Poursuive enn but ki vaut la peine

“Ki tou seki respiré, loué Yah!”—PSAUME 150:6.

1. Raconte seki enn jeune missié ti faire pou trouve enn but dan so la-vie.

“MO TI etudié medecine, parski mo ti envie servi mo la-vie pou aide bann dimoune. Mo ti pensé aussi ki, kan mo pou vinn enn docteur, mo pou ena enn position important ek beaucoup l’argent ek ki sa pou rann moi heureux,” c’est seki Seung Jin, ki’nn grandi en Corée, dire.a Li ajouté: “Avek le temps, mo ti rann-moi compte ki bann docteur pa kapav faire beaucoup pou soulage bann dimoune couma bizin, ek sa ti faire moi bien decouragé. Apré sa, mo ti commence etudié art, mais seki mo ti faire pa ti aide bann dimoune beaucoup ek mo ti ena l’impression ki mo ti egoïste. Mo ti vinn enn professeur, mais mo pa ti tardé pou trouvé ki mo ti zis kapav transmette bann connaissance mais pa enn direction ki ti pou faire bann dimoune trouve vrai bonheur.” Pareil couma beaucoup dimoune, Seung Jin ti pé rod enn but dan la vie ki vaut la peine.

2. (a) Ki sa vedir ena enn but dan la vie? (b) Couma nou koné ki nou Createur finn mette nou lor la terre dan enn but?

² Ena enn vrai but dan la vie vedir ena enn raison pou vive, enn l’objectif precis ek faire tou bann zeffort pou realise sa l’objectif-la. Eski bann dimoune kapav vrai-mem ena sa qualité l’objectif-la? Oui! Si Bondié finn crée nou avek enn l’intelligence, enn conscience ek capacité pou raisonné, sa vedir ki nou Createur finn mette nou lor la terre dan enn but precis. Li logik alors ki, pou nou trouve enn vrai but dan la vie ek pou realise li, nou bizin vive en accord avek projet ki nou Createur ena.

3. Ki kitsoz impliké dan projet ki Bondié ena pou bann dimoune?

³ La Bible faire nou koné ki projet Bondié implik beaucoup kitsoz. Par exemple, nou finn faire dan enn fason extraordinaire ek sa montré so l’amour ki pa egoïste pou nou. (Psaume 40:5; 139:14) Alors, vive en accord avek projet Bondié, vedir ena enn l’amour ki pa egoïste pou lezot, pareil couma Bondié ena. (1 Jean 4:7-11) Sa vedir aussi ki nou bizin obeir bann instruction ki Bondié donné, ki aide nou pou vive en accord avek so projet.—Ecclésiaste 12:13; 1 Jean 5:3.

4. (a) Ki nou bizin pou nou ena enn vrai but dan nou la-vie? (b) Ki pli grand but enn dimoune kapav ena?

⁴ Projet Bondié implik aussi ki bann dimoune vive heureux ek en paix sakenn avek so camarade ek avek le reste creation. (Genèse 1:26; 2:15) Alors, ki nou bizin faire pou nou senti-nou heureux, en securité ek en paix? Pou ki enn zenfant senti-li heureux ek en securité, li bizin koné ki so bann parent pré kot li. Li pareil aussi pou nou, pou nou kapav trouve enn vrai sens ek enn vrai but dan nou la-vie, nou bizin ena bann bon relation avek nou Papa ki dan le ciel. (Hébreux 12:9) Pou ki sa bann relation-la vinn possible, Bondié permette nou pou approche ar Li ek Li ecoute nou bann la-priere. (Jacques 4:8; 1 Jean 5:14, 15) Si nou ‘marche avek Bondié’ avek la foi ek nou vinn so bann camarade, nou kapav faire Li heureux ek donne Li la gloire. (Genèse 6:9; Proverbes 23:15, 16; Jacques 2:23) Sa-mem pli grand but ki enn dimoune kapav ena. Enn ecrivain Psaume ti ecrire: “Ki tou seki respiré, loué Yah!”—Psaume 150:6.

Ki but ou, ou ena dan la vie?

5. Kifer li pa realiste ki nou faire bann kitsoz materiel passe en premier dan nou la-vie?

⁵ Projet Bondié implik ki nou prend nou-mem ek nou famille bien soin lor plan physik ek spirituel. Mais, nou bizin bien equilibré kan nou faire sa pou ki tou bann lezot kitsoz dan nou la-vie pa passe avant bann kitsoz spirituel ki pli important. (Matthieu 4:4; 6:33) Malheureusement, beaucoup dimoune consacré zot la-vie surtout pou gagne bann kitsoz materiel. Selman, li pa realiste ki nou essaye satisfaire tou nou bann besoin zis avek bann kitsoz materiel. Dapré enn l’enquete ki’nn fek faire lor bann millionnaire ki reste en Asie, beaucoup parmi zot “pa senti-zot en securité ek zot tracassé, mem si grace a zot richesse zot ena enn grand position social ek enn sentiment ki zot inn reussi zot la-vie.”—Ecclésiaste 5:11.

6. Ki conseil Jésus ti donne bann dimoune ki rod bann di-bien materiel?

⁶ Jésus ti koz lor “pouvoir ki la richesse ena pou embete dimoune.” (Marc 4:19) Dan ki fason la richesse kapav embete nou? C’est kan bann dimoune pensé ki bann kitsoz materiel pou faire zot heureux, alors ki en realité li pa vrai. Le roi Salomon ki ti sage, ti dire: “Sa kikenn ki content l’argent-la jamais li ena assez.” (Ecclésiaste 5:10, La Bible en français courant) Mais eski li possible pou poursuive bann l’objectif materialiste ek en mem temps servi Bondié avek tou nou leker? Non, li pa possible. Jésus ti expliké: “Personne pa kapav travail couma enn esclave pou deux maitre; parski soit li pou ena la haine pou enn, ek li pou content lot-la, soit li pou attache-li ar enn ek li pou meprise lot-la. Zot pa kapav travail couma bann esclave pou Bondié ek pou la Richesse toulé-deux.” Jésus ti encourage so bann disciple pou arrete ramasse bann tresor, setadir bann kitsoz materiel lor la terre, mais pou ramasse bann “tresor dan le ciel” setadir pou faire enn bon reputation devant Bondié, ki “koné ki zot bizin avant-mem ki zot demann Li.”—Matthieu 6:8, 19-25.

7. Couma nou kapav saisi “vrai la-vie”?

⁷ Kan l’apotre Paul ti ecrire so compagnon Timothée, li ti donne bann conseil bien ferme dan sa domaine-la. Li ti dire Timothée: “Donne l’ordre bann ki riche . . . pou zot pa mette zot l’espoir dan bann richesse ki pa garanti nanyin, mais dan Bondié, ki donne nou tou kitsoz en abondance pou nou plaisir . . . , pou vinn genereux, pré pou partagé, coumsa zot pou garde couma enn tresor pou zot-mem, enn bon base pou l’avenir, pou ki zot kapav bien saisi vrai la-vie.”—1 Timothée 6:17-19.

Ki été “vrai la-vie”?

8. (a) Kifer beaucoup dimoune faire tou pou vinn riche ek pou gagne enn grand position? (b) Ki sa bann dimoune-la pa arrivé comprend?

⁸ Pou la plupart dimoune, l’expression “vrai la-vie” faire zot pense enn la-vie luxe ek plaisir. Enn magazine en Asie faire sa remark-la: “Kan bann dimoune guette bann film ek bann program television, sa faire zot envie gagne seki zot trouvé, ek rêve seki zot kapav gagné.” Beaucoup dimoune faire tout pou vinn riche ek pou gagne enn grand position, sa-mem ki zot but dan zot la-vie. Beaucoup sacrifié zot jeunesse, zot la-santé, zot la-vie famille ek bann valeur spirituel pou zot kapav gagne sa bann kitsoz-la. Mais bien tigit ki prend le temps pou realisé ki sa bann zimage-la c’est zis enn reflet ‘l’esprit sa lé-monde-la’—enn mentalité ki dominé dan sa lé-monde-la. Sa mentalité-la influence majorité dimoune ki reste lor la terre ek pousse zot pou agir kont projet ki Bondié ena pou nou. (1 Corinthiens 2:12; Éphésiens 2:2) Nou pa etonné ki ena sa quantité dimoune malheureux-la lor la terre zordi!—Proverbes 18:11; 23:4, 5.

9. Ki bann dimoune jamais pa pou kapav faire, ek kifer?

⁹ Ki nou kapav dire lor bann dimoune ki sans okenn l’interet personnel, travail pou aide lezot dimoune, ki faire zeffort pou ki la famine, maladie ek l’injustice disparette. Zot merite felicitation pou bann zeffort ki zot faire avek enn l’esprit sacrifice, parski sa faire beaucoup di-bien. Pourtant, malgré zot grand zeffort, jamais zot pa pou kapav faire sa lé-monde-la vinn pli juste ek pli bon. Kifer? Parski en realité, “le monde entier li dan pouvoir sa kikenn ki mauvais-la,” setadir Satan, ki pa’lé ki sa lé-monde-la changé.—1 Jean 5:19.

10. Kan eski bann dimoune fidel pou vive “vrai la-vie”?

¹⁰ Li vrai-mem triste si enn dimoune pena okenn l’espoir a part la vie dan sa lé-monde-la! Paul ti ecrire: “Si c’est zis dan sa la-vie-la ki nou finn mette nou l’espoir dan Christ, dan tou dimoune, nou-mem ki faire plus pitié.” Alors, bann dimoune ki pensé ki zot ena zis sa la-vie-la, ena sa l’attitude-la: “Anou mangé-boire, parski demain nou pou mort.” (1 Corinthiens 15:19, 32) Mais ena enn l’avenir. “Nou pé attann, couma [Bondié] inn promette, enn nouveau lé-ciel ek enn nouveau la-terre, kot pou ena la justice.” (2 Pierre 3:13) Lerla, bann chrétien pou kapav vive “vrai la-vie,” setadir, “la vie eternel,” kot zot pou parfait, soit dan le ciel ou-soit lor la terre ki pou dirigé avek amour par Royaume Bondié!—1 Timothée 6:12.

11. Kifer kan nou travail pou faire bann l’interet Royaume Bondié avancé, sa-mem pli bon but ki nou kapav ena?

¹¹ Zis Royaume Bondié ki pou reussi reglé net bann problem sa lé-monde-la. Alors, kan nou faire tou seki nou kapav pou faire bann l’interet Royaume Bondié avancé, c’est sa-mem pli bon but ki nou tou nou kapav ena dan nou la-vie. (Jean 4:34) Pendant ki nou faire sa travail-la, nou kapav ena bann bon relation avek nou Papa ki dan le ciel. Nou ena aussi la joie pou servi ensam avek plusieurs million bann frere ek soeur spirituel, ki zot aussi ena mem but dan zot la-vie.

Faire bann bon sacrifice

12. Ki difference ena entre la vie ki ena dan sa lé-monde-la avek “vrai la-vie”?

¹² La Bible dire ki sa lé-monde-la “pé al fini ek so desir aussi.” Okenn partie dan le monde Satan, pa mem so la-gloire ek so richesse, pa pou reussi sapé, “mais celui ki faire volonté Bondié, pou reste pou toujours.” (1 Jean 2:15-17) Bann richesse ki ena dan le monde, zot pa sur, la-gloire ek bann plaisir sa lé-monde-la aussi, zot zis pou enn ti moment-mem. Parkont “vrai la-vie,” setadir la vie eternel ki nou pou gagné enba Royaume Bondié, li permanent ek li vaut la peine ki nou faire bann sacrifice pou sa, a condition ki nou faire bann bon sacrifice.

13. Couma enn couple ti faire bann bon sacrifice?

¹³ Anou prend l’exemple Henry ek Suzanne. Zot ena enn la-foi total dan promesse Bondié ki tou bann dimoune ki mette so Royaume en premier dan zot la-vie, pou gagne so l’aide. (Matthieu 6:33) Alors, zot ti choisir pou vive dan enn lakaz ki pa ti coute zot trop cher, pou ki toulé-deux pa obligé travail, ek lerla zot ti kapav passe plus lé-temps pou bann kitsoz spirituel ensam avek zot deux tifi. (Hébreux 13:15, 16) Enn camarade ki ti ena bann bon l’intention pa ti kapav comprend zot decision. Li ti dire Suzanne: “Suzanne, si to envie vive dan enn pli bon lakaz, to pou bizin sacrifié kitsoz.” Mais, Henry ek Suzanne ti koné ki, kan zot mette Jéhovah en premier, zot “ena promesse pou la vie asterla ek la vie ki pou vini.” (1 Timothée 4:8; Tite 2:12) Zot bann tifi inn grandi ek zot inn vinn bann serviteur a plein temps. Toute la-famille ena sentiment ki zot pa’nn perdi nanyin. Au contraire, zot inn gagne bann grand bienfait kan zot inn faire “vrai la-vie” vinn zot but.—Philippiens 3:8; 1 Timothée 6:6-8.

‘Pa profite tou seki ena dan le monde’

14. Ki malheur kapav arrive nou si nou pa prend compte nou vrai but dan la vie?

¹⁴ Mais ena enn danger si nou blié nou vrai but dan la vie ek nou nepli saisi bien “vrai la-vie.” Nou riské “laisse bann tracas, bann richesse ek bann plaisir ki ena dan sa la-vie-la entraine [nou].” (Luc 8:14) Kan nou ena bann desir ki nou pa kapav controlé pou gagne bann kitsoz materiel ek nou ‘tracassé couma nou pou gagne nou la-vie,’ sa kapav pousse nou pou engage-nou trop dan sa lé-monde-la. (Luc 21:34, note) Malheureusement, certain finn tombe dan piege ki nou trouvé partout zordi, setadir ki zot finn ena enn grand desir pou vinn riche. Sa finn faire zot “perdi la foi ek zot finn pique zot-mem partout ar beaucoup douleur,” ziska ki zot finn mem perdi bann bon relation ki zot ti ena avek Jéhovah. Zot finn paye sa bien cher parski zot pa finn contigne “saisi bien la vie eternel”!—1 Timothée 6:9, 10, 12; Proverbes 28:20.

15. Ki benediction enn famille inn gagné parski zot ‘pa finn profite tou seki ena dan le monde’?

¹⁵ Paul ti conseil “bann ki pé profite le monde [pou] vinn couma bann ki pa pé profite tou seki ena ladan.” (1 Corinthiens 7:31) Keith ek Bonnie ti prend sa conseil-la bien serieux. Keith raconté: “Mo ti vinn enn Témoin de Jéhovah zis kan mo ti pré pou fini mo l’etude pou vinn enn dentiste. Mo ti ena enn choix. Mo ti kapav prend beaucoup patient ek gagne beaucoup kass, mais si mo ti faire sa, mo pa ti pou ena le temps pou bann kitsoz spirituel. Mo ti choisir pou pa prend beaucoup patient pou ki mo kapav ena plus lé-temps pou bann kitsoz spirituel ek pou prend plus soin mo madame ek mo cinq tifi lor plan affectif. Mem si bien rare nou ti ena l’argent en plus, nou ti aprann pou faire l’economie, ek nou ti touletan ena seki nou ti bizin. Nou ti bien proche dan nou famille, ti ena enn bon l’atmosphere ek beaucoup la-joie. Finalement, nou tou nou ti prend service a plein temps. Asterla nou bann tifi heureux dan zot mariage, trois parmi ena bann zenfant. Zot famille aussi heureux, parski zot finn contigne mette volonté Jéhovah en premier dan zot la-vie.”

Mette volonté Bondié en premier dan ou la-vie

16, 17. Ki l’exemple bann dimoune ki ti ena talent la Bible mentionné, ek pou ki kitsoz nou rappel zot?

¹⁶ La Bible donne l’exemple bann dimoune ki finn vive pou faire volonté Bondié ek aussi bann ki pa finn faire sa. Nou kapav applik bann leson ki nou tiré dan sa bann l’exemple-la ar bann dimoune n’importe ki l’age, n’importe ki culture ek situation. (Romains 15:4; 1 Corinthiens 10:6, 11) Nimrod ti construire bann grand la-ville, mais li ti faire sa kont Jéhovah. (Genèse 10:8, 9) Mais nou ena beaucoup lezot bon l’exemple. Par exemple, Moïse ti ena enn grand position en Égypte, mais li pa ti faire sa vinn so but dan la vie. Au contraire, li ti considere bann privilege spirituel ki li ti gagné “couma enn richesse ki pli grand ki bann tresor l’Égypte.” (Hébreux 11:26) Luc ki ti enn docteur, ti surement aide Paul ek lezot chrétien pou traite zot maladie. Mais pli grand di-bien ki Luc inn faire pou lezot c’est kan li’nn preche la bonne nouvelle ek kan li’nn ecrire certain partie dan la Bible. Ek Paul li, dimoune ti konn li couma enn missionnaire, enn “zapotre pou bann nation,” pa couma enn expert dan la Loi.—Romains 11:13.

¹⁷ Kan nou rappel David, nou pa pense enn commandant militaire ou-soit enn musicien ek enn compositeur, mais “enn zom ki leker [Jéhovah ti] apprecié.” (1 Samuel 13:14) Nou konn Daniel, pou so service couma enn prophete Jéhovah, pa pou so travail couma enn grand fonctionnaire pou gouvernement Babylone; Li pareil aussi pou Esther, nou konn li parski li’nn donne nou enn l’exemple courage ek la foi, pa parski li ti la reine Perse; Pierre, André, Jacques ek Jean ti bann bon pecheur, mais nou plus konn zot couma bann zapotre Jésus. Ek pli grand l’exemple ki nou ena, c’est Jésus li-mem. Bann dimoune ti konn li plus couma “Christ” ki couma “enn charpentier.” (Marc 6:3; Matthieu 16:16) Tou sa bann dimoune-la ti comprend ki, n’importe ki talent, di-bien, ou-soit position ki zot ti ena, seki ti bizin passe en premier dan zot la-vie, c’est zot service pou Bondié, pa zot carriere. Zot ti koné ki pli bon but ki zot ti kapav ena ek ki ti pou donne zot plus satisfaction, c’est vinn bann dimoune ki attaché ar Bondié.

18. Couma enn jeune chrétien ti decidé pou servi so la-vie, ek ki li ti rann-li compte?

¹⁸ Seung Jin, ki nou ti mentionné au commencement, ti’nn arrivé comprend sa li aussi. Li raconté: “Au lieu ki mo ti consacré tou mo la-force dan medecine, dan art ou-soit pou enseigné dan lekol, mo ti decidé pou servi mo la-vie en accord avek voeu ki mo ti faire ar Bondié. Zordi, mo pé servi dan enn l’endroit kot bien bizin bann proclamateur pou enseigne bann dimoune la Bible ek pou aide zot pou prend chemin ki amenn vers la vie eternel. Avant, mo ti croire ki, kan mo pou vinn enn serviteur a plein temps, mo la-vie pa ti pou sa quantité interessant-la. Mais zordi mo la-vie beaucoup pli interessant ki avant: mo pé essaye ameliore mo personnalité ek mo capacité pou enseigne bann dimoune ki ena different culture. Mo trouvé ki, kan nou faire projet Jéhovah vinn nou but dan la vie, c’est sel fason vive ki vaut la peine.”

19. Couma nou kapav trouve enn vrai but dan nou la-vie?

¹⁹ En tant ki chrétien, nou finn gagne enn connaissance ek enn l’esperance ki kapav sauve nou. (Jean 17:3) Alors, anou faire tou pou nou pa “accepté faveur ki Bondié donné ek ki personne pa merité, pou apré mank so but.” (2 Corinthiens 6:1) Au contraire, anou servi nou bann jour ek nou bann l’année ki ena valeur, pou loué Jéhovah. Anou partage partout connaissance ki donne enn vrai bonheur zordi ek ki amenn vers la vie eternel. Kan nou faire sa, nou pou trouve realisation sa bann parole Jésus-la: “Ena plus bonheur kan donné ki kan recevoir.” (Actes 20:35) Ek lerla, nou pou’nn trouve enn vrai but dan nou la-vie.

[Note]

Eski ou kapav expliké?

• Ki pli grand but nou kapav ena dan nou la-vie?

• Kifer li pa realiste ki nou vive zis pou gagne bann kitsoz materiel?

• Ki été “vrai la-vie” ki Bondié promette?

• Couma nou kapav servi nou la-vie pou faire volonté Bondié?

[Zimage, page 20]

Bann chrétien bizin faire bann bon sacrifice