Bann Nouveau Fason pou Faire la Voie Publik
1. Ki l’exemple bann premier Chretien inn laisse nou?
1 Bann Chretien premier siecle pa ti zis preche lakaz-lakaz. Mais zot ti aussi preche en publik. (Actes 20:20) Par exemple, zot ti al dan temple kot zot ti koné zot pou trouve beaucoup dimoune. (Actes 5:42) Kan l’apotre Paul ti dan Athènes, toulé-jour li ti preche ar bann dimoune lor place bazar. (Actes 17:17) Azordi, fason principal ki nou partage la bonne nouvelle, c’est toujours par nou predication lakaz-lakaz. Selman, nou al aussi lor bann parking, dan bann territoire commercial, dan bann jardin, lor la voie publik kot ena beaucoup dimoune, ek lezot place pou nou kapav preche ar bann dimoune n’importe kot zot été. Alors ki l’organisation encourage tou bann proclamateur pou faire la voie publik n’importe kot zot kapav, beaucoup pou gagne l’occasion pou participe dan deux nouveau fason bien interessant pou faire la voie publik.
2. Ki nouveau fason pou faire la voie publik l’organisation ti essayé en Novembre 2011?
2 Predication Special lor la Voie Publik dan Bann Grand Lavil: Pareil couma nou trouvé lor page 16 ek 17 dan l’Annuaire 2013, en Novembre 2011, l’organisation ti essaye enn nouveau fason pou faire la voie publik dan New York. Ti mette bann joli presentation ek bann publication en plusieurs langue lor bann la table ek lor bann presentoir dan bann l’endroit bien precis sa lavil-la, kot ena beaucoup passant. Chaque jour, plusieurs millier dimoune ti passe par la. Parmi, ti ena bann ki reste dan bann appartement kot ena bann grand securité ek bann dimoune ki souvent pa kot zot. Beaucoup dimoune ti interessé pou gagne nou bann publication. Pa trop longtemps, dan zis enn mois, inn place 3,797 magazine ek 7,986 livre. Beaucoup passant ti demann enn letid la Bible. L’objectif principal sa disposition-la c’est pou commence bann letid la Bible. Alors, kan bann dimoune ki interessé ti donne zot l’adresse, desuite ti envoye sa bann l’adresse-la bann congregation approprié pou ki bann frere kapav al visite sa bann dimoune-la kot zot.
3. Ki pé faire pou ki lezot lavil aussi applik sa disposition-la?
3 Parski sa disposition-la finn gagne bann bon resultat, asterla pé commence applik sa dan bann lezot grand lavil partout dan le monde. Bann filiale pou guetté dan ki bann lavil kapav faire sa qualité la voie publik-la. En general, nou trouve beaucoup passant dan bann lavil kot ena bann lagar, beaucoup bureau ou-soit beaucoup appartement. Apré sa, la filiale pou ecrire bann congregation ki pou participe dan sa qualité la voie publik-la ek pou donne zot bann lezot instruction. Souvent servi bann pionnier permanent ek bann pionnier special, mem si dan certain l’endroit servi aussi bann pionnier auxiliaire pou participe dan sa travail-la.
4. Couma sa predication special lor la voie publik-la passé dan bann grand lavil?
4 Couma sa Predication-la Passé: Bann ki participe dan sa predication special dan bann grand lavil-la, attann bann dimoune vinn kot zot la table ou-soit presentoir mobile. Kan enn dimoune vinn pré, zot encourage li pou prend n’importe ki publication ki interesse li. Si li ena enn question, bann pionnier-la content pou reponn li a travers la Bible. Si li prend bann publication, bann pionnier-la pa pou koz lor donation. Mais, si li demandé couma nou travail financé, zot pou explik dimoune-la ki li kapav envoye bann donation lor l’adresse ki ena lor publication-la. Si li possible, zot pou demann dimoune-la: “Eski ou ti pou content ki enn kikenn vinn visite ou?” ou-soit “Eski ou ti koné ki ensam avek sa publication-la ou kapav gagne enn letid la Bible gratis?”
5. Couma enn couple ki’nn participe dan sa fason preché-la inn gagne bann bienfait?
5 Bann ki’nn participe dan sa nouveau fason preché-la inn gagne bann grand bienfait. Enn couple ti ecrire: “Kan nou deboute kot nou la table ek trouve plusieurs millier dimoune passé chaque jour, sa touche nou leker parski sa permette nou trouve grand travail ki pé faire pou zwenn bann dimoune partout lor later. Kan nou trouve sa quantité dimoune-la ek pensé couma Jéhovah vrai-mem interessé ar sakenn parmi zot, sa encourage nou pou contigne mette travail predication en premier dan nou lavi. Nou kapav mazinn Jéhovah pé examine leker chaque dimoune ki passe kot nou la table pou rod bann ki digne. Bien rare nou’nn senti-nou aussi proche ar bann ange ki travail ensam avek nou.”
6. (a) Ki lot disposition concernant predication lor la voie publik beaucoup congregation pé organisé, ek couma sa diferan avek predication special ki pé faire dan bann grand lavil? (b) Couma bann congregation kapav cooperé kan zot faire la voie publik?
6 La Voie Publik ki Organisé dan Ou Territoire: A part predication special lor la voie publik ki faire dan bann grand lavil, beaucoup college ancien pé organise enn nouveau fason preché dan zot territoire. Avek sa nouveau disposition-la, bann proclamateur servi enn la table ou-soit enn presentoir mobile ki zot mette dan enn place kot beaucoup dimoune passé dan territoire zot congregation. Sa li diferan avek predication special ki faire dan bann grand lavil, kot servi bann frere ek soeur ki sorti dan plusieurs congregation pou preche dan bann mem place kot ena beaucoup passant. En plis, c’est la filiale ki choisir sa bann lavil-la.—Guette l’encadré “Bizin Ena enn Bon Cooperation.”
7. Si bann ancien kapav organise la voie publik dan zot territoire, couma zot pou faire sa?
7 Bann ancien pou guetté si dan territoire congregation ena bann place kot ena beaucoup passant ek pou decidé si li pratik pou organise predication lor la voie publik la-bas. Kapav mette bann la table ou-soit bann presentoir mobile kot bann lagar, bann place publik, bann jardin, bann chemin ki bien frequenté, bann centre commercial, pré kot bann lekol, airport, ek bann place kot toulé-l’année ena bann l’evenement. Li enn l’avantage si touletan mette enn la table dan mem place, dan bann mem jour ek dan mem ler. Bann frere inn trouvé ki zot gagne bann pli bon resultat kan zot mette enn la table kot enn centre commercial plutot ki zis devant enn sel grand magazin, parski bann dimoune pé zis concentré-zot lor seki zot pé al faire dan sa magazin-la. Dan certain l’endroit, couma par exemple lor bann trottoir kot beaucoup dimoune passé, li pli bon ki mette enn pli tipti presentoir mobile. Bann ancien kapav al lor nou site pou download bann document special pou faire bann presentation pou La Tour de Garde, Réveillez-vous ! ek livre Ki la Bible enseigné? Inn prepare sa bann document-la specialement pou servi pou sa qualité la voie publik-la. Bann ki pou faire sa la voie publik-la dan zot territoire, pou preche inpé pareil couma bann ki faire la voie publik dan bann grand lavil, ek zot bizin suive bien bann instruction surveillant service. Si enn dimoune ki interessé donne so l’adresse ek li pa reste dan zot territoire, desuite zot bizin rempli enn form Veuillez suivre l’intérêt (S-43) ek donne sa secretaire.
8. Si congregation pa organise la voie publik, ki bann l’occasion ou ena pou preche en publik?
8 Faire la Voie Publik dan Ou Ministere: Kitfois certain congregation pena okenn place dan zot territoire kot ena beaucoup passant, alors li difisil pou zot mette enn la table ou-soit enn presentoir mobile. Selman, mem dan sa bann congregation-la, li bon ki bann proclamateur guetté si zot kapav aussi faire la voie publik dan zot ministere. Eski dan ou territoire ena enn place kot bann dimoune al faire shopping, enn centre commercial, ou-soit enn la boutik kot beaucoup dimoune allé? Eski ena enn jardin ou-soit enn place kot bann dimoune zwenn? Eski ena bann l’evenement kot souvent beaucoup dimoune zwenn? Si oui, ou ankor kapav faire la voie publik.
9. Kifer nou bizin faire tou pou preche avek bann dimoune n’importe kot sa zot été?
9 C’est volonté Jéhovah ki “tou sorte qualité dimoune sauvé ek gagne enn connaissance exact lor la verité.” (1 Tim. 2:4) A cause sa, nou faire tou seki nou kapav pou preche message Royaume Bondié avek maximum dimoune avant ki lafin vini. (Mat. 24:14) Dan beaucoup l’endroit li difisil pou zwenn bann dimoune kot zot. Malgré sa, nou kapav koz avek zot kan zot dan enn place publik. Kitfois c’est zis dan la voie publik ki certain dimoune pou gagne l’occasion tann la bonne nouvelle. Alors, anou accompli nou ministere a fond ek preche avek bann dimoune n’importe kot sa zot été.—2 Tim. 4:5.
[L’encadré page 5]
Bizin Ena enn Bon Cooperation
Nou finn aprann ki parfois bann proclamateur dan diferan congregation ki pré, faire la voie publik lor mem la rue, lor mem parking, ek devant mem magazin ou-soit mem lagar. Bann proclamateur dan diferan congregation finn laisse bann publication dan mem reception, salle d’attente, ou-soit bann place kot lave linge ek inn preche dan bann mem batiment commercial. A cause sa, parfois sa ti agace bann komersan ek bann dimoune ki reste dan l’endroit, mem si bann proclamateur pa preche dan mem ler. Alors, li pli bon ki bann proclamateur reste dan territoire zot congregation kan zot pé faire la voie publik.
Si bann proclamateur envie faire la voie publik dan territoire bann congregation ki a coté, zot bizin koz sa avek surveillant service. Coumsa li kapav contacté surveillant service sa lot congregation-la, pou gagne permission avant ki sa bann proclamateur-la al preche dan sa lot territoire-la. Si ena bann congregation diferan langue ki preche dan mem place, bann surveillant service bizin communiké entre-zot pou ki zot prend bann disposition ek pa agace bann dimoune ki reste dan l’endroit pou nanyé. Kan ena enn bon cooperation, tou kitsoz pou passe “couma bizin ek dan l’ordre.”—1 Cor. 14:40.
[Zimage lor page 6]
[Zimage lor page 6]