Contigne koz parole Bondié avek courage
1 En tant ki bann ministre chrétien, nou koné ki pa tou dimoune ki pou ecoute nou message. (Mat. 10:14) Mais nou pa laisse bann reaction negatif empeche nou preche la bonne nouvelle. (Prov. 29:25) Ki kitsoz ki aide nou pou contigne koz parole Bondié avek courage?
2 L’apotre Paul ti koné ki ‘connaissance lor Jésus Christ ena enn grand valeur.’ Sa ti faire li koz avek enn “grand conviction.” (Phil. 3:8; 1 Thess. 1:5) Mem si certain ti considere message ki li ti pé preché couma enn kitsoz faible ek bet, li ti koné ki sa message-la ti “puissance Bondié pou ki tou dimoune ki ena la foi kapav gagne la vie sauve.” (Rom. 1:16) Alors mem kan li ti gagne l’opposition, li ti contigne “koz avek courage grace a pouvoir Jéhovah.”—Actes 14:1-7; 20:18-21, 24.
3 L’origine nou la-force: C’est pa par so prop la-force ki Paul finn reussi rann temoignage avek courage. Paul ti ecrire concernant li ek Silas: “Apré ki nou finn souffert ek finn bien gagne maltraité . . . dan la ville Philippes, nou finn prend courage grace a nou Bondié pou dire zot la bonne nouvelle Bondié, malgré beaucoup difficulté.” (1 Thess. 2:2; Actes 16:12, 37) En plus, pendant ki li ti dan prison a Rome, Paul ti demann lezot pou prié pou ki Bondié aide li pou li kapav contigné faire konn la bonne nouvelle ‘avek courage, couma bizin.’ (Éph. 6:18-20) Au lieu ki li ti compte lor li-mem, Paul ti compte lor Jéhovah, ek sa finn permette li pou contigné koz parole Bondié avek courage.—2 Cor. 4:7; Phil. 4:13.
4 Zordi aussi pareil. Enn frere ki ti trouve sa difficile pou dire ki li enn Témoin de Jéhovah dan so travail ek pou donne temoignage informel, ti koz sa dan so la-priere, ek li finn commence donne temoignage. Enn so bann collegue travail pa ti envie ecoute li au commencement, mais kan frere-la finn koz lor l’esperance la resurrection, collegue-la finn accepté enn l’etude la Bible. Depuis sa, frere-la finn saisi chaque l’occasion pou donne temoignage. Kan li ti al travail dan enn lot place, pendant enn period 14 an, li finn reussi aide 34 dimoune pou rempli bann condition pou prend bapteme. Nou kapav sur ki Jéhovah pou donne nou aussi la force ‘pou contigne koz so parole avek courage.’—Actes 4:29.