Jeune, choisir pou servi Jéhovah asterla-mem
“Pa abandonne bann kitsoz ki to’nn aprann ek ki finn convaink toi pou croire.”—2 TIM. 3:14.
1. Couma Jéhovah considere service sacré ki so bann jeune Témoins offert Li?
POU Jéhovah, service sacré ki bann jeune offert Li, ena tellement enn grand l’importance, ki Li finn faire ecrire enn prophetie lor zot. Enn psalmiste ti chanté: “To peuple pou porte-li volontaire, jour ki to rassemblé to l’armée. Dan la gloire la sainteté, to ena to groupe jeune-gens couma bann goutte la rosée ki sorti kot soleil levé.” (Ps. 110:3) Oui, Jéhovah ena enn grand l’estime pou bann jeune ki envie servi Li.
2. Ar ki l’influence bann jeune bizin faire face zordi concernant zot l’avenir?
2 Zot, bann jeune ki dan congregation chretien, eski zot finn voué zot la-vie ar Jéhovah? Kitfois beaucoup trouve sa difficile pou choisir pou servi vrai Bondié. Bann directeur bann compagnie, bann professeur, ek parfois bann membre la famille ek bann camarade encourage bann jeune pou poursuive bann l’objectif materialiste. Kan bann jeune poursuive bann l’objectif spirituel, souvent bann dimoune critik zot. Mais avredir, servi vrai Bondié sa-mem pli bon fason vive ki ou kapav ena. (Ps. 27:4) En rapport avek sa, anou examine trois question: Kifer ou bizin servi Bondié? Couma ou kapav reussi amenn enn la-vie ki en accord avek promesse ki ou’nn faire pou servi Bondié malgré seki lezot dire ou-soit faire? Ki bann possibilité extraordinaire pou servi Jéhovah kapav presente devant ou?
Servi Jéhovah c’est pli bon kitsoz ki ou kapav faire
3. Ki l’effet creation Jéhovah bizin ena lor nou?
3 Kifer ou bizin servi vrai Bondié, enn Bondié ki vivant? Révélation 4:11 donne nou raison principal: “To digne, Jéhovah, oui nou Bondié, pou gagne la gloire, l’honneur ek pouvoir, parski to finn crée tou kitsoz, ek a cause to volonté zot existé ek zot finn crée.” Jéhovah Li-mem Createur extraordinaire tou kitsoz ki existé. La terre vrai-mem joli, pa vrai? Bann pié, bann fleur, bann zanimo, bann l’ocean, bann montagne, ek bann cascade—c’est Jéhovah ki’nn faire tousala. Psaume 104:24 dire: “La terre rempli ar seki [Bondié inn] faire.” Nou kapav bien reconnaissant envers Jéhovah ki avek amour, inn donne nou enn lekor ek enn l’esprit ki permette nou apprecié la terre ek bann bon kitsoz ki lor la! Eski sa grand reconnaissance ki nou ena pou creation Jéhovah-la pa bizin pousse-nou pou servi Li?
4, 5. Ki bann kitsoz ki Jéhovah ti faire, ti aide Josué pou vinn proche ar Li?
4 Josué ki ti guide nation Israël, ti dire bann parole ki donne nou enn lot raison pou servi Jéhovah. Vers la fin so la-vie, li ti dire peuple Bondié: “Zot bien koné avek tou zot leker ek tou zot nâme ki dan tou bann bon parole ki Jéhovah zot Bondié inn dire zot, pena enn sel parole ki pa finn accompli. Tou finn realisé pou zot.” Kifer Josué ti kapav dire sa?—Jos. 23:14.
5 Kan Josué ti enn zenfant en Égypte, surement li ti tann koz lor promesse ki Jéhovah ti faire pou donne bann Israélite enn pays. (Gen. 12:7; 50:24, 25; Ex. 3:8) Apré sa, li ti trouvé couma Jéhovah ti commence realise so promesse kan Li ti amenn dix plaie lor l’Égypte ek kan Li ti force Pharaon ki ti teti, pou laisse bann Israélite allé. Josué ti parmi bann ki ti traverse la mer Rouge en securité ek li ti trouvé couma Pharaon ek so l’armée ti detruire kan la mer ti referme lor zot. Pendant enn longue voyage dan “enn grand desert ki faire peur,” desert Sinaï, Josué ti trouvé couma Jéhovah ti donne bann Israélite tou seki zot ti bizin. Pena enn sel Israélite ki ti mort de soif ou-soit de faim. (Deut. 8:3-5, 14-16; Jos. 24:5-7) Kan le temps ti’nn arrivé pou bann Israélite faire la guerre ek gagne la victoire lor bann nation cananéen ki ti bien puissant, ek prend la Terre promise, Josué ti trouvé couma sa Bondié ki li ek lezot Israélite ti adoré-la ti soutenir zot dan sa travail-la.—Jos. 10:14, 42.
6. Ki pou aide ou pou developpe enn desir pou servi Bondié?
6 Josué ti koné ki Jéhovah ti’nn tini So bann promesse. Alors, li ti kapav dire: “Moi ek mo famille, nou pou servi Jéhovah.” (Jos. 24:15) Ki ou kapav dire lor ou? Kan ou reflechi lor bann promesse ki vrai Bondié inn deja realisé ek bann ki Li pou realisé, eski sa pa faire ou envie servi Li pareil couma Josué?
7. Kifer nou bien bizin prend bapteme?
7 Kan ou examine bien tou seki Jéhovah inn crée ek ou medite lor so bann promesse extraordinaire lor ki ou sur ou kapav compté, sa bizin pousse ou, pa zis pou voué ou la-vie ar Jéhovah mais aussi pou montré sa voeu-la kan ou prend bapteme. Tou seki envie servi Bondié bizin prend bapteme. Jésus, nou l’Exemple inn montré sa bien. Zis avant li commence so l’activité couma le Messie, li ti al vers Jean le Baptiste pou prend bapteme. Kifer Jésus ti prend bapteme? Li ti dire plitar: “Mo finn sorti dan le ciel mo finn vinn lor la terre, pa pou faire mo volonté, mais volonté celui ki finn envoye moi.” (Jean 6:38) Jésus ti prend bapteme pou montré ki li ti presente li-mem devant so Papa pou faire So volonté.—Mat. 3:13-17.
8. Kifer Timothée ti choisir pou adore Bondié, ek kitfois ki ou, ou pou bizin faire?
8 Anou prend aussi l’exemple Timothée, enn jeune chretien. Avek le temps Jéhovah ti donne li beaucoup travail ek beaucoup responsabilité. Kifer Timothée ti decide pou servi vrai Bondié? La Bible dire nou ki ‘li ti aprann bann l’enseignement biblik ek ti’nn convaink li pou croire ladan.’ (2 Tim. 3:14) Si ou finn etudié Parole Bondié ek finn convaink ou pou croire ki so bann l’enseignement vrai, alors ou dan mem situation ki Timothée. Asterla ou bizin prend enn decision. Kifer ou pa koz ar ou bann parent lor seki ou envie faire? Avek l’aide bann ancien, zot kapav aide ou pou comprend bann condition biblik ki ou bizin rempli pou prend bapteme.—Lire Actes 8:12.
9. Ki l’effet ou bapteme kapav ena lor lezot dimoune?
9 Si ou prend bapteme, sa pou enn bon commencement dan ou service pou vrai Bondié. Kan ou faire sa, coumadir ou pé rente dan enn longue la-course kot ou pou gagne bann recompense: dan l’avenir ou pou gagne la vie eternel, ek asterla, la joie pou faire volonté Bondié. (Héb. 12:2, 3) Bann membre ou famille ki deja pé participe dan sa la-course-la ek ou bann camarade dan congregation, zot aussi zot pou gagne enn grand la-joie. Mais, seki pli important encore, ou pou faire leker Jéhovah content. (Lire Proverbes 23:15.) Bien sur, kitfois bann lezot dimoune pa pou comprend kifer ou finn choisir pou adore Jéhovah ek zot kapav critik ou decision. Zot kapav mem opposé ar decision ki ou finn prend. Mais ou kapav reussi faire face ar tou sa bann difficulté-la.
Kan bann dimoune critik ou, ou-soit opposé ar ou
10, 11. (a) Ki bann question certain kapav pose ou concernant ou decision pou servi Bondié? (b) Ki ou kapav aprann ar fason ki Jésus ti reponn bann question lor vrai l’adoration?
10 Li possible ki ou bann camarade lekol, ou bann voisin, ek bann membre ou famille pa comprend kifer ou finn prend decision pou servi Jéhovah. Zot kapav demann ou kifer ou finn faire sa choix-la ek pose ou bann question lor ou bann croyance. Couma ou bizin reponn zot? Bien sur, ou bizin examine ou bann pensée ek ou bann sentiment pou ou kapav explik bann raison ki’nn pousse ou pou faire sa choix-la. Pou reponn bann question lor ou bann croyance, pena pli bon l’exemple ki ou pou kapav suive ki l’exemple Jésus.
11 Kan bann chef religieux juif ti pose Jésus question lor resurrection, li ti attire zot l’attention lor enn verset ki zot pa ti’nn prend en consideration. (Ex. 3:6; Mat. 22:23, 31-33) Kan enn scribe ti demann li ki pli grand commandement, Jésus ti cite bann verset ki adapté pou reponn li. Sa missié-la ti reconnaissant envers Jésus pou so reponse. (Lév. 19:18; Deut. 6:5; Marc 12:28-34) Jésus ti servi bann verset dan l’Ecriture sacré ek fason ki li ti kozé ti faire ‘la foule divisé entre zot a cause li,’ ek so bann l’ennemi pa ti kapav faire li di-tort. (Jean 7:32-46) Kan ou reponn bann question lor ou bann croyance, servi la Bible ek reponn “avek douceur ek enn grand respé.” (1 Pierre 3:15) Si ou pa konn reponse pou enn question, reconette ki ou pa koné ek dire dimoune-la ki ou pou al faire bann recherche. Plitar, guette l’Index des publications ou-soit CD-ROM Watchtower Library. Avek enn bon preparation, ou pou “koné couma pou reponn” bann dimoune.—Col. 4:6.
12. Kifer fodé pa ou laisse persecution decourage ou?
12 Surement bann dimoune pa pou zis pose ou bann question concernant ou decision ek ou bann croyance. Rappel bien ki c’est Satan le Diable, l’ennemi Bondié ki pé control sa lé-monde-la. (Lire 1 Jean 5:19.) Alors, li pa pou realiste ki ou attann ki tou bann dimoune pou felicite ou, ou-soit pou approuve ou decision, surement certain pou opposé ar ou. Certain pou kapav ‘koz en mal lor ou’ ek zot kapav contigne faire sa. (1 Pierre 4:4) Mais rappel, pa ou tousel ki’nn passe par la. Jésus Christ aussi ti konn persecution. L’apotre Pierre aussi, ek li ti ecrire: “Mo bann frere ki mo bien content, pa etonné a cause sa difé [persecution] ki ena parmi zot-la, ek ki pé vinn lor zot pou testé zot, coumadir c’est enn kitsoz drole ki pé arrive zot. Au contraire, contigne ena la joie parski zot pé participe dan bann souffrance Christ.”—1 Pierre 4:12, 13.
13. Kifer bann chretien kapav content kan zot gagne persecution?
13 Si ou pé souffert a cause persecution ou-soit l’opposition parski ou enn chretien, ou ena enn raison pou ou heureux. Kifer? Parski si le monde content ou ek accepté seki ou pé faire, sa pou montré ki ou pé vive en accord avek bann principe Satan—pa bann principe Bondié. Jésus ti donne sa l’avertissement-la: “Malheur, kan tou dimoune koz en bien lor zot, parski c’est coumsa-mem ki ancetre bannla ti agir envers bann fausse prophete.” (Luc 6:26) Si ou gagne persecution, sa montré ki Satan ek so lé-monde en colere parski ou pé servi Jéhovah. (Lire Matthieu 5:11, 12.) En plus, “si pé koz en mal lor [ou] a cause nom Christ,” c’est enn raison pou ou heureux.—1 Pierre 4:14.
14. Ki bienfait ou kapav gagné si ou reste fidele envers Jéhovah malgré persecution?
14 Kan ou reste fidele envers Jéhovah malgré l’opposition, ena au moins quatre bienfait ki ou kapav gagné. Ou donne enn temoignage lor Bondié ek lor so Garson. Ou fidelité dan bann l’epreuve encourage ou bann frere ek soeur spirituel. Kan certain dimoune ki pa konn Jéhovah observe ou bon conduite, sa kapav pousse zot pou rod Jéhovah. (Lire Philippiens 1:12-14.) Ek kan ou senti couma Jéhovah donne ou la force pou endure bann l’epreuve, ou l’amour pou Li pou grandi.
“Enn grand la-porte” ouvert devant ou
15. Ki “grand la-porte” ti ouvert devant l’apotre Paul?
15 Concernant so ministere dan Éphèse, l’apotre Paul ti ecrire: “Enn grand la-porte pou l’activité finn ouvert devant moi.” (1 Cor. 16:8, 9) Sa la-porte-la ti represente bann grand possibilité pou preche la bonne nouvelle ek pou faire bann disciple dan sa la-ville-la. Kan Paul ti passe par sa la-porte-la, li ti aide beaucoup dimoune pou aprann lor Jéhovah ek pou adore Li.
16. Couma bann chretien oint ki encore lor la terre finn passe par “enn la-porte ouvert” en 1919?
16 En 1919, Jésus Christ ki ti’nn gagne la gloire, ti place “enn la-porte ouvert” devant bann chretien oint ki ti encore lor la terre. (Rév. 3:8) Zot ti passe par sa la-porte-la ek ti commence preche la bonne nouvelle ek enseigne bann dimoune bann verité ki ena dan la Bible avek plus zele encore. Ki resultat zot inn gagné dan zot ministere? Zordi la bonne nouvelle finn al ziska dan boute la terre ek apepré sept million dimoune ena l’esperance pou gagne la vie eternel dan le monde nouveau ki Bondié pou etabli.
17. Couma ou kapav passe par “enn grand la-porte pou l’activité”?
17 “Enn grand la-porte” ki permette plus l’activité encore toujours grand ouvert devant tou bann serviteur Jéhovah. Bann ki passe par sa la-porte-la gagne la joie ek satisfaction a mesure ki zot participe plus dan predication la bonne nouvelle. Zot, bann jeune serviteur Jéhovah, ki valeur privilege pou aide bann dimoune pou “ena la foi dan la bonne nouvelle” ena pou zot? (Marc 1:14, 15) Eski ou finn deja reflechi lor possibilité pou faire pionnier permanent ou-soit auxiliaire? Construction bann la-Salle du Royaume, servi dan Béthel, ek service missionnaire c’est bann lezot possibilité ki beaucoup parmi zot kapav gagné. Alors ki pa reste beaucoup lé-temps avant ki sa mauvais lé-monde Satan-la disparette, chaque jour li vinn pli urgent ki nou participe dan sa bann forme service-la. Eski ou pou passe par sa ‘grand la-porte-la’ pendant ki ou encore ena le temps?
“Gouté ek guetté ki Jéhovah Li bon”
18, 19. (a) Ki ti aide David pou li ena enn grand desir pou servi Jéhovah? (b) Ki montré nou ki jamais David ti regretté ki li’nn servi Bondié?
18 David ti inspiré pou ecrire enn psaume ek ladan li ti invite lezot pou “gouté ek guetté ki Jéhovah Li bon.” (Ps. 34:8) Kan le roi David ti enn jeune berger, Jéhovah ti sauve li kan bann zanimo sauvage ti attak li. Bondié ti soutenir li kan li ti bizin laguerre kont Goliath ek ti delivré li dan beaucoup lezot malheur. (1 Sam. 17:32-51; Ps. 18, note ki ena la-haut) Parski Bondié ti ena enn grand l’amour fidele, sa ti pousse David pou ecrire: “Toi o Jéhovah mo Bondié, to’nn faire beaucoup kitsoz, oui bann kitsoz extraordinaire ki to’nn faire ek to bann pensée envers nou; pa kapav compare personne avek toi.”—Ps. 40:5.
19 Avek le temps, l’amour ki David ti ena pou Jéhovah ti vinn pli fort ek sa ti faire li envie loué Jéhovah avek tou so leker ek tou so l’esprit. (Lire Psaume 40:8-10.) Le temps ti’nn passé, mais David jamais pa ti regretté ki li’nn consacré so la-vie pou adore vrai Bondié. Pou li, reste attaché ar Bondié toulé-jour dan so la-vie, ti so pli grand tresor—sa ti donne li enn grand la-joie ki pa ti kapav comparé. Dan so vié jour, David ti dire: “To mo l’espoir, mo confiance depuis mo jeunesse, ah Souverain Seigneur Jéhovah. Mem ziska la vieillesse ek bann cheveux blanc, ah Bondié, pa quitte moi.” (Ps. 71:5, 18) Mem si avek l’age, la force David ti diminué, so confiance en Jéhovah ek so l’amitié pou Li ti vinn pli fort.
20. Kifer servi Bondié sa-mem pli bon kitsoz ki ou kapav faire dan ou la-vie?
20 La vie Josué, David ek Timothée confirmé ki servi Jéhovah c’est pli bon fason ki ou kapav amenn ou la-vie. Bann l’avantage materiel temporaire ki ou kapav gagné grace a enn carriere dan sa lé-monde-la pa pou kapav faire ou gagne bann bienfait ki dure pli longtemps ki ou pou gagné si ou ‘servi Jéhovah avek tou ou leker ek tou ou nâme.’ (Jos. 22:5) Si ou pankor voué ou la-vie ar Jéhovah dan la priere, demann ou-mem: ‘Ki pé empeche moi pou vinn enn Témoin de Jéhovah?’ Si ou deja enn adorateur Jéhovah baptisé, eski ou ti pou content gagne enn pli grand la-joie encore? Alors, faire plus dan ou ministere ek contigne progressé lor plan spirituel. Prochain lartik pou montré ou couma ou kapav progressé spirituellement kan ou suive l’exemple l’apotre Paul.
Couma ou pou reponn?
• Donne deux raison kifer nou bizin servi Bondié.
• Ki ti aide Timothée pou prend decision pou servi Bondié?
• Kifer ou bizin reste ferme kan ou gagne persecution?
• Ki bann possibilité pou servi Jéhovah kapav presente devant ou?
[Zimage lor page 22]
Servi Jéhovah sa-mem pli bon fason vive ki kapav ena
[Zimage lor page 23]
Eski ou kapav reponn bann question lor ou croyance?