Eski fason ki nou adore Bondié li important?
DAN livre La nature spirituelle de l’homme (en anglais), professeur Alister Hardy dire: “Religion bien enraciné dan nature humain.” Li parette ki bann resultat enn sondage ki’nn faire pa trop longtemps appuye sa conclusion-la. Dapré sa sondage-la, 86 pour cent population mondial dire ki zot pratik kit forme religion.
Sa sondage-la inn montré aussi ki sa bann croyant-la suive 19 grand religion ek bann ki dire zot chretien suive 37,000 different groupe religieux. Eski sa pa faire ou demann-ou si Bondié accepté tou sa bann different qualité l’adoration-la? Eski fason ki nou adore Bondié, li important?
Lor sa sujet important-la, li clair ki nou pa kapav prend bann decision ki basé zis lor nou bann sentiment ek l’opinion personnel. Li logik ki nou bizin faire bann recherche pou nou koné ki Bondié pensé lor la. Pou sa, nou bizin tourne vers Parole Bondié, la Bible. Kifer? Parski dan enn la priere, Jésus Christ li-mem ti dire Bondié: “To parole li la verité.” (Jean 17:17) Ek l’apotre Paul ki ti fidele ti confirmé: “Tou l’Ecriture finn inspiré par Bondié, ek li utile pou enseigné, pou corrigé, pou mette bann kitsoz en ordre.”—2 Timothée 3:16.
La Bible montré ki Bondié pa accepté tou l’adoration. Nou ena bann l’exemple dan l’Histoire ki montré ki forme l’adoration Bondié ti accepté ek ki bann forme l’adoration Li ti rejeté. Kan nou examine avek attention sa bann l’exemple-la, nou kapav aprann seki nou bizin faire ek pa faire pou ki Bondié accepté nou l’adoration.
Enn l’exemple dan le passé
Par moyen prophete Moïse, Jéhovah ti donne bann Israélite enn serie la loi ki ti montré zot couma pou adore Bondié dan enn fason ki Li ti pou accepté. Kan le peuple ti faire seki sa bann la loi-la, ki appel aussi la Loi mosaïk, ti demandé, Bondié ti accepté zot couma so peuple ek Li ti beni zot. (Exode 19:5, 6) Mais malgré benediction Bondié, nation Israël pa ti reste attaché ar forme l’adoration ki Bondié ti accepté. Plusieurs fois, zot ti vire ledo ar Jéhovah ek zot ti suive bann pratik religieux ki bann habitant bann pays autour zot ti pé suive.
Dan lepok bann prophete Ézékiel ek Jérémie dan septieme siecle a.n.l., beaucoup Israélite pa ti suive la Loi Bondié ek zot ti frequente beaucoup bann nation ki ti alentour. Bann Israélite ti pé pratik enn religion ki’nn melangé avek lezot letan zot ti suive coutume bannla ek participe dan zot bann fête. Beaucoup Israélite ti pé dire: “Anou vinn pareil couma bann nation, pareil couma bann famille ki dan sa bann pays-la, anou adore di-bois ek roche.” (Ézékiel 20:32; Jérémie 2:28) Zot ti dire ki zot ti adore Jéhovah, mais en mem temps, zot ti adore “bann zidole malprop,” ek zot ti mem offert zot zenfant en sacrifice ar sa bann zidole-la.—Ézékiel 23:37-39; Jérémie 19:3-5.
Bann archeologue appel sa qualité l’adoration-la syncrétisme, setadir enn pratik kot adore different bondié en mem temps. Ou-soit zot appel sa religion populaire. Zordi, beaucoup dimoune pensé ki dan nou societé kot ena enn quantité religion avek different croyance, nou bizin accepté tou kitsoz, parmi ena religion aussi. Alors, zot croire ki pena nanyin mal pou adore Bondié dan n’importe ki fason ki zot envie. Eski sa raisonnement-la bon? Eski nou zis bizin tolerant ek ena enn l’esprit ouvert? Guette certain kitsoz dan sa religion populaire ki bann Israélite infidele ti pratiké-la, ek ki bann resultat sa ti amené.
Bann Israélite ti pratik enn l’adoration ki ti melangé avek lezot l’adoration
Bann centre kot bann Israélite ti pratik zot l’adoration ki ti melangé avek lezot l’adoration, ti “bann place dan hauteur,” ou-soit bann temple kot ti ena bann l’autel, bann l’autel l’encens, bann colonne sacré, ek bann poteau sacré, ki ti apparemment bann representation en di-bois Ashéra, enn bondié fertilité cananéen. Dan Juda ti ena beaucoup centre l’adoration coumsa. Deuxieme Rois 23:5, 8 mentionne “bann place dan hauteur dan bann la ville Juda ek autour Jérusalem, . . . depuis Guéba [frontiere nord] ziska Béer-Shéba [frontiere sud].”
Dan sa bann l’endroit-la, bann Israélite ti faire “la fumée sacrifice pou Baal, pou soleil, pou la lune ek pou bann groupe zetoile ki ena dan zodiak ek pou tou seki ena dan le ciel.” Zot ti ena bann lakaz pou “bann prostitué sacré ki ti dan lakaz Jéhovah” ek zot ti passe zot bann zenfant “dan difé pou Molek.”—2 Rois 23:4-10.
Bann archeologue inn trouve bann centaine ti statue en la terre dan Jérusalem ek Juda, surtout dan ruine bann lakaz. La plupart ti bann representation enn madame touni avek bann sein ki enn grosseur exageré. Bann specialiste dire ki sa bann statue-la, c’est bann bondié fertilité Ashtoreth ek Ashéra. Certain croire ki sa ti ‘bann porte-bonheur ki ti aide bann dimoune pou zot reussi gagne zenfant.’
Couma bann Israélite ti considere sa bann centre l’adoration-la? Ephraim Stern, professeur dan l’université hébreu, Jérusalem, ti dire ki beaucoup parmi sa bann l’endroit-la ti kitfois “voué ar Yahvé [Jéhovah].” Bann l’ecriture ki’nn trouvé dan bann l’endroit kot bann archeologue faire bann recherche parette soutenir sa l’idée-la. Par exemple ena enn ki dire: “Mo beni toi par Yahvé Samarie ek par so ashéra,” ek enn lot dire: “Mo beni toi par Yahvé Témân ek par so ashéra!”
Sa bann l’exemple-la montré couma bann Israélite ti al kont zot bann principe kan zot ti melange l’adoration Jéhovah ki pur avek bann pratik païen ki faire honté. Resultat: zot ti tombe bien bas lor plan moral ek aussi dan bann tenebre spirituel. Couma eski Bondié ti trouve sa forme l’adoration kot zot ti’nn melange vrai l’adoration ensam avek bann pratik païen-la?
Couma Bondié ti reagir?
Bondié ti faire koné ki Li en colere ek par moyen so prophete Ézékiel, Li ti denonce sa forme l’adoration immoral ki bann Israélite ti pé faire-la Li ti dire: “Partout kot zot resté, zot bann la ville pou tombe en ruine ek zot bann l’endroit dan hauteur pou abandonné, pou ki sa reste en ruine, ek pou ki zot bann l’autel reste abandonné ek vrai-mem cassé ek pou ki zot bann zidole malprop vrai-mem disparette ek pou ki zot bann l’autel l’encens cassé boute-boute ek tou seki zot inn faire effacé net.” (Ézékiel 6:6) Pena doute ki pou Jéhovah, sa qualité l’adoration-la li pa ti acceptable ditou, ek Li ti rejette sa.
Jéhovah ti annoncé couma sa destruction-la ti pou vini. “Ala mo pé envoye . . . Neboukadretsar le roi Babylone, mo serviteur, ek vrai-mem mo pou faire zot vinn kont sa pays-la ek kont so bann habitant ek kont tou sa bann nation ki tout autour-la; ek mo pou detruire zot net . . . Tou sa pays-la pou vinn enn l’endroit en ruine.” (Jérémie 25:9-11) Pareil couma ti annoncé, en 607 a.n.l., bann Babylonien ti monte kont Jérusalem ek ti detruire la ville ek so temple net.
Concernant destruction Jérusalem, professeur Stern ki nou ti cité pli la-haut, noté ki bann ruine ki bann archeologue inn decouvert, zot “reflete clairement bann source biblik (2 Rois 25:8; 2 Chroniques 36:18-19) ki decrire couma bann lakaz ek muraille ti detruire, brulé ek tombé, crasé.” Li dire aussi: “Bann preuve archeologik pou sa periode dan l’histoire Jérusalem-la . . . kapav compte parmi bann preuve pli impressionnant ki’nn trouvé dan bann l’endroit ki cité dan la Bible.”
Ki leson nou kapav tiré?
Leson pli important ki nou tiré, c’est ki Bondié pa accepté enn l’adoration ki rod melange bann l’enseignement biblik avek bann doctrine, tradition, ou-soit coutume lezot religion. C’est enn leson ki l’apotre Paul ti bien comprend ek ki li ti prend compte. Li ti né Juif ek li ti instruire ek formé dan la loi bann Pharisien. Kan finalement li ti aprann ek li ti accepté ki Jésus ti Messie ki ti’nn promette, ki li ti faire? Li ti dire: “Bann kitsoz ki ti bann l’avantage pou moi, mo finn considere zot couma enn perte a cause Christ.” Li ti abandonne bann maniere faire ki li ti ena avant ek li ti vinn enn disciple Christ bien devoué.—Philippiens 3:5-7.
En tant ki enn missionnaire ki ti voyagé, Paul ti konn bien bann pratik religieux ek bann l’idée basé lor bann philosophie ki different peuple ti ena ek ki ti faire zot douté lor certaine kitsoz. A cause sa li ti ecrire bann chretien Corinthe: “Ki ena ki pareil entre la lumiere ek noirté? En plus, ki l’accord ena entre Christ ek Bélial? Ou-soit, ki part enn dimoune fidele ena avek enn non-croyant? Ki l’accord ena entre temple Bondié avek bann zidole? . . . Jéhovah dire: ‘A cause sa, sorti parmi zot, separé ar zot, ek arrete touche bann kitsoz impur’; ‘ek mo pou accueil zot.’ ”—2 Corinthiens 6:14-17.
Kan nou comprend ki fason ki nou adore Bondié, sa important pou Li, nou kapav demann-nou: ‘Ki qualité l’adoration Bondié approuvé? Couma mo kapav approche avek Bondié? Ek ki mo bizin faire personnellement pou adore Bondié dan enn fason ki Li pou accepté?’
Bann Témoins de Jéhovah pou content pou aide ou trouve bann reponse pou sa bann question-la ek lezot question ki ou kapav posé lor la Bible. Nou invite ou pou contacté bann Témoins dan la Salle du Royaume ki trouve dan ou l’endroit ou-soit pou ecrire bann ki publié sa magazine-la pou demann enn l’etude la Bible dan l’heure ek l’endroit ki approprié pou ou.
[Zimage lor page 9]
Enn ancien place sacré kot ti adore bann zidole, tel ‘Arad, Israël
[Remerciement photo page 9]
Garo Nalbandian
[Zimage lor page 9]
Bann ti statue Ashtoreth ki’nn decouvert dan bann ancien lakaz dan Judée
[Remerciement photo page 9]
Photograph © Israel Museum, Jerusalem; avek permission Israel Antiquities Authority