Parole Jéhovah vivant

PUISSANCE mondial l’Assyrie inn fini detruire Samarie, capital royaume dix tribu Israël. Depuis longtemps, l’Assyrie inn aussi enn menace pou Juda. Prophete Nahoum ki sorti Juda, ena enn message concernant Ninive, capital l’Assyrie. Sa message-la trouve dan livre Nahoum, ki’nn ecrire avant 632 a.n.l.

Puissance Babylone vinn prochain puissance mondial, ek parfois li dirigé par bann lé-roi chaldéen. Livre Habaqouq, ki terminé kitfois en 628 a.n.l., annoncé couma Jéhovah pou servi sa puissance-la couma so l’instrument pou amenn so jugement ek seki pou arrive Babylone finalement.

Prophete Tsephania ki sorti Juda prophetisé avant Nahoum ek Habaqouq toulé-deux. Li prophetisé plus ki 40 an avant destruction Jérusalem ki arrivé en 607 a.n.l. Li annonce enn message destruction ek enn message l’espoir toulé-deux pou Juda. Livre Tsephania annonce aussi bann message kont lezot nation.

“MALHEUR POU LA VILLE KI VERSE DI-SANG”

(Nahoum 1:1–3:19)

“Message kont Ninive” sorti kot Jéhovah, ki ‘pa en colere vite ek ki grand par la force.’ Mem si Jéhovah Li “enn forteresse dan jour detresse” pou bann ki rod so protection, Ninive pou detruire.—Nahoum 1:1, 3, 7.

“Jéhovah vrai-mem pou rassemblé [retabli] l’orgueil Jacob.” Mais l’Assyrie, pareil couma ‘enn lion ki dechire boute-boute,’ inn faire peuple Bondié gagne peur. Jéhovah “pou faire char la guerre [Ninive] flambé dan la fumée. Ek enn l’epée pou devore [so] bann prop jeune lion.” (Nahoum 2:2, 12, 13) “Malheur pou la ville ki verse di-sang,” setadir pou Ninive. “Tou bann ki pou tann sa nouvel-la lor [li] pou tape zot la-main” ek zot pou dan la joie.—Nahoum 3:1, 19.

Reponse pou bann question biblik:

1:9—Ninive pou konn “enn destruction total.” Ki sa vedir pou Juda? Sa vedir ki l’Assyrie nepli pou vinn fatigue Juda encore, “malheur pa pou arrivé enn deuxieme fois.” Nahoum kozé coumadir Ninive nepli existé. Li ecrire: “Guetté lor bann montagne lipié sa kikenn ki amenn bann bon nouvel-la, sa kikenn ki pé annonce la paix-la. O Juda, celebré to bann fête.”—Nahoum 1:15.

2:6—Ki sa “bann la-porte la riviere” ki ti ouvert-la? Kan li ti pé dire bann la-porte la riviere, Nahoum ti pé koz lor bann trou ki la riviere Tigre ti faire dan muraille Ninive. En 632 a.n.l. kan bann l’armée Babylone ek Mèdes toulé-deux ti attak li, Ninive pa ti senti-li trop menacé. Li ti senti-li en securité derriere so bann muraille bien haute, ek li ti pensé ki li ti enn la-ville kot personne pa kapav rentré. Pourtant a cause gros la-pluie, la riviere Tigre ti debordé. Dapré Diodore ki ti enn historien, “enn partie la ville ti inondé ek bann muraille aussi ti cassé lor enn longue distance.” C’est coumsa ki bann la-porte la riviere ti ouvert, ek couma ti annoncé, bann l’ennemi ti kapav prend Ninive vite-vite pareil couma difé brule la paille sec.—Nahoum 1:8-10.

3:4—Dan ki sens eski Ninive ti couma enn prostitué? Ninive ti trompe bann nation kan li ti promette zot so l’amitié ek so l’aide, mais en realité li ti fini par domine lor zot. Par exemple, kan la Syrie ti complote avek bann Israélite pou attak Juda, l’Assyrie ti aide le roi Ahaz dan enn certain sens. Mais finalement “le roi l’Assyrie ti vinn kont li [Ahaz] ek ti mette li dan probleme.”—2 Chroniques 28:20.

Bann leson pou nou:

1:2-6. Jéhovah ti tire vengeance lor so bann l’ennemi ki ti refuse adore ek servi zis Li tousel. Sa montré ki Li attann ki so bann adorateur reste attaché ar zis Li tousel.—Exode 20:5.

1:10. Bann grand-grand muraille avek zot bann centaine la-tour pa ti empeche Jéhovah realise parole ki Li ti annoncé kont Ninive. Zordi bann l’ennemi peuple Jéhovah pa pou kapav sapé kan Li pou amenn so bann jugement condamnation.—Proverbes 2:22; Daniel 2:44.

‘SA KIKENN KI JUSTE-LA POU CONTIGNE VIVE’

(Habaqouq 1:1–3:19)

Deux premier chapitre dan livre Habaqouq, li enn conversation entre prophete Habaqouq ek Jéhovah. Tellement Habaqouq desesperé concernant seki pé arrivé dan Juda ki li demann Bondié: “Kifer to faire moi trouve seki mauvais ek to contigne guette malheur?” En reponse, Jéhovah dire li: “Mo pé envoye bann Chaldéen, sa nation ki en colere ek ki bien decidé-la.” Habaqouq dire ki li etonné ki Bondié pou servi “bann traitre” pou puni Juda. (Habaqouq 1:3, 6, 13) Bondié donne Habaqouq l’assurance ki sa kikenn ki juste-la pou contigne vive, mais l’ennemi pa pou sapé kan Jéhovah pou puni zot. En plus, Habaqouq ecrire lor cinq malheur ki pou vinn lor bann Babylonien, l’ennemi peuple Jéhovah.—Habaqouq 2:4.

Dan “bann chanté deuil,” Habaqouq prié Jéhovah pou demann Li pou ena misericorde. Li raconte bann l’occasion kot Jéhovah ti montré so la-force extraordinaire, couma par exemple, seki ti arrivé dan la mer Rouge, dan desert, ek dan Jéricho. Habaqouq annonce aussi couma, kan Har–Maguédôn vini, Jéhovah pou sorti avek enn colere ki pou amenn destruction. So la-priere termine avek sa bann parole-la: “Jéhovah mo Souverain Seigneur, Li-mem mo l’energie; Li pou faire mo lipié vinn couma la patte bann biche, ek Li pou faire moi marche lor bann hauteur.”—Habaqouq 3:1, 19.

Reponse pou bann question biblik:

1:5, 6—Kifer li ti incroyable pou bann Juif ki bann Babylonien monte kont Jérusalem? Dan lepok kot Habaqouq ti commence prophetisé, l’Égypte ti ena enn grand control lor Juda. (2 Rois 23:29, 30, 34) Mem si bann Babylonien ti pé vinn pli puissant, zot l’armée pa ti encore batte Pharaon Néko. (Jérémie 46:2) En plus, temple Jéhovah ti dan Jérusalem, ek ziska ler ti’nn ena touletan enn descendant David ki ti’nn le roi lor Juda. Jamais bann Juif sa lepok-la ti pou pensé ki Bondié ti pou faire enn “action” coumsa kan Li ti pou laisse bann Babylonien detruire Jérusalem. Mem ki quantité bann parole Habaqouq ti kapav parette incroyable pou zot, vision ki li ti gagné concernant destruction Jérusalem ti realisé sans faute en 607 a.n.l.—Habaqouq 2:3.

2:5—Kisannla ‘sa zom fort-la,’ ek kifer li “pa pou reussi faire seki li envie faire”? Bann Babylonien ki ti bien konn servi zot capacité militaire pou prend bann pays, ti couma enn sel “zom fort.” Letan li ti gagne gout sa bann victoire-la, sa ti monte dan so la-tête ek ti faire li vinn couma enn kikenn ki’nn sou ar di-vin. Mais li pa ti pou reussi reuni tou bann nation autour li parski Jéhovah ti pou servi bann Mède ek bann Perse pou faire li tombé. Zordi sa ‘zom-la,’ c’est bann puissance politik. Li aussi, li tellement ena confiance dan li ek li tellement croire ki li important, ki sa inn monte dan so la-tête ek li envie vinn pli grand. Mais li pa reussi faire seki li envie, setadir “reuni tou bann nation autour li.” Zis Royaume Bondié ki pou kapav faire tou dimoune vive dan l’unité.—Matthieu 6:9, 10.

Bann leson pou nou:

1:1-4; 1:12–2:1. Habaqouq ti pose Jéhovah bann question sincere, ek Jéhovah ti reponn li. Vrai Bondié ecoute la priere so bann serviteur fidele.

2:1. Nou bizin reste actif lor plan spirituel pareil couma Habaqouq. Nou bizin aussi paré pou adapté nou fason pensé avek n’importe ki “reprimande,” ou-soit correction ki nou kapav gagné.

2:3; 3:16. A mesure ki nou attann avek la foi ki jour Jéhovah vini, fodé pa nou blié ki le temps ki resté bien courte.

2:4. Pou nou gagne la vie sauve kan jour jugement Jéhovah vini, nou bizin reste fidele ek enduré.—Hébreux 10:36-38.

2:6, 7, 9, 12, 15, 19. Pena doute ki malheur attann sa kikenn ki gourmand bann profit malhonnete, ki content la violence, ki pratik l’immoralité, ou-soit ki pratik l’idolatrie-la. Nou bizin faire attention pou evite vinn sa qualité dimoune-la ou-soit pratik sa qualité kitsoz-la.

2:11. Si nou pa faire konn mechanceté ki existé dan sa lé-monde-la, “enn roche . . . pou plaigné fort.” Li important ki nou contigne preche message Royaume Bondié avek courage!

3:6. Nanyin pa pou kapav arrete Jéhovah kan Li pou amenn so jugement, pa mem bann l’organisation humain ki parette permanent couma bann montagne ek bann colline.

3:13. Nou ena l’assurance ki kan Har–Maguédôn pou vini, destruction pa pou vinn lor tou dimoune sans okenn distinction. Jéhovah pou sap so bann serviteur fidele.

3:17-19. Mem si nou gagne bann difficulté avant ek pendant Har–Maguédôn, nou kapav ena confiance ki Jéhovah pou donne nou “l’energie” tant ki nou contigne servi Li avek la joie.

“JOUR JÉHOVAH BIEN PRÉ”

(Tsephania 1:1–3:20)

Partout bann dimoune pé adore Baal dan Juda. Jéhovah dire par so prophete Tsephania: “Mo pou envoye mo la-main kont Juda ek kont tou bann habitant Jérusalem.” Tsephania donne sa l’avertissement-la: “Jour Jéhovah bien pré.” (Tsephania 1:4, 7, 14) Zis bann ki rempli bann condition ki Bondié demandé ki pou “sapé” sa jour-la.—Tsephania 2:3.

“Malheur lor . . . la ville ki faire dominere,” setadir Jérusalem! “ ‘Attann moi,’ sa-mem ki Jéhovah dire, ‘ziska jour kot mo pou levé pou prend seki zot ena, parski mo’nn decidé pou reuni bann nation . . . pou verse lor zot mo bann condamnation.’ ” Mais Bondié promette: “Mo pou faire ki zot vinn enn nom ek enn louange parmi tou bann peuple lor la terre, kan mo pou faire zot bann captif retourné devant zot prop lizié.”—Tsephania 3:1, 8, 20.

Reponse pou bann question biblik:

2:13, 14—Ki la ‘voix ki pou contigne chanté’ dan la ville Ninive kan li pou fini detruire net? Ninive ti pou vinn enn place pou bann zanimo sauvage ek bann zoiseau. Alors la voix ki ti pou contigne chanté, c’est bann zoiseau ki ti chanté ek kitfois c’est son ki di-vent ti faire kan li ti passe a travers la fenetre bann batiment abandonné.

3:9—Ki été “langue pur,” ek couma koz sa langue-la? C’est la verité lor Bondié ki trouve dan so Parole, la Bible. Tou bann l’enseignement ki sorti dan la Bible forme partie aussi ladan. Nou koz sa langue-la kan nou croire dan la verité, kan nou enseigne sa couma bizin ar lezot, ek kan nou vive en accord avek volonté Bondié.

Bann leson pou nou:

1:8. Li parette ki dan lepok Tsephania certain Juif ti pé “mette bann linge ki bann etranger metté” pou ki bann nation ki ti autour, accepté zot. Li bien bet pou bann adorateur Jéhovah rod faire pareil couma le monde par sa mem moyen-la!

1:12; 3:5, 16. Jéhovah ti contigne envoye so bann prophete pou averti so peuple concernant so bann jugement. Li ti faire sa mem si, pareil couma di-vin ki’nn laissé lor so la-mare ki’nn deposé dan fond, beaucoup Juif ti’nn bien installé dan zot la-vie ek ti indifferent ar so message. A mesure ki grand jour Jéhovah approché, au lieu ki nou laisse l’indifference bann dimoune faire ‘nou lé-bras tombé,’ ek faire nou vinn molo-molo, fodé ki nou contigne preche message Royaume Bondié sans arreté.

2:3. Zis Jéhovah kapav sap nou dan jour so colere. Pou nou garde so faveur, nou bizin “rod Jéhovah” kan nou etudié so Parole, la Bible, avek attention; kan dan la priere, nou demann Li pou guide nou; ek kan nou vinn proche avek Li. Nou bizin “rod la justice” kan nou amenn enn la-vie ki pur lor plan moral. Nou bizin aussi “rod l’humilité” kan nou developpe enn l’attitude humble ek nou disposé pou soumette.

2:4-15; 3:1-5. Kan Jéhovah pou amenn so jugement, la chretienté ek tou bann nation ki faire dominere avek peuple Bondié, pou gagne mem sort ki Jérusalem ek bann nation ki ti autour li. (Révélation 16:14, 16; 18:4-8) Nou bizin contigne annonce jugement Bondié sans okenn la-crainte.

3:8, 9. Alors ki nou pé attann jour Jéhovah, nou prepare-nou pou ki nou kapav sapé kan nou aprann “langue pur” ek kan nou ‘invok nom Bondié’ letan nou voué nou la-vie ar Li. Nou servi aussi Jéhovah “cote a cote” ensam avek so peuple ek offert Li “enn sacrifice louange” couma enn don.—Hébreux 13:15.

“Li pé vini vite-vite”

Ecrivain Psaume ti chanté: “Enn tigit lé-temps encore, ek mauvais dimoune nepli pou existé; oui, to pou rod li dan so place, mais li pa pou là.” (Psaume 37:10) Kan nou reflechi lor seki ti annoncé concernant Ninive dan livre Nahoum ek concernant Juda ki ti apostat ek Babylone aussi dan livre Habaqouq, nou sur ki bann parole sa ecrivain Psaume-la pou realisé. Mais, comié lé-temps encore nou bizin attann?

Tsephania 1:14 dire: “Grand jour Jéhovah bien pré. Li bien pré, ek li pé vini vite-vite.” Livre Tsephania montré nou aussi couma nou kapav sapé kan sa jour-la vini ek ki nou bizin faire asterla pou prepare-nou pou ki nou kapav sapé. Oui, “parole Bondié, li vivant ek li puissant.”—Hébreux 4:12.

[Zimage, page 8]

Bann grand-grand muraille Ninive pa ti empeche prophetie Nahoum pou realisé

[Remerciement photo]

Randy Olson/National Geographic Image Collection