“Contigne veille lor ministere ki to finn accepté dan nou Seigneur”
“Contigne veille lor ministere ki to finn accepté dan nou Seigneur, pou ki to accompli li.”—COL. 4:17.
1, 2. Ki responsabilité bann chretien ena envers bann dimoune?
NOU ena enn grand responsabilité envers bann dimoune ki vive tout autour nou. Bann decision ki zot prend asterla pou determiné si zot pou vive ou soit si zot pou mort pendant “la grande tribulation.” (Rév. 7:14) Ecrivain livre Proverbes ki Bondié ti inspiré ti dire: “Delivré bann ki pé prend pé amenn vers la mort, ek bann ki pé mank l’equilibre kan zot pé marché pou al vers la mort, ah pa laisse zot al mort!” C’est bann parole bien fort, pa vrai? Si nou pa prend nou responsabilité pou averti bann dimoune lor choix ki zot ena devant zot, kitfois nou pou responsable zot la-mort. En realité dan sa mem texte-la nou lire: “Si to dire: ‘Guetté! Nou pa ti konn sa,’ eski sa kikenn ki juge bann leker-la pa pou discerne sa? Sa kikenn ki pé observe to nâme-la, eski Li pa pou koné, ek vrai-mem eski Li pa pou rann enn dimoune ki’nn faire ar la poussiere dapré seki li’nn faire?” Li clair ki bann serviteur Jéhovah pa kapav dire ki zot ‘pa konn’ danger ki ena devant bann dimoune.—Prov. 24:11, 12.
2 La vie ena valeur pou Jéhovah. Li demann so bann serviteur pou faire tou bann zeffort ki zot kapav pou sauve pli beaucoup la-vie possible. Chaque ministre Bondié bizin faire konn message ki sorti dan la Bible ek ki kapav sauve la vie bann dimoune. Nou travail li pareil couma travail enn gardien ki averti bann dimoune kan li trouve enn danger pé vini. Nou pa envie ki di-sang bann dimoune ki riské mort, vinn lor nou la-tête. (Ézék. 33:1-7) Alors, li bien important ki nou perseveré dan bann zeffort ki nou faire pou “preche la parole”!—Lire 2 Timothée 4:1, 2, 5.
3. Ki sujet nou pou examiné dan sa lartik-la ek dan deux lezot lartik ki pou suive?
3 Dan sa lartik-la, ou pou aprann couma ou kapav surmonte bann l’obstacle ki ou gagné dan sa ministere ki kapav sauve la vie bann dimoune-la. Ou pou aprann aussi couma ou kapav aide pli beaucoup dimoune. Dan deuxieme lartik, ou pou aprann couma developpe l’art pou enseigne bann verité ki important. Dan troisieme lartik, nou pou trouve bann resultat encourageant ki bann proclamateur pé gagné dan le monde entier. Mais avant nou examine sa bann sujet-la, li bon ki nou guette certain raison kifer nou lepok li tellement difficile.
Kifer beaucoup dimoune pena enn l’esperance?
4, 5. Dan ki situation bann dimoune été, ek couma beaucoup dimoune reagir?
4 Bann l’evenement ki ena dan le monde montré ki nou pé vive “la fin sa systeme-la” ek ki la fin bien pré. Bann dimoune pé konn bann condition ki Jésus ek so bann disciple ti dire pou ena dan “dernier jour.” “Bann douleur,” parmi ena la guerre, la famine, tremblement de terre, ek lezot malheur, pé faire bann dimoune bien souffert. Partout bann dimoune pa obeir la loi, zot egoïste ek zot pena respé pou Bondié. Mem pou bann dimoune ki pé faire zeffort pou vive en accord avek bann principe biblik, c’est bann “lepok critik ki difficile pou supporté.”—Mat. 24:3, 6-8, 12; 2 Tim. 3:1-5.
5 Mais majorité bann dimoune pa koné ki sa bann l’evenement ki pé arrivé dan le monde-la vedir vrai-mem. Alors, beaucoup dimoune tracassé concernant zot securité ek securité zot famille. Beaucoup bien souffert kan enn membre zot famille mort ou-soit kan zot gagne bann lezot malheur dan zot la-vie personnel. Sa bann dimoune-la pena okenn l’esperance parski zot pena enn connaissance exact lor bann raison kifer sa bann kitsoz-la arrivé ek kot-sa kapav trouve enn solution.—Éph. 2:12.
6. Kifer “Babylone la Grande” pa finn kapav aide bann dimoune?
6 “Babylone la Grande” setadir tou bann fausse religion ki ena dan le monde, pa finn donne bann dimoune beaucoup reconfort. Au contraire, par “di-vin so fornication,” li finn mette beaucoup dimoune dan enn confusion spirituel. En plus, fausse religion finn agir couma enn prostitué kan li finn attire “bann lé-roi lor la terre” ek li finn control zot. Li finn servi bann fausse doctrine ek bann pratik spiritisme pou faire majorité dimoune soumette ar zot bann chef politik, sans pose okenn question. C’est coumsa ki fausse religion finn gagne pouvoir ek l’influence, mais en mem temps, li finn rejette la verité net.—Rév. 17:1, 2, 5; 18:23.
7. Ki pé attann la plupart dimoune, mais couma nou kapav aide certain?
7 Jésus ti enseigné ki la plupart dimoune pé marche lor enn chemin large ki amenn vers destruction. (Mat. 7:13, 14) Certain dimoune zot lor sa chemin large-la parski zot finn choisir pou rejette seki la Bible enseigné. Mais beaucoup lezot dimoune zot lor sa chemin-la parski zot chef religieux finn embete zot, ou-soit finn laisse zot dan noir ek pa finn enseigne zot seki Jéhovah vrai-mem demann zot faire. Kitfois, certain pou kapav change zot la-vie si donne zot bann raison biblik bien clair pou faire sa. Mais bann ki reste dan Babylone la Grande ek ki contigne rejette bann principe la Bible, pa pou sapé pendant “la grande tribulation.”—Rév. 7:14.
Contigne preché “sans arreté”
8, 9. Couma bann chretien dan premier siecle ti reagir kan zot ti gagne l’opposition, ek kifer?
8 Jésus ti dire ki so bann disciple pou preche la bonne nouvelle lor Royaume Bondié ek zot pou faire bann disciple. (Mat. 28:19, 20) C’est a cause sa ki bann vrai chretien finn toujours considere zot participation dan predication couma enn kitsoz ki prouvé si zot fidele envers Bondié ou-soit non. C’est aussi enn kitsoz ki zot la-foi demann zot faire. Alors, bann premier disciple Jésus ti contigne preché mem si zot ti gagne l’opposition. Zot ti compte lor Jéhovah pou donne zot la force, ek zot ti prié pou ki Li permette zot contigne “annonce [so] parole avek courage.” En reponse, Jéhovah ti rempli zot ar l’esprit saint, ek zot ti ena courage pou annonce parole Bondié.—Actes 4:18, 29, 31.
9 Kan bann chretien premier siecle ti gagne enn grand l’opposition, eski zot ti arrete preche la bonne nouvelle? Non. Bann chef religieux juif ti en colere a cause predication bann zapotre, alors, zot ti arrete bannla, ti menace zot, ek ti fouette zot. Pourtant, bann zapotre “ti contigne enseigne ek annonce la bonne nouvelle lor Jésus Christ, sans arreté.” Zot ti bien comprend ki zot ti bizin “obeir Bondié couma enn chef plutot ki bann zom.”—Actes 5:28, 29, 40-42.
10. Ki bann difficulté bann chretien gagné zordi, pourtant ki resultat zot bon conduite kapav ena?
10 Zordi, la plupart serviteur Bondié pa finn bizin gagne batté ou-soit al dan prison a cause zot predication. Selman, tou bann vrai chretien gagne bann l’epreuve ek bann difficulté dan lezot fason. Par exemple, kitfois ou conscience ki’nn formé par la Bible, pousse ou pou ena enn conduite ki lezot pou trouve drole ou-soit ki pou faire ou parette different. Bann camarade travail, camarade lekol, bann voisin kapav pensé ki ou bizarre parski ou prend bann decision ki basé lor bann principe biblik. Pourtant, fodé pa ki zot reaction decourage ou. Le monde dan noir lor plan spirituel, mais bann chretien bizin “brillé couma bann la-lumiere ki eclaire lezot.” (Phil. 2:15) Kitfois certain dimoune sincere ki observe ou conduite, pou trouve ou bann bon action ek pou apprecié sa ek zot pou donne la gloire Jéhovah.—Lire Matthieu 5:16.
11. (a) Couma certain kapav reagir kan preche avek zot? (b) Ki qualité l’opposition Paul ti gagné, ek couma li ti reagir?
11 Nou bizin courage pou nou kapav contigne preche Royaume Bondié. Certain dimoune, kitfois-mem nou famille, kapav bouffonne nou ou-soit rod decourage nou par lezot fason. (Mat. 10:36) L’apotre Paul ti gagne batté plusieurs fois parski li ti accompli so ministere avek fidelité. Remarké couma li ti reagir kan li ti gagne l’opposition: “Apré ki nou finn souffert ek finn bien gagne maltraité . . . nou finn prend courage grace a nou Bondié pou dire zot la bonne nouvelle Bondié, malgré beaucoup difficulté.” (1 Thess. 2:2) Surement Paul ti bizin beaucoup courage pou contigne preche la bonne nouvelle apré ki so bann l’ennemi ti’nn arrete li, ti tire so linge lor li, ti batte li avek bann baton ek ti jette li dan prison. (Actes 16:19-24) Ki ti donne li courage pou contigné? C’est sa grand desir pou accompli mission ki Bondié ti donne li-la, setadir preche la bonne nouvelle.—1 Cor. 9:16.
12, 13. Ki difficulté certain gagné, ek couma eski zot finn surmonte sa?
12 Li kapav aussi difficile pou garde nou zele dan bann territoire kot bann dimoune souvent absent ou-soit kot pena beaucoup dimoune ki interessé ar nou message. Ki nou kapav faire dan sa bann situation-la? Kitfois nou pou bizin prend plus courage pou koz avek bann dimoune dan enn fason informel. Li possible aussi ki nou pou bizin faire bann changement dan nou programme ou-soit concentré nou bann zeffort pou preche dan bann territoire kot nou kapav joinde plus dimoune.—Compare avek Jean 4:7-15; Actes 16:13; 17:17.
13 Beaucoup chretien bizin aussi faire face ar la vieillesse ek enn mauvais la-santé ek kitfois sa limite seki zot kapav faire dan predication. Si ou dan sa cas-la, pa decouragé. Jéhovah bien konn ou bann limite, ek kan ou faire seki ou kapav, sa faire Li plaisir. (Lire 2 Corinthiens 8:12.) N’importe ki l’epreuve ki kitfois ou pé gagné—l’opposition, bann dimoune ki indifferent, enn mauvais la-santé—faire tou seki ou situation permette ou pou partage la bonne nouvelle avek lezot.—Prov. 3:27; compare avek Marc 12:41-44.
‘Contigne veille lor to ministere’
14. Ki l’exemple l’apotre Paul ti laissé pou bann chretien dan so lepok, ek ki conseil li ti donné?
14 L’apotre Paul ti prend so ministere bien serieux, ek li ti encourage bann lezot chretien pou faire pareil. (Actes 20:20, 21; 1 Cor. 11:1) Paul ti surtout encourage enn chretien ki ti vive dan premier siecle ek ki ti appel Archippe. Dan lettre ki li ti envoye bann Colossiens, Paul ti ecrire: “Dire Archippe: ‘Contigne veille lor ministere ki to finn accepté dan nou Seigneur, pou ki to accompli li.’ ” (Col. 4:17) Nou pa koné kisannla Archippe ti été, ni dan ki situation li ti été, mais nou comprend ki li ti’nn accepté enn ministere. Si ou enn chretien ki finn voué ou la-vie ar Bondié, ou aussi ou finn accepté enn ministere. Eski ou pé contigne veille lor ou ministere pou ki ou accompli li?
15. Nou voeu ki nou’nn faire ar Jéhovah, ki sa impliké, ek ki bann question sa faire nou posé?
15 Avant nou bapteme, nou ti voué nou la-vie ar Jéhovah dan enn la-priere sincere. Sa ti montré ki nou ti bien decidé pou faire so volonté. Alors, li bon ki nou demann nou-mem asterla: ‘Eski faire volonté Bondié li vrai-mem seki pli important dan mo la-vie?’ Kitfois nou ena beaucoup responsabilité ki Jéhovah demann nou pou prend—couma par exemple donne nou famille seki li bizin. (1 Tim. 5:8) Mais couma eski nou servi le temps ek la force ki nou resté? Ki nou priorité dan la vie?—Lire 2 Corinthiens 5:14, 15.
16, 17. Lor ki possibilité bann jeune chretien ou-soit bann ki pena bann grand responsabilité, kapav reflechi?
16 Eski ou enn jeune ki’nn voué ou la-vie ar Bondié ek ki’nn fini ou-soit ki pré pou fini lekol? Surement ou pankor ena bann grand responsabilité familial. Alors, ki ou pé pense pou faire ar ou la-vie? Ki bann decision ki pou pli aide ou pou tini ou promesse pou faire volonté Jéhovah? Beaucoup chretien finn organise zot la-vie pou zot kapav faire pionnier, ek zot finn gagne beaucoup la-joie ek satisfaction.—Ps. 110:3; Eccl. 12:1.
17 Eski ou enn jeune adulte ki ena enn travail a plein temps mais ki pena beaucoup responsabilité, a part pou occupe ou-mem? Pena doute ki ou bien content pou participe dan bann l’activité congregation autant ki ou programme permette ou. Eski ou kapav gagne encore plus la-joie? Eski ou finn pense pou faire plus dan ou ministere? (Ps. 34:8; Prov. 10:22) Dan certain territoire, ena encore beaucoup travail pou faire pou kapav preche la verité avek tou dimoune ek annonce zot enn message ki pou kapav donne zot la vie. Eski ou kapav faire bann changement dan ou la-vie, kitfois pou al servi dan enn l’endroit kot bizin plus proclamateur?—Lire 1 Timothée 6:6-8.
18. Ki bann changement enn jeune couple ti faire, ek ki resultat zot ti gagné?
18 Anou prend l’exemple Kevin ek Elena, enn couple américain.a Dan zot l’endroit, li ti normal ki bann nouveau marié acheté enn lakaz, ek c’est seki zot aussi zot ti faire. Toulé-deux ti travail a plein temps ek sa ti permette zot pou contigne amenn enn la-vie confortable. Mais zot travail ek bann l’ouvrage lakaz pa ti laisse zot beaucoup lé-temps pou preché. Zot ti rann-zot compte ki zot ti pé consacré preské tou zot lé-temps ek zot la-force ar zot bann di-bien. Selman kan zot ti observe la vie simple enn couple pionnier ki ti joyeux, Kevin ek Elena ti decidé pou change zot priorité dan la vie. Apré ki zot ti’nn demann Jéhovah so direction dan la priere, zot ti vann zot lakaz ek zot ti al reste dan enn l’appartement. Elena ti diminué quantité l’heure ki li ti travail ek li ti commence faire pionnier. Bann l’experience ki so femme ti pé gagné dan so service ti encourage Kevin, alors li ti arrete travail a plein temps ek ti commence faire pionnier li aussi. Enn tipé apré, zot ti demenagé pou al servi dan enn pays en Amérique du Sud kot ti bien bizin bann proclamateur. Kevin dire: “Nou ti toujours ena enn mariage heureux, mais kan nou ti faire plus dan nou service pou Bondié, nou ti konn enn pli grand bonheur encore.”—Lire Matthieu 6:19-22.
19, 20. Kifer predication la bonne nouvelle c’est travail pli important ki ena dan nou lepok?
19 Travail pli important ki pé faire lor la terre zordi c’est predication la bonne nouvelle. (Rév. 14:6, 7) Sa permette ki nom Jéhovah sanctifié. (Mat. 6:9) Chaque l’année, message ki sorti dan la Bible ameliore la vie plusieurs millier dimoune ki accepté li, ek sa kapav sauve zot la-vie. Pourtant, l’apotre Paul ti demandé “couma zot pou tendé si personne pa preché?” (Rom. 10:14, 15) Oui, couma? Kifer ou pa prend decision pou faire tou seki ou kapav pou accompli ou ministere?
20 Enn lot fason pou aide bann dimoune comprend ki sa bann lepok critik-la vedir ek ki consequence bann decision ki zot prend pou ena lor zot la-vie c’est kan ou ameliore ou capacité pou enseigné. Dan prochain lartik nou pou examiné couma ou kapav faire sa.
[Note]
a Nou finn change bann nom.
Couma ou pou reponn?
• Ki responsabilité bann chretien ena envers bann dimoune?
• Couma nou kapav faire face ar bann l’obstacle ki nou gagné dan nou ministere?
• Couma nou kapav accompli ministere ki nou finn accepté?
[Zimage, page 9]
Nou bizin ena courage pou preché malgré l’opposition
[Zimage, page 10]
Ki ou kapav faire si ou preche dan bann territoire kot bann dimoune souvent absent?