Zot “contigne suive l’agneau”
“C’est bann ki contigne suive l’Agneau partout kot li allé.”—RÉV. 14:4.
1. Ki bann vrai disciple Jésus ti pensé concernant l’idée ki zot ti bizin suive li?
ENVIRON deux an et demi apré ki Jésus ti commence so ministere, li “ti pé enseigné dan enn l’assemblée publik dan la ville Capernaüm.” “Beaucoup parmi so bann disciple” ti soké par seki li ti dire, alors zot “ti retourne ar bann kitsoz ki ti derriere, ek zot ti nepli oulé marche avek li.” Kan Jésus ti demann so 12 zapotre si zot aussi zot envie allé, Simon Pierre ti reponn: “Seigneur, vers kisannla nou pou allé? C’est toi ki ena bann parole la vie eternel; ek nou finn croire ek nou finn koné ki c’est to-mem sa Kikenn ki Saint, ki Bondié inn envoyé-la.” (Jean 6:48, 59, 60, 66-69) Bann vrai disciple Jésus ti refuse pou arrete suive li. Apré ki zot ti oint ar l’esprit saint, zot ti contigne soumette-zot ar direction Jésus.—Actes 16:7-10.
2. (a) Kisannla “l’esclave fidele et avisé” ou-soit “l’intendant fidele”? (b) Couma sa esclave-la finn gagne enn bon reputation en seki concerne “suive l’Agneau”?
2 Ki nou kapav dire lor bann chretien oint dan lepok moderne? Dan so prophetie concernant “signe pou montré [so] presence ek conclusion sa systeme-la,” Jésus ti appel so bann disciple oint lor la terre en tant ki enn groupe, “l’esclave fidele et avisé,” ou-soit “l’intendant fidele.” (Mat. 24:3, 45; Luc 12:42) En seki concerne “suive l’Agneau n’importe kot li allé,” sa esclave-la en tant ki enn groupe finn faire-li enn bon reputation. (Lire Révélation 14:4, 5.) So bann membre reste vierge dan enn sens spirituel, setadir zot pa sali-zot avek bann croyance ek bann pratik “Babylone la Grande,” l’empire mondial tou bann fausse religion. (Rév. 17:5) En rapport avek bann doctrine, “pa finn trouve okenn mensonge dan zot la bouche,” ek zot reste “sans defaut” en rapport avek le monde Satan. (Jean 15:19) Dan l’avenir, le reste bann chretien oint lor la terre “pou suive” l’Agneau ziska dan le ciel.—Jean 13:36.
3. Kifer li important ki nou ena confiance dan l’esclave fidele et avisé?
3 Jésus inn etabli l’esclave fidele et avisé “lor so bann domestik” setadir chaque membre sa esclave-la lor plan individuel, “pou donne zot, zot nourriture dan ler ki bizin.” Li ti aussi etabli sa esclave-la lor “tou so bann di-bien.” (Mat. 24:45-47) Parmi sa bann ‘di-bien-la’ ena bann membre ‘la grande foule’ ki forme partie dan bann “lezot brebis” ki pé augmenté. (Rév. 7:9; Jean 10:16) Chaque membre parmi bann oint ek bann “lezot brebis” bizin faire confiance sa esclave ki Jésus finn etabli lor zot-la. Ena beaucoup raison kifer sa esclave-la merite nou confiance. Deux raison principal c’est parski: (1) Jéhovah ena confiance dan sa esclave-la. (2) Jésus aussi ena confiance dan sa esclave-la. Anou examine bann preuve ki montré ki Jéhovah ek Jésus Christ toulé-deux ena enn confiance total dan l’esclave fidele et avisé.
Jéhovah ena confiance dan sa esclave-la
4. Kifer nou kapav ena confiance dan nourriture spirituel ki l’esclave fidele et avisé donne nou?
4 Anou guetté kifer l’esclave fidele et avisé ena capacité pou donne nou enn nourriture spirituel ki riche, dan ler ki bizin. Jéhovah dire: “Mo pou donne toi capacité pou comprend ek mo pou montré toi dan ki chemin to bizin marché.” Li ajouté: “Mo pou donne toi conseil pendant ki mo garde enn lizié lor toi.” (Ps. 32:8) Oui, c’est Jéhovah ki guide sa esclave-la. Alors, nou kapav ena enn confiance total dan fason ki sa esclave-la comprend la Bible ek dan direction ki li donne nou ek ki basé lor la Bible.
5. Ki montré nou ki l’esprit Bondié pé donne puissance l’esclave fidele et avisé en tant ki groupe?
5 Jéhovah donne aussi so l’esprit-saint sa esclave-la. Li vrai ki l’esprit Jéhovah li invisible, mais seki sa l’esprit-la produire dan bann dimoune, sa li enn kitsoz ki nou trouvé. Mazinn seki sa esclave-la inn reussi faire kan li’nn donne temoignage dan le monde entier lor Jéhovah, lor so Garson ek lor Royaume. Bann adorateur Jéhovah pé preche sa Royaume-la avek zele dan plus ki 230 pays ek territoire. Eski sa c’est pa enn preuve ki nou pa kapav contesté ki l’esprit Bondié pé donne puissance sa esclave-la? (Lire Actes 1:8.) Pou donne tou bann serviteur Jéhovah dan le monde entier la nourriture spirituel dan ler ki bizin, sa esclave-la bizin prend bann decision important. Kan l’esclave fidele et avisé prend sa bann decision-la ek applik zot, li manifesté l’amour, la douceur ek lezot qualité ki forme partie dan fruit l’esprit saint.—Gal. 5:22, 23.
6, 7. Ziska ki point Jéhovah ena confiance dan l’esclave fidele et avisé?
6 Pou comprend bien ki quantité Jéhovah faire confiance l’esclave fidele et avisé, reflechi lor promesse ki Li’nn faire so bann membre. L’apotre Paul ti ecrire: “Trompette pou sonné, ek bann mort pou relevé avek enn lekor ki pa kapav pourri, ek nou pou changé. Parski sa lekor ki pourri-la bizin mette enn ki pa kapav pourri lor li, ek sa lekor ki mortel-la bizin mette l’immortalité lor li.” (1 Cor. 15:52, 53) Bann chretien oint ki servi Bondié fidelement ek ki mort dan zot lekor humain ki pourri, zot pa ressuscité zis couma bann creature spirituel ki gagne la vie eternel, mais zot pou gagne enn kitsoz ki ena beaucoup plus valeur. Zot gagne l’immortalité, setadir ki jamais zot pou mort ek jamais pou kapav detruire zot. En plus, zot gagne enn lekor ki pa kapav pourri ek ki kitfois kapav existé sans depann lor lezot source l’energie. Révélation 4:4 dire ki sa bann dimoune ki ressuscité-la pé assizé lor bann trone avek bann couronne en or lor zot la tête. Sa montré ki bann chretien oint pou gagne la gloire en tant ki bann le roi. Mais ena encore lezot preuve ki montré ki Bondié ena confiance dan bann chretien oint.
7 En Révélation 19:7, 8 nou lire: “Mariage l’Agneau inn arrivé ek so femme inn prepare-li. Oui, finn permette li pou mette enn linge en lin ki fin, ki brillé ek ki pur, parski lin fin represente bann action juste ki bann saint inn faire.” Jéhovah inn choisir bann chretien oint pou ki zot vinn futur femme so Garson. Enn lekor ki pa kapav pourri, l’immortalité, enn royaume, ek ‘mariage avek l’Agneau’—c’est vrai-mem bann cadeau extraordinaire, pa vrai? C’est bann preuve ki convaink nou ki Bondié ena confiance dan bann chretien oint, ki “contigne suive l’Agneau n’importe kot li allé.”
Jésus ena confiance dan sa esclave-la
8. Couma Jésus inn montré ki li ena confiance dan so bann disciple oint?
8 Ki preuve nou ena ki Jésus ena enn confiance total dan so bann disciple ki oint ar l’esprit saint? Pendant dernier la nuit ki li ti passé lor la terre, Jésus ti faire enn promesse ar so 11 zapotre fidele. Li ti dire zot: “Zot bann ki finn contigne reste avek moi dan mo bann l’epreuve; ek mo pé faire enn alliance avek zot, pareil couma mo Papa finn faire enn alliance avek moi pou enn royaume, pou ki zot mangé ek boire lor mo la table dan mo royaume, ek assize lor bann trone pou juge douze tribu Israël.” (Luc 22:28-30) Sa l’alliance ki Jésus ti faire avek so 11 zapotre-la pou concerne aussi tou bann 144,000 chretien oint. (Luc 12:32; Rév. 5:9, 10; 14:1) Si Jésus pa ti ena confiance en zot, eski li ti pou faire enn l’alliance pou partage so pouvoir royal avek zot?
9. Ki bann kitsoz ki forme partie dan ‘tou bann di-bien Christ’?
9 En plus, Jésus Christ inn etabli l’esclave fidele et avisé lor “tou so bann di-bien”—tou bann l’interet Royaume Bondié lor la terre. (Mat. 24:47) Parmi sa bann di-bien-la ena bann batiment ek bann l’equipement bureau mondial bann Témoins de Jéhovah, bann lezot filiale dan lezot pays, ek bann la Salle l’assemblée, bann la Salle du Royaume a travers le monde. Ena aussi l’activité predication ek l’enseignement. Si ou pena confiance dan enn dimoune, eski ou pou demann li pou garde ek pou servi ou bann kitsoz ki ena valeur?
10. Ki montré nou ki Jésus Christ li avek so bann disciple oint?
10 Apré so resurrection ek enn tipé avant ki li ti monte dan le ciel, Jésus ti parette ar so bann disciple fidele ek ti faire sa promesse-la: “Guetté! Mo avek zot toulé-jour ziska la fin sa systeme-la.” (Mat. 28:20) Eski li’nn tini sa promesse-la? Pendant 15 dernier l’année ki’nn passé, congregation bann Témoins de Jéhovah inn sorti 70,000 pou vinn plus ki 100,000—enn l’augmentation plus ki 40 %. Ki nou kapav dire lor bann nouveau disciple? Pendant mem periode, environ 4.5 million disciple ti prend bapteme—enn moyenne plus ki 800 par jour. Sa bann l’augmentation extraordinaire-la c’est bann preuve ki Christ pé dirige so bann disciple oint kan zot faire zot reunion dan congregation ek ki li soutenir zot dan l’activité pou faire bann disciple.
Sa esclave-la li fidele ek avisé
11, 12. Couma sa esclave-la inn montré ki li fidele ek avisé?
11 Alors ki Jéhovah ek Jésus Christ ena enn confiance total dan l’esclave fidele et avisé, eski nou aussi nou pa bizin faire pareil? Apré tou, sa esclave-la finn montré ki li fidele kan li’nn faire travail ki ti’nn confié li. Par exemple, periodik La Tour de Garde parette depuis preské 130 an. Bann reunion ek bann l’assemblée bann Témoins de Jéhovah contigne fortifié nou lor plan spirituel.
12 Sa esclave fidele-la li aussi avisé parski li pa depasse so limite ek li pa faire kitsoz avant ki li gagne direction Jéhovah. Li pa tardé aussi pou agir kan direction Bondié clair lor enn sujet. Par exemple, alors ki bann chef religieux enba-enba ou-soit en publik tolere conduite egoïste ek mauvais ki bann dimoune dan le monde ena ek considere sa couma normal, sa esclave-la li, li mette nou en garde kont bann piege ki ena dan sa mauvais le monde Satan-la. L’esclave fidele et avisé kapav donne nou bann l’avertissement sage, dan bon moment parski Jéhovah ek Jésus Christ pé beni li. Ala kifer sa esclave-la merite tou nou confiance. Mais couma eski nou kapav montré ki nou faire confiance l’esclave fidele et avisé?
“Al avek” bann chretien oint pendant ki zot pé suive l’Agneau
13. Dapré prophetie Zekaria, couma nou kapav montré ki nou ena confiance dan l’esclave fidele et avisé?
13 Livre Zekaria koz lor “dix zom” ki approche “enn Juif ” ek ki dire: “Nou pou al avek zot.” (Lire Zekaria 8:23.) Kan sa verset-la koz lor “enn Juif,” li servi mot “zot” apré, sa vedir ki sa zom juif-la represente enn groupe dimoune. Dan nou lepok, sa Juif-la represente le reste bann chretien ki’nn oint ar l’esprit saint, ki forme partie dan “Israël Bondié.” (Gal. 6:16) Sa “dix zom dan tou langue bann nation[-la]” represente la grande foule lezot brebis. Pareil couma bann chretien oint suive Jésus n’importe kot li allé, pareil aussi, la grande foule “al avek,” setadir accompagne l’esclave fidele et avisé. Fodé jamais ki bann membre la grande foule zot honté pou faire koné ki zot compagnon bann “ki ena part dan l’invitation pou al dan le ciel.” (Héb. 3:1) Jésus pa honté pou appel bann chretien oint, “frere.”—Héb. 2:11.
14. Couma nou kapav soutenir fidelement bann frere Christ?
14 Pou Jésus, kan nou soutenir so bann frere oint fidelement, c’est coumadir nou pé soutenir li. (Lire Matthieu 25:40.) Alors, dan ki fason bann ki ena l’esperance pou vive lor la terre kapav soutenir bann frere oint Christ? C’est surtout kan zot aide bannla dan predication la bonne nouvelle lor Royaume Bondié. (Mat. 24:14; Jean 14:12) Quantité chretien oint ki ena lor la terre inn diminué avek le temps, mais bann lezot brebis zot, zot inn augmenté. Kan bann chretien ki ena l’esperance pou vive lor la terre participe dan predication, ek si possible faire sa a plein temps, zot aide bann chretien oint pou accompli mission ki zot inn gagné pou faire bann disciple. (Mat. 28:19, 20) En plus, zot ena aussi l’occasion pou soutenir sa l’activité-la kan zot faire bann offrande dan different fason.
15. Couma chaque chretien bizin considere nourriture spirituel ki l’esclave fidele donné dan ler ki bizin, ek bann decision ki li prend dan fason ki li organise bann kitsoz?
15 Couma eski nou personnellement, nou considere nourriture spirituel ki l’esclave fidele et avisé donne nou dan ler ki bizin par moyen bann publication ki basé lor la Bible ek pendant bann reunion? Eski nou prend sa mangé-la avek reconnaissance ek nou mette en pratik seki nou aprann? Couma nou reagir kan l’esclave fidele prend bann decision dan fason ki li organise bann kitsoz? Kan nou obeir avek tou nou leker direction ki sa esclave-la donne nou, nou montré ki nou ena la foi dan bann disposition ki Jéhovah prend.—Jacq. 3:17.
16. Kifer tou bann chretien bizin ecoute bann frere Christ?
16 Jésus ti dire: “Mo bann brebis ecoute mo la voix ek mo konn zot bien, ek zot suive moi.” (Jean 10:27) Bann chretien oint vrai-mem faire sa. Mais ki nou kapav dire lor bann ki “al avek” zot? Zot bizin ecoute Jésus. Zot bizin aussi ecoute so bann frere. Apré tou, c’est sa bann frere Christ-la ki finn gagne responsabilité pou prend soin peuple Bondié lor plan spirituel. Ki sa impliké pou ecoute la voix bann frere Christ?
17. Ki sa impliké pou ecoute l’esclave fidele?
17 Dan nou lepok, l’esclave fidele et avisé li representé par College central ki dirige ek organise l’activité predication partout lor la terre. Bann membre College central c’est bann ancien ki’nn oint ar l’esprit saint ek ki ena l’experience. L’expression “bann ki pé dirige” nou applik surtout ar zot. (Héb. 13:7) Zot veille lor plus ki 7,000,000 proclamateur ki trouve dan plus ki 100,000 congregation a travers le monde. Sa bann ancien oint-la “ena . . . beaucoup pou faire dan travail nou Seigneur.” (1 Cor. 15:58) Nou ecoute la voix l’esclave fidele kan nou cooperé dan tou domaine ar so College central.
Bann ki ecoute sa esclave-la, zot beni
18, 19. (a) Couma bann ki ecoute l’esclave fidele et avisé zot beni? (b) Ki nou bizin bien decidé pou faire?
18 Depuis ki l’esclave fidele et avisé inn etabli, li’nn “amenn enn quantité dimoune vers la justice.” (Dan. 12:3) Parmi, ena bann dimoune ki ena l’esperance pou gagne la vie sauve kan sa mauvais le monde-la pou detruire. C’est vrai-mem enn grand benediction ki Bondié considere zot couma bann dimoune juste!
19 Dan l’avenir, ki pou arrive bann ki’nn ecoute la voix sa esclave-la kan ‘la ville saint, Nouvelle Jérusalem [144,000] pou sorti dan le ciel kot Bondié ek pou desann, li ki’nn preparé couma enn la marié ki’nn faire-li joli pou so mari’? La Bible dire: “Bondié Li-mem pou avek zot. Li pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.” (Rév. 21:2-4) Alors, anou ecoute Christ ek so bann frere oint ki nou kapav faire confiance.
Ki ou finn aprann?
• Ki preuve nou ena ki Jéhovah ena confiance dan l’esclave fidele et avisé?
• Ki montré nou ki Jésus Christ ena enn confiance total dan sa groupe l’esclave-la?
• Kifer l’intendant fidele merite nou confiance?
• Couma nou montré ki nou ena confiance dan l’esclave fidele?
[Zimage lor page 19]
Eski ou koné kisannla Jéhovah inn choisir pou vinn futur femme so Garson?
[Zimage lor page 20]
Jésus Christ inn confié l’esclave fidele et avisé so bann “di-bien”
[Zimage lor page 21]
Kan nou participe dan predication, nou pé soutenir bann chretien oint