Presence Christ—Ki sa representé pou ou?
“Kan eski sa bann kitsoz-la pou arrivé, ek ki signe pou montré to presence ek conclusion sa systeme-la?”—MAT. 24:3.
1. Ki question interessant bann zapotre ti pose Jésus?
ENA preské deux mille an, alors ki zot ti lor mont des Oliviers, quatre zapotre Jésus ti pose zot Maitre enn question dan enn conversation en privé. Zot ti demann li: “Kan eski sa bann kitsoz-la pou arrivé, ek ki signe pou montré to presence ek conclusion sa systeme-la?” (Mat. 24:3) Dan zot question, zot ti servi deux l’expression bien interessant: “to presence” ek “conclusion sa systeme-la.” Ar ki kitsoz sa deux l’expression-la faire reference?
2. Ki mot “conclusion” impliké?
2 Avant, anou examine deuxieme l’expression ki zot ti servi setadir “conclusion,” ki traduire mot grec suntéléïa. Dan Traduction du monde nouveau en français, a chaque fois inn traduire sa mot-la par “ achèvement ” (setadir conclusion) alors ki enn lot mot grec télos, ki ena enn rapport avek sa, inn traduire par “la fin.” Pou comprend difference ki ena entre sa deux mot-la, anou prend l’exemple enn discours ki faire dan la Salle du Royaume. Conclusion discours-la, c’est dernier partie ki enn frere developpé, là, li prend enn tipé lé-temps pou rappel bann ki pé ecoute li, bann l’idée ki li’nn developpé ek couma sa concerne zot. La fin so discours c’est kan frere-la desann lor l’estrade. Li pareil aussi pou l’expression “conclusion sa systeme-la.” Dapré la Bible, sa l’expression-la vedir periode le temps ki amenn vers la fin, ek sa la-fin-la forme partie dan sa periode-la.
3. Cite certain kitsoz ki arrivé pendant presence Jésus.
3 Ki nou kapav dire concernant mot “presence” lor ki bann zapotre ti pose question? Sa mot-la traduire mot grec parousia.a Parousia, ou-soit presence Christ, inn commencé kan Jésus ti vinn le Roi dan le ciel en 1914, ek sa pou contigné ziska ki li vinn detruire bann mauvais dimoune pendant la “grande tribulation.” (Mat. 24:21) Pendant presence Christ, ena beaucoup kitsoz ki arrivé, parmi ena bann “dernier jour” sa mauvais lé-monde-la, rassemblement bann ki finn choisir, ek zot resurrection pou al dan le ciel. (2 Tim. 3:1; 1 Cor. 15:23; 1 Thess. 4:15-17; 2 Thess. 2:1) Nou kapav dire ki “conclusion sa systeme-la” (suntéléïa) li corresponn ar periode le temps ki appel presence Christ (parousia).
Enn periode le temps assez longue
4. Ki comparaison nou kapav faire entre presence Christ ek bann l’evenement ki ti ena dan lepok Noé?
4 Mot parousia represente enn periode le temps assez longue ek sa li en accord avek seki Jésus ti dire lor so presence. (Lire Matthieu 24:37-39.) Remarké ki Jésus pa ti compare so presence ar sa ti periode le temps kan ti ena deluge dan lepok Noé-la. Au contraire, li ti compare so presence ar sa pli longue periode le temps ki ti ena avant deluge-la. Pendant tou sa lé-temps-la, Noé ti arrange l’arche ek li ti preché ziska ki deluge ti vini finalement. Sa bann kitsoz-la ti arrivé pendant plusieurs dizaine l’année. Li pareil aussi concernant presence Christ: pendant sa presence-la ena bann l’evenement ki pou amenn ziska la grande tribulation ek sa tribulation-la aussi forme partie dan so presence.—2 Thess. 1:6-9.
5. Couma bann parole ki trouve dan Révélation chapitre 6 montré ki presence Jésus c’est enn longue periode le temps?
5 Kan nou lire lezot prophetie biblik, nou comprend ki presence Christ c’est enn longue periode le temps ek c’est pa zis sa moment kot li pou vinn detruire bann mauvais dimoune-la. Livre Révélation montré Jésus lor enn cheval blanc ek li pé gagne enn couronne. (Lire Révélation 6:1-8.) Apré ki li’nn vinn le Roi en 1914, Jésus inn “sorti couma enn vainker ek [li] pou complete so victoire.” Apré sa, toujours dapré livre Révélation, ena bann cavalier, sakenn lor enn cheval different couleur, ki pé suive li. Sa bann cavalier-la represente dan enn fason prophetik, la guerre, la famine ek bann l’epidemie, ek tousala finn arrivé pendant sa longue periode le temps ki la Bible appel ‘dernier jour-la.’ Nou pé trouve realisation sa prophetie-la dan nou lepok.
6. Ki Révélation chapitre 12 aide nou pou comprend concernant presence Christ?
6 Révélation chapitre 12 donne plus detail lor seki ti passé kan Royaume Bondié ti etabli dan le ciel. Sa chapitre-la koz lor enn la-guerre dan le ciel. Mikaël—Jésus Christ dan so position celeste—ek so bann ange, laguerre kont Satan le Diable ek so bann demon. Resultat sa la-guerre-la: Jésus pousse Satan le Diable ek so bann demon lor la terre. La Bible dire ki lerla, Satan ena enn grand colere parski li “koné ki li ena zis enn tigit lé-temps-mem.” (Lire Révélation 12:7-12.) Alors, li clair ki zis apré ki Royaume Bondié inn etabli dan le ciel, ena enn periode le temps kot bann “malheur” augmenté pou la terre ek so bann habitant.
7. Lor ki kitsoz deuxieme psaume kozé, ek dapré sa psaume-la, ki possibilité bann dimoune ena?
7 Deuxieme psaume aussi koz dan enn fason prophetik lor lepok kan Jésus vinn le Roi lor mont Sion dan le ciel. (Lire Psaume 2:5-9; 110:1, 2.) Mais selman, sa psaume-la montré ki ena enn periode le temps kot bann dirigeant lor la terre ensam avek bann dimoune ki zot dirigé, gagne possibilité pou soumette-zot ar regne Christ. Zot encouragé pou “servi zot bon jugement” ek pou laisse-zot “corrigé.” Oui, pendant sa periode le temps-la, ‘tou bann ki rod protection [Bondié], zot heureux’ kan zot servi Jéhovah ek so lé-Roi ki Li’nn etabli. Sa vedir ki, pendant presence kot Jésus le Roi, bann dimoune gagne possibilité pou changé.—Ps. 2:10-12.
Reconette sa signe-la
8, 9. Kisannla ti pou reconette signe presence Christ ek ti pou comprend so signification?
8 Kan bann Pharisien ti questionne Jésus lor lepok ki Royaume pou vini, Jésus ti reponn zot ki sa Royaume-la pa pou vinn dan ‘enn fason ki tou dimoune pou trouvé,’ couma zot ti pensé. (Luc 17:20, 21) Bann ki pa ti croire Jésus, pa ti pou comprend. Couma zot ti pou kapav comprend sa, alors ki zot pa ti mem reconette Jésus couma zot futur lé-Roi? Mais kisannla ki ti pou reconette signe presence Christ ek comprend so signification?
9 Jésus ti ajouté ki so bann disciple ti pou trouve signe-la dan enn fason bien clair pareil couma zot ti pou kapav trouve “zeclair kan li eclairé, [ki] brillé depuis enn boute ziska lot boute dan le ciel.” (Lire Luc 17:24-29.) Li interessant pou remarké ki Matthieu 24:23-27 associé directement sa point-la avek signe presence Christ.
Generation ki trouve signe presence Christ
10, 11. (a) Ki l’explication nou’nn gagné ziska l’heure lor mot “generation” ki trouve dan Matthieu 24:34? (b) Pou bann disciple Jésus, kisannla ti pou forme partie dan sa “generation-la”?
10 Dan le passé, sa periodik-la inn deja expliké ki dan premier siecle, “sa generation” ki mentionné dan Matthieu 24:34-la ti represente “bann Juif ki pa ti’lé repenti ek ki ti vive dan sa lepok-la.”b Sa l’explication-la ti parette raisonnable parski a chaque fois ki Jésus ti servi mot “generation,” li ti servi sa dan enn sens negatif. Dan la plupart cas, Jésus ti associé sa mot-la avek enn lot mot negatif couma “mauvais” pou montré ki qualité sa generation-la ti été. (Mat. 12:39; 17:17; Marc 8:38) Alors, nou ti pensé ki dan realisation moderne, Jésus ti pé koz lor “generation” bann mauvais dimoune ki pa’lé croire, ki pou trouve bann l’evenement ki pou ena dan “conclusion sa systeme-la” (suntéléïa) ek la fin (télos) sa systeme-la, toulé-deux.
11 Li vrai ki kan Jésus ti servi mot “generation” dan enn sens negatif, li ti pé koz soit avek, soit concernant bann mauvais dimoune dan so lepok. Mais dan Matthieu 24:34, eski “sa generation-la” represente bann mauvais dimoune dan so lepok? Rappel bien ki c’est quatre disciple Jésus ki ti approche li “en privé.” (Mat. 24:3) Parski Jésus pa ti servi bann mot negatif kan li ti koz ar zot lor “sa generation-la,” bann zapotre ti comprend ki c’est zot ek bann lezot disciple ki ti pou forme partie dan sa “generation” ki pa pou passé-la “avant ki tou sa bann kitsoz-la arrivé.”
12. Couma contexte Matthieu 24:34, montré nou kisannla Jésus ti pé kozé kan li ti servi mot “generation”?
12 Lor ki base nou tire sa conclusion-la? C’est kan nou examine contexte sa verset-la bien. Dan Matthieu 24:32, 33, Jésus ti dire: “Asterla, prend l’exemple pié figue ek aprann sa: Couma so ti branche vinn tann ek gagne bann feuille, zot koné ki l’été pré pou vini. Alors zot aussi pareil, kan zot trouve tou sa bann kitsoz-la, zot bizin koné ki li pré, li derriere la porte.” (Compare avek Marc 13:28-30; Luc 21:30-32.) Apré sa, dan Matthieu 24:34, nou lire: “Vrai-mem mo dire zot: Non, sa generation-la pa pou passé avant ki tou sa bann kitsoz-la arrivé.”
13, 14. Kifer nou kapav dire ki “generation” ki Jésus ti kozé, ti represente so bann disciple?
13 Jésus ti dire ki c’est so bann disciple, ki bientot ti pou gagne l’esprit saint, ki ti pou kapav tire certain conclusion kan zot ti pou trouve “tou sa bann kitsoz-la” arrivé. Alors surement Jésus ti pé pense so bann disciple kan li ti ajouté dan verset apré: “Non, sa generation-la pa pou passé avant ki tou sa bann kitsoz-la arrivé.”
14 Bann disciple Jésus zot different ar bann dimoune ki pa’lé croire. Bann disciple zot, zot pa ti pou zis trouve sa signe ki Jésus ti donné-la, mais zot ti pou aussi comprend so signification. Zot ti pou “aprann” ar bann l’evenement ki ti pou ena dan sa signe-la ek zot ti pou ‘konn’ zot vrai signification. Zot ti pou comprend bien ki “li [Fils de l’homme] pré, li derriere la porte.” Li vrai ki bann Juif ki pa ti’lé croire ek bann chretien oint ki ti fidele, toulé-deux ti trouve enn ti realisation seki Jésus ti dire dan premier siecle. Mais c’est zis so bann disciple oint dan sa lepok-la ki ti kapav aprann kitsoz ar sa bann l’evenement-la—zot tousel ki ti kapav comprend vrai signification seki zot ti trouvé.
15. (a) Dan nou lepok, kisannla ki forme partie dan sa “generation” ki Jésus ti kozé-la? (b) Kifer li impossible pou calcule exactement comié le temps “sa generation-la” duré? (Guette l’encadré page 29.)
15 Bann dimoune ki pa comprend bann kitsoz spirituel zordi, zot pensé ki pa’nn arrive okenn kitsoz ‘ki tou dimoune inn trouvé’ en rapport avek signe presence Jésus. Zot dire ki tou kitsoz pé deroule pareil couma dan le passé. (2 Pierre 3:4) Parkont, bann fidele frere oint Jésus Christ, groupe ki represente Jean dan lepok moderne, finn reconette sa signe-la dan enn fason bien clair pareil couma zot ti pou trouve enn zeclair brillé, ek zot inn comprend so vrai signification. Zordi, en tant ki groupe, sa bann chretien oint-la zot-mem sa “generation” bann dimoune ki vive dan mem lepok ek ki pa pou passé “avant ki tou sa bann kitsoz-la arrivé.”c Sa faire nou comprend ki certain parmi bann frere oint Jésus Christ pou encore toujours lor la terre kan la grande tribulation ki Jésus ti annoncé pou commencé.
“Contigne veillé”
16. Ki tou bann disciple Jésus Christ bizin faire?
16 Mais li pa assez ki nou zis reconette signe presence Jésus. Jésus ti dire aussi: “Seki mo dire zot, mo dire sa ar tou dimoune: Contigne veillé.” (Marc 13:37) Sa c’est enn kitsoz bien-bien important pou nou tou zordi, ki nou enn chretien oint ou-soit enn membre la grande foule. Plus ki 90 an inn passé depuis ki Jésus inn vinn le Roi dan le ciel en 1914. Nou bizin montré ki nou’nn paré ek contigne veillé mem si li difficile pou faire sa. Nou pou kapav faire sa si nou bien comprend ki Christ li present dan enn fason invisible ek ki li pé regné. Si nou rappel sa, nou pa pou blié aussi ki bientot li pou vinn detruire so bann l’ennemi “dan enn l’heure ki [nou] pa attann.”—Luc 12:40.
17. Ki sa connaissance lor presence Christ-la bizin faire nou realisé, ek ki nou bizin bien decidé pou faire?
17 Parski nou comprend seki presence Christ vedir, sa aide nou pou prend plus conscience ki nou bizin agir sans tardé. Nou koné ki Jésus li deja present ek ki li pé regne dan enn fason invisible dan le ciel depuis 1914. Bientot li pou vinn detruire bann mauvais dimoune ek li pou amenn bann grand changement lor la terre. Alors, nou bizin plus determiné pou participe avek zele dan travail ki Jésus ti annoncé kan li ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin [télos] pou vini.”—Mat. 24:14.
[Note]
a Nou comprend bien signification mot parousia dan 2 Corinthiens 10:10, 11 ek dan Philippiens 2:12 kan sa bann texte-la koz lor contraste ki ena entre “presence” ek “absence” l’apotre Paul. Pou plus renseignement lor sa mot-la, guette livre Étude perspicace des Écritures, volume 2, page 648-51.
b Guette La Tour de Garde, 1er novembre 1995, page 12-15, 19, 30, 31.
c Li parette ki sa generation-la vive dan mem lepok kot ena realisation premier vision ki mentionné dan livre Révélation. (Rév. 1:10–3:22) Sa l’aspect jour nou Seigneur-la inn commencé depuis 1914 ek li contigné ziska ki dernier chretien oint fidele mort ek ressuscité.—Guette livre La Révélation : le grand dénouement est proche ! page 24, paragraphe 4.
Couma ou pou reponn?
• Couma nou koné ki presence Jésus li enn periode assez longue?
• Kisannla ki reconette signe presence Jésus ek ki comprend so signification?
• Dan nou lepok, kisannla ki forme partie dan generation ki mentionné dan Matthieu 24:34?
• Kifer li impossible ki nou calcule exactement comié le temps “sa generation-la” li duré?
[L’encadré lor page 29]
Eski nou kapav calculé comié le temps “Sa generation-la” li duré?
En general, mot “generation” vedir bann dimoune different l’age ki vive dan mem lepok ou-soit ki pé trouve mem kitsoz ki pé arrivé. Par exemple, Exode 1:6 dire: “Finalement Joseph ti mort, ek aussi tou so bann frere ek tou sa generation-la.” Joseph ek so bann frere pa ti ena mem l’age, mais zot tou ti trouve seki ti pé arrivé pendant mem lepok. Parmi “sa generation-la” ti ena bann frere Joseph ki ti né avant li. Certain parmi ti mem contigne vive apré li. (Gen. 50:24) Lezot dan “sa generation-la,” couma Benjamin, ti né apré naissance Joseph ek kitfois zot ti contigne vive apré so la-mort.
Alors, kan servi mot “generation” en rapport avek bann dimoune ki vive dan enn certaine lepok, nou pa kapav dire exactement comié le temps sa lepok-la li duré. Mais nou koné ki sa lepok-la li ena enn la-fin ek ki li pa pou trop longue. Sa vedir ki, kan Jésus ti servi l’expression “sa generation-la” dan Matthieu 24:34, li pa ti pé donne so bann disciple enn methode pou zot calculé kan “dernier jour” pou fini. Au contraire, Jésus ti dire ki zot pa pou konn “sa jour-la ek sa l’heure-la.”—2 Tim. 3:1; Mat. 24:36.
[Zimage lor page 26, 27]
Apré ki Jésus inn vinn le Roi en 1914, Révélation montré li pé sorti couma enn “vainker”
[Zimage lor page 28]
“Non, sa generation-la pa pou passé avant ki tou sa bann kitsoz-la arrivé”