Enn la vie ki ena enn sens—Asterla ek pou touletan
OU KAPAV trouve enn vrai sens dan la vie, asterla-mem. Couma? Kan ou suive bann bon principe ki trouve dan Parole Bondié, la Bible. Anou examine deux-trois ladan.
PRINCIPE BIBLIK: Le roi Salomon ti ecrire: “Pena nanyin ki pli bon pou enn zom ki li mangé, oui, ki li boire ek ki li faire so nâme trouve bann bon kitsoz a cause sa travail dur ki li’nn faire-la.”—ECCLÉSIASTE 2:24.
Nou finn crée pou trouve satisfaction dan travail ki nou faire. Mem dan bann condition bien difficile, ou kapav ena enn tipé satisfaction dan la vie, asterla-mem, kan ou serieux ek honnete dan ou travail.
PRINCIPE BIBLIK: “Ena plus bonheur kan donné ki kan recevoir.”—ACTES 20:35.
Beaucoup finn trouvé ki kan zot faire kitsoz pou lezot—par exemple, donne zot le temps ek zot la force pou aide lezot dan bann moment difficile—sa finn faire zot beaucoup di-bien ek finn donne zot la vie enn vrai sens. Le roi Salomon ti ecrire: “Pa refuse faire di-bien pou bann dimoune ki merité, chaque fois ki to trouvé ki to kapav faire sa.”—Proverbes 3:27.
Anou prend l’exemple Ralph. Apré so retraite, li finn joinde so madame pou preché a plein temps. Zot toulé-deux passe beaucoup l’heure chaque mois dan zot ministere. Zot faire tou seki zot kapav pou enseigne lezot la Bible. Ralph dire: “Kan nou rente lakaz dan tantot, nou fatigué, pa zis parski nou pé vinn vié, mais parski nou donne tou nou la force dan service nou Papa ki dan le ciel. Mais c’est enn bon fatigue!” Ralph ek so madame heureux parski zot priorité dan la vie, c’est pou donne lezot.
PRINCIPE BIBLIK: “Enn vrai camarade montré so l’amour touletan; li couma enn frere ki’nn né pou bann moment difficile.”—PROVERBES 17:17.
Li pli facile pou faire face ar nou bann probleme kan nou pa tousel. Enn philosophe anglais, Francis Bacon ti ecrire ki, pou bann ki pena bann vrai camarade, “le monde pareil couma enn desert.” Kan nou ena bann vrai camarade—ek kan nou-mem nou enn bon camarade—nou plus kapav faire face ar la vie. Sa kapav agreable ek donne nou satisfaction.
PRINCIPE BIBLIK: “Heureux bann ki reconette ki zot pauvre lor plan spirituel.”—MATTHIEU 5:3.
Jésus ti koz lor enn kitsoz bien important ki nou bizin faire si nou envie trouve realisation bann promesse Bondié—nou bizin reconette nou besoin spirituel ek nourri nou lor “plan spirituel.” Nou pa pareil couma bann zanimo, nou bann humain, nou ena enn desir naturel pou comprend sens ki nou la vie ena ek pou ki raison inn crée nou. Zis Jéhovah ki kapav faire nou comprend sa a travers so Parole, la Bible. Couma nou ti trouvé dan lartik avant, la Bible faire nou koné ki projet Bondié ena pou la terre. Li dire nou kifer nou lor la terre, kifer ena sa quantité souffrance-la, ek ki Bondié demann nou pou faire. Li bien important ki nou comprend sa bann verité ki trouve dan la Bible-la pou ki nou ena enn la vie ki ena enn sens ek ki donne nou satisfaction. Bann ki prend le temps pou etudié la Bible ek applik seki zot aprann, zot heureux. Kifer? Parski zot developpe bann relation bien proche avek nou Createur, Jéhovah, nou “Bondié heureux.”—1 Timothée 1:11.
PRINCIPE BIBLIK: “Rappel to Createur . . . avant ki bann probleme arrivé ek ki arrive bann l’année kot to pou dire: ’Mo pa trouve nanyin ki utile [dan sa bann l’année-la.]’”—ECCLÉSIASTE 12:1, THE NEW ENGLISH BIBLE.
Conseil ki le roi Salomon ti donne bann jeune, ki parfois pa realisé ki nou kapav gagne bann grand probleme dan la vie, bien approprié pou nou tou. Faire ou Createur vinn pli important dan ou la vie. C’est sa-mem ki pou faire ou la vie ena enn vrai sens. Rejette sa l’attitude-la: “Anou mangé-boire, parski demain nou pou mort.” (1 Corinthiens 15:32) Si ou mette Bondié en premier, Ecclésiaste 8:12 dire ki “sa pou fini bien” pou ou.
Enn tifi ki appel Wendi ti faire sa l’experience-la. Kan li ti jeune, li avek so soeur, zot ti aprann espagnol pou zot kapav al en République dominicaine kot ti bien bizin bann proclamateur pou preche la bonne nouvelle ki ena dan la Bible. Wendi dire: “Nou ti faire beaucoup sacrifice pou servi kot ti bizin bann proclamateur, mais nou finn passe enn moment extraordinaire. Mo pa ti pou change sa six mois-la kont nanyin! Bann benediction ki nou ti gagné depasse beaucoup bann sacrifice ki nou ti faire.”
Fidelité envers Bondié faire nou la vie ena enn sens
Kan ou developpe bann bon relation avek Jéhovah, sa kapav faire ou la vie ena enn sens dan enn fason special. Couma? Satan pa ti zis pousse Adam ek Ève pou rebellé kont domination Bondié, mais li ti aussi pretann ki personne pa pou reste fidele ar Bondié dan bann l’epreuve. (Job 1:9-11; 2:4) Ou kapav montré ki Satan enn menteur! Couma? Kan ou reste fidele ar Bondié, kan ou obeir so bann principe ek kan ou montré ki ou reconette ki Jéhovah ena tou droit pou decidé seki bon ek seki mauvais pou ou.—Révélation 4:11.
Kitfois nou pou bizin faire face avek bann difficulté si nou envie contigne garde enn conduite droite. Eski sa bann difficulté-la pou empeche nou ena enn la vie ki ena sens? Maziné ki enn l’ennemi pé dire kitsoz pou gate reputation nou camarade ou-soit enn membre nou famille ki nou bien content. Si nou gagne bann difficulté avek sa l’ennemi-la kan nou defann reputation sa dimoune ki nou content-la, eski sa pou empeche nou ena enn la vie ki ena sens? Non, bien sur! Nou pou disposé souffert pou defann reputation sa dimoune ki nou content-la. Li pareil concernant nou fidelité envers Bondié. Kan nou reste fidele dan bann l’epreuve ki nou gagné dan nou lepok, sa faire leker Bondié content.—Proverbes 27:11.
Enn la vie ki ena enn sens pou touletan
Alors, fixé l’objectif pou aprann tou seki ou kapav concernant Bondié ek so projet. Jésus Christ li-mem ti dire: “Sa-mem ki vedir la vie eternel: zot bizin aprann konn toi, sel vrai Bondié, ek celui ki to finn envoyé, Jésus Christ.” (Jean 17:3) Kan Jéhovah pou realise projet ki Li ti ena au commencement pou la terre, bann dimoune fidele pou kapav profite seki Li ti envie pou zot au commencement, setadir “la vie eternel” dan paradis lor la terre. Lerla la vie pou ena vrai-mem enn sens ek nou pou satisfait.—Psaumes 145:16.
Kot-sa ou kapav trouve sa connaissance lor ki Jésus ti kozé-la? Dan la Bible, Parole ki Bondié inn inspiré. Si ou bizin l’aide, ecrire bann ki finn publié sa magazine-la. Zot pou bien content pou faire enn kikenn aide ou pou aprann seki la Bible enseigné vrai-mem.