Predication lakaz par lakaz—Kifer li important zordi?

“Toulé-jour, dan temple ek lakaz par lakaz, zot ti contigne enseigne ek annonce la bonne nouvelle sans arreté lor le Christ, setadir Jésus.”—ACTES 5:42.

1, 2. (a) Pou ki methode predication, bann dimoune konn bann Témoins de Jéhovah? (b) Ki nou pou examiné dan sa lartik-la?

ZORDI preské partout lor la terre nou trouve sa: deux dimoune bien habillé arrete devant enn lakaz ek essaye partage enn ti message biblik ki koz lor Royaume Bondié ar sa dimoune ki zot joinde-la. Si dimoune-la interessé, li possible ki zot offert li bann publication ki basé lor la Bible ek propose li enn l’etude la Bible gratis kot li. Apré sa, zot al faire enn lot lakaz. Si ou participe dan sa l’activité-la, surement ou’nn remarké ki souvent bann dimoune fini koné ki ou enn Témoin de Jéhovah avant mem ki ou commence koz avek zot. Oui, tou dimoune konn bann Témoins de Jéhovah pou zot predication lakaz par lakaz.

² Nou servi different methode pou accompli mission ki Jésus inn donne nou pou preché ek pou faire bann disciple. (Mat. 28:19, 20) Nou rann temoignage kot bazar, dan bann coin la rue, ek dan lezot place publik. (Actes 17:17) Nou contacté beaucoup dimoune par telephone ek par lettre. Nou partage la verité ki ena dan la Bible avek bann dimoune ki nou joinde dan nou l’activité toulé-jour. Nou ena mem enn site officiel lor Internet, ki permette bann dimoune pou gagne bann renseignement ki basé lor la Bible dan plus ki 300 langue.a Tou sa bann methode-la amenn bann bon resultat. Pourtant, dan la plupart l’endroit, methode principal ki nou servi pou partage la bonne nouvelle c’est kan nou preche lakaz par lakaz. Lor ki fondement sa methode predication-la li basé? Couma inn arrivé ki bann serviteur Bondié dan lepok moderne inn servi sa methode-la sa quantité-la? Kifer li important zordi?

Methode bann zapotre

3. Ki bann instruction lor predication Jésus ti donne so bann zapotre, ek ki sa montré nou lor fason ki zot ti bizin preché?

³ Sa methode pou preche lakaz par lakaz-la li basé lor la Bible. Kan Jésus ti envoye so bann zapotre preché, li ti donne zot sa l’ordre-la: “Dan n’importe ki la ville ou-soit village ki zot rentré, rodé kisannla ki digne dan sa l’endroit-la.” Couma zot ti pou rod bann dimoune ki digne? Jésus ti dire zot al dan lakaz bann dimoune ek li ti ajouté: “Kan zot rente dan enn lakaz, dire bonjour bann dimoune ki reste la; si lakaz-la digne, ki la paix ki zot souhaité, vinn lor li.” Eski zot ti bizin attann ki enn dimoune invite zot pou zot al visite li? Remarké seki Jésus ti dire encore: “Partout kot kikenn pa accueil zot ou-soit pa ecoute zot parole, kan zot sorti dan sa lakaz-la ou-soit dan sa la ville-la sakouye la poussiere ki ena lor zot lipié.” (Mat. 10:11-14) Sa bann l’instruction-la montré bien ki a mesure ki bann zapotre “ti passe dan sa territoire-la, dan enn village apré lot, zot ti annonce la bonne nouvelle,” zot ti bizin prend l’initiative pou visite bann dimoune dan zot lakaz.—Luc 9:6.

4. Kot-sa dan la Bible li precisé ki bann chretien ti preche lakaz par lakaz?

⁴ La Bible precisé ki bann zapotre ti preche lakaz par lakaz. Par exemple, Actes 5:42 dire lor zot: “Toulé-jour, dan temple ek lakaz par lakaz, zot ti contigne enseigne ek annonce la bonne nouvelle sans arreté lor le Christ, setadir Jésus.” Apepré 20 an plitar, l’apotre Paul ti rappel bann ancien dan congregation Éphèse: “Mo pa finn hesité pou annonce zot tou bann kitsoz ki ti profitable, ni pou enseigne zot en publik ek lakaz par lakaz.” Eski Paul ti visite sa bann ancien-la avant ki zot vinn bann croyant? Oui, li ti visite zot parski parmi bann kitsoz ki li ti enseigne zot, ti ena “l’importance pou repenti devant Bondié ek pou ena la foi dan nou Seigneur Jésus.” (Actes 20:20, 21) Robertson, enn bibliste, ti faire sa commentaire-la lor Actes 20:20 dan so livre Word Pictures in the New Testament: “Li interessant pou remarké ki sa grand predicateur-la ti preche lakaz par lakaz.”

Enn l’armée sauterelle dan lepok moderne

5. Couma prophetie Yoël decrire l’activité predication?

⁵ Predication ki ti faire dan premier siecle donne nou enn l’idée lor pli grand travail ki ti pou faire dan nou lepok. Prophete Yoël ti compare l’activité predication bann chretien oint ar bann insecte ki ti detruire partout, parmi ti ena aussi bann sauterelle. (Yoël 1:4) Bann sauterelle-la avancé couma enn l’armée, zot passe lor bann l’obstacle, zot rente dan bann lakaz, ek mange tou seki lor zot chemin. (Lire Yoël 2:2, 7-9.) C’est vrai-mem enn description bien frappant lor perseverance ek travail a fond ki peuple Bondié pé faire kan zot pé preche la bonne nouvelle dan nou lepok! Methode pli important ki bann chretien oint ek “bann lezot brebis” servi pou realise sa prophetie-la c’est predication lakaz par lakaz. (Jean 10:16) Couma nou, bann Témoins de Jéhovah, nou’nn arrivé servi sa methode ki bann zapotre ti servi pou preché-la?

6. En 1922, ki l’encouragement ti donné en rapport avek predication lakaz par lakaz, mais couma certain ti reagir?

⁶ Depuis 1919 ziska zordi, finn mette l’accent lor responsabilité ki chaque chretien ena pou participe personnellement dan predication. Par exemple, enn lartik ki ti appel “Preché li important” dan La Tour de Garde 15 août 1922 (en anglais), ti rappel bann chretien oint l’importance pou “montré-zot zelé ek contigne amenn bann livre kot bann dimoune ek pou koz avek zot devant zot la porte, pou donne zot temoignage ki Royaume ki dan le ciel pré pou vini.” Dan Bulletin (zordi Ministère du Royaume) ti ena bann presentation kot ti ena beaucoup detail. Mais kan-mem sa, quantité Témoins ki ti pé preche lakaz par lakaz ti bien tigit au commencement. Certain pa ti’lé preché. Zot ti tire plusieurs pretexte, mais en realité, veritable probleme ki certain ti ena c’est ki zot ti pensé ki zot trop important pou preche lakaz par lakaz. A mesure ki ti mette plus l’accent lor predication, tigit par tigit beaucoup parmi zot ti’nn retire-zot dan l’organisation Jéhovah.

7. Dan bann l’année 50, ki li ti necessaire pou faire?

⁷ Plusieurs dizaine l’année apré, pli beaucoup Témoins ti’nn commence preché. Selman, li ti clair ki chaque proclamateur ti bizin gagne enn formation personnel pou preche lakaz par lakaz. Prend par exemple situation ki ti ena en Amérique. Au commencement bann l’année 50, 28 pour cent bann Témoins dan sa pays-la ti pé zis distribué bann feuille l’invitation ou-soit ti pé debouté lor chemin avek bann periodik. Plus ki 40 pour cent pa ti regulier dan predication, zot ti laisse plusieurs mois passé sans ki zot preché. Ki ti bizin faire pou aide tou bann chretien baptisé preche lakaz par lakaz?

8, 9. En 1953, ki programme formation ti’nn commencé, ek ki resultat sa inn produire?

⁸ Dan enn l’assemblée international dan New York, en 1953, ti mette beaucoup l’accent lor predication lakaz par lakaz. Frere Nathan Knorr, ti dire ki l’activité principal ki tou bann ancien bizin faire c’est aide chaque Témoin pou preche regulierement lakaz par lakaz. Li ti dire ki “sakenn bizin kapav preche la bonne nouvelle lakaz par lakaz.” Pou realise sa l’objectif-la, ti commence enn programme formation dan le monde entier. Bann ki pa ti encore sorti dan predication lakaz par lakaz ti gagne enn formation pou koné couma pou aborde bann dimoune devant zot la porte, pou raisonne avek zot lor la Bible, ek pou reponn zot bann question.

⁹ Sa programme formation-la ti produire bann resultat extraordinaire. Dan enn periode dix an, quantité proclamateur dan le monde entier ti’nn augmenté par 100 pour cent, bann nouvelle visite par 126 pour cent, ek bann l’etude la Bible par 150 pour cent. Zordi, preské sept million proclamateur pé preche la bonne nouvelle lor Royaume Bondié dan le monde entier. Sa augmentation-la c’est enn preuve ki Jéhovah pé beni bann zeffort ki so bann serviteur pé faire dan predication lakaz par lakaz.—Is. 60:22.

Mark bann dimoune pou zot sapé

10, 11. (a) Dapré Ézékiel chapitre 9, ki vision sa prophete-la ti gagné? (b) Couma sa vision-la pé realisé dan nou lepok?

¹⁰ Nou trouve l’importance pou preche lakaz par lakaz dan enn vision ki prophete Ézékiel ti gagné. Dan sa vision-la, Ézékiel ti trouve six zom avek bann zarme dan zot la main ek aussi enn septieme zom ki ti ena enn linge en lin ek lor so la hanche li ti ena enn recipient kot mette l’encre. Septieme zom-la ti gagne l’ordre pou “passe au milieu la ville” ek pou “mette enn mark lor front sa bann dimoune ki pé plaigné a cause bann kitsoz detestable ki pé faire dan sa la ville-la.” Apré ki sa septieme zom-la ti’nn mark bann dimoune, sa six zom ki ti ena bann zarme-la ti gagne l’ordre pou touye tou bann ki pena mark.—Lire Ézékiel 9:1-6.

¹¹ Nou comprend ki dan realisation sa prophetie-la, sa zom ki mette enn ‘linge en lin-la’ represente bann chretien oint ki encore lor la terre. Par moyen predication ek l’activité pou faire bann disciple, bann chretien oint pé mette enn mark symbolik lor front bann ki pé vinn forme partie dan groupe “bann lezot brebis” Christ. (Jean 10:16) Ki sa mark-la representé? C’est enn preuve ki montré bien, coumadir inn ecrire sa lor zot front, ki sa bann brebis-la zot bann disciple Jésus Christ. Zot inn voué zot la vie pou servi Jéhovah, zot inn prend bapteme ek zot inn mette nouveau personnalité lor zot. (Éph. 4:20-24) Sa bann dimoune ki couma bann brebis-la forme enn sel troupeau avek bann chretien oint ek zot aide bannla dan travail ki zot ena pou mark lezot dimoune encore.—Rév. 22:17.

12. Couma vision Ézékiel lor bann dimoune ki gagne enn mark lor zot front montré l’importance pou contigne rod bann dimoune ki couma bann brebis?

¹² Vision Ézékiel montré enn raison kifer li tellement important ki nou contigne rod bann dimoune ki “pé plaigné.” C’est parski la vie bann dimoune en danger. Bientot, sa six zom ki ena bann zarme-la, ki represente bann l’armée Jéhovah ki dan le ciel ek ki applik so jugement, pou detruire bann ki pena sa mark symbolik-la. Concernant sa jugement ki pé vini-la, l’apotre Paul ti ecrire ki le Seigneur Jésus, ensam avek “so bann ange puissant” pou tire “vengeance lor bann ki pa konn Bondié ek lor bann ki pa obeir la bonne nouvelle concernant nou Seigneur Jésus.” (2 Thess. 1:7, 8) Remarké ki pou juge bann dimoune dapré zot reaction ar la bonne nouvelle. Alors, predication la bonne nouvelle bizin contigné avek mem la force ziska la fin. (Rév. 14:6, 7) Sa mette enn grand responsabilité lor tou bann ki’nn voué zot la vie ar Jéhovah.—Lire Ézékiel 3:17-19.

13. (a) Ki responsabilité l’apotre Paul ti conscient ki li ena, ek kifer? (b) Ki responsabilité ou reconette ou ena envers bann dimoune dan ou territoire?

¹³ L’apotre Paul ti conscient ki li ti ena enn responsabilité personnel pou partage la bonne nouvelle avek lezot. Li ti ecrire: “Mo doit bann Grec ek bann Barbare, bann sage ek bann ki pena l’intelligence: alors, mo ena enn grand desir pou annonce zot la bonne nouvelle, zot aussi ki dan Rome.” (Rom. 1:14, 15) Parski Paul ti reconnaissant ki Bondié inn manifesté misericorde envers li, li ti senti-li obligé pou essaye aide lezot pou profite faveur Bondié, enn faveur ki personne pa merité, couma li-mem li’nn profite sa. (1 Tim. 1:12-16) Coumadir li ti ena enn dette envers chaque dimoune ki li ti joinde, enn dette ki li ti pou kapav payé zis kan li ti partage la bonne nouvelle avek sa dimoune-la. Eski ou reconette ki ou ena enn dette coumsa envers bann dimoune dan ou territoire?—Lire Actes 20:26, 27.

14. Pou ki raison principal nou preche en publik ek lakaz par lakaz?

¹⁴ Mem si li bien important pou sauve la vie bann dimoune, ena enn pli grand raison encore kifer nou bizin preche lakaz par lakaz. Dan prophetie ki trouve dan Malaki 1:11, Jéhovah dire: “Depuis soleil levé ziska soleil couché, mo nom pou grand parmi bann nation, ek . . . pou presente mo nom enn offrande, oui enn offrande ki pur; parski mo nom pou grand parmi bann nation.” Pou realise sa prophetie-la, bann ki’nn voué zot la vie ar Jéhovah pé loué so nom en publik partout lor la terre a mesure ki zot pé accompli zot mission avek humilité. (Ps. 109:30; Mat. 24:14) Oui, raison principal kifer nou preche en publik ek lakaz par lakaz c’est pou offert Jéhovah “enn sacrifice louange.”—Héb. 13:15.

Bann l’evenement important pé attann nou devant

15. (a) Lor septieme jour, couma bann Israélite ti augmente zot l’activité kan zot ti marche autour Jéricho? (b) Ki sa montré lor l’activité predication?

¹⁵ Ki bann developpement pou ena encore dan l’avenir en rapport avek l’activité predication? Nou ena enn l’exemple dan livre Josué kan bann Israélite ti pré pou al prend la ville Jéricho. Nou rappel ki zis avant Bondié detruire Jéricho, bann Israélite ti gagne l’ordre pou faire le tour la ville enn fois par jour pendant six jour. Mais lor septieme jour, zot ti bizin augmente zot l’activité. Jéhovah ti dire Josué: “Zot pou marche sept fois autour la ville, ek bann pretre pou soufflé bann cor. Ek pou bizin arrivé ki, kan zot pou soufflé corne belier, . . . tou le peuple bizin criyé bien fort enn grand criyé la guerre; ek muraille sa la ville-la pou bizin tombe net enba.” (Jos. 6:2-5) Li possible ki nou l’activité predication aussi pou augmenté. Mais ki sa augmenté ou non, kan pou arrive ler pou sa systeme-la detruire, nou pou’nn trouve pli grand temoignage ki’nn donné lor nom Bondié ek lor so Royaume couma jamais pa finn arrivé avant dan l’histoire l’humanité.

16, 17. (a) Ki pou arrivé avant ki “la grande tribulation” fini? (b) Ki nou pou examiné dan prochain lartik?

¹⁶ Kitfois pou arrive enn lepok kot message ki nou pé annoncé pou couma “enn grand criyé la guerre.” Livre Révélation dire ki bann message puissant lor jugement Bondié zot pareil couma “enn grand la grele, kot chaque roche ti pese apepré enn talent.”b Ek Révélation 16:21 dire: “Sa plaie-la ti extra grand.” Bientot pou annonce bann dernier partie jugement Bondié. Nou pankor koné ki role predication lakaz par lakaz pou joué ladan. Mais nou kapav sur ki avant la fin “la grande tribulation,” bann serviteur Jéhovah pou’nn faire konn so nom partout lor la terre couma jamais pa finn faire avant dan l’histoire l’humanité.—Rév. 7:14; Ézék. 38:23.

¹⁷ Pendant ki nou pé attann sa bann l’evenement extraordinaire ki devant nou-la, anou contigne preche la bonne nouvelle lor Royaume Bondié avek zele. Alors ki nou pé accompli sa mission-la, ki bann difficulté nou pé gagné dan nou predication lakaz par lakaz, ek couma nou kapav faire face ar sa bann difficulté-la? Nou pou examine sa bann question-la dan prochain lartik.

[Note]

Couma ou pou reponn?

• Lor ki fondement biblik predication lakaz par lakaz basé?

• Couma inn mette plus l’accent lor predication lakaz par lakaz dan lepok moderne?

• Kifer bann ki’nn voué zot la vie ar Jéhovah ena responsabilité pou preché?

• Ki bann l’evenement extraordinaire pé attann nou devant?

[Zimage lor page 12]

Pareil couma l’apotre Paul, eski ou conscient ki ou ena responsabilité pou preche ar lezot?

[Zimage lor page 13]

Frere Knorr, 1953