Ki été Royaume Bondié?

Ki ti theme predication Jésus? Dapré Jésus li-mem, theme so predication ti Royaume Bondié. (Luc 4:43) Kan bann dimoune ti ecoute Jésus kozé, souvent zot ti tann li mentionne sa Royaume-la. Eski sa ti etonne zot? Eski sa ti enn mystere pou zot? Eski zot ti demann li ki été sa Royaume-la? Non. Nou pa trouve sa bann qualité question-la dan bann l’Evangile. Alors eski sa bann dimoune-la ti deja ena enn l’idée lor Royaume Bondié?

En verité, bann l’ecriture ancien ki bann Juif ti considere couma sacré ti decrire sa Royaume-la ek ti servi bann expression bien vivant ek precis pou faire koné ki été Royaume Bondié ek ki li pou accompli. Zordi, nou kapav aprann plus encore lor sa Royaume-la dan mem fason ki bann Juif, setadir grace a la Bible. Anou considere sept point ki la Bible enseigné lor sa Royaume-la. Bann Juif ki ti vive dan lepok Jésus ek avant, ti deja konn trois parmi sa bann point-la. Jésus Christ ou-soit so bann zapotre inn faire konn trois lezot point dan premier siecle. Ek dernier point inn vinn clair dan nou lepok.

1. Royaume Bondié li enn vrai gouvernement ki pou reste pou touletan. Premier prophetie ki ena dan la Bible ti faire koné ki Bondié ti pou envoye enn sauveur pou bann dimoune ki fidele. La Bible appel li “descendance,” ek Li pou tire tou bann probleme ki’nn commencé avek rebellion Adam, Ève ek Satan. (Genèse 3:15) Beaucoup lé-temps apré, le roi David ki ti fidele ti aprann enn kitsoz bien interessant lor sa ‘descendance-la,’ ou-soit Messie. Li ti pou vinn le roi dan enn Royaume. Sa gouvernement-la ti pou different avek tou lezot gouvernement. Li ti pou reste pou touletan.—2 Samuel 7:12-14.

2. Royaume Bondié pou tire tou bann gouvernement humain. Prophete Daniel ti gagne enn vision kot li ti trouve plusieurs puissance mondial ki pou suive enn apré lot, a travers l’histoire ziska nou lepok. Remark la fin extraordinaire sa vision-la: “Dan lepok sa bann lé-roi-la [bann dernier lé-roi humain], Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou enn lot peuple. Li pou crase tou bann lezot royaume ek li pou fini zot, ek li pou regné pou touletan.” Alors tou bann royaume, ou-soit gouvernement sa lé-monde-la, avek zot bann la-guerre, dominere ki zot faire ek zot corruption, pou detruire pou touletan. Couma prophetie Daniel montré, Royaume Bondié pou dirige la terre entier bientot. (Daniel 2:44, 45) Li pa pou selman enn vrai Royaume, mais li pou aussi sel gouvernement ki pou existé.a

3. Royaume Bondié pou tire la guerre, maladie, la famine, mem la mort. Bann prophetie la Bible ki bien interessant faire nou koné seki Royaume Bondié pou faire ici lor la terre. Sa gouvernement-la pou faire seki okenn gouvernement ni l’organisation ki dimoune inn formé, jamais pa finn faire ek jamais pa pou kapav faire. Maziné—tou bann zarme ki servi pou la guerre pou detruire pou touletan! “Li faire bann la-guerre arreté ziska dan boute la terre.” (Psaume 46:9) Nepli pou ena docteur, ni l’hopital, ni n’importe ki qualité maladie. “Okenn habitant pa pou dire: ‘Mo malade.’ ” (Isaïe 33:24) Nepli pou ena la famine, mank mangé, bann dimoune ki mal nourri ou-soit ki mort de faim. “Pou ena la grain cereale en abondance lor la terre.” (Psaume 72:16) Nepli pou ena l’enterrement, nepli pou passe la nuit, nepli pou ena cimetiere, ni la morgue, ni tou bann souffrance ki accompagne sa bann kitsoz-la. La mort, nou l’ennemi ki pena okenn pitié, enfin pou disparette. “Oui, [Bondié] pou faire la mort disparette pou touletan, ek vrai-mem Souverain Seigneur Jéhovah pou souye larme lor tou bann figure.”—Isaïe 25:8.

4. Bondié ki’nn choisir chef sa Royaume-la. Messie pa finn faire li-mem vinn Chef, ek c’est pa bann dimoune imparfait ki’nn choisir li. C’est Jéhovah ki’nn choisir li personnellement. Bann titre Messie ek Christ zot-mem zot montré ki c’est Bondié ki finn choisir li. Toulé-deux mot vedir “Oint.” Alors sa lé-Roi-la inn oint, setadir inn choisir pou enn travail special par Jéhovah. Bondié dire lor li: “Guetté! Mo serviteur ki mo soutenir! Sa kikenn ki mo’nn choisir ek ki mo nâme inn approuvé-la! Mo’nn mette mo l’esprit lor li. La justice pou bann nation, ala seki li pou amené.” (Isaïe 42:1; Matthieu 12:17, 18) Kisannla a part nou Createur konn pli bien ki qualité Chef nou bizin?

5. Chef dan Royaume Bondié inn montré devant tou bann dimoune ki li merite dirigé. Jésus de Nazareth li-mem Messie ki ti annoncé. Li ti né dan descendance ki Bondié ti choisir. (Genèse 22:18; 1 Chroniques 17:11; Matthieu 1:1) Kan li ti lor la terre, li ti realise enn quantité prophetie ki ti’nn ecrire concernant Messie bann centaine l’année avant. En plus, depuis dan le ciel ti faire koné ki c’est li-mem ki Messie. Couma? Bondié ti kozé depuis dan le ciel ek ti faire koné ki li So prop Garson; bann ange ti dire ki Jésus li Messie ki ti’nn annoncé; ek Jésus ti faire bann mirak—souvent devant bann centaine ou-soit bann millier temoin—grace a puissance Bondié.b Plusieurs fois Jésus ti montré ki qualité Chef li pou été. Li pa ti zis ena pouvoir pou aide dimoune mais li ti aussi envie faire sa. (Matthieu 8:1-3) Li pa ti egoïste, li ti ena compassion, courage ek l’humilité. Recit so la-vie lor la terre, li là dan la Bible pou tou dimoune kapav lire.

6. Dan Royaume Bondié, ena 144,000 dimoune ki pou regné ensam avek le Christ. Jésus ti dire ki pou ena lezot ensam avek so bann zapotre ki pou regné dan le ciel avek li. Li ti appel zot “ti troupeau.” (Luc 12:32) Plitar, l’apotre Jean ti aprann ki ti pou ena 144,000 dimoune dan sa ti troupeau-la. Zot ti pou ena enn travail bien interessant dan le ciel, zot pou regné couma bann lé-roi ek zot pou servi en tant ki bann pretre ensam avek Christ.—Révélation 5:9, 10; 14:1, 3.

7. Royaume Bondié pé dirigé dan le ciel asterla, ek li paré pou commence dirigé lor la terre entier. Sa dernier point-la li enn parmi bann point pli interessant ki nou kapav aprann. Dan la Bible ena enn quantité preuve ki Jésus inn gagne l’autorité en tant ki lé-Roi dan le ciel. Asterla li pé dirigé dan le ciel, ek dan enn l’avenir bien proche li pou dirige la terre entier ek li pou realise bann prophetie extraordinaire ki nou’nn mentionné deja. Mais couma nou kapav sur ki Royaume Bondié pé dirigé asterla? Ek kan li pou commence dirige la terre?

[Note]