Enseigne ou zenfant pou vinn pacifik

Nicole ki ti ena huit an, ti excité parski so famille ti pé demenagé pou al reste bien loin. Alors regulierement li ti raconte chaque detail so bon camarade, Gabrielle. Enn jour, enn sel coup Gabrielle ti dire Nicole ki sa pa ti faire li nanyin ki li pé demenagé. Sa ti faire Nicole bien la peine ek li ti aussi en colere. Li ti dire so mama: “Mo pa’lé trouve Gabrielle encore!”

KAN bann zenfant gagne bann ti la-guerre pareil couma Nicole ek Gabrielle, souvent bann parent bizin rente ladan, pa zis pou calmé bann zenfant parski zot senti-zot blessé, mais aussi pou montré zot couma pou reglé sa probleme-la. Li naturel pou bann jeune zenfant “agir couma enn tibaba,” ek souvent zot pa rann-zot compte ki di-tort zot bann parole ek zot bann action kapav faire. (1 Corinthiens 13:⁠11) Zot bizin l’aide pou developpe bann qualité ki kapav aide zot pou vive en paix avek lezot dan zot famille ek en dehors zot famille.

Bann parent chretien faire zeffort pou forme zot bann zenfant pou ki zot “rod la paix ek poursuive li.” (1 Pierre 3:11) Bonheur ki nou gagné kan nou favorise la paix, li vaut tou bann zeffort ki bizin faire pou faire bann sentiment couma doute, chagrin ou-soit la colere, ek la haine, disparette. Si ou enn parent, couma eski ou kapav enseigne ou zenfant pou vive en paix?

Aide ou zenfant pou developpe enn desir pou faire plaisir “Bondié la paix”

Jéhovah, Li-mem “Bondié la paix” ek Li-mem ki “donne la paix.” (Philippiens 4:⁠9; Romains 15:⁠33) Alors bann bon parent konn servi bien Parole Bondié, la Bible, pou developpe dan leker zot bann zenfant desir pou faire Bondié plaisir ek pou imite so bann qualité. Par exemple, aide ou bann zenfant pou mazinn seki l’apotre Jean ti trouvé dan enn vision extraordinaire​​—⁠enn joli l’arc-en-ciel couleur vert transparent ki ti autour trone Jéhovah.a (Révélation 4:⁠2, 3) Explik zot ki sa l’arc-en-ciel-la represente la paix ek tranquillité ki ena autour Jéhovah ek ki tou seki obeir Li pou kapav gagne sa qualité la paix ek tranquillité-la.

Jéhovah guide nou aussi a travers so Garson, Jésus, ki appel “Prince la paix.” (Isaïe 9:​6, 7) Dan la Bible ena bann recit kot Jésus inn enseigne bann leson ki utile ek ki montré couma nou kapav evite laguerre. (Matthieu 26:​51-​56; Marc 9:​33-​35) Lire ek discute sa bann recit-la ensam avek ou bann jeune zenfant. Explik zot kifer, alors ki ‘avant nanyin pa ti faire li peur,’ Paul ti changé ek li ti ecrire ki “fodé pa ki enn esclave nou Seigneur laguerre; mais li bizin ena la douceur envers tou dimoune, . . . ek control li-mem kan lezot faire li di-tort.” (1 Timothée 1:​13; 2 Timothée 2:​24) Kitfois ou pou etonné couma ou zenfant reagir pli bien ki seki ou ti pé pensé.

Evan rappel ki enn garson ti sikann li dan bus lekol kan li ti ena sept an. Li dire: “Mo ti tellement en colere ar sa garson-la ki mo ti envie rann li la pareil! Lerla mo ti rappel enn leson ki mo ti aprann lakaz concernant bann ki rod la guerre. Mo ti koné ki Jéhovah envie ki mo ‘pa rann personne le mal pou le mal’ ek ki mo ‘vive en paix avek tou dimoune.’ ” (Romains 12:​17, 18) Sa ti faire Evan trouve la force ek courage pou reglé sa situation ki ti’nn kapav vinn pli pire-la kan li’nn agir avek douceur. Li ti envie faire plaisir Bondié la paix.

Vinn enn l’exemple pou ou bann zenfant

Eski ena la paix dan ou lakaz? Si oui, ou bann zenfant kapav aprann beaucoup lor la paix zis kan zot guette ou. Pou ki l’enseignement ki ou donne ou bann zenfant pou zot vive en paix, rapporte bann fruit, sa depann beaucoup lor ki quantité ou-mem ou imite Bondié ek Jésus dan sa domaine-la.​​—⁠Romains 2:⁠21.

Russ ek Cindy ti faire beaucoup zeffort pou forme zot deux garson, ek encourage zot pou agir avek l’amour kan lezot faire zot en colere. Cindy dire: “L’attitude ki Russ ek moi nou ena envers nou bann garson ek envers lezot kan ena probleme, joué enn grand role dan fason ki zot reagir kan zot, zot faire face ar bann situation ki pareil.”

Mem kan ou faire enn erreur ​​—⁠ek ki parent ki pa faire erreur?​​—⁠ou toujours kapav profite sa l’occasion-la pou enseigne bann leson ki utile. Stephen reconette: “Ti ena fois kot mo madame, Terry, ek moi, nou ti reagir trop vite ek nou ti discipline nou trois zenfant avant ki nou konn tou seki ti passé.” Terry dire: “Kan sa ti arrivé, nou ti demann zot excuse. Nou ti laisse nou bann zenfant koné ki nou pa parfait ditou ek ki nou faire bann erreur. Nou pensé ki sa pa finn zis aidé pou ki ena la paix dan nou famille mais sa finn aussi aide bann zenfant pou aprann couma rod la paix.”

Eski ou bann zenfant pé aprann couma pou vinn pacifik kan zot guette fason ki ou traite zot? Jésus ti dire: “Tou kitsoz ki zot envie bann dimoune faire pou zot, zot aussi, zot bizin faire pareil pou bannla.” (Matthieu 7:​12) Mem si ou ena ou bann defaut, ou kapav sur ki l’amour ek l’affection ki ou montré envers ou bann zenfant pou produire bann bon resultat. Ou bann zenfant pou reagir pli facilement kan ou offert zot enn direction avek l’amour.

Pa en colere vite

Proverbes 19:11 dire: “Kan enn dimoune comprend seki ena pli loin, vrai-mem sa ralenti so colere.” Couma ou kapav aide ou bann zenfant pou trouve pli loin? David raconté ki li ek so madame, Mariann, inn trouve enn methode pratik ki marché avek zot garson ek zot tifi. Li dire: “Kan zot bouleversé par enn kikenn ki’nn dire ou-soit ki’nn faire enn kitsoz ki’nn blesse zot, nou aide zot pou mette-zot dan place sa dimoune-la. Nou demann zot bann question simple couma par exemple, ‘Eski dimoune-la ti’nn passe enn mauvais la-journée? Eski li possible ki li jaloux? Eski enn kikenn inn faire li la peine?’ ” Mariann ajouté: “Sa ena tendance pou calmé bann zenfant au lieu ki zot contigne laisse sa situation-la bouleverse zot ou-soit zot laguerre kozé pou koné kisannla ki ena raison ou-soit kisannla ki ena tort.”

Sa qualité formation-la kapav donne bann resultat extraordinaire. Noté couma Michelle, mama Nicole ki nou ti mentionné dan commencement sa lartik-la, ti aide so tifi. Li ti faire plus ki zis faire Nicole ek Gabrielle ré-vinn camarade. Michelle dire: “Nicole ek moi, nou ti lire chapitre 14 dan livre Écoute le grand Enseignant.b Lerla mo ti explik li seki Jésus ti pé rod dire kan li ti dire ki nou bizin pardonne nou prochain ‘ziska soixante-dix-sept fois.’ Apré ki mo ti laisse Nicole dire seki li ti ressenti ek ki mo ti ecoute li bien, mo ti aide li pou ressenti couma Gabrielle ti triste ek li pa ti content parski so bon camarade ti pé al reste tellement loin.”​​—⁠Matthieu 18:​21, 22.

Kan Nicole ti’nn comprend kifer Gabrielle ti faire li sa bann remark-la, sa ti aide li pou comprend bann sentiment Gabrielle ek ti pousse li pou telephone Gabrielle pou demann li excuse. Michelle dire: “Depuis sa, Nicole trouve la joie pou prend en consideration sentiment lezot ek pou faire bann bon kitsoz pou zot pou faire zot senti-zot pli bien.”​​—⁠Philippiens 2:​3, 4.

Aide ou bann zenfant pou pa laisse erreur lezot ek bann malentendu ki kapav arrivé, fatigue zot. Kitfois ou pou gagne satisfaction pou trouve zot montré ki zot ena bann bon sentiment ek enn tendre affection pou lezot.​​—⁠Romains 12:​10; 1 Corinthiens 12:⁠25.

Montré ou zenfant ki pardonné, li enn beauté

Proverbes 19:​11 dire: “Enn dimoune . . . montré so beauté kan li passe lor bann erreur.” Dan l’heure kot Jésus ti pé souffert plus, li ti imite so Papa ek li ti montré ki li ti disposé pou pardonné. (Luc 23:⁠34) Ou zenfant kapav aprann ki pardonné, li enn beauté kan zot ressenti reconfort parski ou-mem ou finn pardonne zot.

Par exemple, Willy ki ena cinq an, content penn bann zimage avek so bann crayon couleur ensam avek so grand-mere. Enn fois, so grand-mere ti arrete penn enn sel coup, li ti criye ar Willy, li ti zis quitte li, ek li ti allé. Willy ti bouleversé. So papa, Sam, ti dire: “Grand-mere Willy ti ena maladie Alzheimer. Alors nou’nn explik sa Willy avek bann mot ki li ti kapav comprend.” Apré ki zot finn rappel Willy ki zot finn pardonne li dan plusieurs l’occasion ek ki li bizin faire pareil pou lezot, Sam ti etonné par reaction Willy. Sam dire: “Ou pa kapav maziné couma mo madame ek moi, nou’nn senti-nou kan nou’nn trouve nou ti garson al vers so grand-mere ki ena 80 an, koz ar li lor enn ton pou demann li excuse, ek apré trappe so la-main ek amenn li kot la table?”

Oui, li enn beauté kan bann zenfant aprann pou “contigne supporte” bann defaut ek bann erreur lezot ek pardonne zot. (Colossiens 3:​13) Mem kan bann dimoune faire bann kitsoz par expré pou bouleverse ou zenfant, donne li l’assurance ki enn reponse calme kapav ena enn grand l’effet, parski “kan Jéhovah approuve seki enn dimoune faire, Li faire mem bann l’ennemi sa dimoune-la vive en paix avek li.”​​—⁠Proverbes 16:⁠7.

Contigne aide ou zenfant

Kan bann parent servi Parole Bondié pou enseigne zot zenfant “dan la paix” ek ki zot-mem zot “bann ki faire la paix,” zot kapav vrai-mem aide zot bann zenfant. (Jacques 3:⁠18) Zot pé equipe zot bann zenfant avek seki zot bizin pou reglé bann desaccord ek pou vive en paix. Lerla sa aide zot enn quantité pou vive heureux ek gagne satisfaction toute longue zot la-vie.

Dan ek Kathy ena trois zenfant ki adolescent ek ki pé bien progressé lor plan spirituel. Dan dire: “Mem si li pa ti touletan facile pou forme zot kan zot ti encore tipti, nou extra content ki nou bann zenfant pé progressé zordi. Zot entende-zot bien avek lezot, ek zot paré pou pardonné kan ena kitsoz ki menace la paix.” Kathy dire: “Sa surtout encourage nou, parski la paix forme partie dan fruit l’esprit Bondié.”​​—⁠Galates 5:​22, 23.

Alors, en tant ki bann parent chretien, ou ena bann bon raison pou pa “renoncé” ou-soit pou ‘pa laisse la fatigue gagne ou,’ mais pou contigne enseigne ou bann zenfant pou vive dan la paix​​—⁠mem si au commencement ou parette tardé pou gagne resultat. Alors ki zot faire sa, zot kapav sur ki “Bondié l’amour ek la paix pou avek zot.”​​—⁠Galates 6:⁠9; 2 Corinthiens 13:⁠11.

[Note]

[L’encadré, page 14]

ENN L’INFLUENCE POSITIF?

Enn lartik ki’nn parette lor Internet ek ki ena titre “Violence dan bann divertissement” dire: “Dan film, bann bon dimoune ek bann mauvais dimoune toulé-deux souvent servi violence, ek sa plus faire dimoune croire ki violence, li enn moyen pou reglé bann probleme.” Enn analyse bann program television, bann film ek bann video clip ti montré ki zis apepré dix pour cent ladan ki montré bann mauvais consequence la violence. Plutot sa lartik-la dire, “zot justifié la violence, zot presente li couma enn kitsoz naturel ki pa kapav evité​​—⁠fason pli facile ki ena pou reglé probleme.”

Eski ou reconette ki li necessaire pou faire bann changement dan seki ou guetté lor television? Pa laisse bann divertissement ki le monde offert affaibli ou bann zeffort pou enseigne ou zenfant pou vinn pacifik.

[Zimage, page 12]

Developpe desir pou faire plaisir “Bondié la paix” dan leker ou bann zenfant

[Zimage, page 13]

Prend le temps pou corrige bann parole ek bann action ki blesse lezot

[Zimage, page 15]

Ou zenfant bizin aprann demann excuse ek aprann pardonné