Parole Jéhovah jamais manké pou realisé
“Dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot.”—JOSUÉ 23:14.
1. Kisannla Josué ti été, ek ki li ti faire vers la fin so la-vie?
LI TI enn zom bien dynamik ek enn commandant militaire ki pa ti peur, li ti ena la foi ek li ti integre. Li ti marche avek Moïse, ek Jéhovah ti choisir li pou dirige nation Israël pou traverse enn grand desert ki ti faire peur ek pou amenn zot dan enn pays kot di-lait ek di-miel coulé. Vers la fin so la-vie, sa zom-la, Josué, ki zot tou ti bien respecté, ti faire enn dernier discours bien touchant ar bann ancien Israël. Pena doute ki sa discours-la ti fortifié la foi bann ki ti ecoute li. Li kapav aussi fortifié ou la-foi.
2, 3. Kan Josué ti koz avek bann ancien Israël, couma situation zot nation ti été, ek ki Josué ti dire?
2 Mazinn sa scene ki la Bible decrire-la: “Ala seki ti arrivé bien longtemps apré ki Jéhovah ti’nn donne Israël repos ar tou so bann l’ennemi tout autour, kan Josué ti’nn vinn bien vié: Josué ti appel tou peuple Israël, so bann ancien, so bann chef, so bann juge ek so bann officier ek li ti dire zot: ‘Moi, mo finn vinn bien vié.’ ”—Josué 23:1, 2.
3 Josué ti pré pou gagne 110 an ek li ti’nn vive pendant enn parmi bann periode pli interessant dan l’histoire peuple Bondié. Li ti’nn temoin bann grand action ki Bondié ti faire, ek li ti’nn trouve beaucoup promesse Jéhovah realisé. Alors, grace a l’experience personnel ki li’nn faire, li ti kapav dire avek enn grand conviction: “Zot bien koné avek tou zot leker ek tou zot nâme ki dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot. Pena enn sel parole ladan ki pa finn accompli.”—Josué 23:14.
4. Ki bann promesse Jéhovah ti faire bann Israélite?
4 Ki parole Jéhovah ki finn realisé dan lepok Josué? Nou pou examine trois promesse ki Jéhovah ti faire bann Israélite. Premierement, Li ti pou delivré zot dan l’esclavage. Deuxiemement, Li ti pou protege zot. Troisiemement, Li ti pou prend zot soin. Jéhovah inn faire mem promesse ar so bann serviteur dan lepok moderne, ek pareil couma Josué, nou finn trouve zot realisé dan nou la-vie. Mais avant ki nou guette seki Jéhovah inn faire dan lepok moderne, anou examine seki Li ti faire dan lepok Josué.
Jéhovah delivré so peuple
5, 6. Couma Jéhovah ti delivré bann Israélite dan l’Égypte, ek ki sa ti montré?
5 Jéhovah ti prend compte kan bann Israélite ti suppliye Li pou delivré zot kan zot ti en esclavage en Égypte. (Exode 2:23-25) Kan Moïse ti pré kot sa ti-pié ki ti prend difé-la, Jéhovah ti dire li: “Mo pé desann pou delivré [mo peuple] dan la main bann Égyptien ek pou faire zot sorti dan sa pays-la ek al dan enn bon pays ki grand, enn pays kot di-lait ek di-miel coulé.” (Exode 3:8) Surement sa ti vrai-mem enn kitsoz extraordinaire pou trouve Jéhovah realise sa! Kan Pharaon ti refusé pou laisse bann Israélite quitte l’Égypte, Moïse ti dire li ki Bondié pou faire de l’eau la riviere Nil vinn di-sang. Parole Jéhovah pa ti manké pou realisé. Vrai-mem de l’eau-la ti vinn di-sang. Bann poisson ti mort ek pa ti kapav boire de l’eau sa la-riviere-la. (Exode 7:14-21) Pharaon pa ti’lé ecouté mem, alors Jéhovah ti envoye neuf lezot plaie lor l’Égypte, ek Li ti fini dire a l’avance couma sakenn pou été. (Exode, chapitre 8-12) Apré ki dixieme plaie ti touye premier-né bann Égyptien, Pharaon ti donne l’ordre bann Israélite pou allé—ek vrai-mem zot ti allé!—Exode 12:29-32.
6 Sa delivrance-la ti donne Jéhovah l’occasion pou faire Israël vinn so nation ek Li ti donne zot so la-Loi. Sa delivrance-la ti glorifié Jéhovah couma enn Kikenn ki realise so bann promesse, enn Kikenn ki dire bann parole ki jamais manké pou realisé. Sa ti montré ki Jéhovah Li pli grand ki tou bann bondié bann nation. Kan nou lire lor sa delivrance-la, sa fortifié nou la-foi. Alors maziné ki bann Israélite inn ressenti kan zot inn faire sa l’experience-la! Josué ti trouvé ki Jéhovah ti vrai-mem “Pli Grand lor la terre entier.”—Psaume 83:18.
Jéhovah protege so peuple
7. Couma Jéhovah ti protege bann Israélite ar l’armée Pharaon?
7 Ki nou kapav dire lor deuxieme promesse ki Jéhovah ti faire, setadir pou protege so peuple? Nou comprend ki sa promesse-la ti forme partie dan promesse ki Jéhovah ti faire pou delivré so peuple dan l’Égypte ek pou faire zot rente dan la Terre promise. Rappel ki Pharaon, dan enn grand colere, ti suive bann Israélite avek so l’armée bien puissant kot ti ena plusieurs centaine char. Surement sa zom vantard-la ti ena enn grand confiance en li-mem, surtout kan bann Israélite ti’nn coumadir bloqué entre bann montagne ek la mer! Lerla, Bondié ti agir pou protege So peuple kan Li ti mette enn nuage entre toulé-deux camp. Kot bann Égyptien ti faire noir; kot bann Israélite ti ena la lumiere. Pendant ki sa nuage-la ti empeche bann Égyptien avancé, Moïse ti leve so baton ek de l’eau la mer Rouge ti divise en deux. Sa ti permette bann Israélite pou sauvé ek sa ti vinn enn piege pou bann Égyptien. Jéhovah ti detruire Pharaon ek so grand l’armée net, ek Li ti protege So peuple ar enn destruction ki zot pa ti pou kapav barré.—Exode 14:19-28.
8. Ki protection bann Israélite ti gagné (a) dan desert ek (b) kan zot ti rente dan la Terre promise?
8 Apré ki bann Israélite ti traverse la mer Rouge, zot ti passe dan enn l’endroit ki la Bible decrire couma enn ‘desert ki grand ek terrible, kot ti ena bann serpent empoisonné ek bann scorpion, enn la-terre sec kot pa ti ena de l’eau.’ (Deutéronome 8:15, La Bible en français courant) Jéhovah ti protege so peuple la-bas aussi. Ek ki nou kapav dire kan zot ti rente dan la Terre promise? Bann l’armée cananéen bien puissant ti opposé ar zot. Pourtant, Jéhovah ti dire Josué: “Levé, traverse Jourdain, toi ek tou sa peuple-la, rente dan pays ki mo pou donne bann garson Israël. Personne pa pou tini devant toi toute longue to la-vie. Pareil couma mo ti avek Moïse, mo pou avek toi. Jamais mo pa pou quitte toi, ni mo pou abandonne toi.” (Josué 1:2, 5) Sa bann parole Jéhovah-la pa’nn manké pou realisé. Dan apepré six an, Josué ti gagne victoire lor 31 lé-roi ek li ti control enn grand partie la Terre promise. (Josué 12:7-24) Sa victoire-la ti pou impossible sans protection Jéhovah.
Jéhovah prend soin so peuple
9, 10. Couma Jéhovah ti prend soin so peuple dan desert?
9 Anou guette asterla troisieme promesse, setadir promesse ki Jéhovah ti pou prend soin so peuple. Enn tipé apré ki bann Israélite ti’nn delivré dan l’Égypte, Bondié ti promette zot: “Mo pé faire di-pain sorti dan le ciel ek tombé couma la pluie pou zot; ek le peuple bizin sorti ek ramasse sakenn so quantité pou chaque jour.” Pareil couma Jéhovah ti promette, Li ti donne zot ‘di-pain ki sorti dan le ciel.’ “Kan bann Israélite ti trouve sa, zot ti commence dire sakenn avek so camarade: ‘Ki été sa?’ ” Jéhovah ti envoye la manne, di-pain ki Li ti promette zot.—Exode 16:4, 13-15.
10 Pendant 40 an ki bann Israélite inn passé dan desert, Jéhovah ti prend zot soin. Li ti donne zot mangé ek de l’eau. Li ti mem faire en sorte ki zot linge pa usé ek zot lipié pa enflé. (Deutéronome 8:3, 4) Josué ti temoin tousala. Jéhovah ti delivré, ti protege ek ti prend soin so peuple, pareil couma Li ti promette zot.
Delivrance dan lepok moderne
11. Ki ti arrivé dan Brooklyn en 1914, ek l’heure ti’nn arrivé pou ki kitsoz?
11 Eski dan nou lepok aussi li pareil? Le 2 octobre 1914, enn vendredi gramatin, Charles Russell, ki ti pé dirige l’activité bann Étudiants de la Bible dan sa lepok-la, ti rente dan la salle a manger dan Béthel Brooklyn, New York. Li ti bien joyeux ek li ti dire: “Bonjour zot tou.” Apré sa, avant ki li ti prend so place, li ti annoncé avek la joie: “Le temps bann nation inn fini, bann lé-roi inn fini gagne zot jour.” Encore enn fois, ti’nn arrive l’heure pou Jéhovah, le Roi l’univers, agir pou so peuple. Ek vrai-mem Li’nn faire sa!
12. Ki delivrance ti ena en 1919, ek ki resultat sa finn ena?
12 Cinq an plitar, Jéhovah ti delivré so peuple dan “Babylone la Grande,” l’empire mondial la fausse religion. (Révélation 18:2) Pena beaucoup parmi nou ki assez agé ek ki’nn temoin sa delivrance extraordinaire-la. Pourtant, nou trouve bien bann resultat ki finn ena. Jéhovah ti retabli vrai l’adoration ek ti rassemblé bann ki ti ena enn grand desir pou adore Li. C’est seki prophete Isaïe ti annoncé kan li ti dire: “Pou bizin arrivé ki dan periode final, montagne lakaz Jéhovah pou etabli pli haute ki tou bann montagne, ek vrai-mem li pou vinn pli haute ki tou bann colline; ek tou bann nation pou bizin monte vers li.”—Isaïe 2:2.
13. Ki l’accroissement ou finn trouvé parmi bann serviteur Jéhovah?
13 Bann parole Isaïe pa ti manké pou realisé. En 1919, avek courage bann chretien oint ti commence enn campagne predication partout lor la terre, ek sa ti eleve l’adoration Jéhovah bien haute. Dan bann l’année 30, li ti’nn vinn clair ki bann membre “lezot brebis” ti pé rassemblé pou adore Jéhovah. (Jean 10:16) Au commencement, ti ena plusieurs millier, apré ti ena plusieurs centaine millier, ek zordi ena plusieurs million dimoune ki pé soutenir vrai l’adoration! Enn vision ki l’apotre Jean ti gagné decrire zot couma enn “grand la-foule, ki personne pa ti kapav compté, ki sorti dan tou nation, ek tribu, ek peuple ek langue.” (Révélation 7:9) Ki ou finn trouvé ou-mem dan ou la-vie? Ki quantité Témoins de Jéhovah ti ena lor la terre kan ou ti fek konn la verité? Zordi, bann ki servi Jéhovah zot plus ki 6,700,000. Kan Jéhovah inn delivré so peuple dan Babylone la Grande, Li’nn ouvert enn chemin pou enn l’accroissement extraordinaire ki nou trouvé zordi dan le monde entier.
14. Ki delivrance encore pou vini?
14 Ena encore enn lot delivrance ki pou vini—enn delivrance ki pou concerne tou dimoune lor la terre. Jéhovah pou montré so pouvoir dan enn fason extraordinaire kan Li pou detruire tou seki opposé ar Li, ek Li pou delivré so peuple pou faire zot rente dan enn nouveau lé-monde kot pou ena la justice. Sa pou vrai-mem enn grand kitsoz pou trouve la fin mechanceté ek commencement enn periode pli extraordinaire ki pou ena dan l’histoire!—Révélation 21:1-4.
Protection Jéhovah dan nou lepok
15. Kifer bann serviteur Jéhovah inn bizin so protection dan lepok moderne?
15 Couma nou finn trouvé, bann Israélite dan lepok Josué ti bizin protection Jéhovah. Eski peuple Jéhovah dan lepok moderne, zot different? Non! Jésus ti averti so bann disciple: “Bann dimoune pou faire zot konn persecution ek pou touye zot, ek tou bann nation pou ena la haine pou zot a cause mo nom.” (Matthieu 24:9) Pendant plusieurs l’année, bann Témoins de Jéhovah dan beaucoup pays finn bizin supporte enn l’opposition bien dur, ek bann persecution bien cruel. Pourtant, li clair ki Jéhovah pé soutenir so peuple. (Romains 8:31) So Parole donne nou l’assurance ki nanyin—‘okenn zarme ki formé kont nou’—pa pou arrete nou l’activité predication ek nou l’enseignement lor Royaume Bondié.—Isaïe 54:17.
16. Ki kitsoz ou finn trouvé ki prouvé ki Jéhovah protege so peuple?
16 Malgré la haine ki le monde ena, peuple Jéhovah finn contigne prosperé. Bann Témoins de Jéhovah pé prosperé dan 236 pays—c’est enn preuve bien clair ki Jéhovah Li avek nou pou protege nou ar bann ki envie detruire nou ou-soit faire nou arrete preché. Eski ou kapav rappel nom bann chef politik ou religieux bien puissant ki, enn certain moment dan ou la-vie, finn persecute peuple Bondié? Ki finn arrive zot? Kot zot été asterla? La plupart finn fini couma bann nanyin ditou, pareil couma Pharaon dan lepok Moïse ek Josué. Mais ki nou kapav dire concernant bann serviteur Bondié ki finn mort fidele? Zot bien protegé dan memoire Jéhovah. Pena okenn lot place ki plus en securité kot zot ti pou kapav été. Oui, bann parole Jéhovah pa finn manké pou realisé en rapport avek so protection.
Jéhovah prend soin so peuple zordi
17. Ki l’assurance Jéhovah ti donné concernant nourriture spirituel?
17 Pareil couma Jéhovah ti prend soin so peuple dan desert, Li prend nou soin zordi. “L’esclave fidele et avisé” nourri nou lor plan spirituel. (Matthieu 24:45) Nou gagne enn connaissance lor bann verité spirituel ki finn reste secret pendant plusieurs siecle. Enn ange ti dire Daniel: “Garde sa bann parole-la secret ek scelle sa livre-la, ziska lepok la fin. Beaucoup pou rod par-ci par-là, ek vrai connaissance pou en abondance.”—Daniel 12:4.
18. Kifer nou kapav dire ki nou ena vrai connaissance en abondance zordi?
18 Nou pé vive dan lepok la fin, ek vrai connaissance li vrai-mem en abondance. Dan le monde entier, l’esprit saint finn dirige bann dimoune ki content la verité pou zot gagne enn connaissance exact lor vrai Bondié ek lor so bann projet. Zordi, partout lor la terre ena la Bible, ek aussi bann publication ki aide bann dimoune pou comprend bann verité ki ena valeur ki trouve dan la Bible. Anou prend par exemple la liste bann chapitre ki trouve dan livre Ki la Bible enseigné vrai-mem?a Ena bann chapitre couma “La verité lor Bondié,” “Kot-sa bann dimoune mort été?,” “Ki été Royaume Bondié?,” ek “Kifer Bondié laisse dimoune souffert?” Bann dimoune finn pose-zot sa bann question-la pendant plusieurs millier l’année. Zordi, li pa difficile pou gagne reponse pou sa bann question-la. Mem si pendant plusieurs siecle bann dimoune pa ti koné ki ena dan la Bible ek ki la chretienté finn enseigne bann croyance apostat, Parole Bondié inn reste fort ek inn soutenir tou bann ki ena enn grand desir pou servi Jéhovah.
19. Ki bann promesse ou finn trouve realisé, ek ki conclusion ou finn tiré?
19 Oui, par seki nou finn trouvé ar nou prop lizié, nou kapav dire: “Dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot. Pena enn sel parole ladan ki pa finn accompli.” (Josué 23:14) Jéhovah delivré, protege ek prend soin so bann serviteur. Eski ou kapav dire ki ena enn promesse ki Jéhovah inn faire ki pa finn realisé kan l’heure finn arrivé? Impossible. Avek sagesse nou faire confiance Parole Bondié, parski nou koné ki nou kapav compte lor la.
20. Kifer nou kapav guette l’avenir avek confiance?
20 Ki nou kapav dire concernant l’avenir? Jéhovah inn dire ki la plupart parmi nou kapav esperé vive lor enn la-terre ki pou vinn enn joli paradi. Enn tigit parmi nou ena l’espoir pou al regne avek Jésus Christ dan le ciel. N’importe ki l’esperance nou ena, nou koné ki nou ena tou bann raison pou reste fidele pareil couma Josué. Enn jour pou arrivé ki nou l’esperance pou realisé. Lerla, nou pou ré-guette tou bann promesse ki Jéhovah inn faire, ek nou aussi nou pou dire: “Tou finn realisé.”
[Note]
a Publié par bann Témoins de Jéhovah.
Eski ou kapav expliké?
• Ki bann promesse Jéhovah, Josué ti trouve realisé?
• Ki bann promesse Jéhovah ou finn trouve realisé?
• Ki nou kapav sur concernant Parole Bondié?
[Zimage, page 23]
Jéhovah ti agir pou delivré so peuple
[Zimage, page 23]
Couma Jéhovah ti protege so peuple kot la mer Rouge?
[Zimage, page 24]
Couma Jéhovah ti soutenir so peuple dan desert?
[Zimage, page 25]
Jéhovah prend soin so peuple zordi