L’intendant fidele ek so College central
“Kisannla ki vrai-mem l’intendant fidele ki avisé, ki so maitre pou etabli lor tou so bann serviteur pou contigne donne zot, zot mangé dan ler ki bizin?”—LUC 12:42.
1, 2. Ki question important Jésus ti posé kan li ti pé donne signe dernier jour?
KAN Jésus ti pé donne signe dernier jour, li ti pose sa question-la: “Kisannla ki vrai-mem l’esclave fidele et avisé, ki so maitre finn etabli lor so bann domestik, pou donne zot, zot nourriture dan ler ki bizin?” Apré sa, Jésus ti dire ki li pou recompense sa l’esclave-la kan li pou etabli li lor tou bann di-bien so Maitre parski li’nn montré-li fidele.—Mat. 24:45-47.
2 Plusieurs mois avant sa, Jésus ti pose enn question ki pareil. (Lire Luc 12:42-44.) Li ti appel sa l’esclave-la enn “l’intendant” ek li ti servi l’expression “tou so bann serviteur” pou koz lor “bann domestik.” Enn l’intendant li en charge enn lakaz ek bann serviteur. Pourtant, sa l’intendant-la li aussi li enn serviteur. Kisannla sa l’esclave, ou-soit sa l’intendant-la, ek couma li donne “nourriture dan ler ki bizin”? Li bien important ki nou tou nou konn bien ek nou accepté sa moyen ki Jésus servi pou donne nourriture spirituel-la.
3. (a) Couma certain bibliste dan la chretienté inn essaye explik bann parole Jésus lor “l’esclave”? (b) Kisannla ki sa “l’intendant,” ou-soit sa “l’esclave[-la],” ek kisannla ki “bann serviteur,” ou-soit “bann domestik”?
3 Certain bibliste dan la chretienté souvent dire ki sa bann parole Jésus-la applik ar bann ki ena bann grand responsabilité parmi bann soi-disant chretien. Mais, Jésus, le “maitre” dan l’exemple ki li ti donné, pa ti dire ki ti pou ena enn quantité esclave ki ti pou fané inpé partout dan plusieurs religion la chretienté. Au contraire, li ti bien clair kan li ti dire ki ti pou ena zis enn sel “l’intendant” ou-soit “esclave” ki li ti pou etabli lor tou so bann di-bien. Alors, couma sa periodik-la inn souvent expliké, sa l’intendant-la bizin represente “ti troupeau” setadir bann disciple oint en tant ki enn groupe. Dan contexte l’Evangile Luc, Jésus ti fek koz lor sa ti troupeau-la. (Luc 12:32) “Tou so bann serviteur,” ou-soit “bann domestik” represente sa mem groupe-la, mais ici, Jésus mette l’accent lor role ki sakenn ena dan sa groupe-la. Alors, ena enn question interessant ki nou kapav posé: Eski chaque membre sa l’esclave-la participé pou donne nourriture spirituel dan ler ki bizin? Nou gagne enn reponse clair kan nou examine bien seki la Bible dire.
Bann serviteur Jéhovah dan le passé
4. Couma Jéhovah ti koz lor nation Israël, ek ki li important nou remarké concernant sa nation-la?
4 Jéhovah ti decrire so peuple, nation Israël dan le passé, couma enn serviteur en tant ki enn groupe. “ ‘Zot [pluriel] mo bann temoin [pluriel],’ c’est seki Jéhovah dire, ‘oui mo serviteur [singulier] ki mo finn choisiré.’ ” (Is. 43:10) Tou bann membre sa nation-la ti forme partie dan sa sel serviteur-la en tant ki enn groupe. Pourtant, li important ki nou remarké ki zis bann pretre ek bann Lévite ki pa ti pretre, ki ti responsable pou enseigne nation Israël.—2 Chron. 35:3; Mal. 2:7.
5. Dapré Jésus, ki grand changement ti pou ena?
5 Eski c’est nation Israël ki sa l’esclave ki Jésus ti pé kozé-la? Non. Nou konn sa grace a seki Jésus ti dire ar bann Juif dan so lepok: “Pou rasse royaume Bondié ar zot, ek pou donne sa enn nation ki pou rapporte bann fruit.” (Mat. 21:43) Li clair ki ti pou ena enn changement. Jéhovah ti pou servi enn nouveau nation. Mais, pareil couma sa ti passé en Israël—“serviteur” Bondié dan sa lepok-la—zis certain parmi sa groupe esclave-la ki ti pou responsable pou donne la nourriture spirituel.
L’esclave fidele apparette
6. Ki nouveau nation inn commence existé la Pentecôte l’an 33 nou lepok, ek kisannla ki ti forme partie dan sa nouveau nation-la?
6 C’est bann Israélite spirituel ki forme partie dan “Israël Bondié,” sa nouveau nation-la. (Gal. 6:16; Rom. 2:28, 29; 9:6) Li ti commence existé kan Bondié ti donne so l’esprit saint jour la Pentecôte l’an 33 nou lepok. Depuis sa, tou bann chretien oint ti forme partie dan sa nation-la, ki zordi servi couma enn esclave ki’nn etabli par le maitre, Jésus Christ. Chaque membre sa nation-la ti gagne mission pou preche la bonne nouvelle ek pou faire bann disciple. (Mat. 28:19, 20) Mais eski chaque membre sa groupe-la ti ena responsabilité pou donne nourriture spirituel dan ler ki bizin? Anou guetté couma la Bible reponn sa question-la.
7. Au commencement, ki travail principal bann zapotre ti bizin faire, ek ki responsabilité zot ti gagné en plus?
7 Kan Jésus ti etabli so 12 zapotre, travail principal ki zot ti bizin faire c’est al preche la bonne nouvelle avek lezot. (Lire Marc 3:13-15.) Sa travail-la ti en accord avek signification mot grec apostolos, enn mot ki sorti dan enn verbe ki vedir “envoyé.” Selman, a mesure ki le temps ti passé ek ki congregation chretien ti pré pou etabli, bann zapotre ti bizin “travail en tant ki surveillant.”—Actes 1:20-26.
8, 9. (a) Ki ti travail principal bann 12 zapotre? (b) Kisannla ki ti gagne lezot responsabilité, ki college central ti confirmé?
8 Ki ti travail principal bann 12 zapotre? Nou trouve reponse sa question-la dan bann l’evenement ki ti arrivé apré jour la Pentecôte. Kan ti ena enn probleme en rapport avek distribution mangé ki ti pé faire toulé-jour pou bann veuve, toulé 12 zapotre ti rassemblé bann disciple ek ti dire zot: “Sa pa faire nou plaisir pou laisse parole Bondié pou al servi mangé lor bann la table.” (Lire Actes 6:1-6.) Lerla, bann zapotre ti etabli lezot frere ki mur lor plan spirituel pou prend soin sa “travail important-la” pou ki zot-mem zot kapav consacré-zot pou “preche la parole.” Jéhovah ti beni sa disposition-la parski “parole Bondié ti pé contigne progressé, ek quantité disciple ti pé contigne augmenté dan Jérusalem.” (Actes 6:7) Sa vedir ki c’est bann zapotre ki ti ena responsabilité principal pou donne nourriture spirituel.—Actes 2:42.
9 Avek le temps, lezot frere ti gagne bann grand responsabilité. Enba direction l’esprit saint, congregation Antioche ti envoye Paul ek Barnabas couma bann missionnaire. Zot aussi, avek le temps, ti appel zot bann zapotre, mem si zot pa ti forme partie parmi 12 premier zapotre. (Actes 13:1-3; 14:14; Gal. 1:19) College central dan Jérusalem ti confirme zot nomination. (Gal. 2:7-10) Enn tipé apré sa, Paul ti participé dan preparation nourriture spirituel. Li ti ecrire so premier lettre ki ti inspiré par Bondié.
10. Dan premier siecle, eski tou bann chretien oint ti ena responsabilité pou prepare nourriture spirituel? Expliké.
10 Mais, eski tou bann chretien oint ti ena responsabilité pou en charge l’activité predication ek pou prepare nourriture spirituel? Non. L’apotre Paul dire nou: “Pa tou ki bann zapotre, pa vrai? Pa tou ki prophete, pa vrai? Pa tou ki bann enseignant, pa vrai? Pa tou ki faire bann mirak, pa vrai?” (1 Cor. 12:29) Mem si tou bann chretien oint ti participe dan predication, zis enn tigit—zis huit zom—ki Bondié ti servi pou ecrire 27 livre bann l’Écritures grecques chrétiennes.
L’esclave fidele dan nou lepok
11. Lor ki “di-bien” Jésus ti etabli l’esclave fidele?
11 Seki Jésus ti dire dan Matthieu 24:45 montré bien ki pendant lepok la fin pou ena toujours enn l’esclave fidele et avisé en tant ki groupe lor la terre. Révélation 12:17 faire reference ar zot kan li koz lor “le reste” descendance la femme. En tant ki groupe, sa reste-la finn etabli lor tou di-bien Christ ici lor la terre. Sa “bann di-bien” ki sa l’intendant fidele bizin prend soin-la c’est bann l’interet so Maitre, lor la terre. Parmi sa ‘bann di-bien-la’ ena bann dimoune ki soumette ar Royaume Bondié, tou bann l’emplacement ek bann l’equipement ki servi pou preche la bonne nouvelle.
12, 13. Couma enn chretien koné ki li’nn gagne enn l’invitation pou al dan le ciel?
12 Couma enn chretien koné si li ena l’esperance pou al dan le ciel ek ki li forme parti parmi bann reste Israélite spirituel? Nou gagne enn reponse dan seki l’apotre Paul ti dire ar bann ki ti ena mem l’esperance ki li pou al dan le ciel. Li ti dire zot: “Tou bann ki guidé par l’esprit Bondié, sa bannla zot bann garson Bondié. Parski zot pa finn gagne enn l’esprit l’esclavage ki faire zot gagne peur encore, mais zot inn gagne l’esprit Bondié ki’nn adopté zot couma bann garson, par sa l’esprit-la nou criyé: ‘Abba, Papa!’ Sa l’esprit-la li-mem temoigne avek nou l’esprit ki nou bann zenfant Bondié. Alors, si, nou bann zenfant, nou aussi bann heritier, oui bann heritier Bondié, mais bann coheritier Christ, pourvi ki nou souffert ensam avek li pou ki nou aussi kapav gagne la gloire avek li.”—Rom. 8:14-17.
13 Dan enn fason clair, sa bann dimoune-la zot oint ar l’esprit saint Bondié ek zot gagne enn “l’invitation” pou al dan le ciel. (Héb. 3:1; note) Sa l’invitation personnel-la sorti kot Bondié. En retour, zot accepté sa desuite sans pose okenn question ek zot pena okenn doute ni zot peur pou accepté ki Bondié adopté zot couma so bann garson. (Lire 1 Jean 2:20, 21.) Alors, zot pa choisir sa l’esperance-la par zot-mem, mais c’est Jéhovah ki mette so scellé, setadir so l’esprit saint lor zot.—2 Cor. 1:21, 22; 1 Pierre 1:3, 4.
Enn bon l’attitude
14. Couma bann chretien oint considere sa l’invitation ki zot inn gagné-la?
14 Ki l’opinion sa bann chretien oint-la bizin ena lor zot-mem pendant ki zot pé attann pou gagne zot recompense pou al dan le ciel? Zot rann-zot compte ki mem si zot inn gagne enn l’invitation extraordinaire, c’est zis enn l’invitation. Zot bizin reste fidele ziska la mort pou zot kapav gagne sa prix-la. Avek l’humilité, zot dire pareil couma Paul: “Frere, mo pa pensé ki mo-mem mo’nn fini gagne sa; mais ena enn kitsoz ki mo koné: Mo blié bann kitsoz ki par derriere ek mo mette tou mo la force pou avance vers bann kitsoz ki devant, mo pé poursuive mo la course vers l’objectif pou gagne sa prix-la, setadir l’appel Bondié pou al la-haut, par moyen Christ Jésus.” (Phil. 3:13, 14) Bann chretien oint ki encore lor la terre bizin faire tou seki zot kapav pou “marche dan enn fason pou montré ki zot digne sa l’invitation ki zot inn gagné-la, avek enn grand l’humilité,” ek faire sa “avek la crainte ek tremblement.”—Éph. 4:1, 2; Phil. 2:12; 1 Thess. 2:12.
15. Couma bann chretien considere bann ki prend l’embleme pendant Mémorial, ek ki l’attitude bann chretien oint ena lor zot-mem?
15 De lot coté, couma bann lezot chretien bizin considere enn dimoune ki dire ki li’nn oint ek ki commence prend bann l’embleme pendant Mémorial? Fodé pa ki nou juge li. C’est enn kitsoz entre li ek Jéhovah. (Rom. 14:12) Selman, bann chretien ki vrai-mem inn oint par Bondié pa pou attann ki lezot donne zot enn l’attention special. Zot pa pensé ki, parski zot inn oint, sa faire zot comprend bann kitsoz spirituel pli bien ki mem certain membre ki ena l’experience parmi la ‘grande foule.’ (Rév. 7:9) Zot pa croire aussi ki zot ena plus l’esprit saint ki zot bann compagnon ki forme partie parmi “bann lezot brebis.” (Jean 10:16) Zot pa attann ki traite zot dan enn fason special; ni zot pretann ki, parski zot prend l’embleme, sa faire zot ena enn pli grand l’autorité ki bann ancien ki’nn etabli dan congregation.
16-18. (a) Eski tou bann chretien oint impliké pou donne bann nouveau l’explication biblik? Donne enn l’exemple. (b) Kifer li pa necessaire ki College central contacté tou bann ki dire ki zot bann chretien oint?
16 Eski tou bann chretien oint ki lor la terre forme partie dan enn groupe ki reste en contact entre zot pou discute ou-soit pou partage bann renseignement ek coumsa zot kapav revele bann nouveau l’explication biblik? Non. Mem si en tant ki enn groupe, l’esclave fidele responsable pou nourri tou bann disciple oint Christ, pa tou bann membre sa l’esclave-la ki ena mem responsabilité ou-soit mem travail. (Lire 1 Corinthiens 12:14-18.) Pareil couma nou ti trouvé avant, dan premier siecle, zot tou ti participe dan predication, enn l’activité ki bien important. Mais zis enn tigit-mem ki Bondié ti servi pou ecrire bann livre la Bible ek pou en charge congregation.
17 Anou prend enn l’exemple: Parfois la Bible koz lor “congregation” ki prend certain action kan ena enn comité judiciaire. (Mat. 18:17) Mais en realité, c’est zis bann ancien ki faire sa bann kitsoz-la parski zot represente congregation. Bann ancien pa contacté tou bann membre congregation pou demann sakenn so l’opinion lor seki li pensé avant zot prend enn decision. Dan enn fason theocratik, zot rempli responsabilité ki zot inn gagné; zot agir lor nom zot tou dan congregation.
18 Li pareil aussi zordi, zis enn tigit zom ki ena responsabilité pou represente groupe l’esclave fidele. Zot forme College central bann Témoins de Jéhovah. Sa bann zom ki oint ar l’esprit saint-la, zot en charge travail predication lor Royaume Bondié ek programme pou nourri peuple Bondié lor plan spirituel. Mais pareil couma dan premier siecle, College central pa contacté chaque membre l’esclave fidele avant li prend bann decision. (Lire Actes 16:4, 5.) Selman, tou bann chretien oint impliké a fond dan travail predication ki pé faire dan nou lepok. En tant ki enn groupe, “l’esclave fidele et avisé” li couma enn sel lekor, mais chaque membre sa l’esclave-la ena different travail.—1 Cor. 12:19-26.
19, 20. Ki l’attitude equilibré bann membre la grande foule ena lor “l’esclave fidele et avisé” ek so College central?
19 Ki l’effet seki nou’nn dire bizin ena lor bann membre la grande foule ki pé augmenté ek ki ena l’espoir pou vive lor la terre? Zot forme partie dan bann di-bien le Roi, alors zot content pou soutenir avek tou zot leker tou bann disposition ki College central, ki represente “l’esclave fidele et avisé,” prend. Bann membre la grande foule apprecié nourriture spirituel ki produire enba direction College central. Mais en mem temps, alors ki zot ena enn grand respé pou l’esclave fidele en tant ki enn groupe, bann membre la grande foule faire bien attention pou pa donne trop l’importance enn dimoune ki dire li forme partie dan sa l’esclave-la. Okenn chretien ki vrai-mem inn oint ar l’esprit Bondié pa pou envie, ni pou attann gagne sa qualité l’attention-la.—Actes 10:25, 26; 14:14, 15.
20 N’importe ki nou été, soit “bann domestik,” ki forme partie parmi bann chretien oint, ou-soit bann membre la grande foule, anou bien decidé pou soutenir l’intendant fidele ek so College central, avek tou nou leker. Anou “contigne veillé” ek montré-nou fidele ziska la fin.—Mat. 24:13, 42.
Eski ou rappel?
• Kisannla ki “l’esclave fidele et avisé,” ek kisannla bann domestik?
• Couma enn dimoune koné ki li ena l’esperance pou al vive dan le ciel?
• Kisannla surtout ki ena responsabilité pou faire nou konn bann nouveau explication biblik?
• Ki l’opinion enn chretien oint bizin ena lor li-mem?
[Zimage lor page 28]
Zordi, College central represente l’esclave fidele et avisé. Ti ena mem l’arrangement dan premier siecle