Vive en accord avek projet Bondié zordi

“[Christ] inn mort pou tou, pou ki bann ki vive nepli vive pou zot-mem.”—2 CORINTHIENS 5:15.

1. Raconte l’experience ki enn missionnaire inn faire.

ENN missionnaire ki appel Aarona raconté: “Kan la guerre civil ti’nn fini, nou l’auto ti premier l’auto non-militaire ki ti rente dan enn village isolé en Afrique. Nou pa ti ena okenn contact avek sa ti congregation ki ti la-bas-la, ek nou ti bizin al donne nou bann frere seki zot ti bizin. A part mangé, linge ek bann publication biblik, nou ti amenn enn copie cassette video Les Témoins de Jéhovah : un nom, une organisation.b Nou ti guette sa cassette-la dan ‘cinema’ sa village-la—enn grand cabane en la paille kot nou ti mette enn television ek enn video. Ti ena tellement beaucoup dimoune interessé ki ti vini ki nou ti bizin passe li deux fois. Beaucoup ti envie etudié la Bible kan zot ti fini guette sa cassette-la. Li clair ki tou sa bann zeffort ki nou ti faire-la, ti vaut la peine.”

2. (a) Kifer bann chrétien bien decidé pou servi zot la-vie dan service Bondié? (b) Ki question nou pou examiné asterla?

² Kifer Aaron ek so bann camarade ti faire sa mission difficile-la? Parski, par reconnaissance pou sacrifice Jésus Christ, zot inn voué zot la-vie ar Bondié ek zot envie servi sa la-vie-la en accord avek projet Bondié. Pareil couma zot, tou bann ki’nn voué zot la-vie ar Jéhovah finn prend decision pou “nepli vive pou zot-mem,” mais pou faire tou seki zot kapav “a cause la bonne nouvelle.” (2 Corinthiens 5:15; 1 Corinthiens 9:23) Zot koné ki, kan sa system-la pou fini, tou l’argent ek bann grand position ki ena dan le monde pa pou ena okenn valeur. Alors, zot envie servi la vie ek la santé ki zot ena en accord avek projet Bondié. (Ecclésiaste 12:1) Couma nou kapav arrivé faire sa? Kot-sa nou kapav gagne courage ek la force ki nou bizin pou faire sa? Ek ki bann forme service nou kapav faire?

Bann pas ki nou bizin faire tigit par tigit

3. Ki kitsoz de base nou bizin faire kan nou faire volonté Bondié?

³ Pou bann vrai chrétien, faire volonté Bondié c’est enn kitsoz ki nou faire toute longue nou la-vie. Souvent, sa commence avek bann kitsoz de base, couma par exemple mette nou nom dan Lekol ministere theocratik, lire la Bible toulé-jour, preché, ek progressé ziska nou prend bapteme. A mesure ki nou faire sa bann progré-la, nou garde dan nou l’esprit seki l’apotre Paul ti dire: “Reflechi lor sa bann kitsoz-la; concentré-toi bien ladan, pou ki tou dimoune trouve bien to bann progré.” (1 Timothée 4:15) Nou pa faire sa bann progré-la pou glorifié nou-mem. Mais nou bann progré montré ki nou bien decidé pou faire volonté Bondié sans ki nou guette nou prop l’interet. Kan nou amenn enn la-vie coumsa, sa montré ki nou laisse Bondié dirige nou dan tou domaine nou la-vie, enn kitsoz ki Li faire beaucoup pli bien ki seki nou ti pou kapav faire.—Psaume 32:8.

4. Couma nou kapav surmonte bann kitsoz ki tracasse nou pou nanyin?

⁴ Parkont, kan nou hesité ou-soit kan nou trop tracassé pou nou-mem, sa kapav empeche nou pou faire bann progré dan nou service pou Bondié. (Ecclésiaste 11:4) Alors, pou nou kapav trouve enn vrai la-joie pou servi Bondié ek nou prochain, kitfois avant, nou pou bizin surmonte bann kitsoz ki tracasse nou. Nou prend l’exemple Erik. Li ti pé pense pou al servi dan enn congregation ki koz enn lot langue, mais li ti tracassé. Li ti demann li-mem: ‘Eski mo pou adapté ar sa congregation-la? Eski mo pou content bann frere ki la-bas? Eski zot, zot pou content moi?’ Li raconté: “Finalement, mo ti’nn realisé ki mo ti bizin plus interesse-moi ar bann frere ki ar mo-mem. Mo ti decidé pou arrete tracassé ek pou faire tou seki mo kapav pou donné dan n’importe ki fason. Mo ti prié Jéhovah pou Li aide moi ek mo ti faire seki mo ti decidé. Asterla, mo bien apprecié mo service dan sa territoire-la.” (Romains 4:20) Oui, plus nou servi Bondié ek lezot sans ki nou guette nou prop l’avantage, plus nou trouve la joie ek satisfaction.

5. Kifer li bien important ki nou calcule seki nou pou faire pou nou kapav faire volonté Bondié? Donne enn l’exemple.

⁵ Pou nou reussi vive en accord avek projet Bondié, nou bizin calcule seki nou pou faire. Nou pou montré ki nou sage si nou evité faire beaucoup dette ki pou kapav faire nou vinn esclave sa lé-monde-la ek kot nou pou nepli ena assez liberté pou servi Bondié. La Bible rappel nou: “Sa kikenn ki prend preté-la, li serviteur sa dimoune ki’nn prete li-la.” (Proverbes 22:7) Kan nou mette nou confiance en Jéhovah ek kan nou mette bann kitsoz spirituel en premier dan nou la-vie, sa aide nou pou trouve bann kitsoz couma bizin. Par exemple, Guoming ek so deux soeur reste avek zot mama dan enn l’endroit kot lakaz coute bien cher, ek kot li bien difficile pou trouve enn travail stable. Mem si parfois pa zot tou ki travail, zot reussi debrouillé parski zot faire bien attention couma zot servi zot l’argent ek zot partage zot bann depense. Guoming dire: “Parfois, pa nou tou ki gagne enn salaire, mais kan-mem nou kapav contigne faire pionnier ek prend bien soin nou mama. Nou bien reconnaissant ki nou mama pa’lé ki nou sacrifié bann kitsoz spirituel pou donne li bann kitsoz luxe.”—2 Corinthiens 12:14; Hébreux 13:5.

6. Ki l’exemple montré couma nou kapav vive en accord avek projet Bondié?

⁶ Si ou bien absorbé par bann kitsoz ki pa spirituel—ki sa concerne l’argent ou-soit lezot kitsoz—kitfois ou pou bizin faire bann grand changement pou mette bann kitsoz spirituel en premier dan ou la-vie. En general, ou pa pou kapav faire sa bann changement-la enn sel coup. Alors, si premier fois ou’nn essayé ek ou faire bann erreur, pa pensé ki jamais ou pou reussi. Prend l’exemple Koichi ki ti passe trop beaucoup lé-temps pou diverti-li. Li ti’nn etudié la Bible kan li ti adolescent, mais pendant plusieurs l’année, li ti laisse bann video game domine so la-vie. Enn jour Koichi ti dire li-mem: ‘Ki to pé faire? To ena plus ki 30 an ek to pa pé faire nanyin ki ena enn sens dan to la-vie!’ Koichi ti recommence etudié la Bible ek ti accepté ki bann membre congregation aide li. Mem si li ti prend le temps pou faire bann changement, li pa ti decouragé. Li ti bien prié ek li ti gagne l’encouragement ar bann frere ek soeur, ek grace a sa, finalement li ti reussi surmonte sa l’obsession pou bann video game-la. (Luc 11:9) Zordi, Koichi ena la joie pou servi couma enn assistant ministeriel.

Aprann pou ena l’equilibre

7. Kifer nou bizin equilibré kan nou faire volonté Bondié?

⁷ Vive en accord avek projet Bondié, c’est enn kitsoz ki merité ki nou faire bann zeffort sincere. Fodé jamais nou hesité pou donne nou-mem ou-soit nou faire paresse dan service Bondié. (Hébreux 6:11, 12) Mais en mem temps, Jéhovah pa’lé ki nou faire plus ki seki nou kapav ek fatigue-nou lor plan physik, mental ou-soit affectif. Kan nou reconette avek humilité ki par nou prop la-force nou pa kapav faire travail Bondié, nou glorifié Li ek nou montré ki nou equilibré. (1 Pierre 4:11) Jéhovah promette pou donne nou la force necessaire pou faire so volonté, mais fodé pa ki nou depasse nou limite ek essaye faire bann kitsoz ki Li pa demann nou faire. (2 Corinthiens 4:7) Pou nou contigne servi Bondié sans ki nou extra fatigué, nou bizin servi nou la-force avek sagesse.

8. Ki ti arrive enn jeune chrétienne kan li ti essaye donne Jéhovah ek le monde tou seki li ti kapav, ek ki changement li ti faire?

⁸ Par exemple, pendant deux an, Ji Hye, enn jeune soeur ki vive dan l’est l’Asie, ti faire enn travail ki ti mette beaucoup pression lor li, ek en mem temps li ti pé faire pionnier. Li dire: “Mo ti essaye donne Jéhovah ek le monde tou seki mo ti kapav, mais mo ti pé dormi zis cinq heure-temps. Avek le temps, mo ti nepli ena la force mental pou la verité, ek mo pa ti ena beaucoup la-joie pou faire bann kitsoz spirituel.” Pou ki Ji Hye kapav servi Jéhovah avek ‘tou so leker, tou so nâme, tou so l’esprit ek tou so la-force,’ li ti rod enn travail ki ti moins fatigant ek ki ti prend moins lé-temps. (Marc 12:30) Li raconté: “Malgré bann pression ki mo famille ti mette lor moi pou ki mo gagne beaucoup kass, mo ti bien decidé pou mette projet Bondié en premier. Mo encore toujours gagne assez l’argent pou bann kitsoz ki necessaire couma bann linge presentable. Ek li tellement bon pou dormi pli longtemps! Mo trouve la joie dan mo ministere, ek asterla mo pli fort lor plan spirituel. Sa c’est parski mo nepli passe sa quantité lé-temps-la en contact avek bann kitsoz dan le monde ki kapav attire moi ek avek so bann divertissement.”—Ecclésiaste 4:6; Matthieu 6:24, 28-30.

9. Couma nou bann zeffort kapav ena enn l’effet lor bann dimoune dan territoire?

⁹ Pa tou dimoune ki kapav servi Bondié dan service a plein temps. Si ou agé, ou ena enn mauvais la-santé, ou-soit ou ena bann lezot limite, rappel ki ou fidelité ek tou seki ou pé faire avek tou ou leker dan service Jéhovah, ena enn grand valeur pou Li. (Luc 21:2, 3) A cause sa, fodé ki jamais personne parmi nou pa sous-estime l’effet ki nou bann zeffort, mem si zot limité, kapav ena lor lezot. Par exemple, supposé ki nou’nn al preche kot bann dimoune ek nou pa’nn trouve personne ki parette interessé ar nou message. Apré ki nou’nn quitte zot, kitfois sa bann dimoune-la kapav koz lor nou visite pendant beaucoup lé-temps ou-soit plusieurs jour, mem si personne pa finn ouvert la porte! Nou pa attann ki tou dimoune ki tann la bonne nouvelle pou interessé ar nou message, mais certain pou interessé. (Matthieu 13:19-23) Ena ki kapav interessé plitar kan bann condition dan le monde ou-soit dan zot la-vie changé. N’importe ki reaction bann dimoune kapav ena, kan nou faire seki nou kapav dan predication, nou pé faire travail Bondié. Nou bann “ki travail ensam avek Bondié.”—1 Corinthiens 3:9.

10. Ki possibilité tou bann membre dan congregation ena?

¹⁰ En plus, nou tou nou kapav aide bann membre nou famille ek nou bann frere ek soeur spirituel. (Galates 6:10) Nou bon l’influence kapav ena enn grand l’effet lor lezot pendant longtemps. (Ecclésiaste 11:1, 6) Kan bann ancien ek bann assistant ministeriel prend zot responsabilité avek serieux, zot aide bann membre dan congregation pou reste en bonne santé ek stable lor plan spirituel. Ek lerla, bann activité dan congregation augmenté. Nou ena l’assurance ki, kan nou ena “beaucoup pou faire dan travail nou Seigneur,” nou “la-peine pa dan vide.”—1 Corinthiens 15:58.

Faire enn carriere ki en accord avek projet Bondié

11. A part service ki nou faire dan nou prop congregation, ki lezot possibilité nou kapav ena?

¹¹ En tant ki chrétien, nou content la vie, ek nou envie glorifié Bondié dan tou seki nou faire. (1 Corinthiens 10:31) Kan nou faire tou seki nou kapav avek fidelité pou preche Royaume Bondié ek pou enseigne bann dimoune pou suive tou bann commandement ki Jésus inn donné, nou pou gagne beaucoup possibilité pou servi Bondié ek sa pou faire nou heureux. (Matthieu 24:14; 28:19, 20) En plus service ki nou faire dan nou prop congregation, nou kapav ena possibilité pou al servi kot bien bizin bann proclamateur. Sa kapav dan enn lot territoire, ou avek bann dimoune ki koz enn lot langue ou-soit dan enn lot pays. Bann ancien ek bann assistant ministeriel celibataire ki rempli bann condition kapav gagne l’invitation pou assisté Lekol formation ministeriel, ek apré, al servi dan bann congregation kot bizin l’aide bann frere mur, soit dan zot prop pays ou-soit dan enn lot pays. Bann couple marié ki dan service a plein temps kapav rempli bann condition pou al Lekol Guiléad. Là, zot gagne enn formation pou vinn missionnaire ek al servi dan enn lot pays. En plus, bizin toujours bann volontaire pou faire different travail dan bann Béthel ek dan bann construction ek l’entretien bann la-salle kot nou rassemblé ek bann Béthel.

12, 13. (a) Ki kapav aide ou pou decidé ki forme service ou pou faire? (b) Donne enn l’exemple pou montré couma l’experience ki nou gagné dan enn forme service kapav aide nou dan enn lot forme service.

¹² Ki forme service eski ou pou bizin faire? Ou ki enn serviteur Jéhovah, ki’nn voué ou la-vie ar Li, tourne-ou toujours vers Jéhovah ek vers so l’organisation pou gagne enn direction. So “bon l’esprit” pou aide ou prend enn bon decision. (Nehémia 9:20) Souvent, kan nou dan enn forme service, sa donne nou possibilité pou faire enn lot forme service, ek l’experience ek bann capacité ki nou’nn gagné dan enn forme service, kitfois sa kapav aide nou dan enn lot forme service plitar.

¹³ Par exemple, Dennis ek so femme Jenny ti habitué travail regulierement dan construction bann la-Salle du Royaume. Apré ki cyclone Katrina ti passe dan sud États-Unis, zot ti porte-zot volontaire pou aide bann dimoune la-bas. Dennis raconté: “Nou ti bien content pou kapav servi bann capacité ki nou finn developpé dan construction bann la-Salle du Royaume pou aide nou bann frere. Bann dimoune ki nou finn aidé ti montré zot reconnaissance envers nou, ek sa ti bien touche nou. La plupart parmi bann lezot group ki ti aide bann dimoune, pa ti assez efficace dan zot construction. Bann Témoins de Jéhovah finn deja repare ou-soit finn reconstruire plus ki 5,300 lakaz ek plusieurs la-Salle du Royaume. Bann dimoune remark sa, ek zot montré plus l’interet pou nou message zordi.”

14. Ki ou kapav faire si ou envie faire service a plein temps?

¹⁴ Eski ou kapav agir en accord avek projet Bondié ek choisir pou faire carriere dan service a plein temps? Si oui, ou kapav sur ki ou pou gagne beaucoup benediction. Si asterla ou situation pa permette ou faire sa, kitfois ou kapav faire bann changement. Prié pareil couma Nehémia kan li ti ena enn grand desir pou al faire enn service important pou Jéhovah. Li ti dire: “Ah Jéhovah, s’il te plait, . . . faire to serviteur reussi.” (Nehémia 1:11) Apré, faire confiance sa Kikenn ki ‘ecoute la priere-la’ ek agir en accord avek ou la-priere. (Psaume 65:2) Pou ki Jéhovah beni ou bann zeffort pou servi Li plus, ou bizin avant, faire sa bann zeffort-la. Enn fois ki ou finn decidé pou commence service a plein temps, reste lor ou decision. Avek le temps, ou pou gagne plus l’experience, ek ou la-joie pou augmenté.

Enn la-vie ki vaut la peine

15. (a) Ki bienfait nou pou gagné kan nou koz avek bann ki’nn servi Jéhovah depuis longtemps ou-soit kan nou lire lor zot la-vie? (b) Raconte la vie enn Témoin ki finn bien encourage ou.

¹⁵ Ki resultat ou kapav attann si ou vive en accord avek projet Bondié? Koz avek bann ki’nn servi Jéhovah pendant longtemps, surtout avek bann ki finn passe beaucoup l’année dan service a plein temps. Zot vrai-mem amenn enn la-vie riche ek ki ena enn sens! (Proverbes 10:22) Zot pou dire ou ki mem dan bann situation difficile, Jéhovah inn toujours aide zot pou gagne seki zot vrai-mem bizin ek plus encore. (Philippiens 4:11-13) Depuis 1955 ziska 1961, La Tour de Garde ti publié bann recit lor la vie bann fidel serviteur Jéhovah dan enn serie lartik ki ti appel “ Comment je poursuis le but de ma vie. ” Depuis sa, finn publié plusieurs centaine recit lor la vie bann serviteur Jéhovah. Chaque recit faire nou trouvé couma sa bann Témoin-la ti zelé ek ti ena la joie, ek sa faire nou rappel seki nou lire dan livre Actes. Si ou lire sa bann recit interessant-la, sa pou pousse ou pou dire: ‘C’est sa qualité la-vie-la-mem ki mo envie amené!’

16. Ki kitsoz ki donne la vie enn chrétien enn sens ek faire li heureux?

¹⁶ Aaron, ki nou ti mentionné au commencement, rappel: “En Afrique, souvent mo ti joinde bann jeune ki ti al partout-partout dan pays pou rod enn but dan zot la-vie. La plupart jamais pa’nn trouve sa but-la. Mais nou, nou ti pé vive en accord avek projet Bondié kan nou ti preche la bonne nouvelle lor so Royaume, ek nou ti pé amenn enn la-vie bien interessant ki ti ena vrai-mem enn sens. Nou finn trouvé par nou-mem ki ena plus bonheur kan donné ki kan recevoir.”—Actes 20:35.

17. Kifer nou bizin vive en accord avek projet Bondié asterla?

¹⁷ Ki ou kapav dire lor ou? Ki but ou pé poursuive? Si ou pena enn but spirituel precis, bien vite, lezot l’objectif pou vinn prend sa place-la. Kifer ou bizin gaspille ou la-vie, ki ena valeur, pou bann kitsoz ki le monde Satan faire croire ki vrai-mem important? Bientot kan ‘la grande tribulation’ pou eclaté, bann richesse materiel ek bann grand position dan le monde pou nepli ena okenn valeur. Seki pou ena vrai-mem valeur c’est nou bann relation avek Jéhovah. Nou pou vrai-mem bien content ki nou finn servi Bondié ek nou prochain, ek ki nou finn faire tou pou vive en accord avek projet Bondié!—Matthieu 24:21; Révélation 7:14, 15.

[Note]

Eski ou kapav expliké?

• Ki Jéhovah pensé lor service ki nou offert Li?

• Couma, kan nou faire bann kitsoz pratik ek nou equilibré, sa aide nou pou servi Bondié ek nou prochain?

• Ki bann possibilité pou servi Bondié nou ena?

• Couma nou kapav amenn enn la-vie ki ena vrai-mem enn sens zordi?

[Zimage, page 25]

Nou bizin garde nou l’equilibre si nou envie contigne servi Jéhovah avek tou nou nâme

[Zimage, page 26]

Ena plusieurs fason ki nou kapav servi Bondié