Compassion dan enn lé-monde cruel

DAN Burundi, enn zom ki gagne malaria tombe bien malade. Bien bizin amenn li l’hopital. Mais couma pou faire? Pena enn l’auto pou amenn li. So deux bon camarade aide li. Zot mette li lor enn bicyclette ek avek beaucoup difficulté, zot pousse li dan bann chemin montagne pendant cinq heure-temps. Apré sa, zot faire li monte dan enn bus ki amenn li l’hopital ki pli pré. Deux-trois jour apré, li bien.

Dan lot coté la terre, apré ki cyclone Katrina inn ravage region golfe Mexique dan États-Unis en août 2005, enn groupe volontaire decouvert enn lakaz ki’nn crasé enba bann pié ki’nn tombe lor li. Alors ki zot pa konn proprietaire sa lakaz-la ditou, zot passe toute la journée pou coupe sa bann pié-la ek pou debarrasse tou bann saleté avek l’aide bann la-scie. Proprietaire-la dire: “Jamais mo pa pou fini dire [zot] merci.”

Zordi dan bann journal ki raconte bann kitsoz pou impressionne bann dimoune, koz plus lor bann kitsoz horrible ek cruel ki pé passé. Souvent sa couvert bann action ki bann dimoune faire toulé-jour par compassion ek bonté. Mais malgré sa bann action-la, partout dan le monde, bann dimoune toujours bien bizin l’amour, l’affection ek senti ki lezot prend part dan zot la-peine. Nou bien bizin compassion! Kitfois bann dimoune montré sa bann sentiment-la enn tipé plus pendant periode Noël, kan zot koz ou-soit chante concernant ‘la paix lor la terre pou bann dimoune ki ena bonne volonté.’—Luc 2:14, Bible Liénart.

Li pa facile pou montré compassion dan enn lé-monde kot en general bann dimoune pena okenn sentiment ek zot pa envie gagne zaffaire avek lezot. Majorité dimoune ena sa l’attitude-la: pou ki enn dimoune reussi dan la vie ek konn la gloire, li bizin dur ek sans pitié. Ena enn kozé ki dire ki li pli bon vinn enn dimoune cruel ki vinn enn dimoune ki ena compassion. Par fason ki zot vive, li parette ki beaucoup dimoune d’accord avek sa fason pensé-la. Kan enn dimoune envie gagne toujours plus ek li pense zis li tousel, sa kapav facilement touffe compassion ki li ressenti.

A cause sa, beaucoup pense zis zot avant, mem si sa faire zot mank consideration pou sentiment ek l’interet lezot. Souvent presente bann vedette couma bann “vrai zom” ki dominere ek ki pena sentiment. Mem situation existé parmi bann zom politik.

Alors, li bon ki nou demann-nou: Kifer nou bizin prend part dan la peine lezot dimoune? Eski compassion, li enn la-force ki kapav faire di-bien? Ek ki kapav aide nou pou montré compassion? Prochain lartik pou reponn sa bann question-la.

[L’encadré, page 3]

•Eski li enn faiblesse pou montré compassion?

•Eski enn dimoune ki ena compassion kapav faire kitsoz ki bien?

•Couma nou montré ki nou prend part dan la peine lezot?