Developpe bann qualité pou ou kapav faire bann disciple
“Allé ek faire bann disciple parmi bann dimoune dan tou bann nation.”—MATTHIEU 28:19.
1. Ki bann capacité ek l’attitude certain serviteur Bondié dan le passé ti bizin developpé?
PARFOIS bann serviteur Jéhovah bizin developpe bann capacité ek enn l’attitude ki pou aide zot pou faire so volonté. Prend l’exemple Abraham ek Sara. Bondié ti donne zot l’ordre pou quitte Our, enn la-ville bien prospere, ek avek le temps zot ti’nn bizin developpe bann qualité ek bann capacité necessaire pou reste dan bann la-tente. (Hébreux 11:8, 9, 15) Pou ki Josué ti kapav dirige nation Israël dan la Terre promise, li ti bizin ena courage, confiance en Jéhovah ek bien konn So la-Loi. (Josué 1:7-9) Ek n’importe ki talent Betsalel ek Oholiab ti’nn kapav deja ena, l’esprit saint Bondié ti’nn surement aide zot pou developpe sa bann talent-la encore plus pou ki zot reussi participe ek dirige construction tabernacle ek tou bann travail ki ti ena pou faire en rapport avek sa.—Exode 31:1-11.
2. Ki bann question en rapport avek l’activité pou faire bann disciple, nou pou examiné?
2 Plusieurs siecle plitar, Jésus Christ ti donne so bann disciple sa mission-la: “Allé ek faire bann disciple parmi bann dimoune dan tou bann nation, . . . enseigne zot pou suive tou bann commandement ki mo’nn donne zot.” (Matthieu 28:19, 20) Jamais avant sa, bann dimoune pa finn gagne privilege pou accompli enn grand travail coumsa. Ki bann qualité ki necessaire pou faire bann disciple? Couma nou kapav developpe sa bann qualité-la?
Manifesté enn profond l’amour pou Bondié
3. Ki nou kapav montré kan nou obeir l’ordre pou faire bann disciple?
3 Nou bizin ena enn profond l’amour pou Jéhovah pou nou kapav al koz ar bann dimoune ek faire zeffort pou convaink zot pou adore vrai Bondié. Bann Israélite ti kapav montré zot l’amour pou Bondié kan zot ti obeir so bann commandement avek tou zot leker, kan zot ti offert bann sacrifice ki Li ti accepté, ek kan zot ti loué Li par bann cantik. (Deutéronome 10:12, 13; 30:19, 20; Psaume 21:13; 96:1, 2; 138:5) Dan nou l’activité pou faire bann disciple, nou montré nou l’amour pou Jéhovah pa zis kan nou obeir so bann la-loi, mais aussi kan nou koz lor Li ek lor so bann projet avek lezot dimoune. Nou bizin koz avek conviction, choisir bien nou bann mot pou montré nou bann sentiment sincere pou l’esperance ki Bondié inn donne nou.—1 Thessaloniciens 1:5; 1 Pierre 3:15.
4. Kifer Jésus ti content pou enseigne bann dimoune lor Jéhovah?
4 Parski Jésus ti ena enn profond l’amour pou Bondié, li ti trouve enn grand plaisir pou koz lor So bann projet, lor So Royaume ek lor vrai l’adoration. (Luc 8:1; Jean 4:23, 24, 31) En realité, Jésus ti dire: “Faire volonté Celui ki’nn envoye moi ek fini so travail, c’est coumadir enn mangé pou moi.” (Jean 4:34) Bann parole sa psalmiste-la applik ar Jésus: “Ah Bondié, mo finn prend plaisir pou faire to volonté, ek to la-loi li dan fond mo leker. Mo finn annonce la bonne nouvelle lor la justice dan grand l’assemblée. Guetté! Mo pa garde mo la-bouche fermé. Ah Jéhovah, toi to konn sa bien.”—Psaume 40:8, 9; Hébreux 10:7-10.
5, 6. Ki qualité principal nou bizin ena pou faire bann disciple?
5 Parfois, bann nouveau ki’nn fek konn la verité ek ki motivé par l’amour pou Bondié, koz lor Jéhovah ek lor so Royaume avek tellement enn grand conviction ki zot reussi convaink lezot dimoune pou etudié la Bible. (Jean 1:41) L’amour pou Bondié c’est principal qualité ki motive nou pou faire bann disciple. Alors, anou garde sa l’amour-la toujours vivant kan nou lire ek nou medite lor so Parole regulierement.—1 Timothée 4:6, 15; Révélation 2:4.
6 Pena doute ki c’est l’amour pou Jéhovah ki ti aide Jésus Christ pou vinn enn enseignant bien zelé. Mais c’est pa zis sa ki ti faire li gagne bann bon resultat en tant ki enn proclamateur Royaume Bondié. Alors, ki lot qualité ki ti faire Jésus vinn efficace pou faire bann disciple?
Montré enn l’interet sincere pou bann dimoune
7, 8. Couma Jésus ti considere bann dimoune?
7 Jésus ti prend compte bann dimoune ek li ti montré ki li bien interessé ar zot. Mem avant li ti vinn lor la terre, kan li ti dan le ciel couma enn “zouvrier qualifié” ki ti travail ar Jéhovah, li ti bien attaché ar bann kitsoz ki ti ena enn rapport avek bann dimoune. (Proverbes 8:30, 31) Kan li ti lor la terre, Jésus ti ena compassion pou bann dimoune, li ti soulage bann ki ti vinn vers li. (Matthieu 11:28-30) Jésus ti reflete l’amour ek compassion ki Jéhovah Li-mem Li ena, ek sa ti attire bann dimoune pou adore sel vrai Bondié. Tou sorte qualité dimoune ti ecoute Jésus parski avek amour, li ti montré ki li ti interessé ar zot ek ar zot situation.—Luc 7:36-50; 18:15-17; 19:1-10.
8 Kan enn missié ti demann li seki li bizin faire pou gagne la vie eternel, “Jésus ti guette li ek ti ressenti l’amour pou li.” (Marc 10:17-21) Concernant certain dimoune ki Jésus ti enseigné dan Béthanie, nou lire: “Jésus ti content Marthe ek so soeur ek Lazare.” (Jean 11:1, 5) Tellement Jésus ti interessé ar bann dimoune ki li pa ti’lé reposé mem si li ti fatigué, pou li kapav enseigne zot. (Marc 6:30-34) Sa l’interet profond ek sincere ki Jésus ti ena pou bann dimoune-la, ti faire li vinn pli efficace ki n’importe kisannla pou attire lezot vers vrai l’adoration.
9. Ki l’attitude Paul ti ena kan li ti faire bann disciple?
9 L’apotre Paul aussi ti bien interessé ar bann dimoune avek ki li ti preché. Par exemple, li ti dire bann ki ti’nn vinn chretien ek ki ti reste Thessalonique: “Parski nou ti ena enn grand l’affection pou zot, nou ti bien content pou partage avek zot, pa zis bon nouvel Bondié, mais aussi nou prop nâme, parski nou ti tellement content zot.” Grace a bann zeffort sincere ki Paul ti faire, certain dimoune dan Thessalonique ti ‘laisse zot bann zidole pou travail couma esclave pou enn Bondié vivant.’ (1 Thessaloniciens 1:9; 2:8) Si nou vrai-mem interessé avek bann dimoune pareil couma Jésus ek Paul, kitfois nou aussi nou pou ena la joie pou trouve la bonne nouvelle touche leker bann dimoune ki “ena l’attitude ki bizin pou gagne la vie eternel.”—Actes 13:48.
Manifesté enn l’esprit sacrifice
10, 11. Kifer nou bizin ena enn l’esprit sacrifice kan nou pé essaye faire bann disciple?
10 Bann chretien ki efficace pou faire bann disciple, zot ena enn l’esprit sacrifice. Pou zot, gagne bann kitsoz materiel c’est pa enn kitsoz ki pli important. En realité, Jésus ti dire so bann disciple: “Li pou vrai-mem difficile pou bann ki ena l’argent rente dan royaume Bondié!” Bann disciple ti etonné kan zot ti tann sa, mais Jésus ti ajouté: “Mo bann zenfant, li vrai-mem difficile pou rente dan royaume Bondié! Li pli facile pou enn chameau passe par trou enn zaiguille ki enn riche rente dan royaume Bondié.” (Marc 10:23-25) Jésus ti encourage so bann disciple pou amenn enn la-vie simple pou ki zot kapav concentré zot zeffort pou faire bann disciple. (Matthieu 6:22-24, 33) Kifer enn l’esprit sacrifice kapav aide nou pou faire bann disciple?
11 Nou bizin faire beaucoup zeffort pou nou enseigne tou bann commandement ki Jésus ti donné. En general, enn chretien ki envie faire bann disciple, li faire zeffort pou conduire enn l’etude la Bible chaque semaine avek enn dimoune interessé. Pou augmente bann l’occasion pou trouve bann dimoune sincere, certain proclamateur finn arrete travail a plein temps pou travail a mi-temps. Plusieurs millier chretien finn aprann enn nouveau langue pou zot kapav preche avek bann etranger ki reste dan zot territoire. Lezot finn quitte zot lakaz ek finn al reste dan enn lot l’endroit ou-soit dan enn lot pays pou participe plus dan travail recolte setadir dan l’activité pou faire bann disciple. (Matthieu 9:37, 38) Tousala demann enn l’esprit sacrifice. Mais ki nou bizin faire encore pou vinn efficace kan nou faire bann disciple?
Ena patience mais pa perdi le temps
12, 13. Kifer li bien important ki nou ena patience kan nou faire bann disciple?
12 Enn lot qualité ki aide nou pou faire bann disciple c’est la patience. Nou message pousse nou pou faire bann action sans tardé, mais souvent, sa prend beaucoup lé-temps pou faire bann disciple ek sa demann beaucoup patience. (1 Corinthiens 7:29) Jésus pa ti mank patience avek Jacques, so demi-frere. Mem si kitfois Jacques ti bien konn l’activité ki Jésus ti faire en rapport avek predication, pendant enn certain temps ti ena kitsoz ki ti empeche li pou vinn enn disciple. (Jean 7:5) Mais dan sa ti periode le temps entre la mort Jésus ek Pentecôte l’an 33 nou lepok-la, li parette ki Jacques ti vinn enn disciple, parski la Bible faire nou comprend ki li ti ensam avek so mama, so bann frere ek bann zapotre pou faire la priere. (Actes 1:13, 14) Jacques ti faire bann bon progré spirituel ek plitar li ti prend bann grand responsabilité dan congregation.—Actes 15:13; 1 Corinthiens 15:7.
13 Pareil couma bann planteur, bann chretien pé cultive bann kitsoz ki souvent prend le temps pou poussé. Par exemple sa prend le temps pou comprend Parole Bondié, pou content Jéhovah ek pou manifesté mem l’attitude ki Jésus. Nou bizin ena patience. Jacques ti ecrire: “Frere, prend patience ziska presence nou Seigneur. Guetté! Enn planteur attann produit la terre ki ena valeur, li ena patience pou attann ziska ki premier la-pluie ek dernier la-pluie tombé. Zot aussi, ena patience; faire zot leker vinn fort, parski presence nou Seigneur finn kosté.” (Jacques 5:7, 8) Jacques ti pé encourage bann chretien pou ‘ena patience ziska presence nou Seigneur.’ Si bann disciple pa ti comprend kitsoz, avek patience Jésus ti explik zot ou-soit ti servi bann l’exemple pou faire zot comprend. (Matthieu 13:10-23; Luc 19:11; 21:7; Actes 1:6-8) Asterla ki nou Seigneur li present, nou aussi nou bizin ena patience kan nou pé faire zeffort pou faire bann disciple. Bann ki vinn disciple Jésus dan nou lepok bizin ki nou enseigne zot avek patience.—Jean 14:9.
14. Mem si nou ena patience, couma nou kapav bien servi nou lé-temps pou faire bann disciple?
14 Mem si nou ena patience, parole ki nou preché pa rapporte bann fruit dan la plupart dimoune ki commence etudié la Bible avek nou. (Matthieu 13:18-23) A cause sa, apré ki nou finn faire bann zeffort raisonnable pou aide zot, nou trouvé ki li pli bon pou arrete perdi le temps avek zot, ek nou al rod bann dimoune ki plus apprecié bann verité ki ena dan la Bible. (Ecclésiaste 3:1, 6) Bien sur, mem bann dimoune ki apprecié la Bible, kitfois bizin plus l’aide pou zot change zot fason pensée, zot l’attitude ek zot priorité dan la vie. Alors nou bizin ena patience, pareil couma Jésus ti ena patience avek so bann disciple ki ti gagne difficulté pou developpe enn bon l’attitude.—Marc 9:33-37; 10:35-45.
Developpe l’art pou enseigné
15, 16. Kifer li important ki nou simple ek nou bien prepare-nou kan nou faire bann disciple?
15 Kan nou ena l’amour pou Bondié, nou interessé avek bann dimoune, nou manifesté enn l’esprit sacrifice ek patience, tousala c’est bann qualité important ki pou aide nou pou reussi faire bann disciple. Nou bizin aussi developpe nou capacité pou enseigné parski sa pou permette nou explik bann kitsoz dan enn fason clair ek simple. Par exemple, beaucoup kitsoz ki nou Grand Enseignant, Jésus Christ ti dire ti bien efficace parski zot ti simple. Surement ou rappel bann parole Jésus, couma par exemple: “Ramasse bann tresor dan le ciel.” “Pa donne bann li-chien bann kitsoz ki sacré.” “La sagesse montré ki li juste par so bann action.” “Rann César bann kitsoz ki pou César, mais rann Bondié bann kitsoz ki pou Bondié.” (Matthieu 6:20; 7:6; 11:19; 22:21) Bien sur, Jésus pa ti dire zis bann phrase courte. Li ti enseigne dan enn fason bien clair ek li ti donne bann l’explication kan sa ti necessaire. Couma ou kapav imite fason ki Jésus ti enseigné?
16 Pou ki nou l’enseignement li simple ek clair, li important ki nou bien prepare-nou. Enn proclamateur ki pa’nn bien prepare-li ena tendance pou koz beaucoup. Li possible ki li noye bann point principal par trop beaucoup parole, li dire tou seki li koné lor enn sujet. Parkont, enn proclamateur ki’nn bien preparé pense sa dimoune ki li pé enseigné-la, li medite lor so sujet, ek li dire zis seki bizin dire. (Proverbes 15:28; 1 Corinthiens 2:1, 2) Li prend en consideration seki etudiant-la deja koné ek lor ki point li bizin mette l’accent pendant l’etude. Proclamateur-la kapav konn beaucoup detail interessant lor sujet-la, mais pou ki so l’enseignement clair, li pou elimine bann l’idée ki pa necessaire.
17. Couma nou kapav aide bann dimoune pou raisonne lor la Bible?
17 Jésus ti aussi aide bann dimoune pou raisonné au lieu ki li zis dire zot bann kitsoz. Par exemple, enn fois li ti demandé: “Ki to pensé Simon? Ar kisannla bann lé-roi lor la terre gagne different qualité taxe? Ar zot garson ou-soit ar bann etranger?” (Matthieu 17:25) Kitfois nou tellement content pou explik bann kitsoz ki ena dan la Bible ki nou bizin control nou-mem pou ki nou laisse etudiant-la exprime-li ou-soit explik enn kitsoz ki nou pé examiné dan l’etude. Bien sur, fodé pa nou pose bann dimoune trop beaucoup question. Au contraire, avek tact, avek bann bon l’exemple, ek bann question ki faire reflechi, nou kapav aide zot pou comprend bann point biblik ki ena dan nou bann publication.
18. Ki sa impliké pou developpe “l’art pou enseigné”?
18 La Bible koz lor “l’art pou enseigné.” (2 Timothée 4:2; Tite 1:9) Sa capacité pou enseigné-la implik plus ki zis aide enn dimoune pou rappel bann kitsoz. Nou bizin essaye aide enn etudiant la Bible pou comprend difference ki ena entre seki vrai ek fausse, seki bon ek mauvais, ek entre seki sage ek seki bet. (Matthieu 6:5, 6) A mesure ki nou faire sa ek nou faire zeffort pou developpe l’amour pou Jéhovah dan leker sa dimoune-la, kitfois li pou trouvé kifer li bizin obeir Bondié.
Montré ki ou zelé pou faire bann disciple
19. Couma tou bann chretien participé pou faire bann disciple?
19 Congregation chretien li enn l’organisation ki faire bann disciple. Kan enn nouveau vinn enn disciple, sa Témoin de Jéhovah ki finn trouve li ek ki finn aide li pou aprann seki la Bible enseigné-la, li pa tousel pou ena la joie. Kan bann dimoune organise enn groupe pou rod enn zenfant ki’nn perdi, kitfois c’est enn sel dan sa groupe-la ki pou trouve zenfant-la. Mais kan amenn zenfant-la ar so bann parent, zot tou dan sa groupe-la content. (Luc 15:6, 7) Li pareil aussi kan nou faire bann disciple, c’est enn travail l’equipe. Tou bann chretien participé pou rod bann dimoune ki pou kapav vinn bann disciple Jésus. Ek kan enn nouveau commence assisté reunion dan la Salle du Royaume, chaque Témoin ki là aide li pou apprecié vrai l’adoration. (1 Corinthiens 14:24, 25) Alors, tou bann chretien kapav content ki plusieurs centaine millier nouveau disciple pé vinn dan l’organisation Jéhovah chaque l’année.
20. Ki ou bizin faire si ou envie enseigne lezot la verité ki ena dan la Bible?
20 Beaucoup chretien fidele ti pou content enseigne enn kikenn lor Jéhovah ek lor vrai l’adoration. Mais kitfois zot pa finn kapav faire sa malgré bann zeffort sincere ki zot inn faire. Si ou dan sa situation-la, contigne fortifié ou l’amour pou Jéhovah, interesse-ou avek bann dimoune, ena enn l’esprit sacrifice, ena patience, ek essaye ameliore ou capacité pou bien enseigné. Mais surtout, prié Jéhovah lor desir ki ou ena pou enseigne la verité. (Ecclésiaste 11:1) Sa pou encourage ou pou koné ki grace a tou seki ou faire dan service Jéhovah, ou pé contribué pou faire bann disciple, enn l’activité ki glorifié Jéhovah.
Eski ou kapav expliké?
• Kifer l’activité pou faire bann disciple, testé nou l’amour pou Bondié?
• Ki bann qualité nou bizin ena pou faire bann disciple?
• Ki “l’art pou enseigné” impliké?
[Zimage, page 20]
Kan bann chretien faire bann disciple, zot montré zot profond l’amour pou Bondié
[Zimage, page 22]
Kifer bann ki faire bann disciple bizin interesse-zot ar bann dimoune?
[Zimage, page 23]
Ki bann qualité nou bizin ena pou faire bann disciple?
[Zimage, page 24]
Tou bann chretien content pou trouve bann bon resultat ki gagné kan faire bann disciple