Imite Jesus—Preche avek courage
“Nou finn prend beaucoup courage . . . pou dire zot la bonne nouvelle.”—1 THESS. 2:2.
1. Kifer la bonne nouvelle lor Royaume Bondié tellement attirant?
NOU extra content pou tann bann bon nouvelle! Ek pli bon nouvelle ki ena c’est la bonne nouvelle lor Royaume Bondié. Sa bon nouvelle-la donne nou l’assurance ki souffrance, maladie, douleur, chagrin, ek la mort pou disparette. Li donne nou l’espoir ki nou pou gagne la vie eternel, faire nou konn projet Bondié, ek montré nou couma nou kapav gagne bann bon relation avek Li. Kitfois ou kapav pensé ki tou dimoune pou content pou tann sa nouvelle ki Jésus ti partage avek bann dimoune-la. Mais malheureusement, non!
2. Explik sa bann parole Jésus-la: “Mo’nn vinn crée division.”
2 Jésus ti dire so bann disciple: “Pa pensé ki mo’nn vinn mette la paix lor la terre; mo pa’nn vinn mette la paix, mais l’epée. Parski mo’nn vinn mette division, enn zom kont so papa, enn tifi kont so mama, enn jeune femme kont so belle-mere. Oui, bann l’ennemi enn zom pou sorti dan so prop famille.” (Mat. 10:34-36) Au lieu ki zot accepté la bonne nouvelle, la plupart dimoune rejette li. Certain vinn l’ennemi bann ki preche sa nouvelle-la, mem si c’est bann membre zot prop famille.
3. Ki nou bizin pou nou kapav contigne preché?
3 Zordi nou preche bann mem verité ki Jésus, ek kan bann dimoune tann sa, zot ena mem reaction ki beaucoup dimoune ti ena dan lepok Jésus. Nou kapav attann enn reaction coumsa. Jésus ti dire so bann disciple: “Enn esclave pa pli grand ki so maitre. Si bannla finn persecute moi, bannla pou persecute zot aussi.” (Jean 15:20) Dan beaucoup pays, nou pa gagne persecution direct, mais nou faire face ar bann dimoune ki meprise nou ek ki indifferent. Alors, nou bizin la foi ek fermeté pou nou kapav enduré ek preche la bonne nouvelle avek courage.—Lire 2 Pierre 1:5-8.
4. Kifer Paul ti bizin “prend beaucoup courage” pou preché?
4 Li possible ki parfois ou trouve sa difficile pou participe dan predication, ou-soit ena certain domaine dan ou ministere ki ou pensé ou pa kapav faire. Mais si ou ena sa sentiment-la, maziné ki beaucoup lezot proclamateur fidele ena mem sentiment. L’apotre Paul ti enn predicateur ki ti ena courage ek ki pa ti peur ek li ti bien comprend la verité. Pourtant ti ena bann moment kot li ti trouve sa difficile pou preché. Paul ti ecrire bann chretien dan Thessalonique: “Apré ki nou finn souffert ek finn bien gagne maltraité (couma zot koné) dan la ville Philippes, nou finn prend beaucoup courage grace a nou Bondié pou dire zot la bonne nouvelle Bondié, malgré beaucoup difficulté.” (1 Thess. 2:2) Dan Philippes, Paul ek so compagnon Silas ti gagne batté coute baton ar bann representant l’autorité. Bannla ti jette zot dan prison ek ti mette zot lipié dan bann cep. (Actes 16:16-24) Malgré sa, Paul ek Silas ti “prend beaucoup courage” pou contigne preché. Couma nou kapav imite zot? Pou reponn sa question-la, anou guetté ki ti aide bann serviteur Bondié dan lepok biblik pou dire la verité lor Jéhovah avek courage, ek anou guetté couma nou kapav imite zot l’exemple.
Zot ti bizin courage pou faire face ar la haine
5. Kifer bann serviteur ki fidele envers Jéhovah ti toujours bizin ena courage?
5 Pli grand l’exemple courage c’est bien sur Jésus Christ. Mais kan-mem, depuis commencement l’histoire l’humanité, tou sa bann serviteur fidele Jéhovah-la finn touletan bizin courage. Kifer? Apré rebellion en Éden, Jéhovah ti annoncé ki ti pou ena la haine entre bann ki servi Bondié ek bann ki servi Satan. (Gen. 3:15) Bien vite ti kapav trouve sa la haine-la kan Abel, enn zom droite, ti assassiné par so frere. Plitar, ti ena enn la haine ki ti developpé kont Hénok, enn lot zom fidele ki ti vive avant deluge. Li ti annoncé ki Bondié ti pou vini avek So bann millier ange ki saint, pou amenn So jugement lor bann mauvais dimoune. (Jude 14, 15) Beaucoup dimoune pa ti’lé tann sa message-la. Bann dimoune ti ena la haine pou Hénok ek surement zot ti pou touye li si Jéhovah pa ti mette fin ar so la vie. Oui, Hénok ti ena vrai-mem enn grand courage!—Gen. 5:21-24.
6. Kifer Moïse ti bizin courage pou koz ar Pharaon?
6 Maziné aussi ki quantité courage Moïse ti bizin ena kan li ti koz avek Pharaon. Bann dimoune pa ti considere sa le roi-la zis couma representant bann bondié, mais couma enn bondié li-mem, garson Ra, ki ti bondié soleil. Li possible ki, pareil couma lezot Pharaon ti faire, li ti adore so prop zimage. Kan Pharaon ti kozé, so bann parole ti couma enn la loi; li-mem ki ti faire la loi. Pharaon ti bien puissant, li ti rempli ar l’orgueil ek li ti teti; alors, li pa ti habitué ki lezot dire li seki li ti bizin faire. C’est devant sa qualité dimoune-la ki Moïse, enn berger ki ti ena l’humilité, ti bizin allé plusieurs fois—alors ki personne pa ti invite li. Ek ki kitsoz Moïse ti annoncé? Bann plaie ki ti pou detruire beaucoup kitsoz. Ki li ti demann Pharaon? Permission pou laisse plusieurs million so bann esclave quitte pays! Eski Moïse ti bizin courage? Oui, bien sur!—Nomb. 12:3; Héb. 11:27.
7, 8. (a) Ki l’epreuve bann serviteur fidele ki ti vive dan le passé, ti gagné? (b) Ki ti aide bann ki ti vive dan lepok avant Christ pou montré zot courage pou soutenir ek favorise vrai l’adoration?
7 Pendant bann siecle ki’nn suive, bann prophete ek bann lezot serviteur fidele Bondié ti contigne tini ferme pou vrai l’adoration. Le monde Satan pa ti bon envers zot. Paul dire: “Zot ti gagne coute roche, zot ti gagne bann l’epreuve, ti coupe zot en deux, ti touye zot par l’epée, zot ti al partout-partout dan bann la peau mouton ek la peau cabri lor zot, alors ki zot ti mank kitsoz, zot ti gagne tribulation, ek bann mauvais traitement.” (Héb. 11:37) Ki ti aide sa bann serviteur fidele Bondié-la pou reste ferme? Dan deux-trois verset avant, l’apotre Paul ti dire seki ti donne Abel, Abraham, Sara, ek lezot, la force pou enduré. Li ti dire: “Zot pa ti reussi trouve realisation bann promesse, mais [grace a la foi] zot ti trouve sa bann promesse-la de loin ek zot ti recevoir sa avek beaucoup la joie.” (Héb. 11:13) Pena doute ki bann prophete couma Éliya, Jérémie, ek lezot prophete fidele dan lepok avant Jésus Christ, ti kapav tini ferme pou vrai l’adoration ek enduré parski zot ti garde zot lizié fixé lor bann promesse Jéhovah.—Tite 1:2.
8 Sa bann prophete dan lepok avant Jésus Christ-la, ti garde zot l’esprit fixé lor enn l’avenir heureux. Kan zot pou ressuscité, zot pou finalement vinn parfait ek zot pou “nepli esclave ar seki pé detruire [zot]” grace a service nou Grand Pretre Christ Jésus ek bann 144,000 sous-pretre. (Rom. 8:21) En plus, Jérémie ek lezot serviteur Bondié dan le passé ti prend courage parski Jéhovah ti donne sa l’assurance-la a travers enn promesse ki Li ti faire Jérémie: “Vrai-mem zot pou laguerre ar toi, mais zot pa pou pli fort ki toi, parski ‘mo avek toi pou delivré toi,’ c’est seki Jéhovah dire.” (Jér. 1:19) Zordi, kan nou medite lor bann promesse ki Bondié inn faire pou nou l’avenir ek l’assurance ki Li pou protege nou lor plan spirituel, sa fortifié nou aussi pareil.—Prov. 2:7; lire 2 Corinthiens 4:17, 18.
L’amour ti pousse Jésus pou preche avek courage
9, 10. Dan ki fason Jésus ti montré courage devant (a) bann chef religieux, (b) enn groupe soldat, (c) grand pretre, (d) Pilate?
9 Jésus, nou l’Exemple, ti montré courage dan different fason. Par exemple, mem si bann ki ti ena pouvoir ek l’influence ti ena la haine pou li, Jésus pa ti dire zis enn partie seki Bondié ti envie ki bann dimoune tendé, zis pou pa offense lezot. Sans okenn la crainte, li ti denonce bann chef religieux bien puissant parski zot ti pensé ki zot trop juste ek parski zot ti enseigne seki fausse. Jésus ti bien direct ek bien clair kan li ti condamne sa bann zom-la. Enn fois, li ti dire: “Malheur lor zot, scribe ek Pharisien, hypocrite! parski zot couma bann tombe ki bien blanc, ki dehors parette joli mais endan, zot rempli ar lezo bann dimoune mort ek toute sorte qualité kitsoz ki impur. Zot aussi pareil, dehors zot parette juste devant lizié bann zom, mais endan zot bien hypocrite ek zot pa suive la loi.”—Mat. 23:27, 28.
10 Kan Jésus ti faire face ar enn groupe soldat dan jardin Gethsémané, avek courage li ti dire zot kisannla li été. (Jean 18:3-8) Plitar, ti amenn li devant Sanhédrin ek grand pretre ti questionne li. Mem si li ti koné ki sa grand pretre-la ti pé rod enn pretexte pou touye li, Jésus pa ti peur pou dire ki Li-mem Christ ek Garson Bondié toulé-deux. Li ti ajouté ki zot ti pou trouve li “pé assizé dan coté droite sa Kikenn ki Puissant-la ek pé vini avek bann nuage ki dan le ciel.” (Marc 14:53, 57-65) Enn tipé apré, bann l’ennemi Jésus ti attache li ek ti amenn li devant Pilate ki ti kapav libere li. Mais Jésus ti reste trankil devant bann l’accusation ki zot ti faire kont li. (Marc 15:1-5) Tousala ti demann beaucoup courage.
11. Couma courage ena enn rapport avek l’amour?
11 Jésus ti kan-mem dire Pilate: “C’est pou sa ki mo finn né, ek c’est pou sa ki mo finn vinn dan le monde, pou rann temoignage lor la verité.” (Jean 18:37) Jéhovah ti’nn donne Jésus mission pou preche la bonne nouvelle, ek Jésus ti content pou faire sa parski li ti content so Papa ki dan le ciel. (Luc 4:18, 19) Jésus ti content aussi bann dimoune. Li ti koné ki zot la vie ti difficile. Nou aussi, c’est parski nou ena enn grand l’amour pou Jéhovah ek pou nou prochain ki nou preche la bonne nouvelle avek courage ek sans okenn la peur.—Mat. 22:36-40.
L’esprit saint donne nou la force pou preche avek courage
12. Ki ti faire bann disciple premier siecle content?
12 Plusieurs semaine apré la mort Jésus, bann disciple ti content pou trouvé ki Jéhovah ti pé ajoute bann nouveau disciple ar zot groupe. Oui, zis dan enn sel jour, apepré 3,000 Juif ek prosélyte ki sorti dan beaucoup l’endroit ek ki ti vinn Jérusalem pou fête la Pentecôte, ti prend bapteme! Surement zot tou dan Jérusalem ti pé koz lor seki ti’nn arrivé! La Bible dire: “Tou nâme ki ti la, ti ressenti enn grand la crainte, ek ti ena beaucoup signe ek mirak ki bann zapotre ti faire.”—Actes 2:41, 43.
13. Kifer bann frere ti prié pou gagne courage, ek ki resultat zot ti gagné?
13 Bann chef religieux ti bien en colere, zot ti arrete Pierre ek Jean, ti garde zot dan prison pendant enn nuit, ek ti donne zot l’ordre pou pa koz lor Jésus. Kan ti largue zot, Pierre ek Jean ti al raconte bann frere seki ti’nn arrive zot, ek zot tou, zot ti faire sa la priere-la concernant l’opposition ki zot ti gagné: “Jéhovah, . . . permette ki to bann esclave contigne annonce to parole avek courage.” Ki ti arrivé lerla? “Zot tou ti rempli avek l’esprit saint ek zot ti pé koz parole Bondié avek courage.”—Actes 4:24-31.
14. Couma l’esprit saint aide nou dan predication?
14 Remarké ki c’est l’esprit saint Jéhovah ki bien puissant ki ti aide bann disciple pou dire parole Bondié avek courage. Pou nou ena courage pou koz la verité ar lezot, mem ar bann ki opposé ar nou message, c’est pa par nou-mem ki nou kapav faire sa, mais grace a la force ki Jéhovah donne nou. Jéhovah kapav donne nou so l’esprit saint ek Li pou donne nou sa si nou demann Li. Avek l’aide Jéhovah, nou aussi nou kapav montré courage necessaire pou reussi endure n’importe ki l’opposition.—Lire Psaume 138:3.
Bann chretien preche avek courage zordi
15. Couma la verité divise bann dimoune zordi?
15 Dan nou lepok, pareil couma dan le passé, la verité contigne divise bann dimoune. Certain accepté nou message, alors ki lezot pa comprend ni accepté nou religion. Certain critik nou ou-soit bouffonne nou, ena mem ki ena la haine pou nou, pareil couma Jésus ti annoncé. (Mat. 10:22) Parfois, bann dimoune donne bann fausse renseignement lor nou, ek koz nou en mal dan bann programme television, radio, lor Internet, ou-soit dan la gazette. (Ps. 109:1-3) Malgré sa, partout lor la terre, bann serviteur Jéhovah preche la bonne nouvelle avek courage.
16. Ki l’experience montré ki kan nou ena courage, sa kapav change l’attitude bann dimoune ki nou joinde dan predication?
16 Nou courage kapav pousse bann dimoune pou change zot l’attitude en rapport avek message lor Royaume Bondié. Enn soeur dan Kirghizistan raconté: “Kan mo ti dan predication, enn missié ti dire moi: ‘Mo croire dan Bondié mais pa dan Bondié bann chretien. Si ou vinn devant mo la porte encore, mo pou largue mo li-chien ar ou!’ Pré kot li ti ena enn gros bouledogue ki ti attaché ar enn la chaine. Mais pendant campagne pou distribué Nouvelle du Royaume no. 37, ‘La fin fausse religion pé kosté!,’ mo ti decidé pou retourne dan sa mem lakaz-la dan l’espoir pou joinde enn lot membre famille sa missié-la. Mais, c’est mem missié ki ti vinn ouvert la porte. Desuite, mo ti prié Jéhovah, ek apré mo ti dire: ‘Bonjour, mo rappel conversation ki nou ti gagné trois jour avant, ek mo rappel aussi ou li-chien. Mais mo pa’nn kapav saute ou lakaz parski pareil couma ou, mo croire dan enn sel vrai Bondié. Bientot Bondié pou puni bann religion ki deshonore Li. Ou kapav aprann plus lor la si ou lire sa.’ Mo ti bien etonné kan missié-la ti accepté sa Nouvelle du Royaume-la. Apré sa, mo’nn al faire enn lot lakaz. Deux-trois minute plitar, missié-la ti galopé pou vinn joinde moi avek so Nouvelle du Royaume dan so la main. Li ti dire moi: ‘Mo’nn lire li. Ki mo bizin faire pou Bondié pa envoye so colere lor moi?’ ” Missié-la ti commence etudié la Bible ek assisté bann reunion.
17. Couma courage enn soeur ti fortifié enn etudiant la Bible ki ti peur pou assisté reunion?
17 Nou courage kapav aussi pousse lezot pou ena courage. En Russie, enn soeur ki ti pé voyage dan enn bus, ti donne enn periodik enn lot passager. Kan enn missié ti trouve sa, li ti sorti dan so place, ti rasse sa periodik-la dan la main sa soeur-la, ti crase li, ek ti jette li enba. Li ti insulté soeur-la fort, li ti demann li so l’adresse ek ti dire li pa preche dan village. Sa soeur-la ti prié Jéhovah pou aide li ek li ti rappel seki Jésus ti dire: “Pa peur bann ki touye lekor.” (Mat. 10:28) Avek calme, li ti debouté ek ti dire missié-la: “Mo pa pou donne ou mo l’adresse, ek mo pou contigne preche dan village.” Apré sa, li ti sorti dan bus. Sans ki sa soeur-la ti koné, dan sa bus-la ti ena enn madame ki ti pé etudié la Bible avek li. Sa madame-la pa ti assisté reunion parski li ti peur seki bann dimoune pou pensé. Apré ki li’nn trouve courage sa soeur-la, li ti decidé pou commence assisté reunion.
18. Ki pou aide ou pou preche avek courage pareil couma Jésus?
18 Dan sa le monde ki eloigné ar Bondié-la, nou bizin ena courage pou preché pareil couma Jésus. Ki pou aide ou pou faire sa? Concentré-ou lor l’avenir. Garde ou l’amour pou Bondié ek pou ou prochain, fort. Prié Jéhovah pou Li donne ou courage. Rappel toujours ki jamais ou pa tousel, parski Jésus avek ou. (Mat. 28:20) L’esprit saint pou donne ou la force. Ek Jéhovah pou beni ou ek pou soutenir ou. Alors, anou prend courage ek dire: “C’est Jéhovah ki aide moi; mo pa pou peur. Ki dimoune kapav faire moi?”—Héb. 13:6.
Couma ou pou reponn?
• Kifer bann serviteur Bondié bizin courage?
• En rapport avek courage, ki nou aprann ar . . .
bann serviteur fidele ki’nn vive dan lepok avant Christ?
Jésus Christ?
bann chretien premier siecle?
bann chretien zordi?
[Zimage lor page 23]
Jésus pa ti peur pou denonce bann chef religieux
[Zimage lor page 25]
Jéhovah donne nou courage pou preché