Bann Rapel pou Lasanble
Program: Laport Lasal Lasanble pou ouver 8h00 a.m. Toule-trwa zour, lamizik pou koumanse 9h20 a.m. Kan nou tann lamizik, nou tou bizin al asiz dan nou plas pou ki program kapav koumanse dan enn fason dign. Vandredi ek Samdi, lasanble pou fini ver 5h00 p.m. ek Dimans, ver 4h00 p.m.
‘Loue Zeova Avek Bann Kantik’: Dan lepase, pep Bondie ti loue Li avek bann kantik, ek zordi osi lamizik ena enn plas inportan dan vre ladorasion. (Ps. 28:7) Sak sesion nou bann lasanble rezional koumans avek lamizik. Se pa zis enn ti lamizik dous, me enn lamizik ki’nn prepare pou ed nou aprann ek ador Zeova. Alor, kan prezidan lasanble anonse ki lamizik pre pou koumanse, nou kone inn ariv ler pou asize ek apresie lamizik olie ki nou kontign koze. Kan nou fer sa, nou montre nou rekonesans pou travay ki bann manb lorkes Watchtower fer. De fwa par an, sa bann frer ek ser la vwayaze lor zot prop fre pou vinn Patterson, New York, pou konpoz bann zoli lamizik. Apre ki nou’nn ekout lamizik, nou tou ansam pou sant bann kantik pou loue Zeova.
Parking: Dan tou bann plas kot fer lasanble, servis parking li gratis. Seki vinn avan, gagn plas avan. Bann plas parking limite, akoz sa nou ankouraz bann frer pou organiz zot pou vwayaz ansam.
Rezerv Bann Plas: Kan laport lasanble ouver toule gramatin, pa galoupe pou al swazir bann plas koumadir to pe met paryaz avek to bann frer ek ser. Silteple ena konsiderasion pou lezot. Lespri sakrifis pou pous nou pou get lezot avan. Se sa ki idantifie nou kouma bann vre Kretien ek pous bann ki obzerv nou pou loue Bondie. (Zan 13:34, 35; 1 Kor. 13:4, 5; 1 Pier 2:12) Nou kapav rezerv plas zis pou bann ki pe vwayaz dan mem transpor ki nou, ki res dan mem lakaz ki nou, ouswa pou nou bann letid. Silteple pa poz bann kitsoz lor bann sez ki to pa pe rezerve. Koumsa, lezot pou trouve kotsa ena bann plas lib.
Enn Labiyman Modes: Nou labiyman pandan lasanble bizin apropriye ek modes. Fode pa nou met bann linz ki reflet bann lamod exsantrik ki ena dan lemond. (1 Tim. 2:9) Si avan ek apre lasanble nou pe pas bann moman detant, fode pa nou abiye dan enn fason tro dekontrakte. Koumsa, nou pou fier pou port nou badge ek nou pa pou anbarase pou rann temwaniaz kan enn lokazion prezante. Nou laparans ek nou bon kondwit pandan nou prosin lasanble kapav atir bann dimounn sinser ver laverite. Anplis, sa pou fer Zeova plezir.—Sef. 3:17.
Bann Laparey Elektronik: Nou montre ki nou ena bon manier kan nou regle nou portab ek lezot laparey elektronik pou ki sa pa deranz bann asistan pandan program. Si nou servi enn kamera, enn laparey pou anregistre, enn tablet, ouswa enn lot laparey elektronik, nou pou montre konsiderasion kan nou pa deranz lezot ouswa bar zot. Nou montre bon manier osi kan nou pa avoy bann sms ouswa bann e-mail initil pandan lasanble.
Repa Midi: Silteple, amenn to repa pou midi olie to kit Lasal Lasanble pou al aste manze deor. To kapav amenn enn ti cooler-bag ki kapav rant anba to sez. Fode pa ki to amenn bann gran cooler-box ek bann kitsoz an ver dan Lasal Lasanble.
Donasion: Nou montre nou rekonesans pou bann dispozision ki’nn pran pou lasanble kan nou fer bann kontribision volonter dan Lasal Lasanble pou nou laktivite mondial. Bann donasion ki fer par sek bizin fer lor nom “Association of Jehovah’s Witnesses.”
Medsinn: Si to ena medsinn pou pran, silteple amenn kantite ki to bizin parski dan lasanble pa pou ena okenn medsinn. Fode pa ki bann diabetik zet zot bann zegwi ek sereng dan bann poubel kot pe fer lasanble.
Prekosion: Silteple, fer atansion ki to pa glise ouswa kogne dan Lasal Lasanble. Sak lane ena bann dimounn ki blese akoz soulie ki zot inn mete, sirtou bann soulie talon. Pou to pa blese lor leskalie ek dan makadam, li pli bon to met bann bon soulie ki zis dan to lipie.
Bann Pouset ek Bann Sez Pliab: Fode pa amenn bann pouset ek bann sez pliab dan lasanble. Me, bann paran kapav amenn bann siez bebe ek met li lor enn sez akote zot.
Parfin: Nou pou montre konsiderasion pou lezot kan nou pa tro servi bann parfin for. Sa kapav fer bann dimounn ki ena problem respiratwar ek lezot problem ki asosie ar sa, tom malad.—1 Kor. 10:24.
Form Veuillez suivre l’intérêt (S-43): Si, pandan lasanble, to rann temwaniaz informel ek dimounn-la manifeste lintere, to bizin servi form Veuillez suivre l’intérêt (S-43) pou donn bann ransegnman. Kan to fini ranpli to form, to kapav donn sa sekreter to kongregasion.
Restoran: Nou pou donn loner nom Zeova kan nou ena enn bon kondwit dan restoran. Abiy dan enn fason ki dign pou enn Kretien. Si li apropriye, kit enn ti tips.
Servis Volonter: Tou bann ki anvi travay kouma volonter pou lasanble bizin fer Departman Servis Volonter kone. Bann zanfan ki ena mwins ki 16 an kapav donn enn koudme zot osi, me fode ki zot paran ouswa enn adilt pran zot responsabilite.