Servi Bien To Letan dan To Minister
Pandan lane servis 2014, bann Temwin Zeova inn pas 1,945,487,604 lertan dan zot minister. Sa montre ki zot determine pou res bien okipe dan servis Zeova! (Ps. 110:3; 1 Kor. 15:58) “Letan ki reste bien tigit.” Alor, eski to kapav servi bien sa letan-la pou kontakte plis dimounn dan to minister?—1 Kor. 7:29.
Pou ki nou kapav servi bien nou letan dan nou minister, nou bizin montre nou soup. Par exanp, si souvan to pas enn-er tan ouswa plis dan enn form predikasion ek to pa zwenn dimounn mem pou koze, eski to kapav fer bann sanzman pou to zwenn plis dimounn? Bann sitiasion pa parey dan tou landrwa. Me, bann sigzesion ki ena anba kapav ed twa pou servi bien to letan ek evit “tap bonavini dan ler.”—1 Kor. 9:26.
Predikasion Lakaz par Lakaz: Depi bien lontan, bann proklamater inn abitie koumans zot lazourne avek predikasion lakaz par lakaz. Me boukou dimounn travay enn zourne. Alor, eski to kapav prese dan lapremidi ouswa tanto, kan bann dimounn kot zot ek zot pli rilax? Pandan lazourne, kitfwa to pou gagn bann pli bon rezilta si to rann temwaniaz lor semin ouswa dan bann teritwar komersial.
Predikasion dan Bann Plas Piblik: Bann kongregasion bizin met bann latab ek prezantwar mobil dan bann plas dan zot teritwar, kot boukou dimounn ale-vini. (Get Nou Minister Ziliet 2013, p. 5.) Me si avek letan nepli ena enn kantite pasan dan sa bann plas-la, Komite Servis kitfwa pou deside pou met latab ouswa prezantwar mobil dan enn lot landrwa kot ena plis dimounn.
Bann Vizit ek Letid: Eski to kapav program to bann vizit ek letid dan bann ler kot sertin form predikasion pa tro marse? Par exanp, si predikasion lakaz par lakaz mars bien dan Samdi gramatin, eski to kapav met to bann letid dan lapremidi ouswa dan tanto? Si bann proklamater pe al fer vizit dan enn landrwa, olie ki zot tou al ansam dan enn sel loto, li preferab, si posib, ki zot servi plizir veikil, koumsa zot pou kapav fer plis dan zot minister.
Kan nou partisip dan predikasion nou kontan pou kont nou ler. Me kan nou gagn bann bon rezilta, nou pli kontan ankor. Si to trouve ki enn lapse to minister pa marse enn sertenn ler, esey enn lot. Priye Zeova, “Met larekolt” pou Li gid twa ek koumsa to kapav servi bien to letan dan to minister!—Mat. 9:38.