Examine bien “bann kitsoz profond ki concerne Bondié”

“L’esprit examine tou kitsoz en detail, mem bann kitsoz profond ki concerne Bondié.”—1 CORINTHIENS 2:10.

1. Ki certain l’enseignement ki trouve dan la Bible ki faire bann nouveau ki pé etudié la Bible, content?

LA PLUPART parmi nou kapav rappel la joie ki nou ti ressenti kan nou ti fek konn la verité. Nou ti aprann kifer nom Jéhovah important, kifer Li laisse dimoune souffert, kifer certain dimoune al dan le ciel, ek ki l’avenir reservé pou bann lezot dimoune ki fidele. Kitfois avant sa, nou ti deja examine la Bible, mais nou pa ti arrivé comprend sa bann kitsoz-la, pareil couma la plupart dimoune zordi. Nou ti pareil couma enn dimoune ki guette bann corail a travers de l’eau. Sans enn l’equipement, li pa trouve bien bann joli kitsoz ki ena dan fond de l’eau. Mais avek l’aide enn mask ou-soit si li dan enn bateau fond de verre, li extra content kan premier fois li trouve bann joli corail, bann poisson ek bann ti zanimo ki ressemblé bann plante tou sorte couleur ek lezot creature bien interessant encore, dan la mer. Li ti pareil aussi pou nou. Kan enn kikenn ti commence aide nou pou comprend la Bible, nou ti decouvert pou premier fois “bann kitsoz profond ki concerne Bondié.”—1 Corinthiens 2:8-10.

2. Kifer la joie pou aprann bann kitsoz dan Parole Bondié kapav reste pou touletan?

² Mais eski nou bizin contente-nou zis avek enn connaissance superficiel lor bann verité ki trouve dan la Bible? Mais ki été sa “bann kitsoz profond ki concerne Bondié”? Parmi “bann kitsoz profond ki concerne Bondié,” ena so sagesse ki Li faire bann chretien comprend grace a so l’esprit saint, mais ki lezot dimoune pa arrivé comprend. (1 Corinthiens 2:7) Sagesse Bondié li sans limite ek nou kapav gagne beaucoup la-joie pou etudié li en profondeur. Jamais nou pou konn tou lor sagesse ki ena dan fason ki Bondié agir. Au commencement kan nou ti fek aprann bann l’enseignement de base ki ena dan la Bible, nou ti ena enn grand la-joie. Nou kapav garde sa la-joie-la pou touletan si nou contigne examine en detail “bann kitsoz profond ki concerne Bondié.”

3. Kifer li important ki nou comprend en profondeur bann raison pou nou bann croyance?

³ Kifer li important ki nou comprend sa ‘bann kitsoz profond-la’? Kan nou pa zis comprend seki nou croire, mais aussi kifer nou croire zot, setadir lor ki nou bann croyance basé, sa fortifié nou la-foi ek nou confiance dan sa bann croyance-la. La Bible dire nou servi nou “capacité pou raisonné” pou “verifié par [nou-mem] ki volonté Bondié, li bon, li acceptable, ek li parfait.” (Romains 12:1, 2) Kan nou comprend kifer Jéhovah demann nou pou vive dan enn certaine fason, nou pou plus determiné pou obeir Li. Alors, connaissance lor “bann kitsoz profond” kapav donne nou la force pou resisté kont tentation pou faire bann kitsoz ki kont la loi ek sa kapav pousse-nou pou vinn “zelé pou bann bon action.”—Tite 2:14.

4. Ki l’etude la Bible impliké?

⁴ Pou nou comprend bann kitsoz profond, nou bizin etudié. Selman, l’etude li pa pareil avek lire enn kitsoz la-haut la-haut. Kan nou etudié, nou bizin examine seki nou pé lire en profondeur pou guetté ki lien sa ena avek seki nou koné deja. (2 Timothée 1:13) Sa vedir ki nou bizin trouvé pou ki raison pé dire certaine kitsoz. Etudié la Bible implik aussi medité pou guetté couma nou kapav servi seki nou pé aprann pou prend bann bon decision ek pou aide lezot. En plus, parski “tou l’Ecriture finn inspiré par Bondié, ek li utile,” nou bizin etudié “tou parole ki sorti dan la bouche Jéhovah.” (2 Timothée 3:16, 17; Matthieu 4:4) Kitfois etudié la Bible pou nou c’est enn kitsoz difficile! Mais li kapav aussi vinn enn kitsoz ki nou trouve la joie pou faire. En realité, li pa trop difficile pou comprend “bann kitsoz profond ki concerne Bondié.”

Jéhovah aide bann dimoune humble pou comprend

5. Kisannla kapav comprend “bann kitsoz profond ki concerne Bondié”?

⁵ Mem si ou pa ti travail extra bien dan lekol ek ou pa trop habitué etudié, fodé pa ou pensé ki ou pa pou kapav comprend “bann kitsoz profond ki concerne Bondié.” Pendant ministere ki Jésus inn faire lor la terre, Jéhovah pa ti faire bann dimoune sage ek intellectuel dan sa lé-monde-la comprend so projet. Li ti plutot revele sa ar bann dimoune ordinaire ki pa ti ena enn grand l’instruction ek ki ti assez humble pou accepté ki serviteur Bondié enseigne zot. Comparé ar bann dimoune ki ti al dan bann grand lekol, zot ti couma bann tibaba. (Matthieu 11:25; Actes 4:13) Concernant “bann kitsoz ki Bondié inn preparé pou bann ki content Li,” l’apotre Paul ti ecrire bann chrétien: “C’est ar nou ki Bondié finn faire konn sa bann kitsoz-la grace a so l’esprit, parski l’esprit examine tou kitsoz en detail, mem bann kitsoz profond ki concerne Bondié.”—1 Corinthiens 2:9, 10.

6. Ki 1 Corinthiens 2:10 vedir?

⁶ Couma l’esprit Bondié “examine tou kitsoz en detail, mem bann kitsoz profond ki concerne Bondié”? Au lieu ki Jéhovah donne chaque chretien personnellement enn l’explication lor la verité, Li servi so l’esprit pou dirige so l’organisation. Ek sa l’organisation-la aide peuple Bondié ki vive dan l’unité, pou comprend la Bible. (Actes 20:28; Éphésiens 4:3-6) Dan le monde entier, tou bann congregation profite mem program l’etude la Bible. Avek le temps, zot etudié tou bann l’enseignement ki ena dan la Bible. L’esprit saint agir a travers la congregation pou aide bann dimoune pou gagne l’attitude ki bizin pou comprend “bann kitsoz profond ki concerne Bondié.”—Actes 5:32.

Ki “bann kitsoz profond ki concerne Bondié” impliké?

7. Kifer beaucoup dimoune pa comprend “bann kitsoz profond ki concerne Bondié”?

⁷ Fodé pa nou pensé ki “bann kitsoz profond ki concerne Bondié” zot touletan bann kitsoz ki difficile pou comprend. La plupart dimoune pa comprend “bann kitsoz profond ki concerne Bondié,” pa parski li trop difficile pou gagne sagesse Bondié, mais parski Satan embete bann dimoune ek faire zot rejette l’aide ki Jéhovah donné a travers So l’organisation.—2 Corinthiens 4:3, 4.

8. Lor ki kitsoz profond Paul ti pé kozé dan troisieme chapitre lettre ki li ti ecrire bann Éphésiens?

⁸ Troisieme chapitre dan lettre ki Paul ti ecrire bann Éphésiens montré ki “bann kitsoz profond ki concerne Bondié” implik beaucoup l’enseignement ki la plupart Témoins de Jéhovah comprend bien, couma par exemple kisannla sa Descendance ki Jéhovah ti promette pou vini-la, couma Bondié inn choisir certain dimoune lor la terre pou zot al vive dan le ciel, ek ki été Royaume messianik. Paul ti ecrire: “Dan lezot generation, Bondié pa finn faire bann dimoune konn sa secret-la, couma asterla Li finn faire so bann saint zapotre ek so bann prophete konn sa par l’esprit, setadir ki bann dimoune dan bann nation pou vinn heritier ek membre ensam avek sa lekor-la, ek gagne enn part ensam avek nou dan promesse ki finn faire, dan l’unité avek Jésus Christ.” Paul ti dire ki li ti’nn gagne enn mission pou “faire bann dimoune trouvé couma sa saint secret-la li accompli, secret ki depuis longtemps inn reste cachiette dan Bondié.”—Éphésiens 3:5-9.

9. Kifer li enn privilege pou comprend “bann kitsoz profond ki concerne Bondié”?

⁹ Paul ti contigne expliké ki, seki Bondié envie, c’est ki “a travers congregation, bann . . . ki dan le ciel kapav konn sagesse Bondié ki bien varié.” (Éphésiens 3:10) Bann ange kapav aprann beaucoup kan zot trouve ek zot comprend sagesse ki Jéhovah manifesté kan Li traite avek congregation chretien. Li vrai-mem enn grand privilege pou nou pou comprend bann kitsoz ki interesse mem bann ange! (1 Pierre 1:10-12) Apré sa, Paul dire ki nou bizin faire zeffort pou ‘comprend ensam avek tou bann saint, largeur, longueur, hauteur ek profondeur’ la foi chretien. (Éphésiens 3:11, 18) Asterla, anou guette certain l’exemple bann kitsoz profond ki kapav augmente nou connaissance.

Certain l’exemple bann kitsoz profond

10, 11. Dapré la Bible, kan eski Jésus ti vinn partie principal “descendance” “femme” Bondié?

¹⁰ Nou koné ki Jésus li partie principal “descendance” “femme” Bondié ki dan le ciel ek ki mentionné dan Genèse 3:15. Pou augmente nou connaissance, nou kapav demann nou-mem: ‘Kan eski Jésus ti vinn sa descendance ki Bondié ti promette-la? Eski c’est pendant enn certain moment kan li ti vive dan le ciel avant li vinn lor la terre? Kan li ti né couma enn dimoune? Kan li ti prend bapteme? Ou-soit kan li ti ressuscité?’

¹¹ Bondié ti promette ki partie so l’organisation ki dan le ciel ek ki prophetie Genèse appel so “femme,” ti pou produire enn descendance ki ti pou crase la tête sa serpent ki mentionné dan sa prophetie-la. Mais plusieurs millier l’année ti’nn passé, ek femme Bondié pa ti’nn produire okenn descendance ki ti kapav detruire Satan ek seki li’nn faire. A cause sa, prophetie Isaïe ti appel sa femme-la “sterile” ek ki “demoralisé.” (Isaïe 54:1, 5, 6) Finalement, Jésus ti né dan Bethléhem. Mais c’est selman apré so bapteme, kan li ti gagne l’esprit saint pou vinn garson spirituel Bondié ki Jéhovah ti dire: “Li-mem mo Garson.” (Matthieu 3:17; Jean 3:3) Partie principal “descendance” femme Bondié finalement ti là. Plitar, bann disciple Jésus aussi ti gagne l’esprit saint ek zot inn vinn bann garson Bondié. “Femme” Jéhovah, ki pendant tellement longtemps ti senti-li couma enn “femme . . . ki pa finn donne naissance,” ti kapav enfin “criyé avek la joie.”—Isaïe 54:1; Galates 3:29.

12, 13. Ki bann verset la Bible montré ki tou bann chretien oint lor la terre forme “l’esclave fidele et avisé”?

¹² Enn deuxieme l’exemple bann kitsoz profond ki Bondié finn faire nou koné c’est en rapport avek so projet pou choisir 144,000 dimoune lor la terre. (Révélation 14:1, 4) Nou accepté l’enseignement ki tou bann chretien oint ki vive lor la terre dan n’importe ki lepok, forme “l’esclave fidele et avisé,” ek Jésus ti dire ki sa ‘l’esclave-la’ pou donne bann domestik “mangé” dan l’heure ki bizin. (Matthieu 24:45) Ki texte la Bible prouvé ki sa l’enseignement-la li exact? Eski li possible ki Jésus ti pé koz lor n’importe ki chretien en general ki fortifié so bann frere avek mangé spirituel?

¹³ Bondié ti dire nation Israël: “Zot mo bann temoin . . . oui mo serviteur ki mo finn choisiré.” (Isaïe 43:10) Mais le 11 Nisan l’an 33 nou lepok, Jésus ti dire bann chef Israël ki Bondié finn rejette zot nation en tant ki so serviteur. Li ti dire zot: “Pou rasse royaume Bondié ar zot, ek pou donne sa enn nation ki pou rapporte bann fruit.” Jésus ti dire bann la-foule: “Guetté! Bondié inn laisse zot lakaz abandonné ar zot.” (Matthieu 21:43; 23:38) En tant ki bann esclave Jéhovah, bann Israélite pa ti ni fidele ni avisé. (Isaïe 29:13, 14) Plitar sa mem jour-la, kan Jésus ti demandé: “Kisannla ki vrai-mem l’esclave fidele et avisé?,” en realité, li ti pé demandé: ‘Ki nation ki avisé ki pou remplace Israël pou vinn l’esclave fidele Bondié?’ L’apotre Pierre ti donne reponse sa question-la kan li ti dire congregation bann chretien oint: “Zot enn . . . ‘nation saint, enn peuple ki pou vinn enn di-bien special.’ ” (1 Pierre 1:4; 2:9) Sa nation spirituel-la, “Israël Bondié” ti vinn nouveau esclave Jéhovah. (Galates 6:16) Pareil couma tou bann membre ancien Israël ti forme enn “serviteur,” li pareil aussi pou bann chretien oint ki lor la terre dan n’importe ki lepok, zot forme enn “l’esclave fidele et avisé.” Li vrai-mem enn grand privilege pou gagne “mangé” spirituel a travers l’esclave Bondié!

L’etude personnel kapav vinn enn plaisir

14. Kifer kan nou etudié la Bible, sa faire nou gagne plus la-joie ki zis kan nou lire li?

¹⁴ Kan nou comprend pli bien bann l’enseignement lor la Bible, eski nou pa content parski sa fortifié nou la-foi? C’est a cause sa-mem ki kan nou etudié la Bible—pa zis kan nou lire li—nou kapav gagne beaucoup plus la-joie. Alors, kan ou lire bann publication ki basé lor la Bible, pose ou-mem sa bann question-la: ‘Ki rapport ena entre sa l’explication-la ek seki mo ti comprend avant lor sa sujet-la? Ki bann lezot texte ou-soit argument mo kapav rappel ki pou soutenir encore plus bann conclusion ki finn presenté dan sa lartik-la?’ Si ou bizin faire encore bann lezot recherche, ecrire ou question, ek etudié lor la dan ou prochain l’etude personnel.

15. Ki kitsoz ou kapav etudié ki pou donne ou la joie, ek couma ou pou kapav profite pendant longtemps seki ou etudié?

¹⁵ Ki kitsoz ou kapav etudié ki pou faire ou gagne la joie pou augmente ou connaissance? Par exemple ou kapav etudié en profondeur bann different l’alliance ki Bondié inn faire pou ki bann dimoune gagne bann bienfait. Ou kapav fortifié ou la-foi si ou etudié bann prophetie lor Jésus Christ, ou-soit si ou etudié verset par verset enn livre la Bible ki koz lor bann prophetie. Ou kapav aussi fortifié ou la-foi si ou examine l’histoire moderne bann Témoins de Jéhovah ki trouve dan livre Les Témoins de Jéhovah : Prédicateurs du Royaume de Dieu, si li existé dan ou langue.a Ek si ou ré-guette bann ancien “Question bann lecteur” dan La Tour de Garde, sa pou aide ou pou comprend pli bien certain verset la Bible. Remark bien ki bann raisonnement biblik bann publication servi pou arrive ziska sa bann conclusion ki presenté-la. Sa pou aide ou pou forme ou “capacité pou faire difference entre seki bon ek seki mauvais” ek pou developpe discernement. (Hébreux 5:14) Kan ou etudié, prend bann note, soit dan ou la-Bible personnel, soit dan enn cahier, pou ki ou ek bann ki ou pou aidé kapav profite pendant longtemps seki ou etudié.

Aide bann jeune pou content etudié la Bible

16. Couma ou kapav aide bann jeune pou content zot l’etude la Bible?

¹⁶ Bann parent kapav faire beaucoup pou aide zot zenfant pou developpe l’amour pou bann kitsoz spirituel. Pa sous-estime capacité ki bann jeune ena pou comprend bann kitsoz profond. Par exemple, ou kapav demann ou bann zenfant pou faire bann recherche pou l’etude familial, ek apré, demann zot ki zot finn aprann. Dan ou l’etude familial, ou kapav aussi demann bann zenfant pou faire bann seance d’exercice, coumsa zot pou aprann pou defann zot la-foi ek pou prouvé ki seki zot finn aprann, li vrai. En plus, ou kapav servi brochure ‘ Voyez le bon pays ’b pou enseigne zot lor bann l’endroit ki ena dan la Bible ek pou comprend pli bien lecture la Bible ki faire chaque semaine.

17. Kifer nou bizin equilibré kan nou faire nou l’etude personnel la Bible?

¹⁷ Nou l’etude personnel kapav bien interessant ek fortifié nou la-foi, mais nou bizin faire attention ki sa pa empeche nou pou prepare nou bann reunion. Bann reunion, c’est enn lot moyen ki Jéhovah servi pou instruire nou par “l’esclave fidele et avisé.” Selman, si ou faire bann recherche sa kapav aide ou pou faire bann commentaire bien interessant dan reunion—par exemple, dan l’etude de livre ou-soit kan ena point biblik interessant pou lecture la Bible chaque semaine, dan Lekol ministere theocratik.

18. Kifer li vaut la peine pou faire zeffort pou etudié “bann kitsoz profond ki concerne Bondié”?

¹⁸ Kan nou etudié Parole Bondié en profondeur, sa kapav aide nou pou vinn pli proche ar Jéhovah. Pou montré valeur ki sa qualité l’etude-la ena, la Bible dire: “La sagesse donne enn protection pareil couma l’argent donne enn protection; mais l’avantage connaissance, c’est ki la sagesse garde vivant bann ki ena li.” (Ecclésiaste 7:12) Alors, li vaut la peine pou faire bann zeffort pou gagne enn connaissance profond lor bann kitsoz spirituel. La Bible promette bann ki contigne rodé: “[Zot] pou trouve connaissance Bondié.”—Proverbes 2:4, 5.

[Note]

Eski ou kapav expliké?

• Ki été “bann kitsoz profond ki concerne Bondié”?

• Kifer fodé jamais nou arrete etudié bann kitsoz profond?

• Kifer tou bann chretien kapav gagne la joie pou comprend “bann kitsoz profond ki concerne Bondié”?

• Couma ou kapav tire plus profit ar “bann kitsoz profond ki concerne Bondié?”

[Zimage, page 28]

Kan eski Jésus ti vinn descendance ki Bondié ti promette?

[Zimage, page 31]

Bann parent kapav donne zot zenfant bann recherche pou faire pou l’etude familial