Rann temoignage dan enn fason efficace, dan bann place publik
1. Pareil couma bann chrétien dan premier siecle, couma bann chrétien zordi pé donne temoignage dan bann place publik, ek ki resultat zot pé gagné?
1 Pareil couma bann disciple Jésus dan premier siecle, bann chrétien zordi faire zeffort pou partage la bonne nouvelle avek bann dimoune, n’importe kot-sa zot été. (Actes 16:13; 17:17; 20:20, 21) Grace a bann zeffort ki zot pé faire pou rann temoignage dan bann place publik, zot pé joinde bann dimoune ki bien interessé, ki kitfois bann Témoins jamais ti pou joinde dan predication porte-en-porte.
2. Kifer li important ki nou ena discernement kan nou pé rann temoignage dan bann place publik, ek couma nou kapav faire nou part pou ki tou kitsoz passe en ordre?
2 Li bien important ki nou ena discernement kan nou rann temoignage dan bann place publik. Normalement, li bon ki nou pa trop attire l’attention lor nou-mem. Par exemple, si ena trop beaucoup proclamateur dan enn sel place, ou-soit ena beaucoup ki pé preché dan mem batiment commercial, bann dimoune pou senti-zot mal a l’aise a cause nou. Sa pou riské diminué dignité nou travail ek nou pa pou gagne bann bon resultat. Ki kapav faire pou evite sa? Certain congregation ki ena plusieurs place publik pou preché, finn trouve sa utile pou partage sa territoire-la en plusieurs partie. (1 Cor. 14:40) Tou kitsoz pou aussi passe en ordre si nou al preche zis dan territoire nou congregation, a moins ki comité de service la congregation finn prend bann disposition special pou aide enn lot congregation.—Guette Le Ministère du Royaume, novembre 1998, p. 5, par. 17-18.
3. Ki l’approche certain finn trouve efficace kan zot rann temoignage dan bann place publik?
3 Couma nou kapav aborde bann dimoune: Kan Jésus ti koz avek enn madame pré kot enn puits, li ti commence par enn ti commentaire, ek tigit par tigit li ti donne plus explication kan madame-la ti montré l’interet. (Jean 4:7-26) Sa l’approche-la, li aussi efficace dan certain situation zordi. Certain proclamateur finn remarké ki pou gagne bon resultat dan predication dan bann place publik, li bon ki zot passe dé-trois minute koz avek enn dimoune ki zot joinde, dire li bonjour ek montré ki zot interessé avek li. Apré sa zot partage la bonne nouvelle avek li. Zot dire enn kitsoz ki preoccupe bann dimoune dan territoire, ek souvent, sa ouvert chemin pou enn conversation. Kan bann dimoune dire seki tracasse zot, bann proclamateur-la ecoute bien. Ek apré sa, zot partage l’encouragement ki trouve dan Parole Bondié.—Rom. 15:4.
4. Couma eski nou kapav developpe l’interet bann dimoune ki nou joinde?
4 Couma nou kapav developpe l’interet bann dimoune: Chaque fois ki nou gagne enn bon conversation, nou bizin prend bann disposition pou developpe l’interet ki dimoune-la finn manifesté. Couma nou kapav faire sa? Kan conversation-la pré pou terminé, kitfois ou kapav tire ou carnet note, ek dire: “Mo bien content ki mo’nn koz avek ou. Eski li ti pou possible ki nou joinde enn prochaine fois pou contigne nou conversation?” Ou-bien ou kapav dire: “Mo ti pou bien content montré ou enn lartik. Mo sur ki sa pou interesse ou. Eski mo kapav amenn sa kot ou, ou-soit dan ou travail?” Certain proclamateur dire: “Eski mo kapav joinde ou par telephone? Ki ou numero?” Souvent zot gagne bann reponse positif.
5. Avek ki l’objectif nou bizin preché dan bann place publik?
5 Beaucoup dimoune ki finn gagne zot premier contact avek la verité dan bann place publik, finn accepté enn l’etude la Bible. Kapav dirige sa bann l’etude-la soit kot dimoune-la, soit dan so travail, ou-soit dan enn place publik ki approprié, ou-soit mem par telephone. Anou fixé enn l’objectif pou commence enn l’etude la Bible kan nou rann temoignage dan enn fason efficace, dan bann place publik.