Parole Jéhovah vivant

NOU dan l’année 613 a.n.l. ek prophete Jérémie pé reste dan Juda. Sans okenn la-crainte, li pé annonce destruction Jérusalem ki bien pré ek aussi ki pays Juda pou reste abandonné. Neboukadnetsar, le roi Babylone inn deja amenn beaucoup Juif en captivité. Parmi ena Daniel ek so trois compagnon ki encore jeune ek ki pé servi dan la cour le roi Babylone. La plupart bann Juif ki en exil reste pré kot la riviere Kebar “dan pays bann Chaldéen.” (Ézékiel 1:1-3) Jéhovah pa laisse zot sans enn messager. Li choisir Ézékiel ki ena 30 an, couma prophete.

Livre Ézékiel couvert enn period 22 an ek Ézékiel ti termine sa livre-la en 591 a.n.l. Li donne beaucoup detail kan li ecrire. Li donne date so bann prophetie; li mentionne bann l’année ek li mem precisé ki jour ek ki mois. Premier partie so message koz plus lor lepok kot Jérusalem tombé ek detruire. Dan deuxieme partie so message, ena bann jugement kont bann nation ki autour Jérusalem, ek dernier partie koz lor retablissement l’adoration Jéhovah. Dan sa lartik-la nou pou examine bann point interessant ki sorti dan Ézékiel 1:1–24:27 ek ki koz lor bann vision, bann prophetie ek bann scene ki Ézékiel inn mimé concernant seki pou arrive la ville Jérusalem.

“ENN KIKENN KI VEILLÉ, SA-MEM KI MO’NN FAIRE TOI VINI”

(Ézékiel 1:1–19:14)

Ézékiel gagne so mission apré ki Jéhovah inn faire li trouve So trone dan enn vision impressionnant. Jéhovah dire li: “Enn kikenn ki veillé, sa-mem ki mo’nn faire toi vini pou lakaz Israël, ek to bizin tann bann parole ki sorti dan mo la-bouche ek to bizin averti zot pou moi.” (Ézékiel 3:17) Ézékiel gagne l’ordre pou mime deux scene pou prophetise lor seki pou arrivé kan l’ennemi pou entoure Jérusalem ek bann consequence ki sa pou ena. Jéhovah koz concernant pays Juda ek Li dire par moyen Ézékiel: “Ala mo là! Mo pé faire enn l’epée vinn lor zot, ek vrai-mem mo pou detruire zot bann centre fausse l’adoration.” (Ézékiel 6:3) Jéhovah koz ar bann habitant Juda ek Li dire: ‘Couronne malheur bizin vinn vers toi.’—Ézékiel 7:7.

En 612 a.n.l., dan enn vision Ézékiel trouve-li dan Jérusalem. Li trouve bann kitsoz bien degoutant ki pé passé dan temple Bondié! Pou exprime so colere lor bann apostat, Jéhovah envoye so bann l’armée ki sorti dan le ciel ek ki accompli so bann jugement. Sa bann l’armée-la representé par “six zom.” Zis bann ki’nn recevoir ‘enn marque lor zot front’ ki pou sapé. (Ézékiel 9:2-6) Mais avant, bizin envoye “bann la-braise difé” lor la ville, setadir bann message bien fort concernant so destruction. (Ézékiel 10:2) Alors ki ‘Jéhovah pou faire fason agir bann mauvais dimoune tombe lor zot-mem,’ Li promette pou rassemblé bann ki’nn dispersé parmi Israël.—Ézékiel 11:17-21.

L’esprit Bondié faire Ézékiel retourne en Chaldée. Li mime enn scene ki montré couma le roi Tsidqiya ek so peuple pou sauvé pou quitte Jérusalem. Ézékiel denonce bann fausse prophete—missié, madame toulé-deux. Li rejette bann ki adore zidole. Li compare Juda ar enn pié raisin ki pena okenn valeur. Li raconte enn zistoire l’aigle ek pié raisin ki montré bann kitsoz terrible ki pou arrivé parski Jérusalem inn al rod l’aide ar l’Égypte. Ézékiel termine sa zistoire-la avek promesse ki ‘Jéhovah pou casse enn ti branche ki tann ek vrai-mem Li pou transplante li lor enn montagne ki haute.’ (Ézékiel 17:22) Mais dan Juda, pa pou ena “okenn baton royal pou dirigé.”—Ézékiel 19:14.

Reponse pou bann question biblik:

1:4-28—Ki char celeste representé? Sa char-la represente partie l’organisation Jéhovah ki dan le ciel ek kot ena bann creature spirituel ki fidel. La source so la-force c’est l’esprit saint ki sorti kot Jéhovah. Sa Kikenn ki pé conduire sa char-la represente Jéhovah ek Li ena enn la-gloire ki pa kapav expliké. Enn joli l’arc-en-ciel represente la paix ki Jéhovah ena en Li.

1:5-11—Kisannla sa quatre creature vivant-la? Dan deuxieme vision ki Ézékiel gagné lor char, li faire nou koné ki sa quatre creature vivant-la, zot bann chérubin. (Ézékiel 10:1-11; 11:22) Kan li pé raconte sa deuxieme vision-la, li pa koz lor figure taureau mais lor “figure chérubin.” (Ézékiel 10:14) Sa li approprié parski taureau li enn symbol puissance ek la force, ek bann chérubin zot bann creature spirituel ki puissant.

2:6—Kifer Jéhovah souvent appel Ézékiel “garson enn zom”? Jéhovah appel Ézékiel coumsa pou rappel li ki li enn simple dimoune. Sa montré bien grand difference ki ena entre enn messager humain ek la source sa message-la, setadir Bondié. Jésus aussi appel coumsa apepré 80 fois dan bann l’Evangile, seki montré bien ki Garson Bondié ti’nn né couma enn humain, li pa ti enn l’esprit ki ti’nn zis prend enn lekor materiel.

2:9–3:3—Kifer sa rouleau kot ti ena bann chanté deuil ek bann lamentation-la ti ena enn gout doux dan la bouche Ézékiel? C’est fason ki Ézékiel ti considere so mission ki ti faire sa rouleau-la ena enn gout doux pou li. Li ti reconnaissant ki Jéhovah ti pé servi li couma enn prophete.

4:1-17—Eski Ézékiel ti vrai-mem mime scene ki raconté couma Jérusalem bientot ti pou entouré par bann l’ennemi? Ézékiel ti demann Jéhovah pou laisse li brule enn lot kitsoz pou cuit so mangé ek Jéhovah ti accepté. Sa montré ki Ézékiel ti vrai-mem mime sa scene-la. Li ti dormi lor so coté gauche pou represente sa 390 an ki royaume dix tribu ti’nn faire peché-la, setadir period depuis ki sa royaume-la ti’nn commence existé en 997 a.n.l. ziska so destruction en 607 a.n.l. Li ti dormi lor so coté droite pou represente sa 40 an ki Juda ti faire peché-la, setadir period depuis ki Jérémie ti vinn prophete en 647 a.n.l. ziska 607 a.n.l. Pendant sa period 430 jour-la, Ézékiel ti vive zis avek enn tigit mangé ek de l’eau. Par sa, li ti annoncé ki ti pou ena la famine pendant ki bann l’ennemi pou entoure Jérusalem.

5:1-3—Ézékiel ti bizin prend dé-trois poil dan seki li ti bizin fané dan di-vent ek enveloppe sa enba dan so linge. Ki sa vedir? Li ti faire sa pou montré ki enn reste ti pou retourne Juda ek ti pou retabli vrai l’adoration apré ki pays ti pou reste abandonné pendant 70 an.—Ézékiel 11:17-20.

17:1-24—Kisannla sa deux grand l’aigle-la? Couma bann ti branche sa pié cèdre-la cassé ek kisannla sa ‘ti branche tann’ ki Jéhovah transplanté-la? Sa deux l’aigle-la represente deux lé-roi—le roi Babylone ek le roi l’Égypte. Premier l’aigle vinn la-haut lor boute pié cèdre-la, setadir li vinn kot sa kikenn ki ti pé dirigé dan gouvernement ki dan descendance royal David-la. Sa l’aigle-la casse bann boute ki la-haut dan bann jeune branche kan li remplace le roi Yehoïakîn ki pé regné lor Juda par Tsidqiya. Malgré ki li’nn faire serment pou servi le roi Babylone, Tsidqiya al rod l’aide avek lot l’aigle-la, le roi l’Égypte, mais sa pa servi nanyin. Bann Babylonien pou faire li prisonnier ek li pou mort dan Babylone. Jéhovah casse aussi “enn branche ki tann,” so lé-roi messianik. Li transplante li lor “enn montagne ki haute,” lor mont Sion ki dan le ciel, kot li pou vinn “enn pié cèdre ki bien grand,” ki pou faire la terre gagne bann vrai benediction.—Révélation 14:1.

Bann leson pou nou:

2:6-8; 3:8, 9, 18-21. Fodé pa nou laisse bann mauvais dimoune empeche nou ni decourage nou pou annonce message ki sorti kot Bondié ek ki aussi enn l’avertissement pou zot. Kan nou faire face ar l’indifference ou-soit l’opposition, nou bizin dur couma enn diamant. Mais nou bizin faire attention ki nou leker pa vinn trop dure, ki nou pa vinn insensible, ou-soit sans pitié. Jésus ti ena pitié pou bann dimoune avek ki li ti preché, ek pitié bizin pousse nou aussi pou al preche avek lezot dimoune.—Matthieu 9:36.

3:15. Apré ki li ti gagne so mission, Ézékiel ti reste Tel-Abib, ‘dan enn l’etat choque pendant sept jour,’ pou li kapav digere sa message ki li ti bizin al annoncé-la. Eski nou pa bizin prend le temps pou etudié bien ek medité pou nou comprend bann verité spirituel ki profond?

4:1–5:4. Ézékiel ti bizin ena l’humilité ek courage pou mime sa deux scene prophetik-la. Nou aussi nou bizin ena l’humilité ek courage pou faire n’importe ki travail ki Bondié confié nou.

7:4, 9; 8:18; 9:5, 10. Fodé pa nou ena ni pitié ni chagrin pou bann ki Bondié condamné.

7:19. Kan Jéhovah pou amenn so jugement lor sa lé-monde-la, l’argent pa pou ena okenn valeur.

8:5-18. L’apostasie, li amenn la mort spirituel. “Par so la-bouche enn apostat amenn la ruine pou so prochain.” (Proverbes 11:9) Nou pou montré ki nou ena la sagesse kan nou resisté mem kont l’idée pou ecoute bann apostat.

9:3-6. Pou nou kapav survive kan ‘la grande tribulation’ vini, nou bizin gagne sa marque-la, setadir nou bizin montré ki nou bann serviteur Bondié ki voué ek baptisé, ek ki nou ena personnalité chrétien. (Matthieu 24:21) Bann chrétien oint ki representé par sa zom avek enn recipient kot mette l’encre-la, zot prend la tête dan travail pou mette marque, setadir dan travail predication ek faire bann disciple. Si nou’lé garde nou marque, nou bizin aide zot dan sa travail-la avek zèle.

12:26-28. Ézékiel ti bizin dire mem avek bann ki ti riye so message: ‘En seki concerne tou bann parole Jéhovah, nanyin pou nepli renvoyé.’ Nou bizin faire tou seki nou kapav pou aide lezot mette zot confiance dan Jéhovah avant ki Li amenn destruction sa system-la.

14:12-23. Sakenn parmi nou bizin faire kitsoz pou nou gagne delivrance. Okenn lot dimoune pa kapav faire sa pou nou.—Romains 14:12.

18:1-29. Nou responsable consequence nou bann action.

“MO POU FAIRE SA VINN ENN RUINE, ENN RUINE, ENN RUINE”

(Ézékiel 20:1–24:27)

En 611 a.n.l., alors ki Israël ti dan septieme l’année l’exil, bann ancien vinn guette Ézékiel pou “demandé ki Jéhovah pensé.” Zot tann enn longue zistoire lor rebellion Israël ek enn l’avertissement ki ‘Jéhovah pou tire so l’epée’ kont zot. (Ézékiel 20:1; 21:3) Jéhovah adresse-Li ar chef Israël (Tsidqiya) ek Li dire: “Tire turban, ek enleve couronne. Bann kitsoz pou changé. Mette seki enba, la-haut, ek abaisse seki la-haut. Mo pou faire sa vinn enn ruine, enn ruine, enn ruine. Mais sa aussi, vrai-mem li pa pou vinn pou personne ziska ki sa kikenn ki ena droit legal-la vini, ek mo pou donne li sa.”—Ézékiel 21:26, 27.

Jéhovah accuse Jérusalem. Li faire koné ziska ki point Ohola (Israël) ek Oholiba (Juda), zot coupable. Jéhovah inn fini jette Ohola “dan la main bann ki ti content li avek passion, dan la main bann garson l’Assyrie.” (Ézékiel 23:9) Le temps kot Oholiba pou reste abandonné pré pou arrivé. A partir 609 a.n.l., l’armée Babylone commence entoure la ville Jérusalem ek zot reste là pendant 18 mois. Kan la ville tombé finalement, bann Juif pou tellement gagne choque ki zot pa pou kapav exprime zot chagrin. Fodé pa ki Ézékiel koz message Bondié avek bann ki en exil dan Babylone, tant ki “sa kikenn ki’nn reussi sapé-la” pa vinn dire li ki la ville inn detruire.—Ézékiel 24:26, 27.

Reponse pou bann question biblik:

21:3—Ki été “l’epée” ki Jéhovah pou tire dan so fourreau? “L’epée” ki Jéhovah servi pou amenn so jugement lor Jérusalem ek Juda, c’est le roi Babylone, Neboukadnetsar, ek so l’armée. Avek zot kitfois ena aussi bann creature spirituel puissant ki forme partie dan l’organisation Bondié dan le ciel.

24:6-14—La rouille ki ena dan sa marmite-la, ki li representé? Jéhovah compare Jérusalem ki’nn entouré par bann l’ennemi ar enn marmite ki ena enn grand l’ouverture. So la-rouille represente malpropté moral ki ena dan Jérusalem, setadir so l’impureté, so conduite devergondé ek di-sang ki li’nn versé. Jérusalem ti tellement impur ki mem si ti mette sa marmite vide-la lor so charbon ek ti chauffe li bien, sa pa finn reussi tire sa la-rouille-la.

Bann leson pou nou:

20:1, 49. Fason ki bann ancien Israël ti reagir montré ki zot ti ena doute lor seki Ézékiel ti’nn dire zot. Fodé jamais ki nou ena doute lor bann l’avertissement Bondié.

21:18-22. Mem si Neboukadnetsar ti passe par bann demon pou konn l’avenir, Jéhovah ti faire enn maniere ki sa bann dirigeant païen-la attak Jérusalem. Sa montré ki kan Jéhovah envoye so bann agent pou applik so jugement, mem bann demon pa kapav empeche zot realise so projet.

22:6-16. Jéhovah pa content ditou kan nou koz menti lor lezot pou gate zot reputation, kan nou ena enn conduite immoral, kan nou mal servi nou l’autorité ek kan nou accepté gousse. Nou bizin reste ferme dan nou determination pou evite sa bann mauvais kitsoz-la.

23:5-49. Israël ek Juda ti faire bann l’alliance politik avek bann nation ek sa ti faire zot tombe dan fausse l’adoration. Anou faire attention pou ki frequentation bann dimoune ki dan le monde pa detruire nou la-foi.—Jacques 4:4.

Enn message ki vivant ek puissant

Nou tire bann bon leson dan sa 24 premier chapitre livre Ézékiel-la, pa vrai? Bann principe ki ena dan sa bann chapitre-la montré nou ki kitsoz ki kapav faire nou perdi faveur Bondié, couma nou kapav gagne so misericorde, ek kifer nou bizin averti bann dimoune ki mauvais. Prophetie ki concerne destruction Jérusalem presente bien Jéhovah couma enn Bondié ki ‘faire so peuple tann bann nouveau kitsoz avant ki sa commence germé.’—Isaïe 42:9.

Bann prophetie couma seki nou lire dan Ézékiel 17:22-24 ek 21:26, 27 ti annoncé ki Royaume messianik pou etabli dan le ciel. Bientot, volonté Bondié pou faire lor la terre grace a sa Royaume-la. (Matthieu 6:9, 10) Nou kapav attann bann benediction sa Royaume-la avek enn la-foi ek enn conviction solid. Oui, “parole Bondié, li vivant ek li puissant.”—Hébreux 4:12.

[Zimage, page 12]

Ki char celeste representé?

[Zimage, page 14]

Kan nou participe dan predication avek zèle, sa aide nou pou garde nou “marque”