Parole Jéhovah vivant

NOU en décembre 609 a.n.l. Le roi Babylone inn commence entoure Jérusalem pou attak li pou dernier fois. Ziska ler message Ézékiel pou bann Juif ki en exil ti concerne zis enn sel sujet: Jérusalem, la ville ki zot bien content, pou tombé ek pou detruire. Mais message ki ena dan bann prophetie Ézékiel changé asterla. Sa concerne malheur ki pou vinn lor bann nation païen ki pou content kan peuple Bondié pou dan grand difficulté. Kan Jérusalem tombé 18 mois plitar, message Ézékiel koz lor enn nouveau sujet: retablissement extraordinaire vrai l’adoration.

Dan Ézékiel 25:1–48:35, ena bann prophetie lor bann nation ki tout autour Israël ek lor delivrance peuple Bondié.a Sa recit-la, li dan l’ordre ki bann evenement arrivé ek aussi par sujet excepté Ézékiel 29:17-20 kot li zis dan l’ordre par sujet. Parski livre Ézékiel faire partie dan bann l’Ecriture sacré, ladan ena enn message ki “vivant ek . . . puissant.”—Hébreux 4:12.

‘SA PAYS-LA POU VINN COUMA JARDIN ÉDEN’

(Ézékiel 25:1–39:29)

Parski Jéhovah koné couma Ammôn, Édom, Philistie, Tyr ek Sidon pou reagir kan Jérusalem pou tombé, Li faire Ézékiel prophetise kont zot. Bann l’ennemi pou attak l’Égypte ek pou prend tou seki li ena. Jéhovah compare “Pharaon le roi l’Égypte ek so la-foule” ar enn pié cèdre ki pou coupé par “l’epée le roi Babylone.”—Ézékiel 31:2, 3, 12; 32:11, 12.

Apepré six mois apré destruction Jérusalem en 607 a.n.l., enn dimoune ki reussi sapé vinn dire Ézékiel: “La ville inn tombé!” Ézékiel “kapav recommence kozé” pou bann Juif ki ti en exil. (Ézékiel 33:21, 22) Li ena bann prophetie concernant retablissement pou annoncé. Jéhovah ‘pou etabli enn sel berger lor zot, so serviteur David.’ (Ézékiel 34:23) Édom pou vinn enn l’endroit abandonné, mais Juda, pays ki trouve lot coté, pou vinn “pareil couma jardin Éden.” (Ézékiel 36:35) Jéhovah promette ki Li pou protege so peuple ki’nn retabli kan “Gog” pou attak zot.—Ézékiel 38:2.

Reponse pou bann question biblik:

29:8-12—Kan eski l’Égypte ti reste abandonné pendant 40 an? Apré destruction Jérusalem en 607 a.n.l., ti ena enn ti reste dan Juda ki ti sauvé ti al en Égypte malgré l’avertissement ki Jérémie ti donné. (Jérémie 24:1, 8-10; 42:7-22) Mais zot pa ti reussi sapé dan la main bann Babylonien parski Neboukadnetsar ti arrive ziska l’Égypte ek li ti prend l’Égypte. Li possible ki c’est zis apré sa ki l’Égypte finn reste abandonné pendant 40 an. L’histoire pa mentionne okenn preuve concernant sa situation-la. Mais nou kapav sur ki sa ti arrivé vrai-mem parski Jéhovah toujours realise so prophetie.—Isaïe 55:11.

29:18—Couma eski “tou bann la-tête ti vinn chauve, ek tou bann zepaule ti plisse-plissé a force zot ti frotté”? Li ti bien difficile ek fatigant pou l’armée Babylone prend la ville Tyr. La tête bann soldat Neboukadnetsar ti vinn chauve tellement zot casque ti frotte ar zot la-tête ek zot zepaule ti plisse-plissé tellement zot ti sarié bann materiaux pou construire bann la-tour ek bann muraille.—Ézékiel 26:7-12.

Bann leson pou nou:

29:19, 20. Bann habitant Tyr ti amenn enn bon partie zot bann di-bien avek zot kan zot ti sauvé pou al lor l’île ki ti aussi forme partie dan zot la-ville. A cause sa, le roi Neboukadnetsar ti gagne tigit di-bien pou prend kan li ti attak Tyr. Mais mem si Neboukadnetsar ti enn lé-roi païen ki ti ena l’orgueil ek ki ti egoïste, Jéhovah ti recompense li pou seki li ti faire kan Li ti donne li l’Égypte couma “enn la-paye pou so l’armée.” Eski nou pa bizin imite vrai Bondié ek paye taxe pou bann service ki gouvernement rann nou? Fodé pa ki maniere ki bann gouvernement comporte-zot, ni maniere ki zot servi sa taxe ki nou payé-la empeche nou paye nou taxe.—Romains 13:4-7.

33:7-9. Fodé jamais ki sa groupe modern ki veillé-la, setadir bann reste oint, ek zot bann compagnon, hesité pou preche la bonne nouvelle lor Royaume Bondié ek pou averti bann dimoune concernant “grand tribulation” ki pé vini.—Matthieu 24:21.

33:10-20. Nou pou delivré a condition ki nou quitte nou mauvais chemin ek nou faire seki Bondié demandé. Oui, chemin Jéhovah li “bien reglé.”

36:20, 21. Parski zot pa ti vive couma “peuple Jéhovah” ti bizin vive, bann Israélite ti sali nom Bondié parmi bann nation. Fodé jamais ki nou vinn bann adorateur Jéhovah zis par nom.

36:25, 37, 38. Zordi dan sa paradi spirituel kot nou été-la, ena “enn troupeau dimoune ki saint.” Alors nou bizin faire tou seki nou kapav pou garde sa paradi spirituel-la pur.

38:1-23. Sa vrai-mem donne nou l’assurance pou koné ki Jéhovah pou sap so peuple kan Gog dan pays Magog pou attaké, pa vrai? Gog, c’est nom ki Satan le Diable, “chef sa lé-monde-la,” inn gagné apré ki Jésus inn tire li dan le ciel. Pays Magog, c’est voisinage la terre, kot Satan ek so bann demon gagne droit circulé.—Jean 12:31; Révélation 12:7-12.

“FIXÉ TO LEKER LOR TOU SEKI MO PÉ MONTRÉ TOI”

(Ézékiel 40:1–48:35)

Sa faire 14 an depuis ki la ville Jérusalem inn tombé. (Ézékiel 40:1) Bann Juif ena encore 56 an pou reste en exil. (Jérémie 29:10) Ézékiel pé al lor so 50 an. Dan enn vision, li trouve-li dan pays Israël. Dan sa vision-la li tann sa bann parole-la: “Garson enn zom, guetté avek to lizié, ek tendé avek to zoreil, ek fixé to leker lor tou seki mo pé montré toi.” (Ézékiel 40:2-4) Surement ki Ézékiel bien content pou gagne vision enn nouveau temple!

Dan so vision, Ézékiel trouve enn temple rempli ar la gloire ki ena 6 la-porte, 30 salle a manger, le Saint, Très Saint, enn l’autel en di-bois, ek enn l’autel pou offert bann sacrifice ki brulé. Ena enn ti la-riviere ki “sorti” dan temple ek ki vinn enn grand la-riviere. (Ézékiel 47:1) Dan enn lot vision, Ézékiel trouve partage terrain ki faire entre bann tribu Israël ek chaque part prend depuis l’est ziska l’ouest. Entre terrain Juda ek terrain Benjamin ena enn part ki reservé pou l’administration. “Temple Jéhovah” ek “la ville” ki appel Jéhovah-Shamma trouve lor sa terrain-la.—Ézékiel 48:9, 10, 15, 35, note.

Reponse pou bann question biblik:

40:3–47:12—Sa temple ki Ézékiel trouvé dan so vision-la, ki li representé? Jamais pa finn construire sa extra grand temple ki Ézékiel ti trouvé-la. Li ti represente temple spirituel Bondié, setadir bann disposition ki couma enn temple ek ki Li’nn prend pou vrai l’adoration zordi. (Ézékiel 40:2; Mika 4:1; Hébreux 8:2; 9:23, 24) Vision lor temple, li realisé pendant bann “dernier jour,” kan Jéhovah affine groupe bann pretre. (2 Timothée 3:1; Ézékiel 44:10-16; Malaki 3:1-3) Mais, sa vision-la pou konn enn l’accomplissement final dan Paradi. Grace a sa vision-la, bann Juif ki ti en exil ti gagne enn promesse ki vrai l’adoration pou retabli ek ki chaque famille juif pou ena zot part l’heritage dan sa pays-la.

40:3–43:17—Dan sa vision-la, Ézékiel trouve enn zom pé mesure temple. Ki sa vedir? Sa li enn signe ki pena okenn doute ki projet Jéhovah concernant vrai l’adoration pou accompli.

43:2-4, 7, 9—Ki été “bann cadavre zot bann lé-roi” ki ti bizin tiré dan temple? Li parette ki c’est bann zidole. Bann ki ti pé dirige Jérusalem ek so bann habitant ti’nn sali temple Bondié avek bann zidole—zot ti’nn faire sa bann zidole-la vinn zot bann lé-roi.

43:13-20—Ézékiel ti trouve enn l’autel dan so vision. Ki sa l’autel-la representé? Sa l’autel symbolik-la represente volonté Bondié en rapport avek sacrifice Jésus Christ. Parski Jésus inn donne so la-vie en sacrifice, devant lizié Jéhovah bann membre oint vinn bann dimoune juste ek ‘la grande foule’ vinn bann dimoune ki pur. (Révélation 7:9-14; Romains 5:1, 2) Kitfois c’est a cause sa-mem ki dan sa temple ki Ézékiel ti trouvé en vision-la, pena “la mer en metal”—sa grand bassin kot ti ena de l’eau pou bann pretre servi pou lave-zot-la—pareil couma ti ena dan temple Salomon.—1 Rois 7:23-26.

44:10-16—Kisannla sa groupe pretre-la representé? Sa groupe pretre-la represente groupe bann chrétien oint dan nou lepok. Zot ti passe dan enn period kot zot ti affiné en 1918 kan Jéhovah ti assizé couma “enn kikenn ki affiné ek ki purifié” dan so temple spirituel. (Malaki 3:1-5) Bann ki ti purifié ou-soit ti repenti ti kapav ena privilege pou contigné dan zot service. A partir sa moment-la, zot ti bizin faire bann zeffort pou reste “sans tache par rapport ar le monde.” Sa ti permette zot vinn bann l’exemple pou ‘la grande foule,’ ki representé par bann tribu ki pa ti pretre.—Jacques 1:27; Révélation 7:9, 10.

45:1; 47:13–48:29—Ki “sa pays-la” ek fason ki ti partage li representé? Pays-la represente partout kot peuple Bondié pé faire zot travail. N’importe kot-sa enn dimoune ki adore Jéhovah été, li dan pays ki’nn retabli tant ki li soutenir vrai l’adoration. Partage pays pou konn so l’accomplissement final dan le monde nouveau kan chaque dimoune ki fidel pou gagne enn place pou li.—Isaïe 65:17, 21.

45:7, 16—Ki bann contribution ki le peuple ti faire pou bann pretre ek pou sa chef-la representé? Dan temple spirituel, sa represente surtout soutien spirituel, setadir kan nou offert nou l’aide ek nou disposé pou cooperé.

47:1-5—De l’eau ki Ézékiel ti trouvé dan sa vision-la, ki li representé? Sa dé-l’eau-la represente bann disposition spirituel ki Jéhovah inn prend pou nou gagne la vie, parmi ena aussi sacrifice Jésus ek connaissance ki nou gagné lor Bondié dan la Bible. (Jérémie 2:13; Jean 4:7-26; Éphésiens 5:25-27) Tigit par tigit, la riviere-la vinn pli profond pou ki tou sa bann nouveau ki accepté vrai l’adoration kapav gagne seki zot bizin. (Isaïe 60:22) Pendant Règne mille an, de l’eau dan sa la-riviere-la pou coule avek tou so la-force ek zot pou faire aussi gagne plus connaissance grace a bann “rouleau” ki pou ouvert.—Révélation 20:12; 22:1, 2.

47:12—Ki sa bann pié ki rempli ar fruit-la representé? Sa bann pié symbolik-la represente bann disposition spirituel ki Bondié inn prend pou bann dimoune ré-vinn parfait.

48:15-19, 30-35, note—Ézékiel trouve enn la-ville dan so vision. Ki sa la-ville-la representé? “Jéhovah-Shamma” li trouve lor enn la-terre “ki pa saint,” ek sa montré ki li bizin represente enn kitsoz ki lor la terre. Li parette ki sa la-ville-la represente enn administration lor la terre ki pou amenn bann bienfait pou bann ki pou forme partie dan “nouveau la-terre.” (2 Pierre 3:13) La ville-la ena bann la-porte lor chaque coté ek sa montré ki li facile pou rentré. Bann surveillant parmi peuple Bondié bizin bien abordable.

Bann leson pou nou:

40:14, 16, 22, 26. Ena bann palmier ki’nn gravé lor muraille ki dan l’entrée temple. Sa montré ki zis bann ki droite lor plan moral ki gagne droit rente dan temple. (Psaume 92:12) Nou aprann ki Jéhovah accepté nou l’adoration a condition ki nou bann dimoune ki droite.

44:23. Nou kapav vrai-mem reconnaissant pou bann service ki sa groupe pretre modern-la rann nou! “L’esclave fidel et avisé” donne nou nourriture spirituel dan bon moment ek sa aide nou pou faire difference entre seki impur ek seki pur devant lizié Jéhovah.—Matthieu 24:45.

47:9, 11. La connaissance—enn l’aspect important sa dé-l’eau symbolik-la—pé faire enn travail guerison extraordinaire dan nou lepok. N’importe kot-sa bann dimoune prend sa dé-l’eau-la, sa faire zot revive lor plan spirituel. (Jean 17:3) Parkont, bann ki pa accepté sa dé-l’eau ki donne la vie-la, pou “livré zot ar di-sel,” setadir zot pou gagne destruction eternel. Li vrai-mem bien important ki ‘nou faire tou nou possible pou servi parole la verité couma bizin’!—2 Timothée 2:15.

“Vrai-mem mo pou sanctifié mo grand nom”

Apré ki Li ti tire dernier lé-roi ki dan descendance David lor trone, vrai Bondié inn laisse enn longue period le temps passé avant ki sa Kikenn “ki ena droit legal-la” vinn le roi. Mais Bondié pa ti blié sa l’alliance ki Li ti faire avek David-la. (Ézékiel 21:27; 2 Samuel 7:11-16) Prophetie Ézékiel koz lor “mo serviteur David” ki pou vinn enn “berger” ek enn “lé-roi.” (Ézékiel 34:23, 24; 37:22, 24, 25) Sa kikenn-la, c’est Jésus Christ kan li’nn gagne pouvoir dan so Royaume. (Révélation 11:15) Jéhovah pou “sanctifié [so] grand nom” par moyen Royaume messianik.—Ézékiel 36:23.

Bientot Bondié pou detruire tou bann ki sali so nom ki saint. Mais bann ki sanctifié sa nom-la dan zot la-vie kan zot adore Jéhovah dan enn fason ki Li accepté, pou gagne la vie eternel. Alors anou profite maximum sa bann dé-l’eau la vie ki pé coulé en quantité-la zordi ek anou faire vrai l’adoration passe avant tou kitsoz dan nou la-vie.

[Note]

[Zimage, page 22]

La riviere la vie ki Ézékiel ti trouvé dan so vision, ki li representé?

[Remerciement photo]

Pictorial Archive (Near Eastern History) Est.

[Zimage, page 23]

Temple ki Ézékiel ti trouvé en vision ti rempli ar la gloire