Kan Royaume Bondié pou vini?

“SEIGNEUR, eski c’est asterla ki to pé retabli royaume Israël?” (Actes 1:6) Bann zapotre ti bien envie koné kan Jésus ti pou etabli so Royaume. Zordi, environ 2,000 an plitar, bann dimoune encore toujours envie koné: Kan Royaume Bondié pou vini?

Parski Jésus ti faire Royaume Bondié vinn theme so predication, ou kapav attann ki li ti koz lor sa question-la. C’est seki li ti faire! Plusieurs fois li ti koz lor enn lepok precis ki li ti appel so “presence.” (Matthieu 24:37) Sa presence-la ena enn rapport direct avek moment kot Royaume Messianik pou etabli. Ki été presence Christ? Anou examine quatre point ki la Bible faire nou koné concernant sa presence-la.

1. Presence Christ ti pou commencé bien longtemps apré so la-mort. Jésus ti raconte enn parabole kot li ti compare li-mem ar enn zom ki “ti al dan enn pays bien loin pou li gagne pouvoir royal,” ou-soit pou li “gagne enn royaume.” (Luc 19:12; note) Couma eski sa l’exemple prophetik-la inn realisé? Eh bien, Jésus ti mort ek ti ressuscité; apré sa li ti al dan “enn pays bien loin,” setadir le ciel. Pareil couma Jésus ti annoncé dan enn lot parabole ki pareil, li ti pou retourné en tant ki lé-roi selman “apré enn bon boute lé-temps.”—Matthieu 25:19.

Inpé l’année apré ki Jésus ti monte dan le ciel, l’apotre Paul ti ecrire: “Sa zom-la [Jésus] ti offert enn sel sacrifice pou bann peché pou touletan ek li ti assize dan coté droite Bondié, ek depuis sa li ti attann ziska ki place so bann l’ennemi couma enn ti-stool pou so lipié.” (Hébreux 10:12, 13) Alors kan Jésus ti arrive dan le ciel, li ti bizin attann enn bon boute lé-temps. Sa periode kot li ti bizin attann-la ti fini kan Jéhovah ti faire so Garson vinn le Roi dan sa Royaume messianik ki ti’nn promette depuis bien longtemps-la. C’est lerla ki presence Christ ti commencé. Eski bann dimoune lor la terre ti pou trouve sa l’evenement bien important-la?

2. So presence li invisible pou bann dimoune. Rappel ki Jésus ti koz lor signe so presence. (Matthieu 24:3) Si so presence ti pou visible pou tou dimoune, eski enn signe ti pou necessaire? Anou prend enn l’exemple: Maziné ki ou pé al bord la mer. Toute longue chemin, ena bann panneau ki montré ou dan ki direction ou bizin allé. Mais enn fois ki ou’nn fini arrive lor la plage ek ki ou pé debouté dan bord de l’eau avek sa grand la-mer-la devant ou, eski ou pou attann pou trouve enn panneau avek enn grand fleche kot inn ecrire enn gros “La mer”? Pa ditou! Kifer ou bizin enn panneau pou montré ou enn kitsoz ki ou kapav facilement reconette avek ou lizié?

C’est pa pou montré nou enn kitsoz ki tou dimoune pou kapav trouvé ar zot lizié ki Jésus ti decrire signe so presence. Li ti faire sa pou aide nou reconette enn kitsoz ki pou arrivé dan le ciel. Ala kifer Jésus ti dire: “Royaume Bondié pa pé vini dan enn fason ki tou dimoune pou trouve li.” (Luc 17:20) Alors, couma eski sa signe-la pou montré bann ki lor la terre ki presence Christ inn commencé?

3. Pendant presence Jésus, ici lor la terre pou ena enn periode kot pou ena bann probleme bien grave. Jésus ti dire ki pou ena bann signe lor la terre ki pou montré ki li present en tant ki lé-Roi dan le ciel. Pou ena bann la-guerre, la-famine, tremblement de terre, l’epidemie ek bann dimoune pou desobeir la loi. (Matthieu 24:7-12; Luc 21:10, 11) Kifer pou ena tousala? La Bible expliké ki Satan, “chef sa lé-monde-la,” bien en colere parski li koné ki li reste enn tigit lé-temps asterla ki presence Christ en tant ki le Roi inn commencé. (Jean 12:31; Révélation 12:9, 12) Dan nou lepok nou ena beaucoup preuve ki montré ki Satan bien en colere ek ki presence Christ inn commencé. Surtout depuis 1914, enn l’année kot, dapré bann historien tou inn commence changé, nou finn trouve sa couma jamais nou’nn trouvé avant dan le monde entier.

Tousala kapav parette couma bann mauvais nouvelle, mais en realité c’est pa bann mauvais nouvelle. Sa vedir ki asterla Royaume messianik pé dirigé dan le ciel. Dan enn l’avenir bien proche, sa gouvernement-la pou dirige la terre partout. Mais couma bann dimoune pou konn sa Royaume-la pou ki zot kapav accepté so regne ek vinn so bann sujet?

4. Pendant presence Jésus pou ena enn l’activité predication dan le monde entier. Jésus ti dire ki so presence pou couma “lepok Noé.”a (Matthieu 24:37-39) Noé ti faire plus ki construire l’arche; li ti aussi “enn predicateur la justice.” (2 Pierre 2:5) Noé ti averti bann dimoune ki jugement Bondié ti pé vini. Jésus ti dire ki so bann disciple ti pou faire enn kitsoz pareil coumsa pendant so presence. Li ti annoncé: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”—Matthieu 24:14.

Couma nou ti trouvé dan lartik avant, Royaume Bondié pou detruire tou bann gouvernement sa lé-monde-la. L’activité predication averti bann dimoune ki sa gouvernement ki dan le ciel-la pré pou agir, ek donne zot l’occasion pou gagne la vie sauve dan sa destruction ki pé vini-la ek pou vinn bann sujet sa Royaume-la. Alors question bien important ki nou bizin pose-nou c’est: Couma nou pou reagir?

Eski Royaume Bondié, li pou enn bon nouvelle pou ou?

Pena okenn lot l’esperance ki pareil couma l’esperance ki ena dan message ki Jésus ti preché. Apré rebellion ki ti ena dan jardin Éden, ena bann millier l’année, Jéhovah ti decidé pou forme enn gouvernement ki pou remette bann kitsoz en ordre ek faire bann dimoune fidele regagne mem condition ki Li ti envie depuis commencement, setadir la vie eternel dan enn paradi ici lor la terre. Li aussi bien encourageant pou koné ki sa gouvernement ki Bondié inn promette depuis bien longtemps-la, pé dirigé asterla-mem dan le ciel, pa vrai? Li pa enn kitsoz vague, ki nou pa mem sur si li existé mais li enn realité!

Asterla le Roi ki Jéhovah inn choisir, pé regné au milieu so bann l’ennemi. (Psaume 110:2) Sa lé-monde zordi-la li rempli ar corruption ek li eloigné ar Bondié. Dan sa lé-monde-la, Messie pé accompli desir so Papa pou rod tou bann ki envie konn Bondié couma Li été vrai-mem ek ki envie adore Li “avek l’esprit ek la verité.” (Jean 4:24) N’importe ki zot race, ki zot l’age, ek dan n’importe ki l’environnement zot sorti, tou dimoune kapav gagne l’esperance pou vive lor la terre kan Royaume Bondié pou dirigé. (Actes 10:34, 35) Nou encourage ou pou accepté sa joli l’occasion ki ou ena-la. Asterla-mem aprann konn Royaume Bondié pou ki ou kapav vive kan sa Royaume-la pou dirige la terre avek la justice pou touletan!—1 Jean 2:17.

[Note]