Enn Conduite ki Donne Bondié la Gloire
1. Kifer bann dimoune fasil reconette bann Témoins de Jéhovah kan zot pé assisté l’assemblée district?
1 Bann dimoune fasil reconette nou kan nou pé assisté bann l’assemblée district. Bann dimoune ki reste dan l’endroit kot pé faire l’assemblée remark beaucoup visiteur avek zot badge l’assemblée. Anou guette deux-trois rappel ki pou aide nou donne Bondié la gloire par nou bon conduite, kan nou dan l’endroit kot pé faire l’assemblée.—1 Pierre 2:12.
2. Kifer kan nou habille dan enn fason modeste kan nou pé assisté l’assemblée, sa donne Bondié la gloire?
2 Enn l’Habillement Modeste: Kan nou habille dan enn fason modeste kan nou assisté l’assemblée, sa souvent impression bann ki pé observe nou. Seki nou metté bizin digne ek pa decontracté. Bann dimoune ki pé observe nou bizin kapav trouvé ki ena enn difference entre nou ek bann ki pa servi Jéhovah. (Rom. 12:2) En plis, nou bizin mette nou badge l’assemblée parski sa pou faire bann dimoune koné ki ena l’assemblée, pou crée bann l’occasion pou rann temoignage, ek permette bann lezot assistant konn nou nom ek ki congregation nou sorti.
3. Couma nou kapav montré ki nou ena patience ek bon maniere?
3 Patience ek Bon Maniere: Dan enn lepok kot beaucoup dan sa le monde-la zot egoïste ek pena reconnaissance, nou patience ek nou bon maniere pou faire di-bien bann ki pé observe nou! (2 Tim. 3:1-5) Kan nou pé reserve bann place ou-soit nou pé mette la queue pou prend bann nouveau publication, nou bizin pa rod nou prop l’avantage, mais l’avantage lezot. (1 Cor. 10:23, 24) Apré ki enn missié ki interessé ti assisté so premier l’assemblée, li ti dire: “Mo pa rappel okenn discours ki ti faire sa jour-la, mais seki ti mark moi c’est conduite bann Témoins.”
4. Kifer li bon nou pense pou porte-nou volontaire pendant l’assemblée si nou situation permette?
4 Volontaire: Bann vrai chretien c’est bann dimoune ki disposé pou porte-zot volontaire. (Ps. 110:3) Eski ou kapav porte-ou volontaire pou aidé pou l’assemblée? Pou enn l’assemblée, ti ena apepré 600 frere ek soeur ki ti porte-zot volontaire pou nettoye sa place kot ti pou faire l’assemblée-la. Bann dimoune ki ti travail la-bas ti dire: “Jamais nou finn trouve enn kitsoz extraordinaire coumsa! Nou pa’lé croire ki tou sa bann dimoune-la zot bann volontaire.” Nou pé attann avek impatience bann l’assemblée district pou 2013 kot nou pou gagne l’occasion pou ecouté ek aprann ar Bondié, mais aussi pou donne Li la gloire.
[L’encadré page 3-6]
Bann Rappel pou l’Assemblée District 2013
◼ Programme: Laport la salle l’assemblée pou ouvert 8:00 a.m. Toulé-trois jour pou commence joué la musik 9:20 a.m. Kan nou tann la musik, nou tou nou bizin prend nou place pou ki programme kapav commencé dan enn fason ki digne. Vendredi ek Samedi pou chante cantik final ek faire la priere 4:50 p.m. ek Dimanche pou faire sa 3:35 p.m.
◼ Parking: Parski bann place parking limité, nou encourage bann frere pou organise-zot pou voyage ensam.
◼ Reserve Bann Place: Ou kapav reserve bann place zis pou bann dimoune ki reste dan mem lakaz ki ou, ou-soit ki pé voyage ensam avek ou dan mem transport, ou-soit pou ou bann letid.—1 Cor. 13:5.
◼ Repas Midi: S’il vous plait, amenn enn repas leger pou midi au lieu ki ou al acheté mangé en dehors pendant pause. Ou kapav amenn enn ti cooler-bag ki kapav rente enba ou chaise. Fodé pa amenn bann grand cooler-box ek bann kitsoz en verre dan la salle l’assemblée.
◼ Bann Donation: Nou kapav montré nou reconnaissance pou tou bann disposition ki’nn prend pou l’assemblée kan nou faire bann contribution volontaire dan la salle l’assemblée. Bann donation ki faire par cheque bizin faire lor nom “Association of Jehovah’s Witnesses.”
◼ Medecine: Si ou bizin prend medecine ki docteur finn donne ou, s’il vous plait amenn quantité ki ou bizin, parski pa pou gagne okenn medecine dan l’assemblée. Bann dimoune diabetik ki servi seringue bizin pa jette zot seringue dan bann poubelle ki ena dan la salle l’assemblée.
◼ Soulier: Toulé l’année, ena bann dimoune ki blessé a cause soulier ki zot inn metté, surtout soulier talon. Li pli bon ki ou mette bann soulier ki zis dan ou lipié ek ki pou permette ou marche en securité lor bann l’escalier ek dan macadam.
◼ Bann Poussette ek Bann Chaise Pliable: Fodé pa amenn bann poussette ek bann chaise pliable dan l’assemblée. Mais, bann parent kapav amenn bann siege bébé ki zot kapav mette lor enn chaise a coté zot.
◼ Bann Parfum: Nou pou montré ki nou ena consideration pou lezot si nou pa trop servi bann parfum fort ki kapav faire bann dimoune ki ena probleme respiratoire ek lezot probleme ki associé ar sa, tombe malade.—1 Cor. 10:24.
◼ Form Veuillez suivre l’intérêt (S-43): Bizin servi bann form Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel dan l’assemblée. Kan bann proclamateur inn fini rempli zot form, zot kapav donne sa secretaire zot congregation.
◼ Service Volontaire: Tou bann ki envie travail couma volontaire pou l’assemblée bizin faire Departement Service Volontaire koné. Bann zenfant ki ena moins ki 16 an kapav aussi vinn donne coude-main, mais zot bizin accompagné avek zot parent ou-soit enn adulte ki pou prend zot responsabilité.