Bon Rezilta Avek Temwaynaz par Telefonn
1 Antan ki Temwin Zeova, nu pena zis lobzektif pu angaz nu dan predikasyon bon nuvel, me sirtu pu tus tu dimunn ki nu kapav avek mesaz Rwayom. (Akt 10:42; 20:24) Mem ki predikasyon lakaz-lakaz li tuzur nu mwayin prinsipal pu zwenn bann dimunn, selman la usi nu pa reysi zwenn zot tu. Alor, pu ‘reysi travay nu minister net,’ ek pu truv bann dimunn ki kuma bann muton, nu pe bizin servi lezot metod, parmi ena temwaynaz par telefonn.—2 Timote 4:5.
2 Dan buku landrwa, bann dimunn res dan bann apartman byin ot, uswa dan bann flat ki ena gard sekirite dan lantre. Alor, li difisil pu zwenn zot kan nu fer predikasyon lakaz-lakaz. Mem dan bann teritwar kot nu kapav pres lakaz-lakaz, buku dimunn pa kot zot. Purtan, buku temwin pe gayn bon rezilta kan zot servi telefonn pu zwenn sa bann dimunn la. Enn gramatin, enn kup ti pe pres lakaz-lakaz ek dan nef lakaz, zot pa finn zwenn personn.
3 Eski u ezite pu azut temwaynaz par telefonn dan u minister? Enn frer rekonet: “Mo mem mo pa kontan ki enn kikenn telefonn mwa pu vann bann lartik ar mwa, alor akoz sa mo pa tro an faver sa form temwaynaz la.” Me apre ki li finn fer zis de korl, li finn dir: “Mo kontan li! Zame mo ti panse ki sa ti pu arive, me mo kontan li! Bann dimunn byin rilax lor zot telefonn, ek u ena tu seki u bizin devan u. Sa li enn mwayin ki vremem donn rezilta!” Enn ser ti ena mem reaksyon ki sa frer la, li dir: “Temwaynaz par telefonn pa ti tro atir mwa. Fransman, mo pa ti anvi fer li. Me kan mem, mo finn sey li ek mo truve ki li donn rezilta. Temwaynaz par telefonn finn fer mwa gayn 37 vizit ek plis letid ki mo kapav fer!” Si u anvi sey temwaynaz par telefonn, u’si u kapav gayn bann bon rezilta.
4 Organize pu Donn Temwaynaz par Telefonn: Sirveyan servis ki diriz travay predikasyon dan kongregasyon. Si bizin, konsey bann ansyin kapav truv neseser swazir enn lot ansyin, uswa enn serviter ministeryel kalifye pu travay ansam avek sirveyan servis pu organiz temwaynaz par telefonn. Sa konsern usi frer ki okip bann teritwar, parski li mem ki pu donn bann teritwar ek li pu gard enn rapor azur. Pareyman, sirveyan rezyonal usi pu interese kone sipa program la pe marse, uswa non.
5 Si dan teritwar kongregasyon, ena sertin landrwa kot pa kapav zwenn bann dimunn par predikasyon lakaz-lakaz, alor bizin prepar bann teritwar kot pu pres par telefonn. Frer ki pu okip sa pu bizin fer enn lalis tu bann ladres ki pu tom dan sa bann teritwar la. Li bon ki bann teritwar la pa tro-tro gran, pu ki kumsa kapav travay zot regilyerman. Lor tu bann kart teritwar bizin met enn remark pu presize ki parti teritwar pu fer par telefonn.
6 Ki kote eski u kapav gayn bann nimero telefonn? Suvan, dan bann apartman, non bann abitan la afise dan lantre uswa dan kulwar batiman la. Donk, u kapav kopye bann non la, ek apre rod zot nimero telefonn dan enn lanyer telefonn.
7 Bann ansyin kapav montre zot lintere dan sa travay la, kan zot fer bann laranzman pu ki bann ki ena lexperyans dan temwaynaz par telefonn form lezot, kitfwa atraver program Bann Pyonye Ed Lezot. Regilyerman, kapav servi size bezwin kongregasyon dan Reynion Servis pu met lanfaz lor rezilta ki sa form temwaynaz la pe done.
8 Kan bann ansyin vizit bann proklamater ki malad ek ki pa kapav sorti, uswa ki andikape, zot kapav ankuraz bannla pu partisip dan temwaynaz par telefonn. Kitfwa, ansyin la kapav fer detrwa korl zis pu montre proklamater la, ek lerla li kapav sey fer enn korl par li mem. Buku ki finn kumans kumsa pas plizir minit par zur dan sa travay la, ek zot byin kontan sa.
9 Bann Sigzesyon pu Gayn Bon Rezilta: Kan Zezi ti avoy so bann disip pu al prese, li “ti avoy zot de par de.” (Lik 10:1) Kifer? Li ti kone ki kan zot pu travay ade, sakenn pu kapav aprann ar so kamarad ek ankuraz so kamarad. Li parey ar temwaynaz par telefonn usi. Si u travay ansam avek enn lot proklamater, sakenn kapav aprann ar so kamarad, zot kapav get ansam zot bann rezilta, ek donn bann sigzesyon pu prosin konversasyon. Mem pandan enn korl, sakenn kapav ed so kamarad pu donn li bann ranseynman ki li bizin.
10 Pu u kapav byin panse ek byin konsantre, asiz enn plas kot u kapav poz u bann piblikasyon—Labib, liv Comment Raisonner, brosir Ki Bondye Pe Demann Nu?, magazinn, ek lezot piblikasyon ankor—devan u. Ekrir detrwa prezantasyon, ek met zot devan u pu ki u kapav get zot. Prepar u pu pran bann not presi ek konple, pa bliye dat ek ler sa zur ki u kone u pu kapav swiv lintere sa dimunn la.
11 Suvan lor telefonn, bann dimunn inpe mefyan kan zot pa kone ar kisannla zot pe koze. Alor, u bizin salere, amikal, ek swazir byin bann parol ki u pu dir. Son u lavwa ase pu fer dimunn la gayn enn lide lor u karakter ek fer li kone si u sinser. Rilax ek dir seki ena dan u leker. Pa koz vit, ek koz enn fason kler ek ase for pu ki dimunn la tann u byin. Donn dimunn la lokazyon koze. Donn u non konplet, ek mansyone ki u res dan landrwa. Nu pa anvi donn bann dimunn linpresyon ki nu pe fer piblisite pu vann bann lartik. Olye ki u dir ki u pe telefonn tu bann dimunn dan batiman, montre plito ki u pe telefonn li personelman.
12 Bann Prezantasyon lor Telefonn: Buku bann introdiksyon ki ena dan liv Comment Raisonner, paz 9-15 kapav adapte ar temwaynaz par telefonn. U kapav dir: “Mo pe telefonn u parski mo pa kapav vinn kot u personelman. Mo pe telefonn u pu konn u lopinyon lor enn kestyon interesan.” Apre sa, poz kestyon la.
13 U kapav servi prezantasyon ki ena anba sutit “Krim/Sekirite.” U kapav dir: “Alo. Mo apel_____. Mo res dan landrwa. Mo asir u ki mo pa pe vann nanyin ek mo pa pe fer okenn sondaz. Mo pe telefone parski mo konserne pu sekirite bann dimunn. Ena buku krim otur nu, ek sa afekte nu lavi. Eski u panse ki enn zur bann dimunn pu kapav mars lor simin aswar an sekirite? [Les dimunn la reponn.] Les mo lir u enn promes ki Bondye finn fer.”
14 Buku finn gayn bann bon rezilta kan zot finn kumans bann letid Labib direkteman lor telefonn. Pandan detrwa minit, u kapav montre dimunn la kuma enn letid derule. Propoz li ki u vinn kot li pu kontiyn letid la, uswa si li pa tro dakor, propoz li pu kontiyn letid la lor telefonn enn lot zur.
15 Kan u pe al fini u konversasyon, mansyonn tuletan enn kitsoz ki kapav fer dimunn la aksepte enn vizit, uswa enn piblikasyon par lapos. Si dimunn la ezite pu donn u so ladres, propoz li ki pu u pu retelefonn li. Kitfwa, apre plizir korl ki li pu santi li vremem alez pu invit u kot li.
16 Fer premye pa: Enn ser 15 an finn kumans so servis par enn korl telefonn. Li finn koz ar enn madam ki finn aksepte liv Connaissance. Kan ser la finn al kit liv la kot li, madam la ti anvi kone kuma sa zenn ser la finn konn so nimero telefonn, pwiski pena so nimero dan lanyer. Ebyin, ser la finn konpoz so nimero par erer! Madam la finn aksepte enn letid, ek zordi li enn proklamatris pa batize.
17 Enn ser finn gayn enn lanyer telefonn, me pandan trwa semenn, li finn ezite pu servi li parski li ti pe gayn per. Ki finn donn li kuraz pu lans li? Li finn rapel enn lartik dan Réveillez-vous ! 22 Zanvye 1997 ki ti ena tem, “Lorsque je suis faible, c’est alors que je suis puissant.” (“Letan Mo Feb, Lerla Mem ki Mo For”) Lartik la koz lor enn proklamatris ki pres par telefonn malgre ki li ti ena bann andikap fizik. Alor, ser la finn dir: “Mo finn priye Zeova ek mo finn demann Li kuraz. Mo finn dir Li donn mwa bann mo ki bizin pu mo fer mo prezantasyon.” Ki rezilta li finn gayne pu so premye fwa ki li finn rann temwaynaz par telefonn? Li rakonte: “Zeova finn reponn mo lapriyer. Bann dimunn finn ekut mwa, ek mo finn gayn bann vizit.” Plitar, grasa temwaynaz par telefonn, li finn kapav mem kumans enn letid Labib. Ki so konklizyon? Li dir: “Zeova finn anseyn mwa ankor enn fwa ki, olye ki mo fer mo mem konfyans, mo bizin plito fer Li konfyans.”—Proverb 3:5.
18 Prezant laverite par telefonn finn vinn enn metod predikasyon bon nuvel ki donn bann bon rezilta. Prepar u byin, ek partisip avek tu u leker. Pa bizin u dekuraze, si kan u fer bann premye korl, bann dimunn pa interese. Demann Zeova so direksyon dan lapriyer, ek konpar u bann not avek not bann ki pe fer sa form predikasyon interesan la. Anu travay nu minister afon san perdi letan, avek lintansyon pu tus tu dimunn dan nu teritwar.—Romin 10:13, 14.