“Enseigne Zot pou Suive Tou Bann Kitsoz Ki Mo Finn Dire Zot Faire”
“Allé, ek faire bann disciples. . . . Enseigne zot pou suive tou bann kitsoz ki mo finn dire zot faire.”—MATTHIEU 28:19, 20.
1. Ki conversation Philippe ti gagné avec enn Éthiopien?
LI TI faire enn longue voyage depuis l’Éthiopie pou al adore so Bondié à Jérusalem. Sa monsieur-la, c’est l’eunuque Éthiopien. Li ti éna l’amour pou Jéhovah, ek aussi l’amour pou So Parole. D’ailleurs, lor so chemin de retour dans so kaless, li ti pé lire prophétie Isaïe. C’est lerla-mem ki Philippe, enn disciple Jésus Christ, ti joinde li ek ti demann li: “Eski ou comprend séki ou pé lire?” Monsieur-la réponn: “Couma mo pou comprend si personne pa guide moi?” Alors, Philippe finn aide sa étudiant sincère Parole Bondié-la pou vinn enn disciple Jésus Christ.—Actes 8:26-39.
2. (a) Ki point important l’Éthiopien ti faire ressorti dans so commentaire? (b) Ki questions ki trouve dans commandement Jésus, nou pou examiné asterlà?
2 Dans so réponse, Éthiopien-la ti dire enn kitsoz bien important. Li ti dire: “Couma mo pou comprend si personne pa guide moi?” Oui, li ti bizin enn kikenn pou guide li, pou faire li comprend séki li ti pé lire. Commentaire sa Éthiopien-la attire nou l’attention lor enn instruction précis ki Jésus ti donné kan li ti donne commandement pou faire bann disciples. Ki instruction sa? Pou gagne la réponse, anou contigne examine bann paroles Jésus dans Matthieu chapitre 28. Sûrement, ou rappelle ki dans l’article avant, nou ti réponn questions kifer? ek kot-sa? Asterlà, nou pou examine deux lézot questions ki trouve dans sa commandement Jésus-la—ki kitsoz? ek kan?
“Enseigne Zot pou Suive Tou Bann Kitsoz”
3. (a) Couma enn dimoune kapav vinn enn disciple Jésus Christ? (b) Pou faire bann disciples, ki nou bizin enseigné?
3 Ki kitsoz nou bizin enseigne bann dimoune pou zot vinn disciples Christ? Jésus ti donne so bann disciples sa commandement-la: “Allé, ek faire bann disciples parmi tou bann nations, baptise zot au nom du Père, au nom du Fils, ek au nom de l’esprit saint. Enseigne zot pou suive tou bann kitsoz mo finn dire zot faire.” (Matthieu 28:19, 20) Donc, nou bizin enseigne bann kitsoz ki Christ finn dire nou faire.a Mais kan nou enseigne enn dimoune bann commandements Jésus, nou pa envie simplement ki dimoune-la vinn enn disciple, mais nou envie ki li contigne reste enn disciple. Couma nou kapav faire sa? Nou trouve enn point-clé dans bann mots ki Jésus inn servi. Noté par exemple, ki li pa’nn zis dire: ‘Enseigne zot tou kitsoz ki mo finn dire zot faire.’ Li finn plutôt dire: “Enseigne zot pou suive tou bann kitsoz ki mo finn dire zot faire.” (Matthieu 19:17) Ki sa impliqué?
4. (a) Ki veut dire suive enn commandement? (b) Donne enn l’exemple pou montré couma nou kapav enseigne enn dimoune pou suive bann commandements Christ.
4 Suive enn commandement veut dire “agir en accord” avec sa—obéir, ou-soit mette en pratique enn commandement. Donc, couma nou kapav enseigne enn dimoune pou suive, ou-soit pou obéir bann kitsoz ki Jésus finn dire? Anou prend l’exemple enn moniteur ki enseigne so bann zélèves pou respecté bann codes de la route. Li bien kapav faire so bann zélèves aprann sa bann codes de la route-la dans enn livre. Mais pou faire zot aprann couma obéir sa bann codes-la, théorie pa assez. Li pou bizin faire zot conduire lor la route et guide zot, pendant ki bann zélèves-la faire zeffort pou applique séki zot finn aprann. Pareillement, kan nou étudié la Bible avec bann dimoune, nou enseigne zot bann commandements Christ. Mais nou bizin aussi guide zot dans zot zeffort pou applique sa bann instructions-la toulé-jours dans zot la-vie ek dans zot ministère. (Jean 14:15; 1 Jean 2:3) Alors, pou faire bann disciples couma bizin, en accord avec commandement Christ, nou bizin vinn, non seulement bann enseignants mais aussi bann guides. C’est coumsa ki nou imite l’exemple ki Jésus ek Jéhovah Limem finn laissé.—Psaume 48:14; Révélation 7:17.
5. Ki kapav faire enn étudiant la Bible hésité pou faire bann disciples?
5 Parmi bann commandements Jésus ki nou bizin enseigne lézot pou suive, éna justement commandement pou faire bann disciples. Pou certains étudiants la Bible, sa kapav parette enn montagne. Mem si peut-être avant, zot ti bien actif dans enn religion la Chrétienté, sûrement jamais zot prêtre pa finn enseigne zot pou al faire bann disciples. Certains prêtres admette franchement ki bann religions la Chrétienté pa finn réussi enseigne zot bann membres pou al prêché. John R. W. Stott, enn Bibliste, ti faire enn commentaire lor commandement ki Jésus ti donné pou al dans le monde ek pou faire tou sorte qualité dimoune vinn disciples. Li dire: “Pli grand point faible bann Chrétiens zordi en rapport avec travail évangélisation, c’est nou pa pé obéir sa commandement Jésus-la.” Li ajouté: “Kan nou proclame nou message, nou faire li de loin. Nou couma sa dimoune ki, au lieu plonge dans la mer pou sauve so camarade ki pé noyé, li reste lor la plage, li crié pou dire dimoune-la séki li bizin faire. Li peur pangar li mouillé.”
6. (a) Kan nou aide enn étudiant la Bible, couma nou kapav imite l’exemple Philippe? (b) Couma nou kapav montré nou l’intérêt pou enn étudiant kan li faire so premier pas dans la prédication?
6 Kitfois nou étudiant sorti dans enn religion kot bann dimoune hésité pou prêché, coumadire zot peur “pangar zot mouillé.” Dans enn cas pareil, li pa facile pou faire étudiant-la arrête “peur de l’eau,” c’est-à-dire la prédication ek l’activité faire bann disciples. Li pou bizin l’aide. Donc, nou pou bizin éna patience avec li, à mesure ki nou donne li enn l’instruction ek enn direction ki pou permette li approfondi so compréhension la vérité ek ki pou pousse li pou agir. C’est séki Philippe ti faire avec l’eunuque Éthiopien; so bann l’enseignements ti touche li ek ti pousse li pou prend baptême. (Jean 16:13; Actes 8:35-38) En plus, parski nou envie ki nou bann étudiants faire bann disciples zot aussi, nou pou accompagne zot kan zot faire zot premier pas dans prédication, afin ki nou kapav guide zot.—Ecclésiaste 4:9, 10; Luc 6:40.
“Tou Bann Kitsoz”
7. Kan Jésus dire ki nou bizin enseigne lézot “tou bann kitsoz,” ki commandements sa inclure?
7 Mais, à part faire bann disciples, éna lézot commandements Jésus ki nou bizin enseigne nou bann étudiants. En fait, Jésus finn donne nou instruction pou enseigne lézot pou “suive tou bann kitsoz” ki li finn dire. Bien-sûr, sa inclure aussi premier ek deuxième pli grand commandements—c’est-à-dire l’amour pou Bondié ek l’amour pou nou prochain. (Matthieu 22:37-39) Couma nou kapav enseigne enn nouveau disciple pou suive sa deux commandements-la?
8. Montré, par enn l’exemple, couma enn nouveau disciple kapav aprann pou manifesté l’amour.
8 Anou retourne ar l’exemple sa moniteur auto école-la. Kan so zélève pé conduire à côté li, zélève-la aprann, non seulement kan li écoute moniteur-la, mais aussi kan li observe lézot chauffeurs lor la route. Et justement, kitfois so moniteur pou attire so l’attention lor façon ki certains chauffeurs manifesté la courtoisie envers lézot. Par exemple, éna chauffeurs ki laisse lézot rentre devant zot; éna ki tire zot full phare pou pa gêne lézot; certains prêt pou dépann enn camarade, si so l’auto inn tombe en panne. À travers sa bann l’exemples-la, zélève-la aprann bann leçons bien important ki li kapav mette en pratique kan li conduire. Pareillement, enn nouveau disciple ki pé roule lor chemin ki amène vers la vie, li aprann non seulement avec so enseignant, mais aussi à travers l’exemple lézot membres de la congrégation.—Matthieu 7:13, 14.
9. Couma enn nouveau disciple kapav aprann pou suive commandement Jésus pou manifesté l’amour?
9 Dans la congrégation, enn étudiant la Bible kapav, par exemple, remarqué couma enn parent ki élève so zenfants tousel, faire beaucoup zefforts pou vinn la Salle du Royaume avec so bann zenfants. Kitfois, li trouve aussi sa Chrétien déprimé ki malgré tou, pa manque okenn réunion; sa veuve âgé ki amène lézot Chrétiens âgés réunion dans so l’auto; ek sa jeune ki participe dans nettoyage la Salle du Royaume. Li pou sûrement remarque aussi sa ancien ki prend la tête dans la prédication malgré ki li éna beaucoup responsabilités dans la congrégation. Kitfois, li pou faire connaissance enn Témoin handicapé ki gagne difficultés pou bougé, et ki pourtant enn source l’encouragement spirituel pou bann ki rann li visite. Et li pou sûrement remarqué couma enn couple ki’nn faire bann grand changements dans zot la-vie pou zot kapav occupe zot bann parents âgé. Donc, kan li guetté couma tou sa bann Chrétiens-la manifesté zot bonté, couma zot aide lézot, ek couma zot digne de confiance, sa nouveau disciple-la pou aprann séki veut dire manifesté l’amour pou Bondié ek pou nou prochain, surtout envers nou bann compagnons Chrétiens. (Proverbes 24:32; Jean 13:35; Galates 6:10; 1 Timothée 5:4, 8; 1 Pierre 5:2, 3) Ala dans ki façon, tou dimoune dans la congrégation kapav—pa zis kapav, mais bizin—vinn enn enseignant ek enn guide.—Matthieu 5:16.
“Ziska la Fin Sa Système-La”
10. (a) Ziska kan nou pou bizin contigne prêché? (b) Ki l’exemple Jésus inn donne nou en rapport avec sa grand travail-la?
10 Ziska kan nou pou bizin faire bann disciples? Ziska la fin sa système-la. (Matthieu 28:20) Eski nou pou kapav? En tant ki enn congrégation international, nou déterminé pou faire li. Dans bann l’années ki’nn passé, nou finn offert joyeusement nou lé-temps, nou l’énergie ek tou séki nou éna pou rode bann dimoune ki “bien disposé pou la vie éternelle.” (Actes 13:48) Zordi, bann Témoins de Jéhovah pé dépense trois million l’heures en moyenne chaque jour, pou prêche la bonne nouvelle ek pou faire bann disciples dans le monde entier. Nou faire sa parski nou pé suive l’exemple Jésus, ki ti dire: “Mo mangé, c’est faire la volonté Celui ki finn envoye moi ek fini so travail.” (Jean 4:34) Pou nou aussi, sa mem nou pli grand désir. (Jean 20:21) Nou pa envie simplement commence travail ki Jésus inn confié nou; nou envie fini li.—Matthieu 24:13; Jean 17:4.
11. Ki finn arrive certains nou bann frères ek soeurs, et ki question nou bizin pose nou-mem?
11 Mais seulement, li triste pou trouvé ki certains nou bann compagnons Chrétiens finn affaibli lor plan spirituel. Zot népli pé faire bann disciples couma avant; soit zot finn ralenti, soit zot finn arrêté carrément. Couma nou kapav aide zot pou recommence fréquente la congrégation ek faire bann disciples? (Romains 15:1; Hébreux 12:12) Nou kapav imite façon ki Jésus ti aide so bann zapôtres kan zot ti affaibli temporairement.
Montré enn l’Intérêt Sincère
12. (a) Ki bann apôtres ti faire zis avant la mort Jésus? (b) Couma Jésus ti agir avec bann apôtres malgré ki zot ti’nn faire certains erreurs grave?
12 Vers la fin so ministère lor la terre, kan Jésus ti pré pou mort, so bann zapôtres “ti abandonne li, zot ti sauvé.” Pareil couma Jésus ti prédire, zot “ti dispersé, sakenn dans so lakaz.” (Marc 14:50; Jean 16:32) Couma eski Jésus ti agir avec zot alors ki zot ti bien affaibli lor plan spirituel? Enn tipé après so résurrection, Jésus ti dire certains so bann disciples: “Pa peur! Allé, al raconte mo bann frères, pou ki zot al en Galilée; et là-bas zot pou trouve moi.” (Matthieu 28:10) Malgré ki bann apôtres ti’nn faire certains erreurs grave, Jésus ti contigne appelle zot “mo bann frères.” (Matthieu 12:49) Li ti encore toujours éna confiance en zot. Sa montré ki, pareil couma Jéhovah, Jésus ti éna miséricorde et li ti prêt pou pardonné. (2 Rois 13:23) Couma nou kapav imite Jésus?
13. Couma nou bizin agir avec bann ki finn affaibli lor plan spirituel?
13 Nou bizin intéresse-nou sincèrement avec bann ki finn ralenti, ou ki finn arrête prêché. Sûrement, nou encore rappelle bann bon travail motivé par l’amour ki zot ti faire dans le passé—pou certains, peut-être pendant plusieurs l’années. (Hébreux 6:10) Vraiment, zot manque nou! (Luc 15:4-7; 1 Thessaloniciens 2:17) Mais, couma nou kapav intéresse-nou sincèrement avec zot?
14. Ki manière nou kapav, pareil couma Jésus, aide bann faibles?
14 Jésus ti dire so bann apôtres, ki ti’nn démoralisé, ki zot bizin al Galilée et là-bas zot ti pou trouve li. En fait, Jésus ti pé invite zot pou assisté enn réunion spéciale. (Matthieu 28:10) Pareillement zordi, nou envie encourage bann faibles pou assisté bann réunions dans la congrégation, et kitfois nou pou bizin donne sa l’encouragement-la plusieurs fois. Dans cas bann apôtres, l’invitation Jésus ti’nn rapporte so fruit. “Les onze disciples finn al Galilée, lor montagne kot Jésus ti donne zot rendez-vous.” (Matthieu 28:16) Eski nou pa ressenti enn grand la-joie, kan bann ki faible accepté nou l’invitation ek zot recommence assisté réunions?—Luc 15:6.
15. Pareil couma Jésus ti faire, couma nou kapav accueillir bann faibles ki vinn réunions?
15 Couma nou pou réagir kan bann faibles vinn la Salle du Royaume? Ki Jésus ti faire li, kan li ti joinde so bann apôtres, ki ti’nn affaibli temporairement? “Jésus [ti] al près avec zot et li [ti] koz avec zot.” (Matthieu 28:18) Li pa ti reste loin ar zot, ni li ti froid avec zot; non, li ti al vers zot. Nou kapav imaginé ki quantité sa finn rassure bann apôtres kan Jésus finn faire sa! Alors, nou aussi nou bizin prend l’initiative pou accueillir chaleureusement bann ki faible lor plan spirituel ek ki faire zeffort pou retourne dans la congrégation Chrétienne.
16. (a) Ki leçon nou kapav tiré dans façon ki Jésus ti agir avec so bann disciples? (b) Couma nou kapav imite Jésus dans manière ki nou agir avec bann faibles? (Guette la note.)
16 Ki Jésus ti faire encore? Premièrement, li ti annonce enn kitsoz, li ti dire: “Mo finn gagne tou l’autorité.” Deuxièmement, li ti donne enn mission: “Donc, allé ek faire bann disciples.” Troisièmement, li ti faire enn promesse: “Mo pou avec zot toulé-jours.” Mais, remarqué séki Jésus pa’nn faire. Li pa’nn reprend so bann disciples sévèrement pou bann faiblesses ek doutes ki zot ti éna. (Matthieu 28:17) Eski so façon faire ti efficace? Oui. Bann apôtres pa finn tardé pou recommence “enseigné ek annonce la bonne nouvelle.” (Actes 5:42) Si pareil couma Jésus, nou prend compte bann faibles ek nou traite zot bien, nou aussi nou kapav gagne bann bon résultats dans nou congrégation.b—Actes 20:35.
“Mo Avec Zot Toulé-Jours”
17, 18. Ki l’encouragement nou kapav tiré dans sa bann paroles Jésus-la, “Mo avec zot toulé-jours”?
17 “Mo avec zot toulé-jours,” c’est séki Jésus ti dire à la fin so commandement. Dans sa bann paroles-la, éna enn pensée bien encourageant pou tou bann ki pé faire beaucoup zefforts pou faire bann disciples, en accord avec commandement Christ. Malgré ki quantité l’opposition nou bann l’ennemis faire kont la prédication, ek malgré ki accusation zot mette lor nou, nou péna okenn raison pou peur. Kifer? Parski Jésus, nou Chef, li éna ‘tou l’autorité dans le ciel ek lor la terre,’ et li avec nou pou soutenir nou!
18 “Mo avec zot toulé-jours”; c’est enn promesse ki réconfortant aussi, pa vrai? Dans nou zeffort pou faire bann disciples en accord avec commandement Jésus, pa toujours ki nou en pleine forme. Parfois, nou konn bann moments difficile. (2 Chroniques 6:29) Par exemple, peut-être certains parmi nou encore pé plore lor la mort enn proche. (Genèse 23:2; Jean 11:33-36) À cause la vieillesse, certains népli éna enn bonne santé ek la force. (Ecclésiaste 12:1-6) Lézot pé bizin lutte kont la dépression. (1 Thessaloniciens 5:14) Et beaucoup parmi nou éna bann gros problèmes finance. Mais, malgré tou sa bann l’épreuves-la, nou pé réussi dans nou ministère parski Jésus avec nou “toulé-jours,” mem dans bann jours pli difficile nou la-vie.—Matthieu 11:28-30.
19. (a) Ki bann instructions Jésus ti donné dans so commandement pou faire bann disciples? (b) Ki permette nou accompli mission ki Christ inn confié nou?
19 Couma nou finn trouvé dans sa l’article-la ek dans l’article avant, Jésus ti donne plusieurs instructions dans so commandement pou faire bann disciples. Li finn dire nou kifer ek kot-sa nou bizin faire bann disciples. Li finn dire nou aussi ki kitsoz nou bizin enseigne zot ek kan nou bizin faire sa. Seulement, nou bizin reconnaite kan-mem, ki li pa toujours facile pou accompli sa mission-la. Mais, avec backing Jésus Christ ek avec so présence à côté nou, nou kapav faire sa travail-la. Ki ou pensé?
[Note]
a D’après enn livre de référence, Jésus finn dire, “baptise zot . . . Enseigne zot”; li pa finn dire ‘baptise zot ek enseigne zot.’ Donc, ‘enseigné’ li pa enn action ki suive automatiquement ‘baptême.’ “Enseigné c’est enn action ki continué, ki commencé avant baptême . . . ek ki continué après baptême.”
b Pou plus renseignements lor façon ki nou bizin agir avec bann faibles, guette La Tour de Garde 1er Février, 2003, pages 15-18 en Français, ek pages 24-27 en Créole.
Ki Ou Pou Réponn?
• Couma nou enseigne lézot pou suive bann commandements Jésus?
• Ki bann leçons enn nouveau disciple kapav aprann ar lézot dans la congrégation?
• Ki nou kapav faire pou aide bann ki faible lor plan spirituel?
• Ki l’encouragement ek réconfort nou tiré dans sa promesse ki Jésus finn faire: “Mo avec zot toulé-jours”?
[Zimage lor page 26]
Nou bizin vinn bann enseignants ek guides, toulé-deux
[Zimage lor page 28]
Enn nouveau disciple aprann bann leçons important kan li observe l’exemple lézot