la l’assemblée.
9. Couma nou kapav montré mem l’attitude ki famille Jésus envers bann l’occasion pou aprann lor Jéhovah?
9 Bann fête dan le passé ti bann l’occasion bien joyeux ek bann Juif ki ti envie aprann plus lor Jéhovah ti pé attann sa avek impatience. (Deut. 16:15) Famille Jésus ti content pou faire n’importe ki sacrifice pou assisté sa bann fête-la ek pou tire maximum profit. Nou aussi pareil, nou apprecié nou bann l’assemblée district, ek nou considere sa couma enn don ki nou Papa ki dan le ciel donne nou. (Jacq. 1:17) Asterla inn ler pou prepare nou pou sa l’evenement ki nou ena toulé-l’année-la, kot nou adore Jéhovah dan la joie!
[L’encadré page 6, 7]
Bann rappel pou l’assemblée district
◼ Programme: Toulé-trois jour, programme pou commencé 9:20 a.m. La porte la Salle l’assemblée pou ouvert 8:00 a.m. Kan la musik commence joué, nou tou nou bizin prend nou place pou ki programme kapav commencé dan enn fason ki digne. Programme pou terminé 4:55 p.m. vendredi ek samedi, ek 3:40 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam. Coumsa, sa pou diminué quantité l’auto ki ena dan parking.
◼ Reserve bann place: Ou kapav reserve bann place zis pou bann dimoune ki pé voyage ensam avek ou dan mem transport, ou-soit ki reste dan mem lakaz ki ou, ek aussi pou ou bann l’etude.—1 Cor. 13:5.
◼ Repas pou midi: S’il vous plait, amenn ou repas pou midi au lieu ki ou al acheté mangé en-dehors pendant pause. Ou kapav servi enn ti cooler-bag ki kapav rente enba ou chaise. Li interdit pou amenn bann grand cooler-bag ek bann kitsoz en verre dan la Salle l’assemblée.
◼ Bann donation: Nou kapav montré nou l’appreciation pou tou bann disposition ki’nn prend pou l’assemblée kan nou faire bann contribution volontaire soit dan la Salle du Royaume ou-soit dan la Salle l’assemblée. Bann donation ki faire par cheque dan bann l’assemblée district, bizin faire lor nom “Association of Jehovah’s Witnesses.”
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek c’est li ki pou contacté service premier secours. L’equipe premier secours ki qualifié kapav guette la situation ek donne enn l’aide. Si necessaire, l’equipe premier secours pou appel SAMU.
◼ Bann parfum: Couma zot koné, li arrivé ki l’air pa circulé facilement dan nou la salle l’assemblée, en plus ena beaucoup dimoune tout autour. Alors, nou pou montré ki nou ena consideration pou lezot si nou pa trop servi bann parfum fort ki kapav faire bann dimoune ki ena probleme respiratoire ek lezot probleme ki associé ar sa, tombe malade.—1 Cor. 10:24.
◼ Enregistrement programme: Pa gagne droit branche okenn l’appareil pou enregistré lor la ligne electrik ou-soit lor systeme sonorisation la Salle l’assemblée. Si ou enregistré programme, fodé pa ki sa derange lezot.
◼ Bann form pou suive l’interet: Bizin servi bann form Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn deux-trois sa bann form-la avek zot kan zot vinn l’assemblée. Kan zot inn fini rempli zot forme, zot kapav donne sa secretaire zot congregation kan zot retourné.—Guette Ministere du Royaume novembre 2009, page 4.