Enn Nouvo Fason pou Pres ar Bann Dimounn dan Plas Piblik
1. Ki’nn ankouraz bann kongregasion ki ena bann plas piblik pou fer?
1 Bann kongregasion ki ena bann teritwar kot ena plas piblik finn ankouraze pou organiz predikasion dan sa bann plas-la. Zot kapav servi latab ouswa prezantwar mobil. Si zot pe servi prezantwar, bizin ena omwin enn proklamater ki debout ouswa asiz pre ar prezantwar-la. Selman kan servi latab, li bon ki ena de proklamater kot latab-la. Bann proklamater ki servi sa bann metod predikasion la bizin bien akeyan ek amikal. Si enn dimounn paret interese, enn parmi sa bann proklamater-la kapav koumans enn konversasion. Li kapav dir: “Eski ou finn deza demann oumem ki Bondie panse lor sa size-la?” Enn ouswa de lezot proklamater kapav debout dan enn plas ki pa tro lwin ar prezantwar ouswa latab-la ek fer temwaniaz informel.
2. Rakont enn lexperyans ki montre rezilta ki nou kapav gagne kan nou servi bann latab pou pres dan bann plas piblik.
2 Boukou letid Labib finn koumanse gras-a sa nouvo metod predikasion la. Enn etidian liniversite ti deside pou ekrir enn lartik lor bann Temwin Jéhovah, me li pa ti reisi trouv enn Lasal kot bann Temwin fer renion. Semenn apre, li ti trouv enn latab ki bann Temwin ti instale dan lakour liniversite. Li’nn aksepte enn letid Labib ek asterla li enn proklamatris batize ek li pe rann temwaniaz dan sa fason la.
3. Ki sertin proklamater panse lor sa fason pou rann temwaniaz an piblik la?
3 Enn ser ki bien kontan sa fason pou rann temwaniaz-la dir: “Sertin arete pou pran dernie nimero bann magazinn. Ena ki zame finn tann koz lor bann Temwin Jéhovah. Gras-a sa fason prese la, nou kapav zwenn boukou dimounn.” Enn lot ser dir: “Mo bien kontan sa nouvo fason rann temwaniaz la parski se bann dimounn ki vinn ver ou ek mem si zot pa vremem interese, zot kirye pou kone.”
4. Kifer li enn lavantaz kan instal bann prezantwar ouswa bann latab dan mem ler ek mem plas sak semenn?
4 Li enn lavantaz si nou instal bann prezantwar ouswa bann latab dan mem plas, mem zour, ek mem ler sak semenn. Koumsa, bann dimounn pou abitie trouv nou bann piblikasion ek zot pou santi zot pli alez pou koz ar nou, pou poz bann kestion ouswa pou pran bann piblikasion. Eski to kongregasion organiz predikasion dan bann plas piblik? Si wi, eski to pe partisip dan sa nouvo fason bien efikas pou “anons Rwayom Bondie” la?—Luc 9:60.