Predication porte-en-porte
1. Ki question nou kapav posé en rapport avek predication porte-en-porte, ek kifer?
1 “Bann ki ena l’experience pou preche la Verité dan different fason, pou d’accord ki azordi predication porte-en-porte avek ‘L’AURORE DU MILLÉNIUM,’ sa-mem fason pli efficace pou preche la Verité.” C’est seki nou kapav lire dan La Tour de Garde 1er juillet 1893 (en anglais) ki ti attire l’attention lor l’importance pou preché porte-en-porte. Bann dimoune dan le monde entier reconette bann Témoins de Jéhovah par zot predication porte-en-porte. Eski sa method-la li toujours efficace, parski dan certain pays li pé vinn pli difficile pou joinde bann dimoune kot zot?
2. Kifer nou kapav dire ki preché porte-en-porte li enn method ki trouve dan la Bible?
2 Enn method biblik ki important: La Bible koz lor predication porte-en-porte. Jésus ti donne so 70 disciple bann instruction, li ti mette zot deux par deux ek li ti dire zot al preche ar bann dimoune kot zot. (Luc 10:5-7) Enn tipé apré la mort Jésus, guette seki la Bible dire lor so bann disciple: “Toulé-jour, dan temple ek lakaz par lakaz, zot ti contigne enseigne ek annonce la bonne nouvelle lor Jésus Christ, sans arreté.” (Actes 5:42) L’apotre Paul aussi ti preché porte-en-porte avek zèle.—Actes 20:20.
3. Ki bann l’avantage nou gagné kan nou preché porte-en-porte?
3 Zordi, predication porte-enporte li toujours enn method important pou partage la bonne nouvelle. Li aide nou pou “rod” bann dimoune ki interessé dan enn fason bien organisé. (Mat. 10:11) En general bann dimoune pli relax kot zot. Kan nou koz avek zot face a face—kan nou tann zot la-voix, kan nou trouve bann expression lor zot figure, ek kan nou observe zot l’environnement—sa permette nou koné ki kitsoz ki interesse zot ek ki kitsoz tracasse zot. Kan nou preché porte-en-porte nou gagne plus l’occasion pou gagne bann longue conversation.
4. Couma nou kapav gagne bann pli bon resultat kan nou preché porte-en-porte
4 Adapté-ou: L’apotre Paul ti disposé pou faire bann changement “a cause la bonne nouvelle.” (1 Cor. 9:23) Kitfois nou kapav adapté nou program pou preché dan l’heure kot bann dimoune là kot zot, par exemple dan tantot, dan week-end ou-soit dan bann congé publik. Note tou bann absent ek essaye retourné enn lot l’heure ou-soit enn lot jour pendant la semaine.
5. Couma eski bann ki ena enn problem la santé, zot aussi zot kapav preché porte-en-porte?
5 Mem bann ki ena enn problem la santé kapav preché porte-en-porte. Kitfois nou kapav faire bann l’arrangement pou amenn zot dan bann lakaz kot zot pa pou gagne difficulté pou allé ek nou laisse zot preché dapré seki zot kapav. Enn soeur ki ti gagne difficulté pou respiré, ti bizin attann 30 minute avant li faire enn lot lakaz. Mais li ti bien content ek li ti bien satisfait kan li ti preche avek la congregation.
6. Kifer nou bizin preché porte-en-porte regulierement?
6 Nou encore contigne trouve bann dimoune sincere kan nou preché porte-en-porte. Enn proclamateur ti tape enn la-porte ek dimoune-la ti dire li: “Rentré. Mo koné kisannla ou été. Mo ti pé prié Bondié pou envoye enn kikenn pou aide moi, ek zis apré mo’nn tann la porte tapé. Bondié inn tann moi ek Li’nn envoye ou.” Bann resultat montré ki Jéhovah pé beni sa method predication-la. (Mat. 11:19) Oui, anou bien decidé pou preché porte-en-porte regulierement!