Swiv Lexanp Bann Profet—Nahoum
1. Ki nou aprann dan liv Nahoum?
1 Bann rwinn ansien lavil Ninive zot enn prev ki, parey kouma Nahoum ti anonse, Jéhovah tir vanzans kont so bann lennmi ek ki mem so bann pli gran rival pa kapav lager kont Li. (Nah. 1:2, 6) Nou kapav tir bann leson pou nou minister kan nou examinn profesi Nahoum.
2. Kouma nou kapav gard nou mesaz pozitif?
2 Enn Mesaz Lespwar ek Konsolasion: Premie kitsoz ki vinn dan nou lespri kan nou examinn liv Nahoum, se ki li zis enn liv ki anons bann maler kont lavil Ninive, kapital ansien l’Assyrie. (Nah. 1:1; 3:7) Me pou pep Jéhovah sa mesaz-la ti enn bon nouvel. Nahoum, ki vedir “Konsolater,” ti donn bann Zwif lasirans ki biento zot bann lennmi pou disparet! Anplis, li ti konfirme ki Jéhovah “Li enn fortres dan zour detres.” (Nah. 1:7) Nou osi parey, kan nou prese, nou anons enn bon nouvel ek nou ankouraz bann dimounn pou fer Jéhovah vinn zot refiz.—Nah. 1:15.
3. Kouma nou kapav imit Nahoum kann ou koz lor lafin sa move sistem-la?
3 Servi Bann Lexanp: Jéhovah ti inspir Nahoum pou konpar destriksion lavil Ninive avek destriksion Thèbes (No-Amôn), enn lavil dan l’Égypte, ki larme l’Assyrie limem ti detrir. (Nah. 3:8-10) Kan nou koz avek bann dimounn lor lafin sa move sistem la, nou kapav met laksan lor bann profesi Labib ki prouve ki Jéhovah realiz tou seki Li dir ziska dan bann pli tipti detay. Par exanp, kan bann Babilonien ek bann Med ti atak lavil Ninive an 632 Avan Nou Lepok, ti ena bann gro lapli. Larivier Tigre ti deborde ek ti kraz enn parti bann miray bien solid sa lavil-la. Lerla, bien vit Ninive ti tom dan lame bann Babilonien ek bann Med, parey kouma Jéhovah ti anonse.—Nah. 1:8; 2:6.
4. Dan nou minister, kouma nou kapav koz dan enn fason kler ek fasil pou konpran?
4 Kler ek Fasil pou Konpran: Nahoum donn boukou ti detay dan so liv, ek fason ki li’nn ekrir li bien vivan. So bann lexplikasion bien kler. (Nah. 1:14; 3:1) Nou osi parey, nou anvi servi enn langaz ki fasil pou konpran. (1 Cor. 14:9) Premie fwa ki nou zwenn enn dimounn, explik li, dan enn fason bien kler, kifer nou’nn vinn kot li. Amezir ki nou pe fer letid avek enn dimounn, ed li pou devlop lafwa an Jéhovah ek dan so Parol. Ed li osi pou konpran kouma seki li pe aprann li aplike ar li personelman.—Rom. 10:14.
5. Ki lasirans nou trouve dan profesi Nahoum?
5 Nahoum ti ena konfians ki vremem Jéhovah so parol pou realize. Nou kapav trouv sa konfians-la dan enn fason bien kler, dan liv ki port so nom. Amezir ki lafin sistem Satan pe koste, nou gagn rekonfor dan sa lord ki Jéhovah ti done la: “Detres pa pou leve enn deziem fwa.”—Nah. 1:9.