Watchtower BIBLIOTEK LOR INTERNET
Watchtower
BIBLIOTEK LOR INTERNET
Kreol Morisien
  • LABIB
  • PIBLIKASION
  • RENION
  • w07 1/4 p. 22-26
  • Reste fidel ar Christ ek ar so esclave fidel

Pena video ki disponib pou seki ou finn swazir.

Sori, enn erer inn anpes sa video-la zwe.

  • Reste fidel ar Christ ek ar so esclave fidel
  • La Tour de Garde pé annonce Royaume Jéhovah—2007
  • Soutit
  • Lor Mem Size
  • Enn esclave ki fidel
  • L’esclave ki en charge bann di-bien Christ lor la terre
  • Enn college central ki represente l’esclave fidel
  •  Montré respé ki bizin pou l’esclave fidel
  • Soutenir l’esclave fidel avek fidelité
  • Zot “contigne suive l’agneau”
    La Tour de Garde pé annonce Royaume Jéhovah—2009
  • Enn “Esklav” Ki Fidel ek Ki an Mem Tan Ena Bon Zizman
    La Tour de Garde pé annonce Royaume Jéhovah—2004
  • “Kisannla Ki Vrai-mem l’Esclave Fidele et Avisé?”
    La Tour de Garde pé annonce Royaume Jéhovah—2013
  • L’intendant fidele ek so College central
    La Tour de Garde pé annonce Royaume Jéhovah—2009
Rod Plis
La Tour de Garde pé annonce Royaume Jéhovah—2007
w07 1/4 p. 22-26

Reste fidel ar Christ ek ar so esclave fidel

“So maitre . . . pou mette li en charge tou so bann di-bien.”—Matthieu 24:45-47.

1, 2. (a) Dapré la Bible, kisannla ki nou Chef ? (b) Couma nou koné ki Jésus Christ pé dirige congregation chrétien?

“PA FAIRE personne appel zot ‘chef,’ parski ena enn sel ki zot Chef, Christ.” (Matthieu 23:10) Par sa bann parole-la, Jésus ti bien faire so bann disciple comprend ki okenn dimoune lor la terre pa pou zot chef. Sel Chef ki zot pou ena, pou dan le ciel—Jésus Christ li-mem. C’est Bondié ki’nn etabli Jésus couma enn chef. Jéhovah “ti ressuscite li ek . . . ti faire li vinn chef lor tou kitsoz pou la congregation, ki so lekor.”—Éphésiens 1:20-23.

2 Parski Christ li “chef lor tou kitsoz” ki concerne la congregation, li ena l’autorité lor tou seki passé dan congregation. Pena nanyin ki passé dan congregation ki li pa koné. Li veille bien lor condition spirituel chaque group chrétien setadir chaque congregation. Nou trouve sa bien dan revelation ki l’apotre Jean ti gagné a la fin premier siecle nou lepok. Jésus ti koz ar sept congregation, ek avek cinq ladan, li ti dire ki li konn zot bann action, zot point fort ek zot point faible, ek li ti donne zot bann conseil ek bann l’encouragement ki adapté ar zot situation. (Révélation 2:2, 9, 13, 19; 3:1, 8, 15) Nou sur ki Christ ti bien konn aussi condition spirituel ki ti ena dan lezot congregation dan l’ouest l’Asie, Palestine, Syrie, Babylone, Grèce, l’Italie ek dan lezot l’endroit. (Actes 1:8) Ki nou kapav dire lor nou lepok?

Enn esclave ki fidel

3. Kifer li approprié pou compare Christ ar enn la-tête ek so congregation ar enn lekor?

3 Apré so resurrection, ek enn tipé avant li monte dan le ciel kot so Papa, Jésus ti dire so bann disciple: “Mo’nn gagne tou pouvoir dan le ciel ek lor la terre.” Li ti dire aussi: “Guetté! Mo avek zot toulé-jour ziska la fin sa system-la.” (Matthieu 28:18-20) Li ti pou contigne reste avek zot couma zot Chef ki guide zot touletan. Dan bann lettre ki l’apotre Paul ti ecrire congregation Éphèse ek Colosses, li ti compare congregation chrétien ar enn “lekor” ek la Tête sa lekor-la, c’est Jésus Christ. (Éphésiens 1:22, 23; Colossiens 1:18) Enn livre, The Cambridge Bible for Schools and Colleges, dire ki sa comparaison-la “pa montré zis ki l’unité ki ena entre la Tête ek lekor li bien important, mais aussi ki la Tête dirige tou bann membre. Zot So bann instrument.” Ki group dimoune Jésus Christ inn servi couma so l’instrument depuis ki li’nn vinn le Roi en 1914?—Daniel 7:13, 14.

4. En accord avek prophetie Malaki, ki Jéhovah ek Jésus ti trouvé kan zot ti vinn inspecté temple spirituel?

4 Prophetie Malaki ti annoncé ki Jéhovah, “vrai Seigneur,” ek So “messager l’alliance,” setadir Jésus Christ, So Garson ki’nn fek vinn le Roi, ti pou vinn juge ek inspecté So “temple” setadir So lakaz symbolik kot bann dimoune adore Li. Li parette ki “le temps fixé” pou commence ‘jugement lakaz Bondié’ inn arrivé en 1918.a (Malaki 3:1; 1 Pierre 4:17) Bondié ti examine couma bizin, tou bann ki ti pretann represente Li lor la terre ek pratik vrai l’adoration. Bondié ti rejette bann religion la chrétienté, ki pendant plusieurs siecle ti’nn enseigne bann fausse doctrine lor Li ek ki ti bien impliké dan Premier Guerre mondial ki ti enn grand massacre. Enn reste chrétien oint fidel ti testé, coumadir zot ti purifié ar difé. Bondié ti approuve zot ek zot ti vinn pou Jéhovah “bann dimoune juste ki presente enn offrande.”—Malaki 3:3.

5. En accord avek prophetie ki Jésus ti donné lor so “presence,” kisannla ki’nn montré ki li sa ‘l’esclave fidel-la’?

5 Jésus ti donne so bann disciple enn signe kot ena plusieurs l’evenement. En accord avek prophetie Malaki, sa signe-la ti pou permette zot reconette lepok so “presence ek la fin sa system-la,” ek pou identifié enn group dimoune ki ti pou forme enn “esclave.” Jésus ti dire: “Kisannla ki vrai-mem l’esclave fidel et avisé, ki so maitre finn etabli lor so bann domestik, pou donne zot, zot mangé dan l’heure ki bizin? Heureux sa esclave-la si, kan so maitre vini, li trouve li pé faire sa. Vrai-mem, mo dire zot, li pou mette li en charge tou so bann di-bien.” (Matthieu 24:3, 45-47) Kan Jésus Christ ti “vini” en 1918 pou inspecté sa ‘l’esclave-la,’ li ti trouve enn reste chrétien oint fidel ki, depuis 1879 ti pé servi La Tour de Garde ek lezot publication ki basé lor la Bible pou donne ‘mangé spirituel dan l’heure ki bizin.’ Li ti accepté zot couma so l’instrument ou-soit, so “esclave,” ek en 1919, li ti mette zot en charge tou so bann di-bien lor la terre.

L’esclave ki en charge bann di-bien Christ lor la terre

6, 7. (a) Ki lot fason Jésus ti appel so “l’esclave” fidel? (b) Kan Jésus ti servi mot “intendant,” ki li ti pé rod dire?

6 Kan Jésus ti donne enn prophetie lor signe so presence, li ti annoncé aussi ki pou ena enn “esclave” ki pou represente li lor la terre. Dé-trois mois avant li ti donne sa prophetie-la, li ti koz lor sa ‘esclave-la’ dan enn fason enn tipé different pou montré ki responsabilité sa ‘l’esclave-la’ pou ena. Jésus ti dire: “Kisannla ki vrai-mem l’intendant fidel ki avisé, ki so maitre pou etabli lor tou so bann serviteur pou contigne donne zot, zot mangé dan l’heure ki bizin? Mo dire zot vrai-mem, Li pou mette li en charge tou so bann di-bien.”—Luc 12:42, 44.

7 Ici, Jésus appel sa l’esclave-la enn intendant. Sa mot-la en grec vedir “enn kikenn ki en charge enn lakaz ou-soit enn proprieté.” Sa intendant-la pa pou zis enn group dimoune bien malin ki pou explik bann point interessant lor la Bible. Mais, en plus ki li pou donne la nourriture spirituel “dan l’heure ki bizin,” Jésus pou aussi mette “l’intendant fidel” en charge tou so bann serviteur ek li pou ena responsabilité pou dirige congregation Christ ek tou bann l’activité sa congregation-la lor la terre—oui, li pou en charge “tou so bann di-bien.” Ki sa bann di-bien-la representé?

8, 9. L’esclave fidel en charge ki “di-bien”?

8 Sa l’esclave-la ena responsabilité pou en charge tou bann l’emplacement ek bann l’equipement ki bann disciple Jésus servi pou zot bann activité chrétien; par exemple bureau mondial ek bann filiale bann Témoins de Jéhovah ek aussi bann place kot zot adore Jéhovah, setadir bann la-Salle du Royaume ek bann la-Salle l’assemblée, ki ena a travers le monde. Seki pli important, sa l’esclave-la en charge aussi bann program l’etude la Bible bien encourageant ki ena dan bann reunion chaque semaine ek dan bann l’assemblée regulierement. Dan sa bann rassemblement-la, nou gagne bann renseignement lor realisation bann prophetie ki ena dan la Bible, ek bann conseil ki arrive dan bon moment lor fason ki nou kapav applik bann principe biblik dan nou la-vie toulé-jour.

9 Sa l’intendant-la ena aussi responsabilité pou en charge l’activité bien important ki bann Témoin faire lor la terre, setadir preche ‘la bonne nouvelle lor Royaume Bondié’ ek faire bann “disciple parmi bann dimoune dan tou bann nation.” Zot faire sa kan zot enseigne bann dimoune pou suive tou bann kitsoz ki Jésus Christ, Chef la congregation inn donne l’ordre pou faire pendant lepok la fin. (Matthieu 24:14; 28:19, 20; Révélation 12:17) Predication ek l’activité pou faire bann disciple finn rassemblé “enn grand la-foule” dimoune ki bann compagnon fidel bann chrétien oint. Pena doute ki sa ‘bann kitsoz desirable dan tou bann nation-la’ forme partie parmi “bann di-bien” Jésus Christ, ki l’esclave fidel dirigé.—Révélation 7:9; Haggaï 2:7.

Enn college central ki represente l’esclave fidel

10. Ki group ki ti prend bann decision dan premier siecle, ek ki l’effet sa ti ena lor bann congregation?

10 L’esclave fidel inn gagne bann grand responsabilité, alors li ena beaucoup decision pou prend. Dan premier siecle, bann zapotre ek bann ancien dan Jérusalem ti represente sa group esclave-la ek zot ti prend bann decision pou tou bann congregation. (Actes 15:1, 2) Dan premier siecle kan college central ti prend bann decision, li ti faire bann congregation konn sa a travers bann lettre ek par bann surveillant ki ti voyagé. Bann chrétien dan premier siecle ti content pou gagne enn direction bien clair. Parski zot ti cooperé avek college central, sa ti favorise la paix ek l’unité.—Actes 15:22-31; 16:4, 5; Philippiens 2:2.

11. Kisannla Jésus Christ pé servi zordi pou dirige so congregation, ek couma nou bizin considere sa group chrétien oint-la?

11 Pareil couma dan premier siecle, zordi aussi ena enn ti group ancien ki oint, ki forme College central bann disciple Jésus Christ lor la terre. Avek so “la-main droite,” setadir so la-force ki en action, Jésus Christ, Chef la congregation guide sa bann zom fidel-la pendant ki zot pé dirige tou bann l’activité ki ena enn rapport avek Royaume Bondié. (Révélation 1:16, 20) Dan enn lartik kot li ti raconte so la-vie, Albert Schroeder, enn membre ki’nn forme partie dan College central pendant longtemps ek ki’nn fek termine so la-vie lor la terre, ti ecrire: “Kan College central faire zot reunion toulé-mercredi, zot commence par la priere ek zot demann Jéhovah pou guide zot par so l’esprit saint. Zot faire tou pou ki chaque question ki zot traité, ek chaque decision ki zot prend, li en accord avek la Bible, Parole Bondié.”b Nou kapav ena confiance dan sa bann chrétien oint ki fidel-la. Surtout concernant sa College central-la, nou bizin suive conseil ki l’apotre Paul ti donne nou: “Obeir bann ki pé dirige zot ek soumette ar zot, parski bannla pé veille lor zot nâme.”—Hébreux 13:17.

 Montré respé ki bizin pou l’esclave fidel

12, 13. Cite bann raison biblik kifer nou bizin ena respé pou l’esclave fidel.

12 Enn raison principal kifer nou montré respé ki bizin pou l’esclave fidel c’est parski kan nou faire sa, en realité nou pé montré respé pou nou Maitre, Jésus Christ. Paul ti ecrire concernant bann chrétien oint: “Enn kikenn ki’nn gagne so l’appel alors ki li ti enn zom libre, li enn l’esclave Christ. Finn paye enn prix pou acheté zot.” (1 Corinthiens 7:22, 23; Éphésiens 6:6) Alors, kan nou soumette-nou avek fidelité ar direction ki l’esclave fidel ek so College central donne nou, nou pé soumette ar Christ, Maitre sa l’esclave-la. Kan nou respecté couma bizin sa l’instrument ki Christ pé servi pou dirige so bann di-bien lor la terre-la, c’est enn fason pou nou “reconette en publik ki Jésus Christ, li-mem Seigneur pou la gloire Bondié nou Papa.”—Philippiens 2:11.

13 Enn lot raison biblik kifer nou bizin ena respé pou l’esclave fidel c’est parski la Bible dire ki bann chrétien oint ki lor la terre, zot couma enn “temple” kot Jéhovah resté ‘par so l’esprit.’ Dan sa sens-la, zot “saint.” (1 Corinthiens 3:16, 17; Éphésiens 2:19-22) Sa group-la li couma enn temple ki saint, ek Jésus finn confié li so bann di-bien lor la terre. Sa vedir ki ena certain droit ek responsabilité dan congregation chrétien ki zis sa group l’esclave-la tousel ena. Pou sa raison-la, zot tou dan congregation considere sa couma enn responsabilité sacré pou suive ek soutenir direction l’esclave fidel ek so College central. Oui, bann membre “lezot brebis” considere sa couma enn grand privilege pou coopere avek sa l’esclave-la pou prend soin bann l’interet Jésus Christ, zot Maitre.—Jean 10:16.

Soutenir l’esclave fidel avek fidelité

14. Dapré prophetie Isaïe, couma bann membre lezot brebis marche derriere bann chrétien oint ek servi zot couma “bann travailleur ki pa gagne okenn la-paye”?

14 Prophetie Isaïe ti annoncé ki bann membre lezot brebis pou soumette avek humilité ar bann membre oint ki forme partie dan l’Israël spirituel. Dan sa prophetie-la nou lire: “C’est seki Jéhovah inn dire: ‘Bann travailleur ki pa gagne okenn la-paye, ki sorti l’Égypte, ek bann marchand l’Éthiopie ek bann Sabéen, bann zom ki bien haute, pou vinn kot toi, ek zot pou vinn pou toi. Zot pou marche derriere toi; zot pou vini, attaché ar la chaine, ek zot pou prosterne devant toi. Zot pou suppliye toi zot pou dire: “Oui, Bondié avek toi, ek apart Li pena lot, pena lot Bondié.” ’ ” (Isaïe 45:14) Dan enn fason symbolik, bann membre lezot brebis zordi marche derriere l’esclave fidel ek so College central, setadir zot suive direction ki bannla donné. Couma “bann travailleur ki pa gagne okenn la-paye,” bann membre lezot brebis bien disposé pou donne zot la-force ek zot bann kitsoz materiel pou soutenir predication ki faire dan le monde entier, enn travail ki Jésus Christ inn confié bann chrétien oint ki lor la terre.—Actes 1:8; Révélation 12:17.

15. Dapré prophetie Isaïe 61:5, 6, ki qualité relation existé entre bann lezot brebis ek l’Israël spirituel?

15 Bann membre lezot brebis, zot heureux ek zot reconnaissant pou servi Jéhovah enba direction l’esclave fidel ek so College central. Zot accepté bann chrétien oint couma bann membre ki forme partie dan “Israël Bondié.” (Galates 6:16) Dan enn sens symbolik, sa “bann etranger” ki associé ar Israël spirituel-la, zot servi avek la joie couma bann “planteur” ek “bann ki occupe zot plantation raisin.” Zot travail enba direction bann chrétien oint, “bann pretre Jéhovah” ek bann ‘ministre Bondié.’ (Isaïe 61:5, 6) Avek zèle, zot preche la bonne nouvelle lor Royaume Bondié ek zot faire bann disciple parmi bann dimoune dan tou bann nation. Zot coopere avek tou zot leker ar l’esclave fidel pou prend soin bann nouveau disciple ki vinn dan l’organisation Jéhovah.

16. Ki pousse bann membre lezot brebis pou soutenir l’esclave fidel et avisé avek fidelité?

16 Lezot brebis reconette ki zot inn tire beaucoup profit ar bann grand zeffort ki l’esclave fidel inn faire pou donne zot nourriture spirituel dan l’heure ki bizin. Zot reconette aussi avek humilité ki sans l’esclave fidel et avisé, zot pa ti pou konn beaucoup kitsoz, kitfois-mem zot pa ti pou konn nanyin lor bann verité important ki ena dan la Bible, couma par exemple, droit ki Jéhovah ena pou dirige l’univers, sanctification so nom, so Royaume, nouveau lé-ciel ek nouveau la terre, nâme, condition bann dimoune mort, ek la verité lor Jéhovah, so Garson ek l’esprit saint. C’est avek enn grand reconnaissance ek enn fidelité total, ek beaucoup l’amour, ki bann membre lezot brebis soutenir bann “frere” oint Jésus Christ lor la terre pendant sa lepok la fin-la.—Matthieu 25:40.

17. Ki College central inn trouve necessaire pou faire, ek ki nou pou examiné dan prochain lartik?

17 Parski bann chrétien oint ki ena lor la terre pé diminué, zot pa kapav forme partie dan tou congregation pou dirige di-bien Christ. A cause sa, College central etabli bann surveillant ki forme partie dan lezot brebis pou en charge bann filiale, bann district, bann circonscription, ek bann congregation bann Témoins de Jéhovah. Eski nou l’attitude envers sa bann zom-la ena enn l’effet lor nou fidelité envers Jésus Christ ek envers so l’esclave fidel? C’est seki nou pou examiné dan prochain lartik.

[Note]

a Ena plus renseignement lor sa sujet-la dan La Tour de Garde 1er mars 2004, page 26-31 en créole, ek dan 1er décembre 1992, page 13 en français.

b Guette La Tour de Garde 1er mars 1988, page 10-17.

Revision

• Kisannla ki nou Chef, ek couma nou koné ki li konn tou seki passé dan bann congregation?

• Kan ti ena l’inspection “temple,” kisannla Jéhovah ek Jésus ti trouve pé agir couma enn l’esclave fidel, ek ki di-bien zot inn donne sa l’esclave-la?

• Ki raison biblik nou ena pou soutenir l’esclave fidel avek fidelité?

[Zimage, page 25]

Parmi “bann di-bien” ki “l’intendant” dirigé ena bann kitsoz materiel, bann program spirituel ek l’activité predication

[Zimage, page 26]

Bann membre lezot brebis soutenir group l’esclave fidel kan zot preche avek zèle

    Piblikasion Kreol Morisien (2000-2025)
    Dekoneksion
    Koneksion
    • Kreol Morisien
    • Partaze
    • Preferans
    • Copyright © 2025 Watch Tower Bible and Tract Society of Pennsylvania
    • Linformasion Legal
    • Prinsip Konfidansialite
    • Reglaz Konfidansialite
    • JW.ORG
    • Koneksion
    Partaze